Tellado pide respecto para o Aeródromo de Rozas a aqueles que fan do paro un negocio

Santiago de Compostela, 28 de marzo de 2016.- O voceiro do PPdeG, Miguel Tellado, pediu a AGE que respectara o proxecto industrial para o Aeródromo de Rozas, sinalando que os que fan do paro un negocio político non son os máis adecuados para orientar a política industrial da Xunta de Galicia.
 
O portavoz dixo que AGE ten unha obsesión clara por ir en contra dos investimentos de empresas privadas en Galicia, e recordou o intento dese partido de bloquear a ampliación da planta PSA Peugeot-Citroën en Vigo, que posibilitaría a construción de furgonetas nesa factoría e unha enorme carga de emprego para a cidade.
 
Ademais, Tellado lembrou que AGE e os partidos dos que procede estiveron  en contra do acordo con Pemex e agora se opoñen tamén a inversión de 75 millóns de euros que situarán a Galicia como un  referente nacional e internacional na investigación no campo dos avións non tripulados. 
 
“AGE está en contra de calquera proxecto que xere emprego e riqueza para Galicia, algo propio dun partido que se alimenta da desesperanza da xente e das persoas que están ao límite por non ter traballo”, engadiu.
 
Segundo o voceiro, atendendo as súas actuacións, “semella que queren que a primeira cidade galega teña máis paro forzando a saída de PSA de Vigo; que a comarca de Ferrolterra e resto de cidades que viven do naval siga tendo sobre si a ameaza de peche dos estaleiros; e, agora, tamén é posible que non queiran unha inxección de capital para fixar poboación e emprego na provincia de Lugo”.
 
O portavoz sinalou que o feito de que cuestionen hoxe criterios de adxudicación coñecidos dende fai oito meses amosa “ou que non consultaron os pregos por pereza, que sería moi grave; ou que téndoo feito non atoparon nada irregular e intentan ensombrecer o proceso agora e sen ningún motivo, algo máis grave aínda”.
 
Para Tellado, AGE volveu actuar unha vez máis de forma totalmente irresponsable mentindo e vertendo falsidades sobre un dos investimentos industriais máis importantes da historia da provincia de Lugo e de Galicia, tentando manchar así a imaxe da comunidade e dun proceso exemplar, que acaba de ser premiado a nivel nacional polo seu rigor e transparencia.
 
O portavoz tamén destacou que a política de captación de investimentos que leva a cabo a Xunta é posible porque hai un Goberno sensato que xera estabilidade na nosa comunidade, xusto o contrario do que sería unha Administración liderada por un multipartito no que estivera AGE e o resto de partidos da oposición parlamentaria en Galicia.
 
 

O proxecto de Lei da asesoría xurídica da Xunta culmina o plan de impulso democrático


PUY SALIENTA QUE O PLENO DEBATE MAÑÁ A APROBACIÓN DEFINITIVA DA LEI DE ASESORÍA XURÍDICA DA XUNTA, QUE CULMINA O PLAN DE IMPULSO DEMOCRÁTICO ANUNCIADO POR FEIJÓO

·    Este plan incorporou a Lei de transparencia e bo goberno, a reforma do Consello de Contas, a Lei de financiamento de partidos políticos e a lei de iniciativa lexislativa popular e participación cidadá

·    O Pleno incorpora o debate de toma en consideración da modificación da Lei de policía local de Galicia

Santiago, 28 de marzo de 2016.- O portavoz do Grupo Popular, Pedro Puy, salientou hoxe que o Pleno desta semana procederá ao debate para a aprobación do proxecto de Lei da asistencia xurídica da administración xeral da comunidade autónoma e do seu sector público, que culmina o plan de impulso democrático anunciado por Feijóo no mes de xaneiro do pasado ano no que tamén se incorporan outros catro proxectos lexislativos.

Puy sinalou que a sesión plenaria que se celebra mañá e o mércores terá “un marcado carácter sanitario”, coa comparecencia do conselleiro de Sanidade a petición propia para explicar a estratexia SERGAS 2020, á que se sumarán tres mocións e tres proposicións non de lei relativas a cuestións sanitarias.

No ámbito dos proxectos lexislativos, o portavoz popular indicou que na sesión plenaria procederase ao debate de toma en consideración do proxecto de Lei que modifica a Lei de coordinación de policías locais. Neste sentido, explicou que este texto “mellora a eficiencia e eficacia organizativa destes corpos de seguridade, coa introdución de cuestións como a eliminación do tope de idade dos 36 anos para acceder á policía local galega; a mellora nos procesos de cobertura de prazas de mandos, que facilita tanto a promoción interna, como a mobilidade con ascenso desde outros corpos; e a eliminación da dispensa dun grao na titulación, recollido na Lei anterior para determinados procesos de integración e de promoción”.

FUNCIÓNS DA ASESORÍA XURÍDICA

Porén, Puy fixo especial referencia ao debate para aprobación do proxecto de Lei de asistencia xurídica da administración xeral da comunidade autónoma e do seu sector público. En concreto, este texto pretende regulamentar e establecer con carácter certo e legal as funcións da asesoría xurídica, dotándoa dun maior control da legalidade, da transparencia, da mellora da calidade lexislativa, da loita contra a corrupción e, en definitiva, dunha maior defensa dos dereitos dos cidadáns.

Esta norma “establece claramente cal é o comportamento da asesoría xurídica nos casos de que algún membro da administración estea suxeito a un procedemento xudicial”, indicou Puy. Así, apuntou a existencia dun problema cando “a asesoría xurídica asume a defensa dunha persoa investigada porque entende que a súa actuación foi conforme a dereito, pero na práctica da investigación xudicial se pode chegar á conclusión de que a Administración autonómica foi prexudicada pola actuación desa mesma persoa”.

Pedro Puy manifestou que coa aprobación deste proxecto de Lei “queda culminado” o plan de impulso democrático anunciado polo Presidente en xaneiro do pasado ano. Neste sentido, lembrou que este plan incluía a Lei de transparencia e bo goberno, que xa está vixente e se empeza a traducir nas distintas páxinas web da administración autonómica; a lei que reforma o Consello de Contas, que tamén está en marcha e xa se anunciou que o plan de traballo para 2016 incorpora as primeiras actuacións en materia de prevención da corrupción; a nova lei de financiamento de partidos, da que xa se convocaron axudas que impiden ás distintas forzas políticas percibir doazóns de empresas ou de persoas que formen parte dos seus consellos de administración; e a lei de iniciativa lexislativa popular e participación cidadá na Cámara, a través da que os cidadáns xa poden presentar a través do portal web do Parlamento iniciativas de impulso como de control do Goberno galego.

O  Grupo Popular tamén defenderá na sesión plenaria dúas proposicións non de lei: unha primeira, sobre a apertura do túnel do Parrote en A Coruña, despois de cen días desde que a obra se recepcionara; e outra solicitando que se impulsen os cambios normativos necesarios para que os traballadores do mar poidan mellorar de xeito voluntario as súas bases de cotización.

CANDIDATURA FEIJÓO

Cuestionado sobre a posible candidatura de Feijóo á Presidencia do PPdeG e á Xunta de Galicia, Pedro Puy sinalou que “Feijóo abriu un proceso de renovación no partido, que empezou polo goberno, continuou cos congresos provinciais, a renovación de ideas a través do debate de ponencia política e finaliza coa celebración do Congreso autonómico, no que se elixe o Presidente do partido que despois será o candidato a Presidente da Xunta”. “Está máis que claro que non hai un proxecto esgotado nin outro motivo que o respecto a un proceso que o propio Presidente abriu para a  renovación de ideas, de persoas e de  equipos directivos”, engadiu.

Neste sentido, reiterou que “confío e desexo que unha das persoas que presenten a súa candidatura sexa o actual Presidente galego, que está a facer unha magnífica labor á fronte da Xunta”.

[iframe width=”600″ height=”350″ src=”https://www.youtube.com/embed/6iqqUK1tvGs” frameborder=”0″ allowfullscreen ]

Feijóo destaca que a posta en marcha do novo Programa Reacciona

Santiago, 23 de marzo de 2016.- Alberto Núñez Feijóo subliñou hoxe tras o Consello da Xunta que a posta en marcha do novo Programa Reacciona, dotado con 9 millóns de euros, permitirá ás pemes galegas mellorar a súa competitividade e facilitar o seu crecemento. “Estamos a falar dun programa renovado e ampliado, que ten como obxectivo facilitar a reinvención da empresa, a mellora da súa competitividade e o crecemento da mesma”, aseverou.

Nun primeiro termo, Feijóo explicou que este ano o programa se estrutura en tres convocatorias distintas: a terceira edición do Reacciona; a primeira edición do Reacciona TIC; e unha nova edición das Bolsas Reacciona. Todo elo co obxectivo de que os 9 millóns de euros de investimento que ten o programa permitan o desenvolvemento de 1.500 proxectos, que benefician a preto de 1.000 empresas.

No tocante á terceira edición do Reacciona, o responsable autonómico precisou que está dotado con 5,5 millóns de euros e permitirá que 600 pemes se beneficien de 1.000 proxectos de mellora en ámbitos como o financeiro, de produción, comercial ou estratéxico. “Trátase de apoiar ás pequenas e medianas empresas na profesionalización dos seus equipos directivos como paso previo ao seu crecemento ou internacionalización”, engadiu.

Así mesmo, subliñou que a empresa pode escoller o seu itinerario personalizado de mellora segundo as súas necesidades, apoiándose nun ou varios servizos que van desde un diagnóstico inicial e gratuíto, ata a execución de plans operativos, así como unha análise estratéxica detallada que marca o rumbo futuro da empresa.

Sobre a primeira convocatoria do Programa Reacciona TIC, Feijóo afirmou que esta iniciativa, froito da colaboración entre o Igape e a Amtega, contará con preto de 2,5 millóns de fondos co obxectivo de traballar coas empresas TIC, que dan emprego a 15.000 persoas en Galicia.

“Prevense neste eido 500 proxectos de mellora, correspondentes a unhas 300 empresas”, precisou o presidente do Goberno galego, ao que engadiu que a Xunta ofertará un catálogo de servizos ás pemes para a diagnose, asistencia e soporte na implantación de solucións nos ámbitos de empresa dixital e Industria 4.0. Estes apoios inclúen, por exemplo, o diagnóstico sobre a implantación de solucións dixitais e de Industria 4.0; o acompañamento na posta en marcha de solucións tanto organizativas como tecnolóxicas; o soporte para a adopción e despregamento de solucións en mobilidade; ou o apoio á posta en marcha de estratexias de Marketing Dixital.

Por último, Feijóo destacou tamén a convocatoria dunha nova edición das bolsas Reacciona, para a contratación de 100 mozos recentemente titulados, que apoiarán ás empresas ao longo da duración do Reacciona, gañando experiencia profesional e abrindo unha fiestra ao mercado laboral.

O responsable autonómico lembrou que durante as anteriores edicións destas bolsas beneficiáronse delas 200 mozos, “e máis da metade dos participantes conseguiron a inserción laboral de inmediato en canto remataron a bolsa”.

[iframe width=”600″ height=”350″ src=”https://www.youtube.com/embed/lYW3pj3vzco” frameborder=”0″ allowfullscreen ]

A Atriga conseguiu que en 2015 aflorasen 150 millóns de débeda

Alberto Núñez Feijóo fixo hoxe balance das actuacións de control que levou a cabo a Axencia Tributaria de Galicia (Atriga) no ano 2015. “Logrou máis ingresos, máis comprobacións e máis facilidades para que os cidadáns poidan cumprir coas súas obrigas”, subliñou.
 
Así, a Atriga conseguiu que aflorasen 150 millóns de débeda non declarada e que crecese un 20 por cento o importe obtido polo labor de inspección, que o ano pasado ascendeu a 39,3 millóns. Esta Axencia encárgase principalmente de recadar o imposto de transmisións patrimoniais e actos xurídicos documentados (ITP-AXD) e o de sucesións e doazóns (ISD).
 
“Logramos máis ingresos porque, en termos homoxéneos, ingresamos un 14 por cento máis que en 2014 —explicou Feijóo—. Máis comprobacións porque revisamos case 265.000 autoliquidacións de impostos, un 2 por cento máis que en 2014, aínda que nese ano houbo un plan especial de control”. Isto supón que cada semana os traballadores da Atriga comproban máis de 5.000 autoliquidacións.
 
Ademais, o xefe do Executivo autonómico lembrou que a Axencia Tributaria galega concedeu máis facilidades aos cidadáns, pois o importe dos aprazamentos e fraccionamentos ascendeu a 24,5 millóns. Así, desde o pasado sábado, a cantidade pola que os contribuíntes poden pedir que se aprace ou fraccione o pagamento dun imposto sen ter que presentar unha garantía ascendeu de 18.000 a 30.000 euros. Desde 2009, a media anual de aprazamentos ascende a 23,7 millóns, máis do dobre que entre 2005 e 2008. “Durante a crise económica houbo un incremento do número de aprazamentos, pero desde o ano pasado estamos nunha etapa de meseta onde xa non están aumentando as solicitudes de pagamento fraccionado. No 2015, de feito, son menos ca no 2014”, indicou o presidente.
 
Os galegos responderon a estas facilidades e demostraron que, maioritariamente, “son bos pagadores”. O 88 por cento das autoliquidacións do ano pasado eran correctas e non tiveron que ser modificadas. Nos casos que había erros, a Atriga practicou unha liquidación.
 
Baixadas de impostos
“Os galegos cumpren axeitadamente e nós tamén intentamos cumprir cos galegos coa maior baixada de impostos nun só ano da historia da autonomía”, dixo Feijóo. Convertémonos nunha das comunidades co IRPF máis baixo para as rendas medias e baixas e eximimos do pagamento do imposto de sucesións e doazóns ao 99 por cento dos cidadáns que reciban herdanzas como pais, fillos, netos, avós e cónxuxes e permitimos que o 1 por cento restante pague menos.
 
Ademais, implantamos o programa de impostos cero no rural, que supón a eliminación do ITP para transmisións de predios, solo rústico e explotacións agrarias e a ampliación destas últimas e a supresión do imposto de actos xurídicos documentados para as agrupacións de predios rústicos. “Esperamos e desexamos que isto vaia mobilizando terras e ordenando de forma correcta con todas as facilidades tributarias o noso rural”, concluíu.
[iframe width=”600″ height=”350″ src=”https://www.youtube.com/embed/JU_GFBgRnB0″ frameborder=”0″ allowfullscreen ]

O Consello da Xunta aproba dar o primeiro paso cara á Cidade de San Caetano

Santiago, 23 de marzo de 2016.- Alberto Núñez Feijóo anunciou hoxe a convocatoria dun concurso de ideas para a nova Cidade de San Caetano, que integrará a estación de autobuses de Santiago no complexo administrativo de San Caetano. “Deste xeito garantimos o aproveitamento desta infraestrutura, propiedade da Xunta de Galicia, unha vez que se constrúa a nova intermodal onde está a actual estación ferroviaria”, indicou o presidente.
 
A estación está outorgada en concesión á empresa municipal de transportes, Tussa, pero Feijóo amosou o seu convencemento “de que chegaremos a un entendemento co Concello de Santiago para unha rescisión de mutuo acordo”. De feito, un protocolo asinado en outubro de 2009 entre o Goberno galego, o Ministerio de Fomento e o Concello de Santiago indicaba que, unha vez rematada a intermodal, a actual terminal sería devolta á Xunta para o uso administrativo.
 
“Os participantes neste concurso de ideas deberán propoñer xeitos de reformar, ampliar —se procede— e transformar a Estación de Autobuses nun edificio administrativo funcional”, dixo o presidente. A Cidade de San Caetano solucionará varios problemas: resolverá a demanda de aparcamento que se poida xerar, abrirá novos accesos para vehículos e peóns e permitiranos albergar unha gardería para os fillos dos empregados públicos que facilitará a conciliación laboral.
 
Espérase que as instalacións dean cabida a 1.300 traballadores da Xunta que hoxe ocupan outros inmobles e avanzar así cara ao obxectivo de que todos os empregados públicos dos servizos centrais estean no mesmo recinto. “Queremos dignificar así os empregados públicos, que achegaron boa parte da súa nómina durante a recesión”, reivindicou.
 
O concurso de ideas será convocado nas vindeiras semanas e os interesados terán dous meses para presentar as súas propostas. O xurado concederá tres premios: o primeiro, de 30.000 €, o segundo, de 20.000 € e un accésit de 10.000 €.
 
Enmarcado no Plan de Alugueiros
A creación da Cidade de San Caetano está enmarcada no novo Plan de Alugueiros, que aspira a reducir nun 76% o gasto en arrendar inmobles, camiñando cara a unha política de alugueiros cero e acadando un aforro de 5,65 millóns de euros ao ano. O obxectivo último é que “todas as oficinas públicas estean en espazos da titularidade da comunidade autónoma”, segundo precisou Feijóo.
 
Buscamos aproveitar ao máximo o patrimonio da Xunta, algo que conseguiremos concentrando os espazos administrativos en complexos coma o novo San Caetano e xestionando de forma unificada o patrimonio autonómico. Ademais, así conseguiremos tamén mellorar a atención ás galegas e aos galegos.
[iframe width=”600″ height=”350″ src=”https://www.youtube.com/embed/Y7IX_1d4j-E” frameborder=”0″ allowfullscreen ]

Feijóo traslada o sentir e a conmoción dos galegos ante os atentados de Bruxelas

Alberto Núñez Feijóo trasladou hoxe o sentir e a conmoción de todo o pobo galego ante os atentados ocorridos onte en Bruxelas.
 
O mandatario galego, que este mediodía presidiu o minuto de silencio convocado en memoria das vítimas, afirmou que “máis ca nunca como galegos, como españois e como europeos cremos na liberdade”, ao que expresou a necesidade de estar unidos “para combater a ameaza de quen pretende coartarnos esa liberdade e de quen quere dividirnos”.
 
Feijóo afirmou que o sentir maioritario do pobo galego é seguir vivindo e convivindo nun ámbito de liberdades e nun Estado de Dereito; “e, por suposto, —abondou— non podemos aceptar, de ningún xeito, calquera fanatismo criminal que poida acabar coa vida de cidadáns inocentes, neste caso, na cidade das institucións europeas en Bruxelas”.
[iframe width=”600″ height=”350″ src=”https://www.youtube.com/embed/gcxI_IgH_Ts” frameborder=”0″ allowfullscreen ]

Feijóo avanza que este verán se abrirá ao tráfico a Autovía da Costa da Morte

Zas (A Coruña), 22 de marzo de 2016.- O presidente do Goberno galego, Alberto Núñez Feijóo, avanzou hoxe que este verán abrirase ao tráfico a Autovía da Costa da Morte AG-14 que fará desta comarca un lugar máis vertebrado, máis competitivo e máis atractivo para investir e para vivir. “A infraestrutura que leva tantos anos sendo pouco máis que palabras tornouse, por fin, nun feito real e hoxe, co 80% das obras executadas, podemos asegurar que o vindeiro verán se abrirá ao tráfico. Imos entregar un país máis vertebrado, máis competitivo e máis preparado para investir e para vivir”, dixo.
 
Tras un percorrido polo trazado das obras da autovía, Feijóo afirmou que cando dentro de poucos meses sexa posible percorrer os máis de 25 km entre Carballo e Baio e os 2 km da variante de Baio, libres de peaxe, operarase unha transformación nas comunicacións dunha comarca que habitan case 120.000 persoas. Entre outras melloras, vaise poder evitar o paso por 7km de travesías, que se verán libradas de tráfico e serán espazos recuperados para a vida urbana e cidadá.
 
Para Feijóo hai tres razóns polas que esta obra foi capaz de facerse en plena recesión económica: foi posible grazas á vontade dos veciños, “que non renunciaron nunca nin deixaron de reivindicar a Autovía”; grazas á tenacidade dos técnicos das infraestruturas da Xunta, “que conseguiron superar unha longa lista de atrancos que este proxecto puxo no camiño”, e grazas á vontade dos alcaldes e Goberno galego.
 
Deste xeito, o responsable autonómico salientou que, entre o ano 2009 e 2016 —durante a recesión económica— a rede galega de vías de altas prestacións terase visto incrementada nun 67%, con 207 novos quilómetros.
 
Reequilibrio territorial de Galicia
Así mesmo, subliñou que neste 2016 “conseguiremos que o 80% dos cidadáns se atope a menos de 15 minutos dunha vía de alta capacidade”. “Hai meses finalizamos o eixo interior que une Monforte con Sarria, completando así o eixo de Sarria a Lugo; polo norte estamos construíndo unha vía de alta capacidade e neste momento estamos construíndo a conexión entre Celeiro e San Cibrao, estamos a piques de finalizar a Autovía da Costa da Morte e ademais polo sur estamos a executar o desdobramento e a conversión do Corredor do Morrazo en autovía”, matizou.
 
Feijóo referiuse tamén á política empresarial promovida polo Goberno galego. Sobre este punto lembrou que nos distintos programas destinados a facilitar o acceso dos emprendedores ao solo empresarial, a Costa da Morte ocupa un lugar destacado, con bonificacións especiais no prezo das parcelas de titularidade autonómica que chegan ao 50%.
 
O presidente da Xunta aseverou que os emprendedores están a responder con interese a eses estímulos, facendo posible que no ano pasado se adxudicasen 110.000 metros cadrados de superficie empresarial titularidade da Xunta nesta comarca.
 
Por último e no tocante ao Plan de Seguridade Viaria, Feijóo asegurou que esta iniciativa prevé destinar ata o ano 2020 máis de 300 millóns de euros á manter en condicións óptimas a rede viaria de titularidade autonómica. E recolle tamén a construción de 170km de sendas que contribúan a reducir o uso do vehículo particular ao proporcionar camiños seguros, sostibles e integrados na paisaxe para percorrer as distancias cotiás.
 
En relación a este aspecto, cómpre salientar que a comarca de Bergantiños é unha das sete seleccionadas para desenvolver a primeira fase dese proxecto, onde se investirán máis de 4 millóns de euros para a execución de sete sendas que farán máis doado o día a día dos seus veciños.
[iframe width=”600″ height=”350″ src=”https://www.youtube.com/embed/uoXnYYomHmo” frameborder=”0″ allowfullscreen ]

O Parlamento aproba reforzar presenza empresas pesqueiras en feiras internacionais


O PARLAMENTO GALEGO APROBA A INICIATIVA DO GRUPO POPULAR PARA REFORZAR A PRESENZA DAS EMPRESAS PESQUEIRAS EN FEIRAS INTERNACIONAIS

·    O acordo insta á Xunta a potenciar e ampliar as distintas liñas de apoio tanto desde o punto de vista técnico e económico

 

Santiago, 22 de marzo de 2016.- O Parlamento de Galicia vén de aprobar, co voto en contra dos grupos da oposición, a iniciativa do Grupo Popular dirixida a reforzar a presenza das empresas pesqueiras galegas nas feiras e mercados internacionais de maior prestixio.

O acordo insta á Xunta de Galicia a potenciar as distintas liñas de apoio que xa existen, ampliando os recursos económicos e técnicos dos que poden beneficiarse os distintos axentes profesionais do noso sector pesqueiro

O voceiro do Mar do Grupo Popular, Jose Manuel Balseiro, destacou que “unha medida destas características contribuirá a mellorar a eficiencia do sector, reforzar a súa visibilidade e presenza no exterior e aumentar a súa capacidade para ampliar mercados”.

UN SECTOR EXTERIOR EN ALZA

O portavoz popular salientou que “este é un momento especialmente acaído para este tipo de iniciativas posto que, segundo acreditan os datos, está en alza”. Neste sentido, subliñou que “as exportacións galegas de pescados e mariscos veñen de incrementarse un 9,2 por cento en 2014, superando as 210.000 toneladas e cun valor económico que supera tamén os 363 millóns de euros”.

Balseiro explicou tamén que as empresas galegas representan aproximadamente o 50 por cento do total do volume de exportacións de España de preparados, conservas e semiconservas e supón case o 60 por cento do valor económico das exportacións nestes sectores.

GPP defenderá no pleno cambios na cotización das persoas traballadoras do mar


O GRUPO POPULAR DEFENDERÁ NO PLENO FACILITAR AOS TRABALLADORES DO MAR QUE POIDAN AUMENTAR VOLUNTARIAMENTE AS SÚAS BASES DE COTIZACIÓN

·    A sesión plenaria procederá ao debate para a aprobación do proxecto de Lei de asistencia xurídica da administración xeral da comunidade autónoma e o debate de toma en consideración do proxecto de Lei de coordinación de policías locais

Santiago, 21 de marzo de 2016.- O Grupo Popular defenderá na sesión plenaria da vindeira semana dúas proposicións non de lei dirixidas a facilitar que os traballadores do mar poidan aumentar voluntariamente as súas bases de cotización e para solicitar ao Concello de A Coruña a apertura do túnel do Parrote, xa que pasaron máis de 100 días desde a recepción das obras.

A viceportavoz do Grupo Popular, Cristina Romero, explicou que “os traballadores do mar carecen na actualidade da posibilidade, do mesmo xeito que os traballadores autónomos e do sector agrario, de incrementar voluntariamente as cotizacións para que as pensións que cobren no futuro sexan maiores”.

CAMBIOS NORMATIVOS

Deste xeito, a través dunha proposición non de lei, o Grupo Popular solicita que o Goberno central impulse os cambios normativos necesarios para mellorar o sistema de cotización e protección sociolaboral das persoas traballadoras do mar, estudando co sector a posibilidade de establecer un sistema que permita aumentar voluntariamente as súas bases de cotización.

A segunda das proposicións non de lei que defenderá o Grupo Popular ten como obxectivo a apertura do túnel do Parrote en A Coruña, “unha obra que foi informada favorablemente polos técnicos do Ministerio de Fomento asegurando que o tráfico podía circular polo mesmo, pero que a día de hoxe o Concello de A Coruña aínda non puxo data para a súa apertura”.

“Van máis de cen días desde a data da recepción das obras e o túnel do Parrote segue pechado á circulación, provocando prexuízos e molestias de tráfico a máis de 40.000 veciños e propietarios de comercios e locais de hostalería”, apuntou.

DOUS PROXECTOS DE LEI

Previamente a estas proposicións non de lei, a sesión plenaria dará comezo co debate para a súa aprobación do proxecto de Lei de asistencia xurídica da administración xeral da comunidade autónoma e do seu sector público. “Esperamos que a aceptación que esta norma tivo en Comisión, onde saíu adiante sen ningún voto en contra, se manteña en Pleno para reforzar  os servizos xurídicos da Xunta na busca dun maior control da legalidade, da transparencia, da loita contra a corrupción e, en definitiva, dunha maior defensa dos dereitos dos cidadáns”, manifestou a viceportavoz popular.

Cristina Romero apuntou que “o obxectivo da Xunta e do Grupo Popular é que esta lei saia adiante co maior consenso posible para garantir a súa permanencia, ao tempo que sexa capaz de dar resposta ás necesidades de asesoramento, control e defensa que precise a administración autonómica, os seus entes e os seus empregados públicos”.

A continuación, procederase ao debate de toma en consideración do proxecto de Lei de coordinación de policías locais de Galicia, que actualiza e adapta a normativa existente ás novas normativas vixentes, establecendo unha serie de cambios e axustes que permitan acadar un maior índice de eficacia na organización e estrutura dos cadros de persoal das policías locais.

Entre as medidas que incorpora este proxecto de Lei, Romero subliñou a eliminación do tope de idade dos 36 anos para acceder ao corpo de policía local galego, así como unha mellora nos procesos de cobertura de prazas de mandos, que facilita tanto a promoción interna, como a mobilidade con ascenso desde outros corpos.

Por último, o Grupo Popular cuestionará ao Goberno sobre as consecuencias da sentenza do Tribunal Supremo que anula a prórroga das concesións de transporte público interurbano en Galicia, así como pola viabilidade dun cambio de modelo de xestión dos consorcios provinciais de bombeiros.


DEMAGOXIA COA BANDEIRA EUROPEA

Cuestionada sobre a decisión dalgúns concellos de arriar a bandeira europea en repulsa polo política europea sobre refuxiados, Cristina Romero manifestou que “estamos en contra” desta decisión e lembrou que existe un acordo unánime no Congreso dos Deputados que defende que calquera actuación debe respectar os dereitos dos solicitantes de asilo, a legalidade internacional e a europea. “A isto sumouse o acordo razoable e sensato asinado a nivel europeo o pasado venres que garante o respecto rigoroso á legalidade europea e internacional e a exclusión expresa de calquera tipo de expulsión colectiva”, indicou.

Así mesmo, a viceportavoz criticou “a demagoxia coa que actúan determinados grupos nacionalistas respecto desta situación, xa que por un lado están a arriar a bandeira de Europa, pero por outra poñen as dúas mans para recibir investimentos de Europa para as cidades onde gobernan”.