A Xunta activa o programa Principia para a contratación de 300 investigadores

Santiago, 26 de maio de 2016.- Alfonso Rueda anunciou a activación do programa Principia, que vai apoiar que as empresas e centros de coñecemento galegos (como universidades, fundacións e centros tecnolóxicos) contraten ata 300 investigadores menores de 35 anos.
 
“Esta medida vai orientada a aqueles mozos e mozas cun ano ou menos de experiencia laboral na súa categoría profesional”, explicou Rueda. Cada entidade poderá solicitar axudas para financiar ata 10 contratos, cunha duración mínima dun ano e un importe bruto anual de, polo menos, 24.000 euros. A Xunta dedica ao programa Principia tres millóns de euros, cos que apoiará cada contrato con 10.000 euros.
 
Deste xeito, o Goberno autonómico cumpre unha das medidas para canalizar os fondos extra dos que dispoñemos por cumprir o déficit, tal e como se comprometeu o presidente hai dúas semanas: ampliar de 200 a 300 o número de investigadores a contratar.
 
As actividades que desenvolverán estes 300 mozos e mozas deberán desenvolverse en Galicia e en tarefas relacionadas cos retos e prioridades da Estratexia de especialización intelixente de Galicia-RIS3. A convocatoria do programa Principia publicarase nos vindeiros días e o prazo para a presentación de solicitudes será dun mes a partir da súa publicación no Diario Oficial de Galicia. Unha vez resoltas as axudas, as entidades procederán á contratación do persoal, coa data límite para asinar os contratos do 1 de decembro de 2016.
 
Captación e retención do talento
“A Xunta continúa así a súa aposta pola captación e retención do mellor talento”, concluíu. Esta é unha das claves para aumentar a capacidade innovadora do noso tecido produtivo, polo cal parte dos fondos extra dos que dispón o Goberno galego por cumprir o déficit se destinará a ampliar de 200 a 300 o número de investigadores que axudará a permanecer en Galicia.
 
Isto complementa outras iniciativas a prol da I+D+i, como os contratos programa para os centros tecnolóxicos e fundacións sanitarias, as 19 unidades mixtas de investigación e o programa Oportunius, que está a traer de volta a Galicia investigadores de alto nivel.
[iframe width=”600″ height=”350″ src=”https://www.youtube.com/embed/R3BvK4WwQl0″ frameborder=”0″ allowfullscreen ]

Rueda anuncia que a Xunta dá luz verde ao Plan de Incendios Forestais para 2016

Santiago, 26 de maio de 2016.- Alfonso Rueda avanzou hoxe que o Consello deu o visto e prace ao Plan de Incendios Forestais para 2016 (Pladiga), co fin de actuar en todas as frontes necesarias para, en primeiro lugar, evitar ao máximo posible os lumes e, en segundo lugar, reducir os danos que se produzan.
 
Rueda detallou os tres aspectos máis relevantes do texto. Así, sinalou que se mantén o dispositivo de vixilancia e extinción do pasado ano. Para esta campaña, o dispositivo estará composto por 5.700 persoas, ao que hai que sumar persoal do Ministerio, do Exército e dos Corpos e Forzas de Seguridade do Estado ata completar un operativo de máis de 7.000 efectivos.
 
No relativo aos medios materiais, o vicepresidente da Xunta precisou que se contará cunha trintena de medios aéreos, entre os propios da Xunta e os que achega o Estado; e 360 motobombas da Xunta, dos concellos e dos parques de bombeiros, aos que se engaden cisternas, pas e outros vehículos.
 
Así mesmo, Rueda avanzou que se incorporan algunhas adaptacións necesarias respecto a normativas aprobadas neste eido. A máis importante ten que ver coa ampliación a 3 anos da duración dos convenios entre Medio Rural e as entidades locais para a súa participación na prevención e defensa contra os lumes; e, ademais, establécese a creación e regulación da figura das agrupacións de defensa contra incendios forestais.
 
Trátase de promover as organizacións de voluntarios e as asociacións relacionadas co medio rural e o medio forestal e a súa implicación na defensa contra os incendios.
 
Un novo sistema dixital de comunicacións
Do mesmo xeito, está prevista a posta en marcha dun novo sistema dixital de comunicacións, integrado na rede galega de emerxencias, e a posta en funcionamento do novo programa informático de xestión integral de incendios en tempo real.
 
No tocante á sensibilización, Rueda sinalou que a Xunta afonda de forma moi intensa nun dos apartados que máis se precisa en materia forestal. Así, inclúese o compromiso de manter e reforzar os programas de concienciación actualmente en marcha, especialmente entre as xeracións máis novas.
 
Neste senso, destacou que a Administración ten un papel fundamental na loita contra os lumes pero matizou que é imprescindible a colaboración cidadá. Sobre todo, tendo en conta que o 98% dos montes están en mans de propietarios particulares.
 
En definitiva, configúrase o dispositivo contra incendios plenamente consciente do risco, razón pola que a Xunta actúa en todas as frontes necesarias: prevención, detección, disuasión e investigación e extinción, co fin de conseguir diminuír o número de lumes, o seu tamaño e a superficie afectada.
 
[iframe width=”600″ height=”350″ src=”https://www.youtube.com/embed/8AlOR66TNas” frameborder=”0″ allowfullscreen ]

O Plan Galego de Estatística 2017-2021 consolidará o sistema estatístico de Galicia

Santiago, 26 de maio de 2016.- O novo Plan Galego de Estatística 2017-2021 busca consolidar o sistema estatístico de Galicia, ao tempo que permitirá avanzar na transparencia, na accesibilidade dos datos que subministra e na calidade da información que proporciona.
 
Así o avanzou hoxe Alfonso Rueda, quen ficou na importancia de dispor dunha información estatística de calidade, imprescindible para tomar decisións dun xeito obxectivo e con todos os datos.
 
Como especificou, para cada un destes obxectivos, o Instituto Galego de Estatística coordinará os seus esforzos para aumentar a claridade e visibilidade da estatística oficial.
 
Así mesmo, engadiu que se reforzará a colaboración cos sistemas estatísticos da Administración xeral do Estado e da Unión Europea en aras da coordinación. Ademais, así garántese o uso eficiente dos recursos públicos e a comparabilidade da información elaborada por distintos organismos estatísticos.
 
Por outra banda, Rueda avanzou que o novo plan estatístico contempla a obriga de considerar a perspectiva de xénero en toda a información estatística que se facilite. Do mesmo xeito, o compromiso co principio de calidade na información estatística se manifesta neste novo plan na fixación de obxectivos concretos sobre a relevancia, sobre a precisión que teñen que ter os datos que se faciliten, a fiabilidade, a accesibilidade. Como detallou, todos estes obxectivos serán obxecto dun seguimento específico e as persoas usuarias poderán coñecer os resultados acadados.
 
Así mesmo, asúmese o código de conduta adoptado polo comité do Sistema Estatístico Europeo estatístico europeo, co que se busca garantir a independencia do persoal estatístico, tanto na recollida de datos como despois nas análises e conclusións; a imparcialidade; e, en definitiva, a obxectividade e a transparencia que debe ter todo traballo estatístico para que realmente sexa útil e veraz.
 
En relación ás metas do Plan, xunto coas 101 xenéricas, establécense 117 estatísticas concretas que se conseguiron consolidar nos plans precedentes e que se deberán executar. A maioría destas estatísticas, como destacou Rueda, son novas con respecto ao plan anterior e abordan temas como a poboación dependente, as empresas TIC, a estatística de emerxencias 112 ou a ocupación na pesca.
 
Segundo Rueda, trátase do quinto plan plurianual que aproba a Xunta co que, en definitiva, se están cumprindo os obxectivos marcados na Lei de Estatística “para perfilar un sistema estatístico público que nos permita dispoñer de información de calidade” porque neste momento “onde a xestión responsable, a xestión con sentidiño dos recursos públicos demanda, desde logo, utilizar criterios obxectivos” faise necesario utilizar “boa información para acertar nas decisións”.
[iframe width=”600″ height=”350″ src=”https://www.youtube.com/embed/v4K6q4Xcdkk” frameborder=”0″ allowfullscreen ]

A Xunta inviste 27M€ para financiar pemes e emprendedores e crear 700 postos no rural

Santiago, 26 de maio de 2016.- Por terceira semana consecutiva, o Consello da Xunta volveu deliberar sobre o uso que darlle aos fondos extra dos que dispón Galicia grazas ao cumprimento do déficit. Despois de aprobar un primeiro paquete de prioridades destinado á infancia e á mocidade e un segundo orientado a mellorar as condicións de vida das familias galegas en diferentes ámbitos, hoxe anunciouse un novo paquete de medidas orientado a reforzar o noso tecido produtivo e a xerar emprego. Trátase, segundo anunciou Alfonso Rueda, de 27 millóns de euros orientados a facilitar financiamento a pemes e emprendedores e a crear 700 empregos na contorna rural.
As liñas de financiamento artellaranse a través de préstamos e avais do Igape. Suman 20 millóns, que permitirán mobilizar 100 millóns neste 2016. O primeiro destes instrumentos financeiros apoiará ata o 70% do investimento a realizar. O segundo amplía os fondos destinados a facilitar o acceso ao capital a través da achega de garantías, tanto a través das sociedades de garantía recíproca como de avais do Igape. “O obxectivo, en definitiva, está claro: que ningún proxecto que sexa viable das nosas pequenas e medianas empresas deixe de facerse realidade porque falta o financiamento”, dixo Rueda.
Por outra banda, as axudas para a contratación no rural suman sete millóns de euros, que financiarán ata o 100% do custo salarial de 700 novos contratos. Estas axudas chegan “ás zonas onde máis se necesitan, as áreas do medio rural donde hai menos oportunidades” e “ás persoas con máis dificultades para acceder ao mercado laboral, que son: as mulleres e os mozos e mozas”, recalcou. Están destinadas aos concellos de menos de 10.000 habitantes e teñen prioridade os de menor poboación.
“Este sentidiño na xestión dos cartos públicos e na planificación responsable, este superávit de responsabilidade, dá os seus froitos —resumiu—. Tentamos construír unha Galicia estable, unha Galicia próspera agora e no futuro, para os nosos fillos e os nosos netos, sen descoidar as necesidades das galegas e galegos de hoxe”.
[iframe width=”600″ height=”350″ src=”https://www.youtube.com/embed/JLUOHCcQyvg” frameborder=”0″ allowfullscreen ]

Puy afirma que Galicia “está blindada contra novos recortes porque hai marxe”

Sobre o aniversario dos novos gobernos locais, o portavoz popular dixo que “onde hai estabilidade e un goberno que ten apoios e capacidade de tomar iniciativas as cousas van mellor

PEDRO PUY AFIRMA QUE GALICIA “ESTÁ BLINDADA ESTE ANO CONTRA A EXISTENCIA DE NOVOS RECORTES PORQUE HAI MARXE” AO TER CUMPRIDO O DÉFICIT NOS ÚLTIMOS ANOS

·    Respecto do Pleno desta semana, explicou que “levamos iniciativas de desenvolvemento económico e propostas e debates sobre actuacións futuras no ámbito da protección social de quen máis o precisa como consecuencia da crise”

·    “Chama a atención que o PSOE só entenda a posibilidade de pactar nunha única dirección e cun único obxectivo, atándose de mans e pes e entregándose a unha única alternativa que lle esixe un prezo que non pode pagar”, dixo

Santiago, 23 de maio de 2016.- O portavoz do Grupo Popular, Pedro Puy, afirmou hoxe que “a Comunidade galega está blindada este ano contra a existencia de novos recortes porque hai marxe” logo de ter cumprido o obxectivo de déficit nos últimos anos. Respecto do primeiro aniversario dos novos gobernos municipais, Puy manifestou que “as improvisacións e as minorías que se creen con capacidade de gobernar como se tivesen maioría están a dar peores resultados que os gobernos que se basean nunha maioría estable e cun programa de goberno que poden aprobar e levar á práctica”.

Na comparecencia ante os medios de comunicación logo da reunión do Grupo Parlamentario para preparar o Pleno desta semana, Pedro Puy salientou que “levamos iniciativas de desenvolvemento económico e propostas e debates sobre actuacións futuras no ámbito da protección social de quen máis o precisa como consecuencia da crise”.

Dentro do ámbito económico, o portavoz popular destacou a comparecencia da conselleira do Mar e a proposición non de lei do Grupo Popular sobre o futuro do sector pesqueiro, así como a proposición non de lei sobre a autovía do Morrazo para que no presente ano estean en execución os dous primeiros tramos, así como a licitación do terceiro.

No ámbito social, Puy destacou a comparecencia do conselleiro de Política Social. “A maior marxe de endebedamento da Xunta como consecuencia de ter cumprido o criterio do déficit público en anos anteriores permite agora, por enriba dos recursos que o sistema aporta a Galicia e que implican un incremento do gasto, realizar investimentos e actuacións nos campos das políticas sociais, educativas ou sanitarias”, apuntou.


TRANQUILOS ANTE OS RECORTES

Cuestionado sobre a posibilidade de que sexan necesarios novos recortes, Pedro Puy sinalou que en Galicia “estamos tranquilos porque temos cumprido o déficit estes últimos anos e parece que non se vai chegar ao nivel do 0,7 por cento autorizado este ano para o conxunto das comunidades autónomas”.

O portavoz popular tomou como referencia o último informe da Autoridade Fiscal Independente (AiREF) para afirmar que “o previsible é que en Galicia non haxa recortes, senón que, como se está a comprobar coas últimas medidas aprobadas polo Goberno galego, temos maior capacidade para facer investimento e para contribuír á recuperación social de quen máis o precisa tras a crise”.

A nivel nacional, Puy lembrou que o Goberno de Rajoy “fixo un esforzo por combinar equilibradamente a necesidade de reducir un déficit público, xerado con gastos moitas veces dificilmente xustificables desde o punto de vista da recuperación económica, cunha recuperación da economía, acadando unha taxa de crecemento superior ao 3 por cento que permite xerar emprego e recuperar ingresos”.

“A posición do Goberno central alónxase dos maximalismos do cumprimento estrito do déficit, que tería malas consecuencias para  a recuperación económica do país, pero evidencia un compromiso para reducir ese déficit, que xa pasou do 11 a pouco máis do 4 por cento”, sinalou.


ONDE HAI ESTABILIDADE AS COUSAS VAN MELLOR

A preguntas dos xornalistas sobre o primeiro aniversario dos novos gobernos municipais, Pedro Puy indicou que “a sensación é que onde hai estabilidade e un goberno que ten apoios e capacidade de tomar iniciativas as cousas van mellor, tanto en termos de aprobación dos orzamentos como nas políticas do día a día”.

O portavoz popular anotou que o PSOE “debe tomar en consideración o que está a ocorrer alí onde se entrega, antes incluso de coñecer os resultados electorais, a unhas coalicións de goberno que moitos dos seus membros non consideran as máis eficaces para gobernar”.

“Chama a atención que o PSOE só entenda a posibilidade de pactar nunha única dirección e cun único obxectivo, cando esta situación xa lle resta posibilidades de negociación, atándose de mans e pes e entregándose a unha única alternativa que lle esixe un prezo que non pode pagar”, dixo.

 

[iframe width=”600″ height=”350″ src=”https://www.youtube.com/embed/f7PCtiffmGs” frameborder=”0″ allowfullscreen ]

Tellado di que é unha burla que os socialistas falen de “pactos de perdedores”

Santiago de Compostela, 21 de maio de 2016.- O secretario xeral do PPdeG, Miguel Tellado, asegurou que as primarias do PSdeG, téñense convertido nun reality televisivo protagonizado por dous candidatos: un que pelexa para continuar, José Luis Méndez Romeu, e outro que o fai para volver, Xoaquín Fernández Leiceaga, dos que afirmou que están máis centrados en intereses personalistas que nos de Galicia.

Así se expresou o dirixente tralo primeiro comité de dirección do partido despois do XVI Congreso autonómico e que foi presidido por Alberto Núñez Feijóo. Tellado tamén se pronunciou sobre as declaracións realizadas por Méndez Romeu nas que falaba de “pactos de perdedores” referíndose aos seus opoñentes nas primarias socialistas Fernández Leiceaga e Gonzalo Caballero: “que sexan os socialistas os que utilicen esta expresión é unha burla á xente que lee os periódicos”. 

“Os pactos de perderes é o que o PSOE leva promovendo en Galicia e no conxunto de España para evitar que gobernen os que gañan. Sorprende que Méndez Romeu reivindique para o seu partido o que non dan ás institucións”, engadiu. 

Do mesmo xeito, tamén aseverou que lle resultaba sorprendente que Abel Caballero, “que é o que parece que manda agora no PSdeG”, busque un coruñés desde o seu localismo exacerbado para que protagonice o peor resultado do PSdeG nunhas autonómicas, récord que ata agora ten o propio Caballero.

Na súas declaracións, Tellado fixo referencia tamén a Xosé Manuel Beiras, do que dixo está definitivamente entregado a Podemos e a EU, “pasando de ser o merlo branco do nacionalismo galego a ser a ovella negra”. Ademais, indicou que despois de perder seis eleccións autonómicas, quere ser o candidato da súa coalición, buscando unha sétima derrota.

MAQUINARIA ELECTORAL EN MARCHA
Durante a súa intervención, Miguel Tellado asegurou que o PPdeG está traballando nunha campaña en positivo, xa que a cidadanía está farta de partidos pelexando entre eles e queren propostas de futuro. Nesta liña apuntou que eles darán resposta ás demandas da sociedade, cuxa principal preocupación é a xeración de emprego, poñendo en valor o traballo desenvolvido polo goberno de Mariano Rajoy.
 
Así mesmo, contrapuxo a responsabilidade do PP nestes últimos catro meses cos partidos da oposición, referíndose ao PSOE, que quería tocar poder a calquera costa para facer a Pedro Sánchez presidente; ás ansias de poder de Pablo Iglesias, ao que definiu como “o herdeiro do 15-M máis interesado en controlar o CNI e en ser vicepresidente do Goberno”; e a Ciudadanos, que traicionou aos seus votantes entregando o apoio recibido do centro dereita á esquerda radical.
 
“Mentres algúns reivindican grupo parlamentario propio e cinco deputados, nós queremos ter un presidente do Goberno que sexa galego”, dixo ao tempo que explicaba que haberá unha implicación total do partido a todos os niveis nestes comicios xerais e que agardan poder traer a Galicia a líderes nacionais. Nese sentido aproveitou para anunciar que o vicesecretario de Comunicación, Pablo Casado, estará na nosa comunidade o vindeiro 28 de maio.
 
 
[iframe width=”600″ height=”350″ src=”https://www.youtube.com/embed/cNDlj8_z4PY” frameborder=”0″ allowfullscreen ]

O PPdeG apostará por unha campaña participativa con “menos moqueta e máis beirarrúas”

Santiago de Compostela, 20 de maio de 2016.- O secretario do PPdeG e director de campaña para as vindeiras eleccións xerais, Miguel Tellado, asegurou que os populares farán unha campaña que aposte por maiores fórmulas de participación, facendo menos mítines, con máis presenza na rúa, máis conversa cos veciños, e con “menos moqueta e máis beirarrúas”. 

Tras presidir o primeiro Comité de Campaña do PPdeG para os próximos comicios nacionais, o dirixente admitiu que xa teñen en marcha toda a maquinaria electoral do partido nas catro provincias para permitirlles sacar os resultados que merece o PPdeG, que é a primeira forza política na nosa comunidade.

Nesta liña, indicou que traballan no deseño dunha campaña que vai vir marcada polo clima xa que non é mesmo facer unhas eleccións en decembro que en xuño, podendo aproveitar as posibilidades climatolóxicas para sacar a campaña á rúa. 

Tellado tamén apuntou que os populares explicarán nestes comicios cal é o seu proxecto de futuro para o país e cales son os riscos que corre España se cae en mans dun partido como Podemos ou dunha coalición -necesaria para evitar que goberne o PP- que estaría formada polo partido de Pablo Iglesias, o PSOE e partidos separatistas e da esquerda máis radical.

O dirixente afirmou que farán unha campaña “moi en positivo”, ao tempo que explicaba que non ten sentido entrar na estratexia de crispación que leva a cabo a oposición e que apelarán á razón e a criterios obxectivos que  demostran que o mellor para o noso país é que continúe habendo en España un Goberno do PP.

No plano político, tamén asegurou que estes serán uns comicios  diferentes, xa que en decembro o enfrontamento era entre o PP e o PSOE pero, tralo ocorrido nos últimos meses, agora  a polarización será entre o PP e Podemos. Nesa liña, tamén engadiu que Podemos estalle pasando pola esquerda ao PSOE e que eles serán o eixo central da esquerda en lugar dos socialistas.

Por último, subliñou que asumen o reto co obxectivo irrenunciable de seguir sendo o primeiro partido de Galicia e o referente da maioría dos galegos xa que “só o PP garante a estabilidade política e institucional que é o que precisamos para seguir crecendo no plano económico e para seguir creando emprego, que é o que máis preocupa á cidadanía”.

 

 

[iframe width=”600″ height=”350″ src=”https://www.youtube.com/embed/nRY_eRGDzPg” frameborder=”0″ allowfullscreen ]

A Xunta convoca cursos adaptados ao tecido empresarial para 10.000 desempregados

Santiago, 19 de maio de 2016.- O presidente do PPdeG, Alberto Núñez Feijóo, anunciou hoxe a convocatoria de preto de 700 accións formativas, adaptadas ás necesidades do tecido empresarial, que teñen como obxectivo formar a máis de 10.000 persoas sen emprego. Estes cursos teñen tres modalidades segundo o lugar onde se desenvolvan: en centros e entidades de formación, nos centros públicos de formación profesional e no Centro de Novas Tecnoloxías de Galicia, situado no barrio compostelán de Conxo.
 
Nos dous primeiros tipos de centros vanse realizar cursos de 450 horas de media para formar 9.000 persoas, que obterán un certificado de profesionalidade homologado. Priorízanse materias como soldadura, caldereiría, estruturas metálicas e deseño da industria naval, debido ao aumento da carga de traballo nos estaleiros galegos. “Está constatado que hai distintas áreas, sobre todo na Ferrol, onde temos dificultades para contratar soldadores en aceiro que estean á disposición da industria eólica mariña”, explicou o presidente. Tamén se farán cursos orientados á internacionalización, o emprendemento ou o desenvolvemento tecnolóxico.
 
A formación TIC, que chegará a 1.000 persoas ao longo de 3.270 horas, ten como obxectivo que os alumnos obteñan certificacións oficiais de fabricante, que acreditan que son quen de empregar unha determinada tecnoloxía.
 
Isto complementa aos programas de formación profesional co foco posto na Industria 4.0 que foron anunciados polo presidente hai dúas semanas e que teñen como obxectivo mellorar a empregabilidade de máis de 1.000 persoas en paro.
[iframe width=”600″ height=”350″ src=”https://www.youtube.com/embed/TKfNWWOAdlw” frameborder=”0″ allowfullscreen ]

Feijóo avanza o visto e prace ao acordo de colaboración para a intermodal de Ourense

Santiago, 19 de maio de 2016.- O presidente do PPdeG, Alberto Núñez Feijóo, destacou que o Consello deu o visto e prace a un convenio marco de colaboración entre o Ministerio de Fomento, a Xunta, o Concello de Ourense e a entidade pública empresarial Adif-Alta Velocidade para executar e desenvolver a nova estación de autobuses da cidade das Burgas. Trátase de configurar un nó de intercambio modal coa estación ferroviaria e outros medios de transporte de viaxeiros.
 
O dirixente popular galego sinalou que os obxectivos fundamentais son principalmente tres: promover o uso do transporte público; mellorar a permeabilidade da cidade no entorno; e dotar á estación ferroviaria das instalacións necesarias para a chegada da alta velocidade no ano 2018.
 
Logo de indicar que, a través deste acordo, cada institución terá diversos compromisos, Feijóo especificou que a Xunta encargarase de redactar os proxectos, executar e financiar as obras da estación de autobuses integrada na estación intermodal, así como de redactar o proxecto, executar as obras e tamén financiar unha porcentaxe do novo aparcadoiro de turismos.
 
Do mesmo xeito, terá que obter os solos necesarios para a nova estación de autobuses e indemnizar aos arrendatarios dos contratos que teña en vigor ADIF-Alta Velocidade no ámbito da estación de autobuses.
 
Ademais, a Xunta deberá tramitar, conxuntamente co Concello de Ourense, as modificacións precisas no planeamento urbanístico.
 
Os compromisos do Ministerio de Fomento, de Adif e do Concello de Ourense 
Pola súa banda, o Ministerio de Fomento terá que facer e tramitar o Estudo Informativo da Estación Intermodal de Ourense.
 
En canto a Adif-Alta Velocidade, terá que redactar os proxectos, executar e financiar as obras de adaptación da estación ferroviaria aos servizos de alta velocidade e as actuacións de mellora da permeabilidade peonil da cidade na zona.
 
Do mesmo xeito, deberá transmitir á Xunta os terreos e edificacións da súa titularidade necesarios para a execución da nova estación de autobuses e poñer a disposición do Goberno galego os terreos necesarios para a execución do aparcamento subterráneo. Tamén deberá financiar nun 33% a execución das obras deste aparcadoiro.
 
No que atinxe ao Concello de Ourense, Feijóo explicou que deberá promover e tramitar as modificacións necesarias no planeamento urbanístico, así como ceder á Fomento, Adif e á Xunta, de balde e libre de cargas e gravames, os terreos e aproveitamentos da súa titularidade necesarios para a execución da estación de autobuses.
 
Ademais, o Concello deberá realizar as actuacións relativas aos semáforos que sexan necesarias e facer a reorganización do transporte urbano que garanta a conectividade da estación intermodal coa cidade.
 
Segundo precisou Feijóo, trátase de “obras complexas que se insertan na cidade”, que “precisan urbanizacións e accesos para facilitar a entrada e saída dos autobuses” pero que, unha vez rematadas, permitirán a “permeabilidade dos barrios”.
 
Como avanzou, a Xunta ten a vontade de presentar a estación intermodal de Ourense no mes de xullo. “Esta é a nosa proposta e esperamos e desexamos que o resto das administracións públicas cumpran o seu calendario”, sinalou, co fin de que a estación intermodal estea lista no ano 2018.
 
[iframe width=”600″ height=”350″ src=”https://www.youtube.com/embed/-8jpE0w7wmc” frameborder=”0″ allowfullscreen ]

Feijóo anuncia que a Xunta dedicará 60M€ á mellora da Sanidade e da calidade de vida

Santiago, 19 de maio de 2016.- Logo de que a semana pasada se concretase dentro do superávit de responsabilidade, o primeiro paquete de prioridades dirixido aos nenos e aos mozos, Feijóo avanzou hoxe, na rolda de prensa do Consello, un novo paquete de medidas co obxectivo de mellorar as condicións de vida das familias galegas en distintos eidos. “Destinamos deste xeito entre 58 e 60 millóns de euros do total dos recursos dispoñibles a catro grandes bloques de actuación: no ámbito da saúde, en materia de servizos sociais, en materia de vivenda e en materia de lecer”, precisou, asegurando que boa parte destes recursos destinaranse a continuar mellorando as prestacións da Sanidade Pública e as súas instalacións.
Con este obxectivo, explicou que se destinarán máis de 24 millóns de euros a tres medidas fundamentais. A primeira delas, a de incrementar a actividade asistencial, co obxectivo de rebaixar as listas de espera en consultas externas, en probas diagnósticas e cirúrxicas.
En segundo lugar, axilizarase a entrada en funcionamento de 24 novos centros de saúde. E, neste ano entrarán en funcionamento 12 novos ambulatorios públicos: Buño (Malpica), Villarrodís (Arteixo), Corveira (Culleredo), Temple (Cambre), As Neves (A Capela), Galeras (Santiago), Outeiro (Pontedeva), O Couto (Ourense), Valenzá (Barbadás), Tui, Marín e Panxón (Nigrán).
Procederase tamén á licitación das obras dos centros de Ares e Gondomar, así como á licitación doutros 10: Melide, Salceda de Caselas, Pereiro de Aguiar, A Estrada, Milladoiro, Narón, O Saviñao, PAC de Laracha, Paderne de Allariz e ampliación do ambulatorio Anafáns, en Poio.
“E imos equipar na súa totalidade todo o bloque cirúrxico do Hospital da Coruña -15 quirófanos novos neste 2016-; equiparemos completamente todas as habitacións do Complexo Hospitalario Universitario de Ourense, que abriremos antes de finalizar este ano, e unha nova cociña; finalizaremos e equiparemos na súa totalidade a ampliación do Hospital Público do Salnés; e iniciaremos coa máxima capacidade construtiva posible a execución das obras do Hospital da Mariña”, dixo, ao que engadiu que tamén se farán melloras no resto do parque hospitalario de Galicia, referíndose ao Hospital do Meixoeiro, ao Hospital da Coruña, á zona de esterilización do Hospital do Salnés, á ampliación das urxencias do Hospital Materno da Coruña; ao hospital de día médico polivalente no CHUAC; á dotación do equipamento de dous novos quirófanos no Álvaro Cunqueiro; ao Plan director do Hospital de Ferrol; á ampliación do Hospital de Conxo, así como ás novas instalacións para as salas de resonancia nuclear magnética nos hospitais de Ourense, de Pontevedra e de Ferrol e á licitación do Plan funcional e do Proxecto sectorial de Montecelo.
Así mesmo, destacou que tamén se farán melloras para a ampliación das súas capacidades no Hospital do Salnés, no Hospital Clínico de Santiago, no Hospital de Verín, no Hospital do Barco, así como a actualización do equipamento de hemodinámica en Lugo.
No eido dos servizos sociais e a atención ás persoas con máis dificultades, Feijóo avanzou a construción de dous novos centros, un en Ourense e outro Monforte, é dicir, 413 novas prazas públicas e 623 traballadores. “E, para a terceira idade asumimos o compromiso de actuar en 74 centros: en 30 centros sociais e en 44 residencias e centros de día”, aseverou.
En materia de vivenda, destinaranse 4 millóns de euros ao Plan de aforro e eficiencia enerxética nas vivendas galegas, que conta así cun orzamento total de preto de 12 millóns de euros. Isto permitirá atender os proxectos de substitución ou mellora de fiestras, cubertas, fachadas e ascensores, chegando a 1.200 familias. E, investiranse 3 millóns a unha nova edición do programa do Igape para melloras en cociñas e baños.
Sobre este segundo punto, Feijóo subliñou que o Reforma16 incluirá axudas que suporán rebaixas de arredor do 40% nos custos de materiais e mobiliario, xerando 32 millóns de euros en obras de remodelación, para atender a 5.000 solicitudes.
Así mesmo, destinaranse 8 millóns de euros para a compra do solo necesario para urbanizar a última fase de San Paio de Navia, en Vigo. E, sobre este aspecto, Feijóo explicou que, con esta iniciativa construiranse 1.600 vivendas protexidas “e, ademais, damos resposta a unha demanda histórica dos propietarios destas parcelas”.
Por último, e na liña do que se vén facendo a través do Plan Hurbe e do Plan de Infraestruturas comunitarias que xestiona Vicepresidencia e a Consellería de Medio Ambiente, destinaranse arredor de 10 millóns de euros a mellorar a habitabilidade de distintas vilas galegas, “cunha partida específica de 1,2 millóns de euros para o equipamento do Auditorio de Lugo”. E 2 millóns de euros para a reparación e mantemento de distintas instalacións deportivas, entre elas, o Centro de Tecnificación Deportiva de Pontevedra. 
[iframe width=”600″ height=”350″ src=”https://www.youtube.com/embed/eOtK1FQUz3o” frameborder=”0″ allowfullscreen ]