Categoría: PP de Galicia

A portavoz de Educación do Grupo Popular, Cecilia Vázquez, afirmou hoxe no Parlamento de Galicia que a Xunta e o Concello están a avanzar para dotar ao IES Ferrol Vello dun novo pavillón, para o que será preciso a adquisición dunha parcela para a súa localización.

Cecilia Vázquez lembrou que a Consellería de Educación “é plenamente consciente da situación na que se atopa o IES de Ferrol e por iso asinou no seu momento un convenio co Concello para levar adiante a construción dun novo pavillón”.

Respecto da dotación de profesorado neste instituto, a portavoz popular explicou que na actualidade dispón dun cadro de persoal de 20 persoas (18 profesores máis outros dous especialistas en pedagoxía terapéutica, “polo que cumpre coa dotación de profesorado necesario e mesmo se reforza, tendo en conta o tipo de centro do que se trata”.

Con este nivel de profesorado, a portavoz popular subliñou que o rateo global do centro é de 8 alumnos por profesor.

Novas Xeracións de Galicia reivindica ante Europa o modelo de educación gratuíta implantado na nosa Comunidade polo Goberno de Alfonso Rueda e que consideran un “exemplo a seguir” para outras rexións á hora de facer fronte ao reto demográfico e garantir a igualdade de oportunidades.

“Medidas como a gratuidade educativa desde a etapa infantil ata a universidade que se aplicou en Galicia son unha referencia para todas as rexións europeas en termos de conciliación familiar e loita contra o reto demográfico”, asegurou hoxe o vicesecretario de Organización Territorial e Institucional da organización xuvenil do PPdeG e tamén concelleiro do partido na cidade da Coruña, Carlos San Claudio.

En calidade de membro da rede Young Elected Politicians (YEP), o político coruñés participou nas xornadas organizadas polo Partido Popular Europeo no Comité das Rexións co título Local Dialogue on Empowering Regional Talents: Fostering Local Skills, Resources, and Cultural Identity for Sustainable Development.

Estas xornadas enmárcanse na Semana Europea das Rexións, na que tamén están a participar o coordinador de Emprego do PPdeG, Pablo Fernández López, e o alcalde do concello ourensán de San Xoán de Río, Xosé Miguel Pérez Blecua.

O alcalde de Poio, Ángel Moldes, relevará ao rexedor do Incio, Héctor Corujo, como principal representante do Partido Popular de Galicia na Federación Galega de Municipios e Provincias (Fegamp).

Así, Moldes pasará a ser o voceiro do PPdeG e o vicepresidente primeiro —cargos que ocupaba Corujo— no órgano supramunicipal, e polo tanto o rexedor de Poio continuará formando parte tanto da Comisión Executiva como do Consello Federal, onde xa se integrou no inicio da presente lexislatura (2023-2027).

Héctor Corujo deixa a Fegamp —tamén a Comisión Executiva e o Consello Federal— “co fin de non acumular cargos e para poder atender o máximo posible todas as súas responsabilidades” despois de tomar posesión o pasado verán como deputado provincial en Lugo.

Pola súa parte, Ángel Moldes mantén o compromiso “incuestionable” do PPdeG, co presidente Alfonso Rueda á cabeza, cos 313 concellos de Galicia.

A portavoz de Asuntos Sociais do Grupo Popular, Raquel Arias, salientou hoxe no Pleno do Parlamento galego que “a retirada da tarxeta básica, creada de xeito extraordinario para axudar ás familias a afrontar as situacións extraordinarias provocadas pola pandemia da Covid-19, supliuse cun incremento nun 30 por cento do orzamento da Xunta dedicado á inclusión”.

Raquel Arias lembrou que esta medida “so foi aplicada por dúas comunidades autónomas españolas: Andalucía e Galicia, á que se destinaron máis de 20 millóns de euros para paliar as deficiencias das familias galegas nun momento no que non podían saír das súas casas para traballar”.

Na súa intervención, criticou que “o que non axuda aos máis vulnerables é que o Goberno de Pedro Sánchez acabe de subir o IVE dos produtos básicos, negándose a baixar o do peixe, as conservas e a carne; que negue a Galicia o 50 por cento que lle corresponde da atención aos dependentes; que manteña bloqueada a Lei de familias desde hai máis de tres anos; que ten as autoestradas máis caras de España e os peores servizos ferroviarios; e que boicotea a instalación de empresas e a creación de postos de traballo”.

Fronte a esta situación, a portavoz popular destacou que “o presuposto da área de inclusión social da Xunta medrou un 30 por cento nos dous últimos anos, ata situarse hoxe nos 153 millóns de euros, a contía máis elevada destinada ata agora a esta finalidade”.

“Con estes cartos, a Xunta está a destinar 46 millóns de euros á Risga, 5 millóns de euros ás axudas de inclusión social e sufraga con 8 millóns o complemento autonómico das pensións non contributivas”, concretou.

O Partido Popular de Galicia faise eco dos problemas da mocidade galega para acceder a unha vivenda e contrapón as medidas tomadas desde o Goberno de Alfonso Rueda para garantir este dereito fronte ás mentiras e promesas baleiras dos partidos de esquerdas.

Os populares galegos sosteñen que ante unha cuestión como é o do acceso á vivenda, especialmente para a xente nova, a única resposta válida é aportar e implantar solucións reais. Neste sentido apuntan que en nada axuda á mocidade que o BNG se dedique a “sementar unha visión negra de Galicia e mentir para ocultar os avances e as oportunidades que se están dando na nosa Comunidade” ou que o PSOE “só fale de vivenda en campaña electoral”.

A presidenta de Novas Xeracións de Galicia e deputada no Parlamento, Nicole Grueira, recorda que Pedro Sánchez “prometeu miles de vivendas que non aparecen por ningures e que, como os trens, nunca chegan” e denuncia que non axudan a solucionar o problema da vivenda nin a permisividade do Goberno central ante a okupación, nin as políticas de restricións e imposicións que só provocan un aumento dos prezos e, ademais, desincentivan o alugueiro.

Fronte á ocultación da realidade duns e as promesas incumpridas doutros, a política lucense reivindica que o Goberno galego actúa con feitos, con medidas concretas e efectivas e cun compromiso claro como é o do presidente Rueda de duplicar o parque público residencial de Galicia nesta lexislatura.

A maiores disto, destaca medidas como o Bono de alugueiro mozo e as axudas dirixidas aos menores de 35 anos para a compra en centros históricos ou para a adquisición de vivendas en concellos rurais, ademais do aval hipotecario para mercar un inmoble.

“En Galicia non se promete o que non se pode cumprir, senón que se traballa a diario para garantir que os galegos, especialmente os máis novos, teñan acceso a unha vivenda digna. O futuro constrúese cumprindo coa palabra dada, non con promesas baleiras”, conclúen desde o PPdeG.

Así mesmo, cómpre lembrar que o presidente do PP nacional, Alberto Núñez Feijóo, anunciou o pasado venres no marco do Foro La Toja que presentará, ante “a incompetencia lexislativa do Goberno central”, o plan integral para o acceso á vivenda do Partido Popular, e reclamou mesa onde senten todas as administracións, expertos e afectados para solucionar o problema.

O portavoz do Grupo Popular, Alberto Pazos, pediu hoxe ao BNG que “deixen de facerlle o caldo gordo aos seus aliados independentistas cataláns e abandonen a súa idea nefasta de que Galicia conte cun cupo, porque se ten demostrado que sería enormemente prexudicial para a economía galega”. “Por unha vez, recoñezan que están fondamente equivocados e que as súas propostas non son máis que pasos atrás e prexuizos para Galicia e todos os galegos”.

Alberto Pazos referiuse ao informe que onte presentou o Foro Económico de Galicia sobre “O impacto económico para Galicia da extensión dos sistemas de concerto”, elaborado polos economistas Santiago Lago e Xoaquín Fernández Leiceaga.

CONCLUSIÓNS CONCLUÍNTES

“As conclusións deste informe son concluíntes respecto da proposta de cupo defendida polo BNG, porque, no caso de que o sistema de concerto se xeneralizase a toda España, Galicia perdería nese novo sistema 2.128 millóns de euros, se a cota se realiza en función do PIB; ou 2.647 millóns, se o cupo se calcula en función da poboación”, concretou.

Porén, o portavoz popular afirmou que “o máis preocupante, porque é o que está máis próximo de facerse realidade, vista a situación política e a debilidade do Goberno de Pedro Sánchez, chantaxeado e sometido aos intereses do independentismo catalán, é que de levarse a cabo o acordo entre os socialistas cataláns e Esquerra Republicana de Cataluña para facer Presidente da Generalitat a Salvador Illa Galicia vería reducido as transferencias que recibe nun 6,27 por cento, é dicir, 634 millóns de euros”.

Pazos tamén lamentou a submisión dos socialistas galegos a Pedro Sánchez e ao seu Goberno, “respaldando todas e cada unha das súas decisións que prexudican a Galicia, ben no ámbito económico, como pode ser o acordo acadado co independentismo catalán en materia de financiamento; ou no ámbito das infraestruturas de comunicación, cos exemplos no estado das autovías de conexión coa Meseta ou na nefasta xestión do AVE; ou na sanidade, rexeitando as propostas que se lle fan desde Galicia para incrementar o número de médicos e especialistas; e sen esquecernos dos máis de 2.500 millóns de euros que nos debe o Goberno central pola prestación da dependencia, unha cifra que se incrementa día a día ao negarse a aportar o 50 por cento que lle corresponde no cumprimento da Lei de dependencia”.

O portavoz popular asegurou que “imos seguir defendendo a reforma do sistema de financiamento autonómico, pero unha reforma que saia de xeito multilateral e consensuado con todas as comunidades autónomas; no seo do Consello de Política Fiscal e Financeira; evitando todo tipo de acordo bilaterais; e que achegue a Galicia máis recursos para contar con maior capacidade financeira, atendendo as maiores necesidades de financiamento da nosa comunidade derivadas da súa dispersión e envellecemento da poboación”.

NOXENTA CARTA AMEAZANTE

Por outra banda, Alberto Pazos trasladou “o apoio e solidariedade ás deputadas e senadoras do Partido Popular, en especial á nosa deputada ourensana Ana Vázquez, que no día de onte recibiron unha noxenta carta ameazante”. “Este tipo de accións, realizadas polo mellor exemplo de persoa cobarde, non van servir de freo á actividade exemplar que están levando a cabo as deputadas do Partido Popular, denunciando todas e cada unha dos desmáns que leva adiante o Goberno de Pedro Sánchez para manterse no poder e para contentar aos seus socios independentistas, tanto cataláns como vascos”, engadiu.

“Rexeitamos rotundamente este tipo de accións ameazantes, veñan de quen veñan e con independencia dos ou das destinatarios que sexan”, incidiu Pazos, quen lamentou que “estamos á espera de que as demais forzas políticas manifesten publicamente a súa solidariedade coas deputadas e senadoras do Grupo Popular, porque parece que só lles doe cando as afectadas están máis próximas ao seu ideario político que cando lles afecta a persoas relacionadas co PP”.

O Partido Popular de Galicia amosa o seu rexeitamento á decisión do Goberno central de subir o IVE aos produtos básicos, argumentando que con esta decisión se constata que “a única prioridade de Pedro Sánchez é a súa propia supervivencia” e non a das familias nin a dos comerciantes que madrugan cada mañá para vender os seus mellores produtos.

En declaracións aos medios antes de realizar unha visita á Praza de Abastos de Santiago de Compostela acompañada polo presidente local do PP, Borja Verea, a número dous dos populares galegos lamentou que o Goberno “non está axudando ás familias e ás pequenas empresas que ven como cada día ascende o custo da cesta da compra”.

“Non se entende que o Goberno central que máis impostos recada da historia decidira esta semana que os galegos e galegas, e todos os españois, paguemos máis IVE en alimentos básicos”, asegurou ao tempo que remarcaba que os alimentos se teñen encarecido un 35% máis nos últimos tempos.

Paula Prado volveu insistir na demanda de rebaixar o IVE de máis alimentos básicos como o peixe –“cuxo consumo segue baixando”, apuntou– a carne ou as conservas. Unha medida á que o Goberno de Sánchez se ten oposto de xeito reiterado “a pesar de que tanto o Parlamento de Galicia como o Congreso dos Deputados lle trasladaron este mandato”.

“Sánchez non está preocupado pola supervivencia das familias, nin das pequenas e medianas empresas. Só está preocupado pola súa propia supervivencia e o único que abarata son os votos do independentismo”, concluíu a secretaria xeral.

O Partido Popular de Galicia acusa ao BNG de “situarse no lado incorrecto” coa súa decisión de apoiar o veto da presidenta electa de México ao rei Felipe VI e co seu apoio á ditadura de Nicolás Maduro en Venezuela, polo que esixen aos seus socios do PSdeG que lle pidan explicacións por esta “falta de respecto” a Galicia e ao conxunto de España.

En declaracións aos medios esta mañá en Santiago de Compostela –acompañada polo coordinador de Acción Exterior do PPdeG, Rubén del Río, e o concelleiro compostelán Adrián Villa–, a secretaria xeral dos populares galegos criticou a “inxustificada” decisión da presidenta electa de México de non invitar ao Rei de España á súa investidura e afeou a Ana Pontón a súa presenza neste acto.

“O BNG, unha vez máis, recupera as súas ideas extremas e sitúase do lado de partidos como Sumar, Podemos, Bildu ou ERC, que só buscan ir en contra de España e das súas institucións”, afirmou ao tempo que lamentaba que o PSOE galego, en calidade de socio dos nacionalistas en moitas institucións, “non lle teña pedido á señora Pontón e ao seu partido que rectifiquen e pidan perdón aos españois por esta inxustificada aldraxe”.

Contrapuxo esta actitude coa dun PPdeG que, reivindicou, estará sempre “ao carón das institucións, do Estado de Dereito e do Xefe do Estado” ao igual que o está do pobo venezolano que hoxe protagonizará unha marcha mundial para pedir liberdade en Venezuela e o recoñecemento de Edmundo González como presidente lexítimo.

“O PSOE e o BNG deberían rectificar, deixar de situarse ao carón de Maduro e poñerse do lado dos milleiros de venezolanos que tiveron que abandonar o seu país e dos máis de 30.000 galegos e galegas que residen en Venezuela e están a sufrir a vulneración de dereitos e liberdades por parte do réxime bolivariano”, explicou.

Paula Prado concluíu neste sentido pedindo a socialistas e nacionalistas que “chamen ao que está pasando en Venezuela polo seu nome: ditadura” e que, dunha vez por todas, “se poñan do lado da democracia e non da ditadura”.

O secretario executivo do Partido Popular no Exterior, o galego Antonio Rodríguez Miranda, lamentou hoxe que o BNG “sempre se aliña cos que insultan a España, faltan o respecto a todos españois e sempre están tentando quebrar as súas institucións”, en relación ao seu apoio ao seu apoio á president electa de México, Claudia Sheinbaum, ante a súa inxustificada decisión de non invitar ao rei Felipe VI a súa cerimonia de investidura.

Nunhas declaracións remitidas aos medios, Rodríguez Miranda manifestou que a líder do independentismo galego, Ana Pontón, “xa se quitou hai tempo a careta da moderación das pasadas eleccións autonómicas” e agora volve ir da man dos seu socios e amigos de Esquerra e Bildu en contra, coma sempre, dos intereses de España, e apoiando a decisión “inexplicable, inxusta e non procedente” da presidenta do país mexicano.

“O Partido Popular de Galicia sempre está do lado da defensa e respecto das institucións do Estado, e neste caso ao carón do Xefe do Estado. Nós sempre estamos coa Galicia real”, subliñou o representante popular.

Por último, Rodríguez Miranda sinalou que “o PSOE terá que pedir explicacións aos seus socios, no Goberno central e nun bo número de concellos, sobre esta provocación do independentismo galego ao Estado español” que “non se pode permitir” e ante a que o PPdeG “non pode calar”.