Iniciativa sobre a demanda da Xunta de Galicia ao Goberno de España da elaboración dun proxecto estratéxico para a recuperación e transformación económica para o sector cultural
A cultura non só é a base sobre a que se constrúe a nosa identidade como comunidade política, tamén conforma un sector produtivo que, na última década, experimentou un importante crecemento.
Antes da crise sanitaria, a nosa cultura representaba o 3% do PIB galego e amosaba unhas cifras en crecemento: desde os anos 2014 e 2018 o emprego vinculada a este ámbito aumentara un 5,4% e sucedíanse os recoñecementos, tanto internos como externos, á labor dos nosos profesionais.
Este escenario viuse paralizado polas medidas de contención postas en marcha para loitar contra a pandemia. Galicia foi a primeira Comunidade Autónoma en aprobar un
Plan de Reactivación específico para o sector cultural. Unha folla de ruta froito dun intenso diálogo que foi clave para vertebrar as políticas culturais ao longo de 2020 e, sobre todo, para atender as necesidades dun sector que se viu especialmente afectado pola crise sanitaria.
Se no 2020 foi imprescindible dar resposta á nova realidade da cultura galega, durante o ano 2021, coa mellora dos datos epidemiolóxicos, a Xunta de Galicia tivo que
enfrontar un reto distinto: colaborar en sentar as bases para que o sector cultural
puidese volver á senda de crecemento e ás cifras en positivo previas á pandemia.
No mes de novembro, coñecemos a cuarta conxuntura estatística do ámbito cultural en Galicia, un estudo realizado polo Observatorio da Cultura do Consello da Cultura
Galega que achegaba unha serie de resultados moi prometedores.Entre eles, poñía o foco sobre as cifras de emprego cultural, que non só melloraban as de antes da pandemia, senón que situaban a Galicia como unha das catro Comunidades Autónoma nas que aumentaba o número de empregados neste tipo de actividades. Tamén destacaba o aumento do ritmo de creación de empresas e evidenciaba a tendencia de recuperación que debuxaron, durante o ano 2021, as actividades artísticas e recreativas.
A Consellería de Cultura, Educación e Universidade continúa coas políticas de apoio ao sector cultural e vén de iniciar un novo proceso de reflexión e diálogo cos seus profesionais, a través dun foro que deberá cristalizar en proxectos sólidos para a transformación e a modernización da cultura galega que opten aos fondos europeos. Fronte á actuación da Xunta de Galicia, o Goberno do Estado mantivo a cultura nun segundo plano, sen unha política activa a favor dela e sen propostas específicas. Non existe a nivel estatal un proceso similar de diálogo cos profesionais da cultura ao iniciado polo Goberno galego. Resulta imprescindible mudar esta perspectiva, a cultura debe ser un proxecto de país.
É necesario que o Goberno do Estado elabore un Proxecto Estratéxico para a Recuperación e a Transformación Económica (PERTE) para o sector cultural, tal e como o está solicitando a Xunta de Galicia. O Executivo estatal debe estar á altura do intenso proceso de cambios que está vivindo a cultura profesional e dar apoio aos seus profesionais, favorecendo aspectos clave como a mellora da competitividade e sustentabilidade do sector.
Polo Exposto, O Grupo Parlamentario Popular de Galicia presenta a seguinte proposición non de Lei en comisión:
“O Parlamento de Galicia insta á Xunta de Galicia a solicitar ao Goberno de España a elaboración dun PERTE para o sector cultural, ao ser este un sector que está en liña cos obxectivos destes instrumentos”.
Rexistro: https://www.parlamentodegalicia.es/Expedientes/11/PNC-002684
