Adrián Vázquez reivindica en Culleredo novas alcaldías conectadas con Europa e as súas oportunidades para 2027

O eurodeputado do PPdeG, Adrián Vázquez, visitou hoxe Culleredo, xunto coa presidenta do PP local, Izaskun García e o seu equipo, para coñecer a proposta “Culleredo Verde” e analizar as posibilidades que ofrecen as políticas europeas de impulso a proxectos de rexeneración ambiental e urbana.

Izaskun García explicou a importancia do plan Culleredo Verde, que non consiste unicamente en construír unha senda. “Trátase unir o rural co urbano, coidar as nosas canles, recuperar camiños e achegar o noso patrimonio aos veciños”, subliñou durante a xornada, que comezou cun encontro na sede local do PP e continuou cun percorrido polo paseo fluvial e a contorna do río de Trabe ao seu paso por Vilaboa.

A proposta de Culleredo Verde, tal e como explicaron os populares, inclúe tamén a posta en valor de elementos históricos como os Muíños de Acea de Ama, construídos orixinalmente no século XII; a rexeneración de zonas residenciais como Fonte da Balsa e o estudo de alternativas para reducir o efecto barreira cubrindo as vías do tren na contorna de La Cros.

Vázquez e García desprazáronse tamén ata a ría do Burgo, onde abordaron a importancia de continuar protexendo este espazo despois dunha actuación de dragaxe que contou con cofinanciamento europeo. Os populares coincidiron en subliñar a importancia destes investimentos para a conservación e mellora dos municipios galegos e a importancia de que os alcaldes estean ben preparados para acceder a este tipo de fondos.

“Izaskun visitounos en Bruxelas e agora eu visito Culleredo. É esencial que os concellos galegos conten con alcaldes conectados con Europa”, afirmou o eurodeputado lalinense.

FINANCIAMENTO EUROPEO PARA O PROXECTO

Adrián Vázquez aproveitou a visita para anunciar o seu compromiso de traballar dende o Parlamento Europeo na procura de financiamento comunitario para actuacións deste tipo en municipios como Culleredo, insistindo na importancia de que os concellos galegos aproveiten aos máximo os fondos europeos dispoñibles para mellorar as súas infraestruturas.

O eurodeputado do PPdeG destacou que o proxecto de sendas verdes desde os montes á ría, suporía “unir todo o potencial de Culleredo con planificación e visión de futuro”. Neste sentido, recalcou que se necesita “unha alcaldesa con ambición e capacidade para converter oportunidades en proxectos reais, como Izaskun García”.

Ademais, a portavoz municipal sostivo que “os fondos europeos ben utilizados son unha oportunidade enorme para municipios como o noso. Queremos un concello que non deixe escapar oportunidades e converta cada investimento en melloras concretas para os veciños”.

Paula Prado lamenta que os galegos e galegas dependan dun Goberno central que non protexe a integridade territorial dun país

A viceportavoz do Grupo Parlamentario Popular e secretaria xeral do PPdeG, Paula Prado, reivindica a solidariedade de Galicia co pobo ceutí e lamenta que os galegos e galegas, igual que o resto de españois, dependan dun Goberno central que non pode garantir a súa función máis básica: protexer a integridade territorial dun país. Neste sentido, lamenta que PSdeG e BNG non apoiasen hoxe a defensa de Ceuta e da soberanía nacional, unha iniciativa proposta polo Grupo Popular que foi aprobada na Cámara galega pese aos votos en contra da oposición.

 Así, para Paula Prado, mentres o PPdeG se manifestou en tódolos concellos galegos polo pobo ceutí, o PSdeG fixo “seguidismo” de Sánchez e o BNG “preferiu reunirse con Bildu”. Así o manifestou durante a defensa da Proposta Non de Lei rexistrada polo Grupo Popular, nun debate no que insistiu que o que aconteceu e segue acontecendo en Ceuta “non é unha crise migratoria, é unha invasión”. Neste sentido, cualifica a Sánchez de “único responsable” do descontrol en Ceuta, pese aos “numerosos avisos oficiais” de organismos como CNI, Policía Nacional ou Garda Civil que alertaban da vulnerabilidade das fronteiras antes da invasión do mes de xullo. 

Durante o debate, instou ao Goberno central a protexer as fronteiras, así como a “facerse cargo das súas competencias”, afeando a saturación da sanidade en Ceuta ou a problemática da filiación dos menores e a educación. “Nada de dicir ‘iso a Vivas’, señorías. Todo iso, a Sánchez. O único responsable”, engadiu.

Para Prado, as persoas que faleceron nas costas cando trataban de cruzar de Marrocos a España, son vítimas dos Gobernos que decidiron utilizalos como “armas arroxadizas”. Ademais, lembra que a Eurocámara sacou adiante unha proposta do PPE -co voto en contra do BNG-, na que se defende que a invasión se trata dunha “guerra híbrida”.

Tamén sinalou como “fundamental” o debate sobre Ceuta no Parlamento de Galicia porque “se trata dun asunto que afecta a tódalas comunidades autónomas”, afeando que Sánchez trate de repartir a súa “incompetencia” en territorios como Galicia. Neste punto, afea a “falta de previsión e financiamento” no plan de reparto dos menores non acompañados, poñendo o foco no recorte de máis do 80% do financiamento para atención a menores migrantes, con 3 millóns de euros menos a Galicia só nun ano. 

Por outra banda, lamentou as “contradicións” entre o presidente Pedro Sánchez e os seus ministros ao longo da invasión, aos que afea que as súas visitas a Ceta se convertesen nunha “pasarela de ministros”, sen solucións reais para os ceutís. 

AUMENTO DAS AGRESIÓNS SEXUAIS

 Paula Prado chamou a atención sobre o incremento das agresións sexuais en Ceuta dende a invasión, lembrando as alarmantes cifras da Fiscalía, que cifra os casos en case unha agresión sexual ao día dende a invasión. 

Neste punto, criticou as declaracións do ministro de Interior, Fernando Grande-Marlaska, cando ante a vulnerabilidade denunciada polos ceutís cualificou a inseguridade nas rúas da cidade autónoma como “inseguridade subxectiva”. Igualmente, afeou o “falso feminismo” de PSOE e BNG ante a realidade destas cifras.

Para os populares, é necesario aplicar a Lei de Seguridade Nacional, posto que o que sucede en Ceuta “non pode abordarse coma un episodio inmigratorio ordinario”, senón que debe ter unha resposta de Estado, cun mando único. “Non é crise migratoria, é invasión”, incidiu.

O Parlamento de Galicia aproba instar ao Goberno a impulsar unha nova lei educativa baseada no consenso, tras o fracaso da LOMLOE

O Parlamento de Galicia aprobou, hoxe, a iniciativa do Grupo Parlamentario Popular, na que se insta ao Goberno central a impulsar, en consenso coas comunidades autónomas e coa comunidade educativa, un novo marco legal que substitúa a actual LOMLOE, co fin de avanzar cara a un sistema educativo estable.

O deputado do Grupo Parlamentario Popular, Julio García Comesaña, remarcou que é imprescindible “superar os problemas que o actual marco normativo está a xerar no alumnado, o profesorado e os centros”. Así, referiuse ás consecuencias do que cualificou como a “lei do tanto dá” sobre a cultura do esforzo, a calidade educativa e a igualdade de oportunidades. “Non dá igual aprender que non aprender, adquirir os coñecementos necesarios ou pasar de curso sen adquirilos”, afirmou.

Neste sentido, defendeu unha educación baseada nas competencias, pero advertiu de que “para saber facer, primeiro hai que saber, porque non hai competencia posible sen coñecemento”. Considerou necesario recuperar o equilibrio entre coñecementos e competencias e simplificar unha arquitectura curricular que, na súa opinión, incrementou a carga burocrática do profesorado.

Tamén apostou por mellorar os mecanismos de avaliación e detección temperá das dificultades de aprendizaxe. “O obxectivo non debe ser que máis alumnos repitan, senón que menos alumnos necesiten repetir”, insistiu, defendendo que a resposta debe chegar antes e con máis apoios para quen o precise.

Asemade, incidiu en que igualdade de oportunidades non significa baixar a esixencia, senón proporcionar máis recursos ao alumnado que parte dunha situación máis desfavorable, porque “a esixencia e a equidade non son conceptos opostos”.

GALICIA LEVA CINCO ANOS TRABALLANDO
O popular destacou que, fronte á situación estatal, Galicia leva estes cinco anos desenvolvendo medidas para mellorar o sistema educativo e reducir o impacto das dificultades detectadas. Neste ámbito, puxo en valor o Acordo de Mellora do Sistema Educativo acadado cos sindicatos, as medidas para reducir progresivamente as ratios máximas por aulas, a mellora dos agrupamentos no rural e o reforzo da atención ao alumnado con necesidades educativas especiais.

Tamén salientou a redución das sesións lectivas directas do profesorado de 20 a 18 horas en Secundaria, co obxectivo de favorecer unha atención máis próxima ao alumnado, así como o Plan de impulso á atención á diversidade 2026-2030, dotado con 118 millóns de euros e que contempla un incremento dos especialistas en Pedagoxía Terapéutica, Audición e Linguaxe e orientación. A estas medidas súmanse os programas Avanza Lectura e Avanza Matemáticas, destinados a reforzar competencias fundamentais e detectar de maneira temperá as dificultades de aprendizaxe.

Así mesmo, lembrou que o novo Marco galego para o impulso educativo, aprobado esta mesma semana polo Consello da Xunta, contempla tamén reforzar a lectura en todas as materias de Primaria e incorporar en primeiro e segundo da ESO unha nova materia obrigatoria de Lectura e Comprensión.