Solicitude da Xunta de Galicia ao Goberno central da fixación dun prezo eléctrico competitivio para os consumidores electrointensivos e o compromiso para que o plan industrial para Alcoa poia optar ao Fondo Europeo de Recuperación
O pasado 28 de maio a empresa Alcoa anunciou un Expediente de Regulación de Emprego para 534 traballadores das súas plantas na provincia de Lugo, como paso previo ao peche das súas factorías en Galicia, enfrontándonos así á ameaza real de poñer fin á produción de aluminio na Comunidade, unha materia básica e esencial para a nosa economía. Esta noticia culmina meses de incertezas sobre a viabilidade da empresa, lastrada fundamentalmente por un prezo inasumible da enerxía para unha produción competitiva.
O mero relato dos feitos é implacable co Goberno Sánchez primeiro, e co Goberno Sánchez-Iglesias, apoiado polo BNG, despois, posto que amosa un desleixo absoluto na solución deste problema.
O 31 de outubro de 2018, a ministra Teresa Ribera anunciou por primeira vez un estatuto electrointensivo no Congreso.
O 5 de febreiro de 2019, Reyes Maroto anuncia o estatuto para dentro de 3 meses.
O 11 de marzo de 2019, Pedro Sánchez afirmou nun mitin na Coruña que en nove meses o seu goberno xa garantira o futuro para Alcoa.
O 26 de xuño de 2019, unha vez pasadas as eleccións xerais, Reyes Maroto afirmou que se aprobaría o estatuto en canto se configurase o Goberno.
O 20 de xaneiro de 2020, logo dunha repetición electoral e co goberno de coalición xa configurado, a ministra Yolanda Díaz dixo que o estatuto estaría aprobado “nuns días”.
Cando por fin presentaron un borrador de estatuto, en febreiro de 2020, tanto as administracións autonómicas, como as empresas, como os comités coincidiron en que era insuficiente e non garantía a continuidade das industrias electrointensivas. De feito, Galicia, Asturias e Cantabria, tres autonomías gobernadas por partidos políticos distintos, conseguiron pactar unhas alegacións comúns ao Estatuto do Goberno, demostrando que este non era un tema de batalla política, senón de defensa dos intereses da industria e do emprego. Malia isto, a resposta do Goberno Central seguiu a ser o silencio e a deixadez.
O 30 de xullo, Alcoa informou de que o principal interesado en mercar as plantas de Lugo é o grupo Liberty House. Así, o 20 de agosto, o presidente Alberto Núñez Feijóo reuniuse cos responsables de Liberty House para coñecer o plan de futuro que teñen previsto desenvolver en Alcoa San Cibrao no caso de que a operación de compra- venda da factoría se resolva de forma satisfactoria. Neste sentido, a administración autonómica insistiu en que segue aberta a colaborar e formar parte da solución, sempre que esta pase por un proxecto viable e de futuro que garanta o mantemento dos postos de traballo e da actividade dunha factoría esencial para o desenvolvemento económico de toda a comarca da Mariña.
Con todo, desde o Grupo Popular entendemos que a solución, sexa a que sexa, pasa necesariamente por garantir un prezo eléctrico competitivo para toda a industria electrointensiva, que dea certezas ao sector e despexe o horizonte de cara ao futuro e garanta a viabilidade das empresas.
ImagePolo exposto, o Grupo Parlamentario Popular, presenta a seguinte proposición non de lei en Pleno:
O Parlamento de Galicia insta á Xunta de Galicia a que se dirixa ao Goberno Central para
1. Fixar un prezo eléctrico competitivo, que pase pola aprobación dun estatuto para consumidores electrointensivos, incrementar ata o máximo que autoriza a Unión Europea as compensacións por custos indirectos de CO2 e un novo sistema de xestión da demanda que substitúa á poxa por interrompebilidade.
2. Amosar o seu compromiso de avaliar que proxectos do plan industrial de Liberty para as fábricas de Alcoa poidan optar ao Fondo Europeo de Recuperación Europeo de Recuperación.
Rexistro Iniciativa: http://www.es.parlamentodegalicia.es/Expedientes/11/PNP-000065
