Iniciativa sobre o pronunciamento do Parlamento de Galicia a favor de que todas as administracións cumpran os seus compromisos económicos co Museo do Pobo Galego
O Museo do Pobo Galego é institución galega de referencia para a conservación, a divulgación e a investigación das tradicións, a historia e a identidade de Galicia, tal e como establece o Decreto 111/1993 de 22 de maio e a Lei 7/2021, do 17 de febreiro, de museos e outros centros museísticos de Galicia.
A súa creación estivo ligada á sociedade civil galega, que impulsou a súa apertura a mediados dos anos 70 nun contexto de cambios políticos, sociais e económicos. Na actualidade, o Museo do Pobo Galego ocupa un lugar central como sintetizador das coleccións antropolóxicas da nosa Comunidade ofrecendo unha completo visión do noso pasado.
Polo súa importancia, a Xunta de Galicia contribúe anualmente ao financiamento de parte dos gastos de funcionamento do museo e das súas actividades a través dun convenio de colaboración. Así mesmo, o pasado 1 de marzo foron inauguradas as obras de ampliación da súa sede, financiadas polo Consorcio de Santiago co obxectivo de habilitar novos espazos expositivos na zona sur do convento.
Estes últimos traballos non só permitiron que o Museo do Pobo Galego estivera nas súas mellores condicións para o Ano Santo, tamén foron un claro exemplo de colaboración institucional.
Para completar os contidos do novo espazo, a Xunta de Galicia incrementou a súa achega ordinaria á institución, contribuíndo ao deseño e posta en marcha da nova museografía e cumprindo co seu compromiso. Pola contra, outras administracións desatenderon as súas obrigas, como é o caso da Deputación Provincial da Coruña á que a dirección do museo lle reiterou, en numerosas ocasións, necesidade de colaborara economicamente co centro.
Por todo o exposto, as deputadas e deputados do Grupo Parlamentario Popular presentamos a seguinte proposición non de lei na Comisión 4ª de Educación e Cultura:
“O Parlamento de Galicia acorda -como resolución- pronunciarse a favor de que todas as administracións cumpran os seus compromisos económicos co Museo do Pobo Galego, especialmente no relativo á nova museografía, -aportando o 50% ao proxecto- e atendendo ás peticións da dirección do museo e á relevancia desta institución en Galicia”
Rexistro: https://www.parlamentodegalicia.es/Rexistros/DHnqb4IPuebdqp-I6iNVhhkkrQcyC5XFoJKa2XgBnw8=
