Categoría: Parlamento de Galicia

O Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España que amplíe a exención tributaria do artigo 7.p da Lei 35/2006, do Imposto sobre a Renda das Persoas Físicas e de modificación parcial das leis dos Impostos sobre Sociedades, sobre a Renda de non Residentes e sobre o Patrimonio, aos tripulantes españois que traballen en buques de bandeira española que faenan fóra das augas españolas co fin último de estimular a substitución xeracional.

O portavoz popular do Mar, Miguel Fidalgo, explicou que o artigo 7.p da Lei do IRPF establece unha exención fiscal de ata 60.100 euros anuais para os rendementos do traballo realizados efectivamente no estranxeiro, sempre que cumpran determinados requisitos. Porén, lamentou que esta exención “si se aplica a mariñeiros españois que traballan en buques de bandeira estranxeira ou para empresas non residentes, mesmo cando a empresa contratante é española; pero quedan excluídos os tripulantes de buques de bandeira española que faenan en augas internacionais ou estranxeiras quedan excluídos, ao considerarse estes buques como extensión do territorio nacional”.

TRIBUTACIÓN DISTINTA PARA UN MESMO TRABALLO

“Esta situación xera unha discriminación fiscal evidente, xa que mariñeiros que realizan o mesmo traballo, nos mesmos caladoiros e en idénticas condicións tributan de forma moi distinta en función da bandeira do buque”, sinalou Miguel Fidalgo.

Neste sentido, o portavoz popular apuntou que o Tribunal Superior de Xustiza de Galicia “leva anos recoñecendo a exención cando o traballo se realiza en augas estranxeiras, pero unha sentenza recente do Tribunal Supremo do pasado mes de abril déixao moi claro: recoñece a aplicación da exención do artigo 7.p a tripulantes da Armada Española embarcados en buques de bandeira española en augas internacionais”.

“Lamentablemente, a negativa do Goberno de España a adaptar a normativa está a provocar a fuga masiva de mariñeiros cara a buques de bandeira francesa, irlandesa ou británica, cun aforro fiscal estimado de entre 30.000 e 35.000 euros anuais, unha situación que agrava a falta de persoal cualificado e facendo inviable o relevo xeracional na frota española, especialmente en Galicia”.

O Grupo Popular demandará no Pleno da vindeira semana que o Goberno central rexeite calquera proposta que implique unha redución substancial dos fondos europeos destinados aos sectores agrícola e gandeiro, ao tempo que pedirá consenso e participacion efectiva das comunidades autónomas na reforma do Estatuto Marco do persoal sanitario.

Ao remate da Xunta de Portavoces, o portavoz popular, Alberto Pazos, comezou a súa comparecencia ante os medios trasladando o máis sentido pésame ás familias dos máis de 40 falecidos no accidente ferroviario acontecido este domingo en Adamuz, desexando unha pronta recuperación a todos os feridos neste lamentable sinistro e agradecendo a todos os membros do operativo de emerxencia e sanitarios que están traballando neste lamentable sinistro.

RETO DA NEUTRALIDADE CLIMÁTICA EN 2040

A sesión plenaria dará comezo coa xura ou promesa de Nazareth Candán como nova deputada pola provincia de A Coruña en substitución de Ethel Vázquez, acto ao que seguirá a votación para a elección do novo secretario da Mesa do Parlamento de Galicia, posto para o que o Grupo Popular proporá ao actual viceportavoz e Presidente da Comisión 1ª, Julio García Comesaña.

A continuación, terá lugar o debate para a súa aprobación do proxecto de Lei do clima de Galicia, “unha norma coa que nos situaremos como a primeira Comunidade Autónoma en fixar por lei o reto da neutralidade climática, co obxectivo de conseguir o equilibrio entre as emisións de gases de efecto invernadoiro e as absorcións en 2040: 10 anos antes do prazo fixado pola Unión Europea”, destacou Alberto Pazos.

O seguinte punto na orde do día da sesión plenaria será a comparecencia do conselleiro de Facenda e Administración Pública para dar conta do último Consello de Política Fiscal e Financeira, celebrado o pasado 14 de xaneiro, e no que o Goberno de Pedro Sánchez puxo enriba da mesa o acordo acadado cos independentistas cataláns en materia de financiamento autonómico. “Un modelo no que a Galicia lle corresponde a cifra irrisoria de 587 millóns de euros, dun total de case 21.000 millóns que se reparten entre todas as comunidades autónomas, coa que pasamos a estar financiados moi por debaixo da media, algo que os galegos xa anunciamos que non imos aceptar porque Galicia precisa recursos adicionais nas mesmas condicións que as demais comunidades autónomas para financiar o incremento de custo da sanidade, da educación e da dependencia”, subliñou o portavoz popular.

SECTOR AGROGANDEIRO E ESTATUTO MARCO SANITARIO

Dentro do apartado de proposicións non de lei, o Grupo Popular defenderá no Pleno dúas iniciativas de importancia para o futuro do sector agrogandeiro galego e para a prestación dun servizo sanitario acorde coas necesidades de todos os galegos.

En primeiro lugar, esixirase ao Goberno de España que, nas negociacións que se están a levar a cabo da nova Política Agraria Común no marco da Unión Europea, rexeite calquera proposta que implique unha redución substancial dos fondos europeos destinados ao sector agrícola e gandeiro no próximo Marco Financeiro Plurianual 2028-2034.

En concreto, Pazos demandou que “se manteña un orzamento específico e suficiente, con recursos equivalentes e homologables á actual PAC e aos fondos FEAGA e FEADER, de forma que se garanta a competitividade, modernización e viabilidade futuro do sector agrogandeiro galego, sen esquecernos de algo que consideramos esencial: que o Goberno de España active mecanismos de interlocución permanentes coas comunidades autónomas e coas organizacións profesionais agrarias”.

A segunda das proposicións non de lei do Grupo Popular tamén demanda ao Goberno de Pedro Sánchez que teña en conta ás comunidades autónomas, neste caso no relativo á reforma do Estatuto Marco do persoal estatutario dos servizos de saúde. “Consideramos imprescindible que esta modificación se realice co consenso e participación efectiva das comunidades autónomas e dos sectores profesionais implicados”, dixo Alberto Pazos. Así mesmo, pídese que as modificacións deste Estatuto Marco contribúan a dar resposta ao déficit de profesionais sanitarios, especialmente en atención primaria e nos postos de difícil cobertura.

Por último, dentro do apartado de preguntas ao Goberno galego, o Grupo Popular interesarase por como ten previsto defender a Xunta os intereses do sector primario galego no novo escenario económico xurdido trala recente sinatura do acordo entre a Unión Europea e Mercosur; sobre a implantación do programa estatal de vivenda Casa 47 no concello de Vigo, que pon a disposición dos cidadáns vivendas a un custo superior á media do prezo libre nesta cidade; e sobre os traballos que se están a desenvolver para a renovación do Plan xeral de normalización da lingua galega, no que se leva traballando varios meses da man de máis de 100 profesionais de diferentes ámbitos e logo de escoitar a todos os grupos parlamentarios.

O Grupo Popular no Parlamento de Galicia participou hoxe no minuto de silencio convocado no Parlamento de Galicia polo tráxico accidente de tren ocorrido en Adamuz.

O GPP expresou a súa solidariedade coas persoas afectadas e  coas súas familias  e agradeceu o esforzo exemplar dos servizos de emerxencia despregados.

Os deputados do Grupo Popular Noelia Pérez e Argimiro Marnotes destacaron hoxe o investimento de case 700.000 euros no concello ourensán de San Cristovo de Cea a través do Plan Hurbe, impulsado pola Xunta de Galicia, para a realización de melloras de humanización en varias rúas do casco histórico deste municipio.

Nunha visita realizada en compañía do alcalde de San Cristovo de Cea, Jose Luis Valladares, e co concelleiro de Turismo Turismo, Promoción Económica e Novas Tecnoloxías, José Dalama, os deputados populares destacaron o bo ritmo dos traballos e a importancia das intervencións que se están levando a cabo dentro do Plan Hurbe para mellorar espazos públicos e a calidade de vida da veciñanza. ““Estamos ante unhas obras moi necesarias, que permiten recuperar o corazón desta vila e adaptalo ás necesidades actuais dos veciños”, sinalou Argimiro Marnotes.

Estes traballos, que supoñen un investimento conxunto próximo aos 700.000 euros, inclúen a renovación do pavimento de varias rúas, a mellora da rede de saneamento e o soterramento do cableado aéreo de electricidade, telecomunicacións e alumeado público. O importe destas obras dentro do Plan Hurbe é financiado nun 70 por cento pola Xunta, mentres que o Concello aporta o 30 por cento restante.

REVITALIZACIÓN

Noelia Pérez puxo en valor o Plan Hurbe como “unha ferramenta clave para a revitalización das vilas galegas, a través do que a Xunta aposta por un urbanismo pensado para as persoas, que mellora a accesibilidade, impulsa a economía local e axuda a fixar poboación no interior de Galicia”.

Neste sentido, os deputados destacaron o impacto directo que esta actuación ten para o comercio, a hostalería e o turismo local, en especial no caso do concello de San Cristovo de Cea pola súa localización na Vía da Prata e pola súa proximidade ao Mosteiro de Oseira. “Investir en espazos públicos de calidade é tamén investir en oportunidades para os concellos rurais”, manifestaron.

Durante os meses de maio e outubro do pasado ano, os albergues de Cea e Oseira rexistraron máis de 4.400 persoas aloxadas, unha cifra que reflicte a alta capacidade de atracción desta zona e o bo funcionamento destas infraestruturas. “Estes datos poñen de manifesto a importancia do Camiño de Santiago e do turismo vencellado ao patrimonio, a natureza e a hospitalidade, así como o impacto positivo que ten na economía local e na proxección de Cea e Oseira como destinos vivos e dinámicos”, sinalou Noelia Pérez.

Os deputados do Grupo Popular Roberto Rodríguez e Paula Mouzo afirmaron hoxe que en materia de vivenda “o Partido Popular constrúe e suma, mentres PSOE e BNG bloquean e encarecen”. Referíndose en concreto á cidade de A Coruña, criticaron que a declaración de zona tensionada traduciuse na redución do 70 por cento das vivendas de alugueiro, ao tempo que na mesma semana que o Goberno galego anuncia 264 novas vivendas de promoción pública, o goberno local de socialistas e nacionalistas suspenderon as licenzas para construír 160 novas vivendas de protección pública en As Percebeiras.

Roberto Rodríguez e Paula Mouzo lembraron a presentación esta semana polo Partido Popular do Plan Urxente de Vivenda a nivel nacional baseado en tres eixos: máis oferta, máis seguridade xurídica e menos trámites e impostos. “Este compendio de medidas estatais acompañará ás políticas que xa vén desenvolvendo a Xunta de Galicia nos últimos anos para cumprir o compromiso de duplicar de 4.000 a 8.000o parque público de vivendas ao longo da presente lexislatura.

“No caso concreto da cidade de A Coruña, o Goberno galego anunciou esta mesma semana 264 novas vivendas de promoción pública, que elevan a 476 o número total que está a desenvolver nesta cidade”, subliñou Roberto Rodríguez.

PROPIETARIOS MÁIS DESPROTEXIDOS

Fronte a estas medidas impulsadas polo Partido Popular, o PSOE, co apoio do BNG, aprobou unha lei estatal que está a agravar o problema de acceso á vivenda. Paula Mouzo lamentou que “o prezo da vivenda aumentou co Goberno de Pedro Sánchez nun 50 por cento e os propietarios están cada día máis desprotexidos, chegando ao colmo de que unha ex ministra ven de chamar sanguijuelas aos propietarios, aínda que en máis dun 90 por cento sexan particulares de clase media cunha única vivenda en alugueiro”.

Por outra banda, e respecto á declaración de zona tensionada no concello de A Coruña, Roberto Rodríguez manifestou que esta situación derivou en que, en apenas seis meses, a oferta de novas vivendas en alugueiro reduciuse nun 70 por cento. “Ademais, o desacerto nas medidas impulsadas polo Goberno local desta cidade supuxo que esta mesma semana PSOE e BNG aprobaran suspender as licenzas de edificación de As Percebeiras, onde se prevía a construción de 160 novas vivendas de protección pública”.

“Todo isto nos leva a afirmar que, en materia de vivenda, o Partido Popular constrúe e suma, mentres PSOE e BNG bloquean e encarecen”, indicou a deputada Paula Mouzo, que considerou que “a vivenda non debería ser un luxo e por iso son necesarias medidas e investimentos que dean resposta as necesidades reais da xente, que é o que o PP está a facer en Galicia e PSOE e BNG a impedir en A Coruña”.

Os deputados do Grupo Popular Cristina Sanz e José Manuel Mato animaron hoxe aos propietarios de comercios locais de Lugo a solicitar as axudas da Xunta de Galicia para a realización de proxectos de innovación, dixitalización e mellora da súa sostenibilidade. O prazo de presentación de solicitudes comezou no día de onte e estará aberto ata o vindeiro 16 de febreiro.

Cristina Sanz e José Manuel Mato visitaron a Ferretería MP de Paradela e explicaron que estas axudas contarán este ano cun orzamento que ronda os 4 millóns de euros. Os interesados poden optar por varias liñas de subvención, desde as melloras dirixidas á dixitalización e innovación comercial, ata a modernización das instalacións, ou a sostenibilidade ambiental a través da redución das cantidades de embalaxe dos produtos ou na utilización de materiais reciclados.

Durante a campaña de axudas realizada en 2025, un total de 112 comercios de toda a provincia de Lugo se beneficiaron de subvencións, recibindo máis de 675.000 euros en axudas.

Os deputados do Grupo Popular Miguel Fidalgo, Manuel Santos, Loli Hermelo e Raúl Santamaría trasladaron ao patrón maior da Confraría de Pescadores de Bueu e presidente provincial da Federación de Confrarías, José Manuel Rosas, o seu apoio á demanda para que o Goberno de España asuma as súas competencias e flexibilice o novo regulamento de control pesqueiro, que obriga aos barcos, entre outras medidas, a preavisar da súa chegada a porto ou levar un rexistro electrónico de capturas ao longo da xornada.

Neste sentido, anunciaron que o PPdeG levará, tanto ao Parlamento de Galicia como aos concellos do litoral galego, iniciativas reclamando estas reformas da normativa europea, que afecta negativamente á viabilidade económica da pesca galega, á seguridade no mar e ao mantemento do tecido social e produtivo das zonas costeiras.

Acompañados da portavoz do PPdeG en Bueu, Elena Estévez, os deputados populares consideraron necesario un período de adaptación ao novo regulamento de control pesqueiro. Porén, lamentaron que “o Goberno de España non dispón dun plan operativo público suficientemente definido que garanta a correcta aplicación da nova normativa e que evite consecuencias negativas para o sector pesqueiro galego, particularmente para a pesca costeira artesanal”.

RISCO OPERATIVO E DESVIACIÓN DA ATENCIÓN

A obriga de avisar electronicamente da entrada a porto dos barcos con varias horas de antelación ou a declaración exhaustiva de capturas en tempo real “son medidas máis propias da pesca industrial que da artesanal, e supoñen un risco operativo e unha desviación da atención principal á propia actividade de pesca”, manifestaron.

Os deputados populares amosaron o seu apoio ás reivindicacións dos pescadores galegos e consideran que “o Goberno de Pedro Sánchez tense extralimitado na aplicación do regulamento europeo, que non está adaptado á realidade social, económica e técnica da pesca de baixura galega, polo que é imprescindible que se proceda a flexibilizar ao máximo estas medidas que non tiveron en conta para nada a realidade do sector do mar”.

Por este motivo, o PPdeG levará ao Parlamento galego e aos concellos costeiros de toda Galicia iniciativas co fin de que o Goberno central reaccione e tome a iniciativa, “facilitando unha adaptación ao novo regulamento de control pesqueiro porque se fai imprescindible que estas novas normas se apliquen con proporcionalidade e sentido común, e que se deixe traballar a sector pesqueiro galego, que ten demostrado o seu compromiso coa sostibilidade do mar e dos recursos mariños”.

O portavoz do Medio Rural do Grupo Popular, Miguel Ángel Viso, esixiu hoxe no Parlamento de Galicia que o Goberno central “protexa ao sector primario, defenda as cláusulas de salvagarda no acordo de libre comercio entre a Unión Europea e Mercosur ante posibles ameazas, e garanta e intensifique os controis de fronteira co fin de que os produtos agroalimentarios de terceiros países que pretendan comercializarse no mercado comunitario cumpran os mesmos estándares de calidade, sanidade e benestar animal que os esixidos en Europa”.

Miguel Ángel Viso considerou “absolutamente comprensible a preocupación dos gandeiros e agricultores galegos ante o acordo entre a Unión Europea e Mercosur”, unha situación ante a que “a Xunta non se agocha, e por iso a conselleira do Medio Rural convocou o Consello Agrario para analizar coas organizacións profesionais o impacto da PAC e do novo escenario europeo, ao tempo que porá en marcha medidas concretas en ámbitos como a saúde animal e vexetal, para detectar enfermidades, pragas e problemas nos alimentos”.

“E todo isto cun obxectivo claro e inequívoco: defender o sector agrogandeiro galego, apostar polos produtos de calidade e estar sempre ao carón das necesidades reais do campo galego”, incidiu o portavoz popular.

SEN ESCOITAR ÁS COMUNIDADES AUTÓNOMAS

Na súa intervención, Viso explicou que o acordo Unión Europea-Mercosur “é un tratado de política comercial internacional, polo que son os estados membros os que teñen a obriga de defender os intereses dos seus territorios durante a negociación, de escoitar ás comunidades autónomas e de trasladar esas posicións á Comisión Europea”. Porén, lamentou que “en España isto non se fixo, e o Goberno de Pedro Sánchez negociou e posicionouse sen escoitar de maneira real ás comunidades autónomas, sen integrar as preocupacións específicas de territorios como Galicia, onde o sector primario é estrutural”.

O portavoz popular insistiu en que “calquera produto que entre desde países terceiros debe cumprir exactamente as mesmas esixencias que se lles impoñen aos produtores galegos”, porque demandou que “Galicia non pode ser tratada como un dano colateral aceptable dun acordo global, nin ser o territorio ao que se lle pide comprensión, paciencia e silencio mentres outros deciden”. “O sector primario galego non é un problema que xestionar, é un activo que protexer”, indicou.

Para rematar, Miguel Ángel Viso criticou a actitude do BNG porque esta situación “non se evita facendo discursos grandilocuentes aquí mentres se sostén en Madrid ao mesmo goberno que negocia estes acordos sen contar coas comunidades autónomas”. “Ultimamente semella que algúns están máis preocupados por exhibir bandeiras alleas que por defender con firmeza os intereses de Galicia onde realmente se deciden as cousas”, dixo.

O Parlamento de Galicia aprobou hoxe a proposición non de lei do Grupo Popular, co voto en contra do PSdeG e a abstención do BNG, a través da que se demanda ao Goberno de España que aplique, en colaboración coas comunidades autónomas, un maior nivel de cogobernanza na execución dos recursos previstos no Mecanismo para a Recuperación e a Resiliencia (MRR), nomeadamente, aqueles dirixidos a unha xestión forestal sostible, incluída a loita contra os lumes, chegando incluso a transferir a Galicia os recursos correspondentes, de tal xeito que se favoreza un impacto máis positivo sobre o territorio e sexa posible acadar un maior nivel de execución.

A deputada popular Nicole Grueira lamentou que o Goberno central “optara por un modelo excesivamente centralizado para a xestión dos fondos do Plan Nacional de Recuperación e Resiliencia, uniformizando criterios e procedementos sen ter en conta a diversidade territorial”. “E isto fíxose sen unha cogobernanza real e efectiva coas comunidades autónomas, que son as que ostentan as competencias, dispoñen do coñecemento directo do territorio e teñen capacidade contrastada de execución en moitos dos ámbitos clave deste plan”, indicou.

PROBLEMAS DE DECISIÓNS MAL TOMADAS

Deste xeito, manifestou que, “cando as decisións se toman mal, aparecen os problemas, como convocatorias excesivamente ríxidas que non se adaptan ás necesidades do medio rural, distintos criterios segundo o ministerio que publique a orde de axudas, unha falta absoluta de claridade sobre o réxime de reintegro dos fondos ou a falta dun marco plurianual claro, que non permite ás comunidades autónomas coñecer con antelación os fondos dos que van dispoñer e impide unha planificación estratéxica seria”.

Nicole Grueira reclamou “máis respecto e participación das comunidades autónomas na planificación, deseño e xestión dos fondos europeos, de xeito que respondan realmente ás necesidades reais dos territorios”. Así mesmo, pediu que o Goberno de Pedro Sánchez “mellore os mecanismos de coordinación e garantía xurídica destes fondos europeos ou, no seu defecto, transfira os recursos á Xunta, que xa demostrou capacidade, coñecemento do territorio e solvencia técnica para xestionalos con maior eficacia e impacto positivo”.

O Parlamento de Galicia aprobou hoxe a proposición non de lei do Grupo Popular, que non contou co apoio de BNG nin de PSdeG, a través da que se demanda ao Ministerio de Agricultura, Pesca e Alimentación que axilice a autorización de produtos fitosanitarios de eficacia contrastada, especialmente os que xa están autorizados noutros países da Unión Europea. Así mesmo, pídese que se fomente a investigación na industria fitosanitaria para desenvolver novos principios activos e ínstase a que continúe a produción de produtos autorizados de eficacia contrastada.

O deputado popular Juan Casares manifestou que “a produtividade agrícola decae por diversas razóns, entre as que destaca o cambio climático e a actual política ambiental, que propicia a prohibición de produtos fitosanitarios necesarios para garantir uns rendementos mínimos nos cultivos”.

REVISIÓN CONSTANTE

“Para evitar danos ambientais e na saúde pública é necesaria unha revisión constante da efectividade, dos protocolos de uso e dos efectos sobre as persoas e o medio ambiente destes produtos químicos”, sinalou Juan Casares, quen apuntou que “como resultado destas revisións deben ser prohibidos aqueles que resulten perniciosos”. Porén, sinalou que esta prohibición “debe acompañarse da autorización de novos produtos que non teñan efectos negativos co gallo de non deixar desprotexidos aos nosos produtores”.

Neste sentido, segundo os datos do Rexistro Oficial de Produtos Fitosanitarios do Ministerio de Agricultura, nos últimos cinco anos canceláronse 540 produtos, mentres que só se rexistraron 120 novos. A este balance sumáronse tres cuestións: hai produtos eficaces que non se comercializan pola súa escasa marxe comercial; algúns produtos novos autorizados non contan coa efectividade dos anteriores; e existe o compromiso do Pacto Verde Europeo que prevé a redución do uso de fitosanitarios.

“Como resultado desta constelación causal, moitas pragas e enfermidades son máis difíciles de controlar, unha cuestión que compromete non só a viabilidade económica de moitas explotacións, senón tamén a súa capacidade de competir cos produtos procedentes de terceiros países”, sinalou o deputado popular.

MARXE DE MANOBRA

Por este motivo, asegurou que “o Goberno de España ten marxe de manobra para mellorar a situación axilizando as autorizacións, posto que hai produtos autorizados na Unión Europea que en España non se poden usar”, e puxo como exemplo principios activos que están autorizados no norte de Portugal que os produtores galegos non poden utilizar.

Juan Casares pediu, ademais, que “se dote de máis recursos ao Instituto Nacional de Investigación e Tecnoloxía Agraria e Alimentaria, co fin de axilizar as liñas de traballo en produtos fitosanitarios, impulsar a investigación na loita biolóxica de pragas e abrir o campo á obtención de novas variedades de cultivo máis resistentes ás pragas e enfermidades”.

“De xeito paralelo, o Goberno de España debe apoiar o mantemento da produción dos fitosanitarios pouco rendibles para a industria química, pola súa escasa marxe comercial, ao tempo que se implementan medidas complentarias como a mellora dos controis nas fronteiras, co gallo de evitar a entrada de pragas procedentes doutros países; apoiar a agricultura de precisión, posto que fai máis eficiente o uso de fitosanitarios; e aumentar o nivel de aseguramento dos cultivos a través da Entidade Estatal de Seguros Agrarios, en colaboración coas comunidades autónomas”, rematou.