Categoría: Parlamento de Galicia

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta de Galicia a realizar un acto de homenaxe en lembranza e recoñecemento de José Manuel Costas Capelo para salientar a súa importancia no sector náutico-pesqueiro e na mariña mercante de Galicia, así como na formación neste ámbito.

O viceportavoz popular, Julio García Comesaña, salientou que “hai persoas que, sen ocupar titulares nin buscar protagonismo, constrúen país desde o compromiso cotián coa formación, a seguridade e a dignidade profesional”. “Un deses homes foi o profesor José Manuel Costas Capelo, vigués de nacemento e coruñés de adopción, que dedicou toda unha vida ao servizo da educación náutico-pesqueira en Galicia”, indicou.

RECENTE FALECEMENTO

Costas Capelo obtivo o título de capitán da Escola Oficial de Náutica de A Coruña no ano 1964 e durante varios anos navegou en distintos buques mercantes, adquirindo unha experiencia directa do mar que marcaría o seu labor docente. Xa en terra, en 1971, accedeu á praza de profesor adxunto de Construción Naval, e en 1972 pasou a impartir docencia na Universidade Laboral Crucero Baleares de A Coruña, centro no que se xubilou como catedrático de Navegación e Instalacións Mariñas, sen deixar nunca de formar a futuras xeracións de mariños tamén no IES Universidade Laboral.

“Foi un divulgador técnico rigoroso, un mentor entregado e unha autoridade moral e profesional recoñecida en toda España”, afirmou o viceportavoz popular, quen engadiu que Costas Capelo foi socio de honra de AETINAPE, entidade coa que colaborou de forma intensa, sendo autor de numerosos artigos publicados na súa revista e inspirador de propostas lexislativas e técnicas para mellorar as condicións do traballo marítimo. Entre elas, cabe destacar a sinalización segura das bateas, a prohibición de faenar en condicións meteorolóxicas extremas, a substitución das balsas salvavidas por botes de rescate nos buques que operan en augas frías ou a implantación de sistemas de emerxencia con luces LED, como alternativa ás tradicionais bengalas.

Julio García Comesaña lamentou que o seu recente falecemento de forma repentina “deixou un fondo baleiro na comunidade educativa e profesional do mar, pero tamén deixou unha pegada profunda e transversal que o fai merecedor dun recoñecemento público, sereno e respectuoso”.

A deputada do Grupo Popular Patricia García demandou hoxe no Parlamento galego ao Concello de Vigo, no debate dunha iniciativa sobre o abandono e deterioro que presenta na actualidade o colexio Celso Emilio Ferreiro, que cumpra coas competencias que lle corresponden en materia de mantemento e conservación das infraestruturas educativas na Lei reguladora das bases de réxime local e a Lei orgánica de Educación e leve adiante os traballos de mantemento que precisa este centro de ensino.

Patricia García lembrou que o CEIP Celso Emilio Ferreiro foi construído en 1980, “polo que leva máis de 40 anos sen recibir un mantemento estrutural axeitado por parte do Concello de Vigo”. “O resultado desta neglixencia continuada é un edificio con cuberta deteriorada, risco de desprendemento e estrutura deformada, derivado de que os responsables municipais eludiron as súas responsabilidades básicas durante todos estes anos”, indicou.

FALTA DE MANTEMENTO CONTINUADA

“A situación do CEIP Celso Emilio Ferreiro é consecuencia directa dunha falta de mantemento continuada por parte do Concello durante máis de 40 anos, porque o que ocorreu non é un accidente, é o resultado dunha política municipal que non se preocupa polas instalacións escolares ata que hai un risco real e inmediato”, indicou.

Neste sentido, a deputada popular lembrou que a responsabilidade do mantemento ordinario dos centros de infantil e primaria corresponde aos concellos, segundo se establece tanto na Lei de bases de réxime local como na Lei orgánica de educación.

“A Xunta cumpre coas súas competencias con investimentos nos centros que lle corresponden, como é o caso do cambio da cuberta do ximnasio e dos anexos no CEIP Chans-Bembrive”, indicou Patricia García, que subliñou que “Vigo é a cidade de Galicia onde máis se investiu en infraestruturas educativas nos últimos anos”. En concreto, o Goberno galego leva investidos desde 2021 máis de 36 millóns de euros en 170 actuacións en 73 centros públicos no marco do Plan de nova arquitectura pedagóxica.

Ademais, asegurou que “Galicia é hoxe unha das comunidades que máis inviste por alumno en España: 8.075 euros por alumno, mil euros máis que a media estatal”.

A viceportavoz do Grupo Popular, Cristina Sanz, asegurou hoxe no Parlamento de Galicia o pleno compromiso da Xunta de Galicia de construír en Ribeira unha residencia pública coa que garantir a atención das persoas maiores deste municipio e da comarca, para o que demandou que o Concello dispoña dunha parcela que cumpra cos novos requisitos esixidos para a súa construción, tendo en conta a modificación da normativa sobre xestión do risco de inundación que está tramitando o Goberno central.

Cristina Sanz afirmou que “a residencia de maiores de Ribeira trátase dun proxecto completamente irrenunciable, que debe realizarse coas máximas garantías respecto ao cumprimento da normativa relativa aos riscos de inundación e que non cumpre a localización prevista inicialmente no lugar de Saíñas na parroquia de Palmeira”.

Deste xeito, o Grupo Popular apoiou a aprobación da proposición non de lei a través da que se solicita que a Consellería de Política Social designe de inmediato os técnicos que leven adiante un traballo áxil cos técnicos municipais para analizar os novos criterios legais que impedirían a construción desta residencia pública no lugar proxectado, de xeito que se poida axilizar ao máximo a localización dunha nova parcela.

Na súa intervención, a viceportavoz explicou que, logo da dana que se sufriu en Valencia, o Goberno central iniciou un proceso de modificación da normativa estatal para prohibir a edificación en zonas como a prevista inicialmente para a construción desta residencia de maiores en Ribeira, xa que ten risco de posible inundación.

PARCELA MÍNIMA DE 6.000 METROS CADRADOS

“A Consellería de Política Social xa ten solicitado ao Concello de Ribeira que propoña, á maior brevidade, unha nova parcela dunha superficie mínima de 6.000 metros cadrados na que se poida continuar co compromiso de construír esta residencia de maiores, algo no que xa están traballando os representantes do PPdeG neste concello, que xa se puxeron a traballar na busca de novas localizacións”, indicou.

A viceportavoz popular asegurou “compartir co BNG o desexo de que este proxecto poida iniciarse canto antes, porque estamos ante unha edificio piloto cunha estrutura que se adapta ao novo modelo de residencias: máis centradas nas persoas, accesible e con maior intimidade gracias ás habitacións individuais e os baños adaptados”. Unha nova residencia de maiores con 100 prazas e que contará cun orzamento inicial de 10 millóns de euros.

A portavoz de Sanidade do Grupo Popular, Encarna Amigo, lamentou hoxe no Parlamento de Galicia a falta dun mantemento axeitado por parte do Concello de Padrón do centro de saúde desta localidade, polo que demandou á Xunta que avalíe a posibilidade de colaborar na realización de melloras puntuais neste edificio.

Encarna Amigo explicou que “as carencias que o centro de saúde de Padrón presenta son principalmente de falta de mantemento axeitado por parte do Concello, o que provocou un deterioro continuo do edificio”.

DISPOSICIÓN A COLABORAR

“A Xunta sempre está disposta a colaborar cos concellos, pero esa colaboración non pode ser substitución, e moito menos pode converterse en tapar a deixadez doutros con recursos públicos de todos os galegos”, sinalou.

Deste xeito, sinalou que “quen pide reformas, que primeiro manteña o que xa ten, porque se non o que se pretende non é mellorar a sanidade pública, senón facer política local con fins partidistas”.

A portavoz popular lembrou que a Xunta destinou desde o ano 2018 máis de 215.000 euros en actuacións de conservación e mantemento do centro de saúde de Padrón, “reforzando o seu firme compromiso de colaborar aínda que o mantemento fundamental corresponde ao Concello”.

“A Xunta está disposta a seguir colaborando, como sempre fixo, pero é inaceptable que se ignore a obriga do Concello e se pretenda trasladar toda a responsabilidade á Administración autonómica”, rematou.

O Pleno do Parlamento de Galicia aprobou hoxe a proposición non de lei do Grupo Popular, que non contou co apoio dos deputados do BNG, a través da que se solicita ao Goberno de España unha serie de actuacións para mellorar o estado no treito internacional do río Miño, como avaliar o cumprimento do caudal ecolóxico, desenvolver un plan de loita contra especies invasoras, promover a dragaxe sostible e controlada, harmonizar normativas e facilitar a xestión da biomasa, actualizar o regulamento de navegación, reforzar a inspección de embarcacións de pasaxeiros ou protexer estrutural e patrimonialmente as pesqueiras.

O viceportavoz popular, Julio García Comesaña, explicou que esta iniciativa parlamentaria recolle demandas realizadas por alcaldes, veciños, clubs deportivos, pescadores e empresarios turísticos “ante os problemas gravísimos que se cronificaron no treito internacional do río Miño pola desidia do Goberno de España e a conivencia dos seus socios”.

COMPROMISO DA XUNTA

En concreto, referiuse á xestión irregular do caudal ecolóxico; á proliferación de especies invasoras, que están desprazando a fauna e a flora autóctonas; a sedimentación do leito fluvial, agravada pola prohibición absoluta do dragado; a falta de harmonización normativa entre as dúas marxes do río; a obsolescencia do regulamento de navegación; o descontrol no transporte fluvial de pasaxeiros; e a necesidade de preservar as tradicionais pesqueiras.

“A Xunta leva anos demostrando o seu compromiso co Miño, pero a dimensión transfronteiriza e multisectorial dos problemas deste río esixe a implicación activa do Goberno de España, implicación que ata o día e hoxe brilla pola súa ausencia”, sinalou o viceportavoz popular. Neste sentido, asegurou que “a Xunta ten cumprido coa súa parte, con investimentos reais, coa promoción do río como recurso turístico e ambiental, e con iniciativas para a conservación do ecosistema, pero sen unha implicación do Goberno central moitas destas actuacións atopan un muro de incompetencia e silencio”.

García Comesaña pediu que o Goberno central “se sente a falar cos alcaldes do territorio e que trate ao Miño como o que é: un patrimonio natural e cultural único, un activo para o desenvolvemento rural e un exemplo de colaboración internacional”. “Estamos ante un problema real que afecta directamente á calidade de vida dos veciños e á sustentabilidade ambiental do territorio”, apuntou.

RÍO IGNORADO POLO GOBERNO CENTRAL

“Non podemos permitir que o Miño se converta nun río ignorado polas administracións, nin pola súa historia, nin pola súa riqueza ecolóxica, nin polo que representa para a identidade galega e para a cooperación entre pobos irmáns como Galicia e o norte de Portugal”, manifestou.

Para rematar, o viceportavoz popular cualificou de “oportunista” a preocupación amosada en días pasado polo BNG pola situación do río Miño, propoñendo a creación dunha autoridade única de gobernanza transfronteiriza, “unha fórmula maximalista que nin concretan, nin executan, nin defenden ante o seu socio preferente: o PSOE”. “Non deixa de chamar a atención que, mesmo nesta cuestión, o BNG evite criticar con claridade ao Goberno de Pedro Sánchez, chegando incluso a evitar o seu apoio neste Pleno a esta iniciativa aprobada polo Grupo Popular”, subliñou.

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta de Galicia a iniciar os trámites para reclamar o traspaso das competencias executivas en materia das autorizacións iniciais de traballo das persoas migrantes, de xeito que poida habilitar un proceso que reduza os prazos para obter esta documentación. “Non hai argumento técnico algún que xustifique que estas competencias se quedan en Madrid, e moito menos a día de hoxe cun Goberno central que está colapsado, desaparecido ou directamente distraído noutras cuestións máis turbias”, manifestou a portavoz popular de Emprego, Noelia Pérez.

Na súa intervención, Noelia Pérez lamentou que “un dos síntomas de que o Goberno de España está totalmente desconectado da realidade é o colapso administrativo que existe no acceso aos permisos de residencia e traballo para as persoas migrantes”, que se manifesta a través da “ausencia de reforzo dos servizos públicos e que, deste xeito, as demandas do tecido produtivo estean sen atender”.

NIN MÁIS NIN MENOS

“Mentres os socialistas están á espera a ver quen se salva ou quen máis cae nesta trama de corrupción, nós estamos a ver como cubrir vacantes laborais en sectores estratéxicos como a agricultura, a hostalería, a pesca ou a construción”, indicou a portavoz popular, quen asegurou que “hai empresas que se están vendo obrigadas a rexeitar contratos porque non atopan traballadores”.

Noelia Pérez afirmou que “Galicia non pide nin máis nin menos que o que xa se lles deu a outras comunidades, porque Cataluña ten estas competencias en materia de permisos de traballo das persoas migrantes e Euskadi tamén as terá a partir do 1 de xullo”. “E esta proposta permítenos xestionar directamente as autorizacións iniciais de traballo desde Galicia, sen colapsos, sen atrasos e sen o Goberno de Pedro Sánchez polo medio, acreditando a experiencia profesional de quen ven, deseñando formacións a medida e facendo contratacións en orixe con garantías”, anotou.

A portavoz de Sanidade do Grupo Popular, Encarna Amigo, asegurou hoxe no Pleno do Parlamento galego que o Hospital da Mariña de Burela “ten hoxe máis servizos, máis prestacións, máis especialistas e máis calidade asistencial que nunca, e iso non se podería conseguir sen coordinación e sen planificación de área”. Neste sentido, asegurou que queremos seguir mellorando a atención sanitaria nesta comarca e criticou que “se disfrace de reivindicación sanitaria o que é claramente unha estratexia política partidista, como vemos en certas plataformas ateigadas de cargos públicos e militantes do PSOE e do BNG”.

Encarna Amigo manifestou que a integración do Hospital da Mariña na área sanitaria de Lugo “non supuxo perda algunha, senón todo o contrario: gracias á área sanitaria única optimizáronse recursos, ampliáronse servizos, reforzáronse equipos multidisciplinares e garantiuse a continuidade asistencial dos pacientes desta comarca lucense”.

En concreto, salientou que o Hospital da Mariña conta desde 2010 con 154 profesionais máis traballando no centro hospitalario, o que supuxo un incremento do 28,5 por cento. “Agora mesmo, profesionais dos hospitais universitarios de Lugo, de Monforte e de A Coruña estanse a desprazar á Mariña para reforzar aqueles servizos hospitalarios que o precisan, tanto en gardas como en consultas”, indicou a portavoz popular.

MÁIS ESPECIALISTAS E MELLORAS LABORAIS

“Hoxe está a piques de resolverse un concurso que xa permitiu incorporar cinco novos especialistas ao Hospital de Burela e que servirá para cubrir 17 prazas máis”, dixo Encarna Amigo, quen incidiu que “os servizos do Hospital da Mariña non fixeron máis que verse incrementados ao longo das lexislaturas do Goberno do PPdeG, en ámbitos tan importantes como a oncohematoloxía, coa que se evitan milleiros de desprazamentos cada ano; o servizo de hospitalización a domicilio ou a resonancia magnética fixa”.

Encarna Amigo apuntou que “tamén se puxeron en marcha medidas de calado a nivel laboral para mellorar as condicións dos profesionais e facer máis atractivas as prazas deste centro hospitalario”. Así, explicou que “os profesionais que apostan por traballar na Mariña reciben unha puntuación adicional e melloras para avanzar na súa carreira profesional”.

“Gracias ás medidas adoptadas pola Xunta, hoxe temos prazas clave cubertas no Hospital da Mariña e nos centros de saúde da comarca que doutro xeito seguirían vacantes, medidas que foron posible porque se puxeron en marcha leis e convocatorias que tanto BNG como PSdeG votaron en contra”, sinalou.

Para rematar, a portavoz popular destacou que o Hospital da Mariña “tamén viu mellorada a súa infraestrutura desde 2018, a través da súa ampliación e remodelación integral con máis de 6.000 metros cadrados, novas habitacións e consultas, logo dun investimento de 20 millóns de euros, e xa se prevé un novo investimento doutros 30 millóns de euros para a mellora deste centro hospitalario”. Fronte a isto, lembrou que o Goberno bipartito de PSdeG e BNG prevía a integración do Hospital da Mariña na área sanitaria de Ferrol, que abarcaría as actuais áreas sanitarias do norte de Lugo e de Ferrol.

A portavoz de Sanidade do Grupo Popular, Encarna Amigo, afirmou hoxe no Pleno do Parlamento de Galicia que o novo Plan de saúde mental 2025-2028 incorporará a creación dunha rede de psicoloxía clínica en atención primaria e o reforzo da atención á saúde mental infanto-xuvenil, así como un incremento das prazas en centros de rehabilitación psicosocial, pisos protexidos e unidades residenciais.

Encarna Amigo lembrou que a Xunta “leva meses traballando no novo Plan de saúde mental 2025-2028 e faino cun enfoque participativo, contando cos profesionais e coas entidades implicadas”.

Entre as novidades deste novo Plan de saúde mental, a portavoz popular citou a creación dunha rede de psicoloxía clínica en atención primaria, “que comezará este mesmo ano coa contratación de 14 novos psicólogos e que aspira a contar con 35 profesionais en 2028 e 50 no 2030”.

“Así mesmo, procederase ao reforzo da atención á saúde mental infanto-xuvenil, ampliando a atención pediátrica ata os 18 anos, ata os 21 no caso de TEA, e reforzando a continuidade asistencial”, engadiu.

PLAN 2020-2024 PIONEIRO

Respecto do Plan de saúde mental post-covid 19 2020-2024, Encarna Amigo lembrou que foi unha “iniciativa pioneira, que contou cun orzamento de 83 millóns de euros e que permitiu crear 244 novas prazas de profesionais da saúde mental en catro anos, profesionais que hoxe xa están a traballar na nosa rede pública de saúde”.

“Gracias a este plan, a sanidade pública galega conta hoxe con 557 profesionais da saúde mental, case o dobre dos que había en 2009, ao tempo que se puxeron en marcha sete unidades de prevención intensiva do suicidio, unha por cada área sanitaria e que xa atenderon a máis de 1.500 persoas en situación de risco”, engadiu.

O deputado do Grupo Popular Ángel Rodríguez Conde asegurou hoxe no Pleno do Parlamento que “nunca antes o Servizo de Prevención dos incendios forestais de Galicia foi tan único, tan estable, tan profesionalizado e tan equipado”. Así mesmo, apuntou que no Plan de prevención e defensa contra os incendios forestais (Pladiga) “actualízase anualmente a listaxe e o mapa de parroquias de alta actividade incendiaria para poder establecer mecanismos máis adecuados na loita contra os incendios forestais”

Ángel Rodríguez lembrou que o Goberno galego do PPdeG “emendou a catastrófica xestión con SEAGA e integrou na xunta as brigadas que socialistas e nacionalistas crearon cando gobernaron, ao tempo que ampliou de tres a seis e de seis a nove meses o tempo de traballo do seu persoal fixo-descontinuo e completou a funcionarización de dous terzos do persoal laboral”.

“Nunca o Servizo de Prevención dos incendios forestais estivo tan profesionalizado a través dunha clara aposta pola formación teórica e práctica do seu persoal”, subliñou o deputado popular, quen tamén destacou o equipamento deste servizo “cun reforzo de medios e materiais como EPIS, vehículos de brigadas e motobombas, ou a rede de bases, que o sitúan como un dos mellores de España”.

AXUDAS PARA PREVIR DANOS

Así mesmo, dentro das medidas que se están a facer desde a Consellería do Medio Rural, o deputado popular referiuse á ampliación a 5,4 millóns de euros as axudas para previr os danos causados por incendios ou desastres naturais en montes de agrupacións forestais de xestión conxunta, como en montes veciñais en man común. En concreto, estas actuacións subvencionadas céntranse fundamentalmente no control de biomasa en áreas devasa e faixas auxiliares de pista, buscando reducir a carga de combustible presente no monte e establecer zonas con discontinuidade horizontal ou vertical.

Por outra banda, Ángel Rodríguez lembrou que os mapas de combustibles forestais “serán un dos produtos resultantes do inventario forestal continuo de Galicia, froito da integración de datos recollidos tanto en campo como a través de fontes de teledetección, permitindo caracterizar con detalle a estrutura da vexetación e a dispoñibilidade da biomasa en Galicia”.

A portavoz de Política Social do Grupo Popular, Raquel Arias, salientou hoxe no Pleno do Parlamento galego que Galicia será o vindeiro ano, unha vez máis, a comunidade autónoma coa maior taxa neta de escolarización infantil de 0 a 3 anos de toda España, ao que se engade a gratuidade destas escolas para todos os nenos e nenas.

Raquel Arias concretou que a escolarización para nenos e nenas de 0 a 3 anos acada en Galicia o 60,6 por cento, cando a media de España se sitúa no 49 por cento. “Son 20 puntos por enriba da porcentaxe de escolarización de Cataluña e o dobre que o que teñen en Asturias”, apuntou.

Ademais, lembrou que desde hai catro anos as escolas infantís son gratuítas para todos os nenos de 0 a 3 anos, “sexa cal sexa o centro ao que vaian, tanto público, como privado ou dunha entidade social”. Esta medida, que as familias poden gozar ata un máximo de 8 horas ao día durante once meses cada ano, permite un aforro de cerca de 3.000 euros por fillo cada ano.

RECURSOS DE CONCILIACIÓN EN TODOS OS CONCELLOS

“En Galicia, todos os concellos, por moi pequenos que sexan, contan cun recurso de conciliación gracias ás casas-niño, das que hai un cento repartidas por toda a xeografía galega”, indicou a portavoz popular.

Porén, Raquel Arias afirmou que “a Xunta dispón para as familias de todos estes beneficios exclusivamente cos seus orzamentos, aos que dedica cada ano 65 millóns de euros”. “Lamentablemente non conta co apoio do Goberno de Pedro Sánchez, a pesar de que xa prometera a gratuidade das escolas infantís en 2018 e de que na última Conferencia de Presidentes prometeu 175 millóns de euros para este fin”, sinalou.

Para rematar, a portavoz popular asegurou que “Galicia está executando os fondos europeos e con eles vanse crear 1.000 novas prazas de escolas infantís, en colaboración cos concellos”. “1.000 novas prazas que, desgraciadamente, non se poderán beneficiar as familias de ningún concello gobernado polo BNG porque os seus alcaldes se negaron a solicitalas”, dixo.