Categoría: Parlamento de Galicia

O portavoz do Grupo Popular, Alberto Pazos, afirmou hoxe que “afrontamos o Debate sobre Política Xeral que terá lugar a vindeira semana coas mans tendidas para estudar e negociar as propostas sensatas e viables que nos presenten os grupos da oposición, opoñéndonos a calquera cuestión demagóxica e irrealizable no momento e na sociedade actual”.

A Xunta de Portavoces fixou esta mañá a celebración do Debate sobre Política Xeral da Comunidade galega para os días 23 e 25 de abril, “xusto un ano e dez días despois da toma de posesión de Alfonso Rueda como Presidente da Xunta, o que pon de manifesto a súa vontade total de transparencia e de poñer enriba da mesa o seu proxecto de Goberno para a valoración tanto dos grupos da oposición como de toda a sociedade galega”, manifestou Alberto Pazos.

ÁNIMO CONSTRUTIVO

Neste sentido, lembrou que o Regulamento do Parlamento galego recolle que o Debate sobre Política Xeral non se celebra no mesmo ano no que se investise ao Presidente da Xunta, “pero Alfonso Rueda non quere aprazar máis a súa rendición de contas ante o Parlamento e vaino facer xusto cando se cumpre ese primeiro ano de lexislatura”.

O portavoz popular demandou a BNG, PSdeG e Grupo Mixto que “afronten este debate co mesmo ánimo construtivo co que o imos facer desde o Grupo Popular, para que as resolucións que se aproben finalmente sirvan para mellorar a economía e o benestar de todos os galegos”.

INTENSO TRABALLO PARLAMENTARIO

Alberto Pazos afirmou que “afrontamos este debate coa tranquilidade que nos da o traballo feito ao longo do presente ano, un ano moi intenso a nivel parlamentario”. En concreto, lembrou a aprobación de sete novas leis, entre as que figuran textos tan importantes como os orzamentos da Xunta para o presente ano 2025; a lei de promoción dos beneficios sociais e económicos dos proxectos que utilizan os recursos naturais de Galicia; a nova Lei dos medios públicos de comunicación audiovisual de Galicia; ou as leis de cultura inclusiva e accesible de Galicia, de estatística de Galicia e de impulso da intelixencia artificial.

O portavoz popular salientou que estas tres últimas leis aprobáronse sen o voto en contra da oposición, “un feito que se merece destacar para demostrar que o suposto rolo do Partido Popular que quere trasladar a oposición á cidadanía non é tal, se temos en conta que practicamente a metade das proposicións non de lei que se aprobaron en Pleno nesta lexislatura saíron adiante por unanimidade, unha cifra que se incrementa sensiblemente cando falamos de proposicións non de lei en Comisión, onde 90 das 165 proposicións non de lei se aprobaron foron por unanimidade”.

Ademais, apuntou que os grupos da oposición “son os que se levan a palma nas iniciativas de control ao Goberno galego, xa que levan feito 218 accións de control ao Goberno galego das 297 que se teñen feito en Pleno neste primeiro ano de lexislatura”.

Dentro do traballo parlamentario desenvolvido ao longo deste primeiro ano de lexislatura, Pazos destacou a Comisión de Investigación sobre a sanidade pública galega, impulsada polos grupos da oposición, “que nos permitiu botar abaixo todas e cada unha das falsidades e inexactitudes que están a espallar nacionalistas e socialistas sobre o suposto caos que vive a nosa sanidade pública”.

“Demostrouse, con datos e afirmacións dos propios comparecentes, que non existiu sobrecuste na construción do Hospital Público Álvaro Cunqueiro e que a colaboración pública privada era a única opción viable para dotar a Vigo deste centro sanitario nun contexto de crise económica extrema e de incapacidade para recorrer á débeda pública”, manifestou o portavoz popular, quen lembrou que tamén quedou probado que “toda a contratación da Xunta de Galicia en materia de sanidade pública se realiza cumprindo todo o procedemento que está previsto na normativa”.

COMEZO O MÉRCORES, ÁS 10 DA MAÑÁ

O Debate de Política Xeral dará comezo o vindeiro mércores, ás 10 da mañá, coa intervención do Presidente da Xunta. Pola tarde, terá lugar a intervención dos portavoces dos catro grupos parlamentarios, por un tempo máximo de 45 minutos, aos que seguirá a réplica do Presidente da Xunta, ben en conxunto a todos os grupos ou de xeitos individual, sen límite de tempo. A continuación, os portavoces dos grupos terán unha segunda intervención por un tempo máximo de 15 minutos, para poñer fin a esta primeira xornada do Debate de Política Xeral co peche a cargo do Presidente da Xunta.

Os grupos parlamentarios terán de prazo ata as 10.30 da mañá do xoves, 24 de abril, para rexistrar un máximo de 40 propostas de resolución, que serán negociadas ao longo de todo o día tendo como prazo ata as 22.30 para rexistrar as transaccións e propostas de votación por separado.

O Debate sobre Política Xeral retomarase o venres, a partir das 11 horas co debate das propostas de resolución, no que cada grupo parlamentario disporá dunha primeira quenda de 30 minutos para defender as propostas propias e dunha segunda quenda de 10 minutos para a fixación da súa posición respecto das propostas dos demais grupos parlamentarios.

As deputadas populares Carmen Pomar e Ethel Vázquez mantiveron un encontro con mozos e mozas en Santiago para coñecer as súas preocupacións e necesidades á hora de independizarse e ser autónomos, e explicaron que o novo Plan Estratéxico de Xuventude 2025-27 da Xunta facilitaralles as ferramentas, recursos e oportunidades necesarios para o seu pleno desenvolvemento na vida activa e a súa emancipación.

Carmen Pomar e Ethel Vázquez explicaron que o novo Plan Estratéxico de Xuventude conta cunha dotación económica de máis de 700 millóns de euros e inclúe máis de 130 medidas a desenvolver nos vindeiros tres anos para facilitar a empregabilidade da xente moza, o seu benestar e contribuír á súa emancipación.

500 NOVAS PRAZAS EN RESIDENCIAS

“Os mozos e mozas puxeron enriba da mesa que a vivenda, a mobilidade internacional, a inserción laboral ou a saúde mental son os temas que máis lles preocupan e demandan, e para iso consideran necesarios plans específicos que teñan en conta as dificultades que teñen nestes ámbitos e accións concretas destinadas a minoralas”, indicaron as deputadas populares.

Ademais de incorporar medidas concretas para atender estas demandas da xuventude, o Plan Estratéxico tamén inclúe a creación de 500 novas prazas en residencias para os mozos que estean estudando ou aqueles se procedan á súa incorporación ao mercado laboral.

As deputadas do Grupo Popular Nicole Grueira e Katy Varela salientaron hoxe o “paso adiante” para a reforma do mapa de transporte público por estrada que supuxo a aprobación no Congreso o pasado xoves da iniciativa impulsada polo Partido Popular, coas únicas abstencións dos socios do Goberno central PSOE e de Sumar, polo que solicitaron ao Goberno central que “convoque a Conferencia Sectorial de Transporte e abra unha negociación cos afectados e as comunidades autónomas para configurar un novo mapa que atenda realmente as necesidades dos cidadáns e non suprima os servizos existentes”.

Acompañadas do alcalde do Corgo, Felipe Labrada, Nicole Grueira e Katy Varela lembraron que 11 concellos lucenses (Pontenova, Meira, Guitiriz, Palas de Rei, O Corgo, Baralla, Monterroso, As Nogais, Pedrafita, Chantada e Quiroga) verían como o mapa aprobado polo Goberno de Pedro Sánchez no ano 2022 suprimía paradas do servizo de transporte estatal en autobús. “A medida afectaba especialmente á provincia de Lugo, o que supón un castigo máis para todos os lucenses por parte do Goberno de Pedro Sánchez”, engadiron.

HALO DE ESPERANZA

“Agora, logo da iniciativa do Grupo Popular aprobada polo Congreso esta semana, ábrese un halo de esperanza para que estes concellos manteñan un servizo imprescindible para a mobilidade dos seus veciños, especialmente nestas zonas do rural e con menor densidade de poboación”, sinalaron as deputadas populares, quen anotaron que “estas liñas regulares de autobús non comunican so con outras comunidades autónomas, senón que favorecen a mobilidade entre localidades da nosa provincia”.

Deste xeito, consideraron “urxente” que o Goberno de Pedro Sánchez abra un proceso de diálogo coas comunidades autónomas para a elaboración do novo mapa de transporte público por estrada, “que debería pasar pola convocatoria dunha Conferencia Sectorial de Transportes, un órgano que leva tres anos sen reunirse a pesar de que debería facelo cada seis meses”.

Nicole Grueira e Katy Varela avanzaron que tamén pediran desde o Parlamento de Galicia que calquera proposta sobre o transporte público por estrada incorpore as demandas trasladadas desde Galicia en relación con este servizo, en particular que se teñan en conta as peculiaridades xeográficas e de poboación da Comunidade galega, prestando especial atención as conexión do rural.

Os deputados do Grupo Popular Miguel Fidalgo e Raúl Santamaría demandaron hoxe demandaron hoxe unha regulación europea no sector da pesca “máis xusta e que escoite tanto aos profesionais do mar como ás comunidades autónomas”. Así mesmo, amosaron a aposta firme da Xunta pola modernización e a adaptación do sector pesqueiro galego ás novas tendencias e necesidades deste sector como camiño seguro para acadar unha pesca galega innovadora, sostible e respectada en todo mundo.

Nunha visita ás instalacións do Grupo Eurored en Redondela, Miguel Fidalgo e Raúl Santamaría coñeceron o traballo que desenvolve esta compañía con máis de 45 anos de experiencia dedicados ao deseño e elaboración de artes de pesca, acuicultura e subministros de ferretería naval. “Unha empresa que leva a industria pesqueira no seu ADN e que defende un sector estratéxico que da emprego, vida e progreso para Galicia”, manifestaron.

FLOTA MODERNA

“Investir en pesca é investir en innovación, tecnoloxía e futuro, porque unha flota moderna é unha flota máis eficiente, segura a sostible”, afirmaron os deputados populares ao coñecer as solucións aportadas polo Grupo Eurored para acadar un sector pesqueiro moderno e competitivo.

Así mesmo, Fidalgo e Santamaría recolleron a queixa pola sobrecarga normativa que existe no ámbito pesqueiro, ante o que reclamaron unha regulación europea máis xusta e que escoite aos profesionais do mar. “Quedounos claro que o sector pesqueiro é o primeiro interesado en conservar o mar e os seus recursos, ante o que defenden unha pesca sostible que protexa os nosos ecosistemas e a nosa identidade”, indicaron.

O portavoz do Grupo Popular, Alberto Pazos, afirmou hoxe que a próxima celebración do Debate sobre o Estado da Autonomía “é unha mostra máis da importancia de contar en Galicia cun Goberno que da estabilidade política, respecta a normalidade democrática e defende a transparencia nas súas accións, todo o contrario do Goberno de Pedro Sánchez, que só celebrou un Debate de Política Xeral nos sete anos que leva de presidente”.

Así mesmo, avanzou que, despois de asinar a transferencia das competencias sobre o litoral galego, “seguiremos traballando para ampliar o autogoberno de Galicia, coa cesión de novos traspasos como a AP-9, os servizos de meteoroloxía, a homologación de títulos e a axilización dos permisos de residencia, ou a xestión do ingreso mínimo vital”.

Alberto Pazos comezou a súa comparecencia ante os medios amosando a súa satisfacción pola resolución do problema laboral que viviu a factoría de Sargadelos en Cervo, “unha solución na que tivo unha importancia vital a implicación da Xunta de Galicia, a través da Consellería de Emprego, que conseguiu convencer ao propietario da empresa para que a actividade na fábrica volverá á normalidade”. “O Goberno galego seguirá mantendo contacto directo cos responsables de Sargadelos para implantar nas instalacións todas as melloras que sexan necesarias para a protección da saúde dos traballadores, ao mesmo tempo que solicitará á Inspección de Traballo a máxima flexibilidade, dentro da legalidade, para que este emblema histórico, cultural e económico de Galicia poida continuar coa súa produción”, indicou.

Respecto da solicitude feita polo propio Presidente Alfonso Rueda para a celebración o máis pronto posible despois da Semana Santa do Debate sobre o Estado da Autonomía, o portavoz popular afirmou que esta sesión “servirá para contrastar o moito que o Goberno galego ten feito xa neste primeiro ano de lexislatura e os novos proxectos que afrontará a curto e medio prazo para dar cumprimento ao recollido no seu programa electoral co que se presentou ás eleccións autonómicas do pasado ano, fronte á demagoxia e ás falsidades que adoitan utilizar tanto o BNG como o PSdeG para esconder a súa falta de proxecto político, que se reduce á celebración de algaradas continuas para tensionar a rúa e dar a sensación dunha intensa conflitividade social que, en realidade, non existe entre a inmensa maioría dos galegos”.

O portavoz popular salientou “a normalidade democrática” que se vive en Galicia coa celebración cada ano do Debate de Política Xeral, unha situación que comparou coa situación que se vive a nivel estatal, onde o Goberno de Pedro Sánchez só celebrou un Debate sobre o Estado da Nación nos sete anos que leva de presidente. “Esta situación motivou que o Grupo Popular no Congreso presentara unha proposición de lei no Congreso para obrigar á celebración cada ano dun Debate sobre o Estado da Nación, do mesmo xeito que implantou Alberto Núñez Feijóo en Galicia hai 10 anos”, explicou.

COMPETENCIA DESDE A ADMINISTRACIÓN MÁIS PRÓXIMA

Alberto Pazos tamén se referiu á sinatura o pasado mércores do traspaso a Galicia das competencias sobre o litoral, “que levamos varios anos esperando e que, desde o vindeiro 1 de xullo, exerceremos con total responsabilidade, respectando a legalidade e,mellorando a xestión do noso litoral, ao adoptar as decisións desde unha administración máis próxima e que mellor coñece a súa riqueza económica, social e cultural, e a conservación do noso medio ambiente”.

Neste sentido, criticou “o desprezo” co que acolleron BNG e PSdeG este traspaso, que se traduciu na “ausencia inxustificable dos seus líderes no acto de sinatura celebrado no Pazo de Raxoi, despois de que puxeran todos os atrancos posibles para atrasar ou impedir a transferencia, chegando ao punto de que o propio Goberno de Pedro Sánchez considerou esta demanda ‘case como unha declaración de independencia’”.

“Pero tamén hai que lembrar que o BNG cansouse de pedir no Parlamento galego que esta transferencia se fixera a través dunha reforma no Congreso do Estatuto de Autonomía, unha proposta que tamén apoiaron os socialistas galegos e que puxo de manifesto a súa propia división interna entre os que apoiaban a Lei impulsada polo Goberno galego, como era o caso do entón secretario xeral, Valentín González Formoso, e os que, dirixidos polo daquela delegado do Goberno e agora secretario xeral e portavoz neste Parlamento, defendían que era necesario reformar o Estatuto”, lembrou.

Pazos sinalou que a cesión a Galicia das competencias sobre o litoral “non vai facer que nos esquezamos doutros traspasos sobre as que o Goberno galego e o Partido Popular de Galicia temos posto o noso obxectivo”. En concreto, referiuse á transferencia da AP-9, que lamentablemente xa leva 42 aprazamentos, por decisión da Presidenta socialista da Mesa do Congreso, ao prazo de presentación de emendas á proposición de lei aprobada por unanimidade neste Parlamento galego; as competencias en materia de meteoroloxía, co obxectivo de que este servizo se preste dun xeito máis racional e desde unha rede de estacións moito máis ampla que a que ten en Galicia a Axencia Estatal de Meteoroloxía; a transferencia na homologación de títulos e a axilización dos permisos de residencia e traballo, para facilitar a incorporación de estranxeiros ao mercado laboral galego, sobre todo naqueles sectores que están demandando urxentemente man de obra e profesionais; e a xestión do ingreso mínimo vital, unha cuestión que seguimos esperando desde hai tres anos para compatibilizar esta prestación coa nosa Risga.

RECTIFICAR O MAPA DE TRANSPORTE PÚBLICO POR ESTRADA

Por último, Alberto Pazos salientou a aprobación onte no Congreso da proposta do Grupo Popular, sen votos en contra, para que o Goberno de Pedro Sánchez reconsidere e rectifique a súa proposta do novo mapa concesional de transporte por estrada, que ten uns evidentes prexuízos de importancia para os galegos porque deixa illados a máis dunha vintena de concellos, con máis de 130.000 habitantes; elimina 87 paradas nas catro provincias; reduce un cento de conexións entre os concellos galegos e máis de 70 con outras comunidades autónomas; e deixa localidades galegas sen paradas nas rutas estatais, obrigando aos viaxeiros a facer transbordos francamente innecesarios.

“Pedimos ao Goberno de Pedro Sánchez que recoñeza o seu erro e retire o plan previsto, convocando urxentemente a Conferencia Sectorial de Transportes, que leva desde o ano 2022 sen reunirse, para, en coordinación coas comunidades autónomas, elaborar un novo plan que realmente mellore a prestación dos servizos de transporte público aos cidadáns”, demandou.

Os deputados do Grupo Popular Jesús María Fernández Rosende e Miguel Fidalgo mantiveron onte unha xuntanza en A Coruña co presidente da Asociación Española de Titulados Naútico-Pesqueiros (Aetinape), José Manuel Muñiz, e o asesor desta organización Vicente Yáñez para anunciarlles a presentación dunha proposición non de lei no Parlamento galego a través da que se solicita ao Goberno de España a implantación de novas medidas de seguridade marítima coas que afrontar con garantías as situacións de risco que poidan xurdir tanto para a flota profesional como para a deportiva.

Fernández Rosende e Miguel Fidalgo amosaron hoxe o seu pesar polo pasamento do profesor José Manuel Costas Capelo, unha persoa que colaborou directamente co Grupo Popular, xunto con outros expertos de Aetinape, na elaboración desta proposición non de lei e a quen agradecen sinceramente as súas aportacións. “O noso apoio e ánimo á súa familia, amigos e compañeiros en Aetinape e imos traballar para que esta iniciativa e todo o que nela se recolle sirva de homenaxe ao profesor Costas Capelo”, apuntaron.

SEGUIR INNOVANDO

En concreto, a iniciativa parlamentaria do Grupo Popular solicita que se estude a posibilidade de substituír as bengalas progresivamente ou, en todo caso, combinalas con sinais luminosos baseados en tecnoloxía LED, implementando formación práctica no uso destes dispositivos.

A proposta pide que se estude a posibilidade de sinalizar os polígonos de bateas e calquera outra instalación de acuicultura ou flotante, con vértices virtuais nas cartas de navegación, de tal xeito que resulten perfectamente identificables polos plotters GPS. Ademais, solicítase avaliar a prohibición ou condicionar a navegación, ben sexa profesional ou deportiva, en función das previsións sobre determinadas condicións meteorolóxicas; ao tempo que se estude a posibilidade de instalar nos pesqueiros de certa envergadura e en función do seu número de tripulantes, embarcacións de supervivencia ou de salvamento ríxidas, reguladas pola normativa, similares ás empregadas nos mercantes e nas que se poida abandonar o buque en condicións de sobrevivir no mar.

Fernández Rosende insistiu na “importancia de incorporar todas as medidas que contribúan á mellora das condicións de seguridade nas que a poboación galega vinculada a actividades marítimas realizan o seu traballo”. “É necesario seguir innovando e que as solucións adoptadas teñan unha capacidade protectora ampla e universal, tanto para a flota profesional, ben sexa mercante ou pesqueira, como para a flota deportiva”, apuntou.

“É de capital importancia seguir incorporando novas posibilidades de mellora de seguridade abordo e, complementariamente, formar nelas a todos aqueles que, pola razón que sexa, saen ao mar”, indicou o deputado popular, quen subliñou que desta forma “estarase favorecendo a supervivencia no medio mariño daqueles traballadores ou persoa que se embarque no mar se vexan expostas a situacións de risco”.

O Parlamento de Galicia aprobou hoxe, co voto en contra de BNG e PSdeG, a proposición non de lei do Grupo Popular a través da que se solicita Goberno de España que, en diálogo co conxunto das comunidades autónomas, acorde unha repartición de migrantes menores non acompañados dun xeito planificado e acompañado do financiamento preciso. “Calquera menor ten dereito a ser acollido nunhas condicións dignas e coas máximas garantías, polo que estamos en contra de acoller a menores para os que non haxa cabida sen garantir os seus dereitos”, manifestou a portavoz popular de Política Social, Raquel Arias.

Na súa intervención, Raquel Arias asegurou que “Galicia e os galegos somos solidarios e así o vimos demostrando nos últimos anos, en particular coa acollida e integración de inmigrantes”. Neste sentido, apuntou que Galicia ten acollidos neste momento 276 menores non acompañados, o que supón unha sobreocupación da rede galega do 108 por cento.

INTOLERABLE

“É intolerable que a modificación do artigo 35 da lei de estranxeiría sexa froito dunha nova chantaxe e imposición dos independentistas cataláns para que Pedro Sánchez permaneza na Moncloa un tempo máis, como tamén é intolerable que o Goberno de España tome decisións que afectan ás comunidades sen ningún tipo de diálogo coas mesmas e que esta imposición sexa sen planificación e non vaia acompañada do financiamento necesario”, indicou.

Neste sentido, considerou “absolutamente necesario este financiamento, porque estamos falando de menores, de persoas tremendamente vulnerables e aos que temos que darlle a mellor calidade de vida”. Así, lembrou que “cada vez que un menor entra a formar parte do sistema de protección da Xunta recibe atención integral na que se contempla a súa formación, coidados e todos os servizos que un neno ou adolescente pode necesitar as 24 horas do día”.

Respecto dos 326 menores que lle corresponderían a Galicia no reparto acordado polo Goberno de Pedro Sánchez cos independentistas cataláns, a portavoz popular indicou que “suporía para a nosa Comunidade un custo anual de 30 millóns de euros, cando o Estado só contempla destinar 100 millóns de euros para toda España, pagando unicamente o primeiro ano de acollemento”.

“Pero, o máis preocupante é que non temos capacidade suficiente para acoller a 326 menores máis e atendelos axeitadamente”, asegurou Raquel Arias, quen lembrou que “as competencias en política migratoria e de control de fronteiras son exclusivas do Estado”.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que presente de inmediato un Plan Director do Corredor Atlántico ferroviario que inclúa compromisos concretos, cifras detalladas e prazos definidos para a execución das obras.

Así mesmo, demándase que aclare a composición e funcionamento do grupo de traballo creado recentemente e, de ser o caso, garanta a participación da Xunta no mesmo; ao tempo que nomea, con carácter urxente, o interlocutor de Renfe coa Xunta, comprometido hai máis de oito meses, para informar das incidencias e avances en infraestruturas ferroviarias; e acelere os traballos da saída sur de Vigo para garantir a súa finalización nun prazo razoable, garantindo así a conexión efectiva de Galicia co resto do Corredor Atlántico e con Portugal.

O portavoz popular de Mobilidade, Gonzalo Trenor, criticou que “a relación do Goberno de Pedro Sánchez con Galicia está marcada polos incumprimentos, polas deslealdades e polo trato desigual”, e puxo como exemplo a financiación autonómica, os recursos para a dependencia, o reparto dos PERTES para a industria, o control do lobo, a transferencia da AP-9 ou a condonación da débeda.

DÉBEDAS EN MATERIA FERROVIARIA

“Pero hai un tema que sobresae e é todo o que ten que ver co ferrocarril”, concretou o portavoz popular, quen apuntou que “son moitas as demandas que están sobre a mesa: desde que o AVE chegue a todas as cidades galegas, que os servizos existentes cumpran os mínimos estándares de puntualidade, que se recuperen os servizos suprimidos pola pandemia, que se incrementen as prazas, que se nomee ao interlocutor con RENFE ou que podamos ver xa o plan director do Corredor Atlántico”.

Gonzalo Trenor lembrou que, no caso do Corredor Atlántico ferroviario “estivemos anos pelexando porque se escoitase a Galicia e, despois, estivemos máis anos reclamando un plan director e un comisionado”. “Só cando o Goberno galego, o asturiano e o castelán-leonés convocaron en Santiago a máis de mil representantes da empresa, da universidade e dos colexios profesionais, o Goberno de Pedro Sánchez anunciou o nomeamento deste comisionado”, lembrou.

Ademais, o portavoz popular manifestou que “todo o que imos coñecendo respecto ao Corredor Atlántico é moi pouco alentador para os intereses de Galicia, desde que a finais do pasado mes de xullo soubemos que volvemos a quedar fora, por segundo ano consecutivo, dos fondos europeos para este proxecto; ata que descoñecemos as propostas que presentou o Goberno de España ao mecanismo Conectar Europa; ou a novas sobre o abandono absoluto de Galicia no que respecta á planificación de diferentes actuacións”.

Para rematar, Gonzalo Trenor agradeceu que esta iniciativa “saíra co voto unánime de todos os deputados do Parlamento de Galicia”, aínda que augurou que “despois seremos nós, os deputados do PP, os que nos quedemos sos defendendo o Corredor Atlántico ferroviario”.

A portavoz de Sanidade do Grupo Popular, Encarna Amigo, criticou hoxe “a demagoxia e o alarmismo do BNG” respecto do incidente ocorrido no Hospital Materno-Infantil de Ourense, logo do caída dun falso teito, e salientou que a Xunta “reaccionou con axilidade, dando unha solución urxente adiantando a reubicación dos servizos de paritorios, hospitalización infantil e obstétrica noutros espazos do Hospital de Ourense para manter a actividade asistencial e garantir tranquilidade a pacientes e profesionais”.

“Mentres se moderniza o Complexo Hospitalario Universitario de Ourense, con proxectos rigorosos baseados en criterios técnicos e no diálogo cos profesionais, o BNG insiste en desinformar e xerar alarma”, lamentou a portavoz popular, quen afirmou que “o BNG pretende dar leccións sobre planificación sanitaria cando, en realidade, actúa como a inquisición moderna: atacando sen fundamento, opinando sen coñecemento técnico e poñendo en dúbida o traballo de profesionais e expertos”.

A RENOVACIÓN MÁIS AMBICIOSA DA HISTORIA

Encarna Amigo salientou que a Xunta está a acometer “a renovación hospitalaria máis ambiciosa da historia de Galicia” e situou como un dos exemplos máis contundentes as obras do Complexo Hospitalario de Ourense, onde os investimentos superan os 80 millóns de euros desde o ano 2020.

En concreto, referiuse á nova área UCI, dotada con equipamento de última xeración tras un investimento de 10 millóns de euros; ou a nova unidade de medicina nuclear, con 2,8 millóns de euros investidos e que, por primeira vez, permite facer probas PET en Ourense.

“O núcleo central deste proceso de modernización e renovación é o novo edificio hospitalario de 12 plantas e 52,6 millóns de euros de investimento, que albergará áreas de hospitalización, urxencias e radioloxía; e no que tamén se construirá un novo Hospital Materno-Infantil, que substituirá o actual para garantir un maior rendemento do investimento, unha vida útil máis longa e unha mellor atención para as familias ourensáns”, manifestou.

A portavoz de Xuventude do Grupo Popular, Nicole Grueira, asegurou hoxe no Pleno do Parlamento galego que a Xunta “está a traballar con compromiso, esforzo e responsabilidade para facilitar a emancipación da mocidade galega” e puxo como exemplo o novo Plan Estratéxico de Xuventude 2025-2027, aprobado onte no Consello da Xunta e que conta con 133 medidas ás que se destinarán máis de 700 millóns de euros.

Nicole Grueira recoñeceu que “a xuventude galega se enfronta a importantes dificultades á hora de emanciparse”, situando “o problema da vivenda como un dos principais obstáculos”. “Este é un reto real que require vontade política, traballo, planificación e accións reais, que se materialicen en medidas e axudas positivas á mocidade”, dixo.

MEDIDAS CONCRETAS

En concreto, a portavoz popular referiuse ás medidas postas en marcha pola Xunta, como o bono Emancípate; as bonificacións fiscais para facilitar a compra dunha vivenda en Galicia; as axudas directas de ata 20.000 euros para vivenda pública; a reserva do 40 por cento das novas vivendas públicas en alugueiro para menores de 36 anos e do 25 por cento para os que decidan comprar; os avais que cobren o 20 por cento da hipoteca; o bono alugueiro mocidade; ou a axuda ao alugueiro do plan de vivenda.

A portavoz popular tamén salientou que a Xunta “ten en marcha a Estratexia Galicia Retorna, dotada con 450 millóns de euros para favorecer a volta de 30.000 persoas”. “Unha estratexia positiva, como se pode comprobar na última enquisa sobre inmigración realizada polo INE en 2023, onde se indica que o saldo migratorio en Galicia foi positivo, volvendo acadar por terceiro ano consecutivo unha cifra histórica, xa que case 8.500 galegos volveron para a súa terra!”, indicou.