Categoría: Parlamento de Galicia

 

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que habilite, mediante os procedementos que resulten necesarios, que as empresas que desexen patrocinar actividades turísticas ao abeiro do Xacobeo 2027 o poidan facer a partir do 1 de xaneiro de 2025.

O portavoz de Turismo do Grupo Popular, Borja Verea, lamentou que a falta de orzamentos do Estado está a impedir a declaración do Xacobeo 2027 como evento de especial interese público, que permitiría poñer en marcha os incentivos fiscais de apoio ao Xacobeo e abrir a porta á colaboración público-privada.

En concreto, este mecanismo fiscal permitiu que no pasado Xacobeo 2021-22 un total de 40 empresas aportaran 28 millóns de euros para a organización deste evento.

Ademais, Borja Verea lembrou o consenso amosado respecto desta solicitude no Consello Xacobeo celebrado o pasado 1 de xullo, no que se acordou pedir ao Goberno de España a declaración como evento de especial interese público.

A iniciativa do Grupo Popular complementouse cunha emenda do Grupo Socialista a través da que se solicita o deseño dun mapa territorial por toda a xeografía galega que chegue ao máximo número de concellos e, cando menos, a todas as comarcas galegas, facer unha distribución equitativa e igualitaria das actuacións de maior impacto por todo o territorio; e que o acceso aos distintos eventos sexa en igualdade de condicións.

 

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se esixe ao Goberno central accións inmediatas de mellora da N-541 entre Punxín e Pontevedra para reducir a alta sinistralidade nesta vía de comunicación, adaptando esta estrada ás necesidades de tráfico que garantan a seguridade de vehículos e dos habitantes dos núcleos de poboación polos que transcorre, así como se realice un estudio de viabilidade que contemple unha autovía ou vía de alta capacidade sen pasar por núcleos de poboación entre O Carballiño e Pontevedra.

O deputado popular Argimiro Marnotes explicou que a N-541 conecta Punxín con Pontevedra, pero é tamén un 75 por cento do percorrido natural entre as cidades de Ourense e Pontevedra. “Esta estrada nacional é unha das principais preocupacións en materia de seguridade viaria en Galicia, que cubre as necesidades dunhas 218.000 persoas, cun tráfico intenso de turismos particulares e transporte industrial, sendo escenario habitual de accidentes graves, algúns de les con resultados fatais”.

PROBLEMÁTICA RECORRENTE

En concreto, Marnotes lembrou o accidente do autobús ocorrido o 24 de decembro de 2022 que causou a morte de sete persoas, pero tamén doutros sinistros máis recentes acontecidos ao longo dos anos 2023 e 2024. “Non estamos a falar de accidentes illados, senón dunha problemática recorrente que afecta a todos os concellos polos que transcorre a N-541”, indicou o portavoz popular, quen salientou que “agora é co Pacto do Pedre desde onde se fai toda a forza social como representación da súa veciñanza para reclamar unha solución estrutural e integral de toda a N-541, facendo entre as súas alcaldías un xestión de unión que lles honra”.

“A N-541 ten que estar adaptada á circulación que se require por uso e costume, e non pode deixar de ser unha posibilidade de crecemento de todos os concellos polos que transita”, manifestou o deputado popular.

DECEPCIONANTE RESPOSTA DO GOBERNO CENTRAL

Argimiro Marnotes considerou “decepcionante” a resposta do Goberno central no Senado á pregunta formulada polo Partido Popular respecto do estado da N-541, ao afirmar que “xa teñen, ao igual que noutras estradas nacionais, contratos de mantemento e que actuarán en función das prioridades e disposición económica, desbotando calquera mellora estrutural e tamén a elaboración dun estudo sobre a posible construción dunha autovía ou vía de alta capacidade alternativa, instando aos usuarios a empregar alternativas como a AP-9, a A-52 ou a AG-53”.

“Esta resposta é absolutamente insuficiente e demostra unha falta de empatía e comprensión das necesidades reais do territorio e das relacións sociais e comerciais entre as distintas poboacións afectadas”, rematou.

O portavoz de Medio Ambiente do Grupo Popular, Gonzalo Trenor, salientou hoxe no Pleno do Parlamento galego que o organismo Augas de Galicia contará en 2025 cun orzamento próximo aos 144 millóns de euros, o que supón un incremento do 4,7 por cento, para continuar na mellora das augas das rías e ríos galegos, da que se abastecen tamén os fogares, industrias e empresas da Comunidade galega.

 

“Será un investimento millonario en saneamento e abastecemento distribuído en tres grandes eixos: a construción de infraestruturas, a execución de políticas activas de resposta ante o cambio climático e a formación e divulgación para concienciar sobre unha xestión eficaz da auga desde as nosas casas, como usuarios, ata o xestor profesional”, sinalou Trenor.

 

Neste sentido, o portavoz popular subliñou que “o 80 por cento das masas de auga que son de competencia autonómica están en bo estado, un dato que contrasta co 56 por cento no que se sitúa a media estatal”. “Este resultado é posible gracias a que Augas de Galicia realiza un importante esforzo inversor en infraestruturas e un traballo de inspección e vixilancia a través dos mecanismos que ostenta e das súas competencias”, explicou.

 

Gonzalo Trenor referiuse ao Programa de control de vertidos, “a través do que Augas de Galicia realiza un control moi estrito dos vertidos que se producen, especialmente nas rías galegas”. Dotado anualmente con dous millóns de euros, este plan realizou ao longo de 2023 case 10.000 visitas e inspeccións a puntos de vertido, atendendo 635 alertas. Así mesmo, este plan permitiu reducir 36 puntos os vertidos identificados como contaminantes e emendar 650 puntos de vertedura contaminante nas nosas rías.

 

Por último, o portavoz popular fixo un chamamento ao resto de administracións públicas para que “colaboren e fagan as súas aportacións para a mellora das nosas rías, do mesmo xeito que está a facer a Xunta de Galicia”.

O portavoz de Medio Ambiente do Grupo Popular, Gonzalo Trenor, reiterou hoxe no Pleno do Parlamento galego a solicitude para que “Galicia teña a competencia para que os seus avisos meteorolóxicos teñan validez oficial, polo que imos seguir reclamando ao Estado o traspaso das facultades en materia de meteoroloxía, porque é un servizo vital para a cidadanía”. “Agardamos que o Goberno central proceda a esta transferencia porque, de non ser así, tramitaremos unha lei propia de meteoroloxía”, avanzou.

 

Gonzalo Trenor subliñou que Meteogalicia “está considerada como unha das axencias máis importantes e punteiras no seu campo”. En concreto, dixo que este servizo meteorolóxico “emprega intelixencia artificial e está constituído por 160 estacións, case o triplo que AEMET, ademais de contar cun radar meteorolóxico”.

 

“Polo tanto, as predicións e avisos de Meteogalicia e o resto de ferramentas das que dispón este servizo permítenos anticiparnos aos fenómenos meteorolóxicos adversos que afectan á saúde das persoas, como as vagas de calor, inundacións ou incendios”, manifestou.

O Pleno do Parlamento de Galicia aprobou hoxe por unanimidade a nova Lei de estatística de Galicia, un texto normativo que adapta a lexislación vixente desde hai 36 anos tendo en conta a achega de nova regulamentación, o desenvolvemento da tecnoloxía e a multiplicación das fontes de datos.

 

A viceportavoz do Grupo Popular, Cristina Sanz, sinalou que “os datos estatíticos contrastados e accesibles son unha ferramenta crucial para combater a desinformación e para tomar decisións en base a datos certos e de calidade”. “Necesitamos un sistema estatístico público sólido que ofreza datos oficiais para loitar con veracidade fronte á especulación, decidir a partir do rigor científico e a transparencia, e fomentar o pensamento crítico”, concretou.

 

“Desde os primeiros tempos, a actividade estatística galega estivo sometida aos principios de interese público, obxectividade, corrección técnica, confidencialidade e publicidade obrigatoria dos resultados”, pero co paso do tempo “a estatística oficial foi crecendo, mellorando e ampliando as informacións demográfica, social, económica, cultural e ambiental de Galicia”, sinalou a viceportavoz popular.

 

DATOS CONTRASTADOS

 

Cristina Sanz manifestou que esta nova lei adáptase á normativa actual sobre estatística e ao desenvolvemento da tecnoloxía, reforzando e garantindo o acceso do Instituto Galego de Estatística ás fontes administrativas para explotar e enlazar rexistros, integrando os datos en bases que multipliquen a información, xeren indicadores máis rápidos e permitan superar as delimitacións xeográficas tradicionais.

 

Así mesmo, a nova lei conecta o sistema estatístico, a planificación económica e a avaliación do impacto de políticas públicas, facilitando a investigación científica e o acceso dos investigadores aos datos protexidos polo segredo estatístico, baixo protocolos que preserven a confidencialidade.

 

“En definitiva, unha estatística galega que nos ofreza datos contrastados como piar fundamental dunha sociedade máis informada e crítica, unha estatística que protexa e fortaleza a nosa sociedade e a democracia”, rematou a viceportavoz popular.

O Pleno do Parlamento de Galicia aprobou hoxe a Lei de medidas fiscais e administrativas, que acompaña aos orzamentos da Xunta de Galicia e que incorpora novas rebaixas de impostos, como o de sucesións ou de transmisións patrimoniais, así como accións dirixidas a estimular a posta no mercado de vivendas de aluguer.

 

O viceportavoz do Grupo Popular, Julio García Comesaña, lembrou que o Tribunal Constitucional configurou este tipo de normas como “leis ordinarias cuxo contido está plenamente amparado pola liberdade de configuración normativa de que goza o lexislador e que permiten unha mellor e máis eficaz execución do programa de goberno”. “Así, esta lei contén un conxunto de medidas referidas a diferentes áreas de actividade que, con vocación de permanencia no tempo, contribúan á consecución de determinados obxectivos de orientación plurianual perseguidos pola Comunidade galega a través da execución orzamentaria”, indicou.

 

BENEFICIO A MÁIS DO 80% DOS DECLARANTES

 

En concreto, García Comesaña salientou que este ano apróbase unha nova mellora no imposto de sucesións a través da que a redución se aplica a irmáns, tíos, sobriños, sogros, cuñados, xenros e noras, que suporá que as herdanzas de ata 25.000 euros a favor de calquera persoa deste grupo de parentes non tribute.

 

“En conxunto, as rebaixas do imposto de sucesións permitiron aforrar aos contribuíntes galegos 128 millóns de euros na súa declaración no ano 2022 e cerca de 280 millóns de euros no ano 2023, sendo o máis significativo de todo isto que a maior rebaixa a recibiron as rendas medias e baixas, en concreto nos tres primeiros tramos da tarifa, onde se concentra aproximadamente máis do 80 por cento dos declarantes”, explicou.

 

Respecto das medidas dirixidas ao ámbito da vivenda, o vindeiro ano estableceranse dúas deducións para estimular ás persoas propietarias de vivendas baleiras a súa posta no mercado do aluguer.

 

Por unha banda, poderanse beneficiar aquelas persoas que teñan algunha vivenda baleira que para poñela en condicións de ser alugada precise determinadas obras. Neste caso, permitirase deducir un 15 por cento do custe das obras, cunha base máxima de 9.000 euros por vivenda, sempre que o valor de mercado da vivenda non supere os 300.000 euros.

 

Por outra banda, tamén se beneficiarán aquelas persoas que conten cun número pequeno de vivendas e que non se decidan a poñelas en aluguer por entender que non lles compensa asumir os riscos de arrendalas. Para incentivar que o fagan, permitirase deducir ata 500 euros por vivenda ano no que se alugue, sempre que a renda non supere os 700 euros mensuais.

 

IMPOSTO DE TRANSMISIÓNS PATRIMONIAIS

 

Julio García Comesaña subliñou que “máis de 1.100.000 familias se teñen beneficiado desde o ano 2016 das distintas opcións de rebaixa no imposto de transmisións patrimoniais impulsadas polo Goberno galego para facilitar o acceso a unha vivenda, ás que a partir do vindeiro ano engadiranse dúas novas formas: apoiando a vivenda protexida de promoción pública e estimulando ás persoas propietarias a poñer os bens inmobles no mercado de aluguer”.

 

No primeiro caso, exímese de tributación no imposto de transmisións patrimoniais todas as operacións implicadas na construción e financiamento da vivenda protexida de promoción pública, establecendo unha dedución na cota do 100%. Esta medida afectará á promoción de 2.350 vivendas.

 

No segundo caso, adóptanse dúas medidas neste imposto: por unha banda, equipáranse os locais comerciais que se destinen a uso de vivenda ás vivendas, de xeito que as operacións gravadas polo tributo se beneficien dos tipos bonificados recoñecidos para as vivendas; e, pola outra, estimúlanse as operacións de promoción, construción e rehabilitación de vivendas que se poñan no mercado do aluguer cunha serie de requisitos que se deben cumprir para poder beneficiarse dunha dedución do 75 por cento na cota do imposto.

 

Esta lei tamén aborda, entre outras cuestións, aspectos como a modificación, simplificación e axilización do procedemento para o recoñecemento da situación de dependencia e o dereito a prestación do Sistema para a Autonomía e a Atención a Dependencia, coa posibilidade de tramitar conxuntamente o grado de dependencia e o grado de discapacidade, así como aspectos relacionados co sector eólico, a implantación da taxa turística por parte dos concellos galegos ou medidas para evitar as inundación.

O Pleno do Parlamento de Galicia aprobou hoxe os orzamentos da Xunta de Galicia para o ano 2025, unhas contas que acadan a cifra histórica de 13.953 millóns de euros e que “volven a situar a Galicia como unha illa de estabilidade en medio das turbulencias da política nacional”.

 

O portavoz do Grupo Popular, Alberto Pazos, salientou que “xa van 16 anos consecutivos nos que o Goberno galego completa a tramitación desta ferramenta lexislativa, que da estabilidade social, política e económica á Comunidade galega”.

 

A modo de resumo, Pazos manifestou que estes orzamentos “blindan e melloran o benestar social dos galegos dedicando, por primeira vez, máis de 10.000 millóns de euros a consolidar a sanidade galega, o sistema de ensino público, un escudo social sen precedentes e fomentando a creación de emprego como nunca antes se tivera feito”.

 

UNHA GALICIA MÁIS XUSTA E COHESIONADA

 

“Pero tamén impulsan unha importante aposta pola vivenda, que nos leve a duplicar o parque público antes de que finalice a lexislatura, ao tempo que realizamos unha decidida aposta pola industria e a innovación, como motores de oportunidades e situándonos sempre ao carón dos nosos sectores produtivos”, apuntou o portavoz popular, quen subliñou que “todo iso construíndo unha Galicia máis xusta e máis cohesionada gracias a unha fiscalidade centrada en axudar a aquelas que máis o precisan”.

 

Porén, Alberto Pazos lamentou que na tramitación dos orzamentos a oposición “nunca falla ao seu encontro coa demagoxia, o tremendismo e a falta de rigor”, porque “cada ano voltan, co mesmo convencemento que o ano anterior, a repetir as mesmas críticas mil veces repetidas, os mesmos mantras mil veces escoitados e a facer as mesmas propostas mil veces rexeitadas polos galegos”.

 

En concreto, respecto á crítica da oposición de que é un orzamento pensado para os ricos, Pazos indicou que “nada importa que Galicia teña unha das mellores fiscalidades para rendas baixas de todo o Estado, nada importa que o 87,3 por cento das bonificacións fiscais previstas teñan un marcado carácter social e que beneficien á inmensa maioría dos galegos que máis o precisan”.

 

“Para a oposición galega, garantir unha educación gratuíta desde a escola infantil ata rematar os estudos universitarios ou de formación profesional é cousa de ricos; mellorar o programa de cribados preventivos ou converter o calendario de vacinación galego no máis completo do mundo son prebendas que só favorecen aos poderosos; ou facilitar o acceso a vivenda pública ou a compra dun vehículo de segunda man son medidas pensadas para beneficiar aos millonarios”, manifestou.

 

PENSADOS PARA A GALICIA REAL

 

Para rematar, Alberto Pazos asegurou que “son uns orzamentos pensados para a Galicia real, para todos aqueles que cada día se levantan pensado en como gañar un futuro mellor para os seus, en como dar a mellor educación aos seus fillos, en como prestar a mellor atención aos seus maiores, en como sacar adiante o seu pequeno negocio ou en como chegar con certa folgura a fin de mes”.

 

“Eses son os problemas reais que preocupan aos galegos e ao Goberno de Galicia, e eses son os obxectivos que conforman o orzamento máis alto da nosa historia”, concluíu.

O portavoz do Grupo Popular, Alberto Pazos, fixo hoxe un balance do desenvolvemento da Comisión de Investigación sobre a contratación pública da Administración galega e afirmou que “comezou co obxectivo de difamar o bo facer do Goberno galego; pasou por ser un esperpento no que a oposición rozou en moitas ocasións o ridículo ao enfrontarse á realidade e ás verdades que lles manifestaban os comparecentes; e rematou como a Comisión da vergoña allea, ante o bochorno que tiveron que padecer os deputados do BNG que, despois de quedar acreditado o bo facer do Goberno do PP, viron destapada unha incipiente trama que ben poderíamos chamar nacionalismo de amiguetes”.

 

Alberto Pazos lembrou que “desde o primeiro momento dixemos que o Grupo Popular ía traballar nesta Comisión de Investigación para certificar o bo facer dos gobernos do PPdeG, tanto na construción do Hospital Álvaro Cunqueiro como nas contratacións levadas a cabo”. “E creo que o conseguimos: primeiro, porque a oposición non conseguiu o seu obxectivo de traer a Galicia o barullo provocado polos escándalos de corrupción que arrodean a Pedro Sánchez, ao seu Goberno e ao Partido Socialista; e, segundo, porque se confirmou que Galicia conta cun Goberno exemplar e que pon os intereses e o benestar de todos os galegos por enriba de todo”.

 

PREGUNTA SEN RESPOSTAR

 

Así, volveu cuestionar se a “lideresa do BNG está en condicións de asegurar que ninguén do seu entorno máis próximo se viu favorecido por contratacións menores realizados por administracións gobernadas polo BNG?, unha pregunta que, despois da intervención do noso portavoz na Comisión de Investigación podemos estender a outros insignes representantes do BNG, presuntamente beneficiados por contratos menores realizados por gobernos nacionalistas”.

 

“A verdade é que a Comisión de Investigación quedou finiquitada desde o momento en que tivo lugar, na súa terceira sesión, a comparecencia do conselleiro maior do Consello de Contas, o señor Juan Carlos Aladro e a posterior do ex conselleiro maior, o señor José Antonio Redondo”, sinalou o portavoz popular, quen destacou que “ambos botaron abaixo totalmente os argumentos utilizados polos grupos da oposición para crear esta Comisión de Investigación”.

 

En primeiro lugar, certificouse que todas as contratacións realizadas pola Xunta de Galicia foron totalmente legais e sometidas ao control dos órganos pertinentes. “É máis, os propios conselleiros maiores aseguraron que, de atopar calquera mínima cuestión que non se axustara á legalidade, teríano trasladado á Fiscalía para que o investigase xudicialmente, cousa que, como é patente, non teñen feito en ningún caso, avalando así todas e cada unha das contratacións realizadas pola Xunta nestes últimos anos”, indicou.

 

Ademais das comparecencias dos dous conselleiros maiores, Alberto Pazos afirmou que os propios grupos parlamentarios tiveron, e aínda teñen, á súa disposición unha extensa documentación sobre as contratacións realizadas pola Xunta desde o ano 2009 e o proceso seguido para a construción do Hospital Público Álvaro Cunqueiro, “sen que, ao seu pesar e despois de ter revisado minuciosamente toda esta documentación desde o pasado 22 de novembro, atoparan o máis mínimo dato co que poder sustentar as súas falacias sobre as supostas contratacións irregulares da Xunta de Galicia para beneficiar aos seus amigos”.

 

CONTRATOS MENORES: LEGAIS E ÚTILES

 

“Porque, como ben insistiron o mércores os ex altos cargos do Goberno bipartito, na parte correspondente ao BNG, que compareceron na Comisión, ‘os contratos menores en si non teñen ningún problema, son unha fórmula xurídica que está recollida na Lei de contratos do sector público. Son totalmente legais e son útiles para unha Administración pública, entre outras cousas, pola súa axilidade para determinadas cousas. Polo tanto, están recollidos na Lei de contratos e son para usar’”, recordou.

 

Respecto da construción do Hospital Público Álvaro Cunqueiro, o portavoz popular subliñou que “quedaron ben claras dúas cousas”. “Unha primeira, tal e como confirmou o propio conselleiro maior na súa comparecencia, que é totalmente falso que o Consello de Contas fale de sobrecusto nesta obra, xa que no seu informe está a comparar o custo que supuxo o modelo público-privado adoptado polo Goberno galego co investimento que conlevaría unha posible opción de financiamento público”, dixo.

 

Neste sentido, afirmou que esta posibilidade “quedou demostrado que era totalmente imposible naquel momento pola crise económica que se vivía e a prohibición para que as administracións públicas incrementaran a súa débeda”.

 

Ademais, tanto o informe realizado pola auditora Pricewaterhousecoopers como a comparecencia do representante da tamén auditora Garrigues “puxeron de manifesto que a opción que xa manexaba o Goberno bipartito de PSOE e BNG naquel momento era recorrer ao financiamento público-privado, non só para a construción dun hospital público en Vigo, senón outros 8 hospitais máis e 6 centros de alta resolución”, dixo.

 

“Tanto cacarexar e berrar que o Goberno do PPdeG recorrera ao financiamento publico-privado para a construción do Hospital Álvaro Cunqueiro, cando quedou moi claro que o Goberno bipartito tiña enriba da mesa os informes de dúas consultoras para a construción de hospitais públicos e centros de saúde con financiamento público-privado: en concreto, o informe de Garrigues falaba dunha sociedade mixta cun 90 por cento de capital privado e un 10 por cento de capital público; e Pricewaterhousecoopers, poñía de manifesto a falta total de financiamento público para esta obra a partir do ano 2008”, explicou o portavoz popular.

 

PAOS NAS RODAS

 

Xa para rematar, Alberto Pazos criticou a ausencia de representantes da oposición na reunión da ponencia da Comisión de Investigación para comezar a redactar as conclusións da mesma. “É lamentable que os grandes promotores desta Comisión de Investigación estean a poñer desde o primeiro momento paos nas rodas ao seu desenvolvemento, e a última falcatruada é a súa decisión de non asistir á convocatoria da reunión da ponencia, o que supón o máis claro exemplo de fuxida de perdedor e dunha perrencha infantil ao comprobar que non lle saen as cousas como queren ou como pretendían”.

 

“Desde o Grupo Popular imos seguir traballando para pechar como se merece esta Comisión de Investigación e acudiremos a todas as chamadas que se nos fagan desde os servizos xurídicos para levalo adiante”, asegurou.

O Grupo Popular demandará no Pleno da vindeira semana que o Goberno central habilite os mecanismos necesarios para que as empresas que desexen patrocinar o Xacobeo 2027 poidan facelo a partir do vindeiro 1 de xaneiro e beneficiarse dos correspondentes beneficios fiscais. Así mesmo, solicitará ao Goberno do Estado accións inmediatas para mellorar a estrada N-541 entre Ourense e Pontevedra, garantindo a seguridade tanto de vehículos como dos habitantes dos núcleos de poboación que atravesa, ademais de realizar un estudo de viabilidade sobre a construción dunha autovía ou vía de alta capacidade entre os concellos de O Carballiño e Pontevedra.

 

Ao remate da Xunta de Portavoces, o portavoz popular, Alberto Pazos, informou que o Parlamento galego acollerá a vindeira semana dúas sesións plenarias. Unha primeira terá como obxectivo aprobar os orzamentos da Xunta para o vindeiro ano 2025 e a Lei de medidas fiscais e administrativas.

 

ORZAMENTOS EN TEMPO E FORMA

 

“Galicia contará, un ano máis, e xa van 16 consecutivos con gobernos do PPdeG, con orzamentos en tempo e forma, uns orzamentos que acadan a cifra histórica de 13.954 millóns de euros, e que teñen catro obxectivos principais: impulsar a oferta de vivenda; sentar as bases da Galicia futura, con máis innovación; reforzar os servizos públicos; e apostar polos sectores produtivos e a transición verde”, sinalou Alberto Pazos. Así mesmo, lembrou que tres de cada catro euros destinaranse a gasto social, superando por primeira vez a barreira dos 10.000 millóns de euros; e se impulsan novas rebaixas fiscais, ao reducir o imposto de sucesións para parentes colaterais e con bonificacións destinadas a dinamizar o mercado da vivenda.

 

Respecto da aprobación do proxecto de Lei de medidas fiscais e administrativas, o portavoz popular lembrou que permitirá a implantación a partir do vindeiro 1 de xaneiro de medidas como a nova taxa turística, actuacións para incrementar o mercado de vivendas en aluguer en Galicia través de incentivos aos pequenos propietarios con inmobles baleiros para que os poñan no mercado ou accións dirixidas ao impulso ao sector eólico galego.

 

Polo que respecta ao Pleno ordinario, tamén dará comezo co debate para a súa aprobación dunha nova lei: a de estatística de Galicia, que chega ao debate definitivo sen votos en contra da oposición ao ditame. Este novo texto lexislativo facilita ao Instituto Galego de Estatística contar cunha información máis completa que permitirá tomar decisións estratéxicas e concluíntes tanto á Administración pública como ás empresas e os cidadáns.

 

A nova Lei de Estatística de Galicia actualiza a norma vixente desde hai 36 anos, tendo en conta as novas fontes de información, así como os potentes métodos de tratamento de datos, baseados no big data e na Intelixencia Artificial, que permiten reforzar a colaboración e os fluxos de datos estatísticos entre os distintos niveis da administración, así como incrementar a difusión e o acceso aos recursos estatísticos que se xeran.

 

BENEFICIOS FISCAIS PARA O XACOBEO 2027

 

Dentro do apartado de proposicións non de lei, o Grupo Popular demandará ao Goberno central que habilite os procedementos necesarios para que as empresas que desexen patrocinar actividades turísticas ao abeiro do Xacobeo 2027 o poidan facer a partir do vindeiro 1 de xaneiro de 2025, acolléndose aos correspondentes beneficios fiscais ao declararse o Ano Santo Xacobeo 2027 como Acontecemento de Excepcional Interese Público.

 

Alberto Pazos lembrou que o Ministerio de Cultura, no Pleno do Consello Xacobeo celebrado o pasado 1 de xullo en Pamplona, xa adquiriu o compromiso de promover a inclusión do Ano Santo Xacobeo nos orzamentos do Estado para 2025 como acontecemento de excepcional interese público, no período comprendido entre o 1 de xaneiro de 2025 e o 31 de decembro de 2027. “Porén, a complexa situación política na que se atopa o Goberno de Pedro Sánchez fainos temer que esta declaración non sexa unha realidade a tempo para que se poidan acadar os obxectivos que se perseguen e que as empresas que desexen colaborar co Xacobeo 2027 poidan facelo e acollerse a beneficios fiscais para iso”.

 

A segunda proposición non de lei do Grupo Popular ten que ver coa estrada N-541 e os numerosos accidentes de tráfico que se producen neste viario pola súa perigosidade. Diante desta situación, o portavoz popular lembrou que os alcaldes e alcaldesas de todos os concellos polos que transcorre a N-541 (Punxín, Maside, O Carballiño, Boborás, Beariz, O Irixo e Cerdedo-Cotobade, ademais dos de Ourense e Pontevedra) crearon o Pacto do Pedre, a través do que se demandan melloras inmediatas para esta estrada, que soporta un tráfico importante non só de turismos senón de transporte industrial vital para o desenvolvemento das comarcas.

 

“Desde o Grupo Popular consideramos necesario que desde o Parlamento de Galicia se esixa ao Goberno de España que leve a cabo actuacións inmediatas de mellora na N-541 para reducir a alta sinistralidade nesta vía de comunicación, adaptando esta estrada ás necesidades de tráfico que garantan a seguridade de vehículos así como dos habitantes dos núcleos de poboación polos que transcorre; e realizando, ao mesmo tempo, un estudio de viabilidade que contemple unha autovía ou vía de alta capacidade sen pasar por núcleos de poboación entre O Carballiño e Pontevedra”, concretou Alberto Pazos.

 

Por último, dentro do apartado de preguntas ao Goberno galego, o Grupo Popular interesarase pola situación da factoría de Alcoa na Mariña lucense e as previsións do Goberno de Pedro Sánchez para dar unha solución enerxética a esta fábrica; polo compromiso do Goberno central de poñer en marcha o tren de alta velocidade entre Galicia e o norte de Portugal; e polo grao de execución das liñas complementarias en apoio aos autónomos galegos, onde Galicia destaca como a comunidade cun maior número de convocatorias de axudas a este sector: case un 10 por cento do total do Estado.