Categoría: Parlamento de Galicia

O Grupo Popular demandará no Pleno da vindeira semana que o Parlamento de Galicia apoie todas as iniciativas que impulse a Xunta, incluída a vía xudicial, en defensa do seu autogoberno, logo do recurso de inconstitucionalidade anunciado polo Goberno central contra determinadas medidas que regulan o plan de axilización da dependencia e da discapacidade, así como a repotenciación dos parques eólicos. Ademais, pedirá a dimisión ou cese da ministra de Igualdade pola neglixencia na xestión das pulseiras telemáticas de control dos agresores con ordes de afastamento por violencia de xénero, ao tempo que solicita que o Goberno central facilite toda a información sobre as vítimas galegas que se viron afectadas por estas deficiencias no servizo.

Ao remate da Xunta de Portavoces, Alberto Pazos informou que a sesión plenaria inclúe o debate de totalidade de dous novos proxectos de Lei. O primeiro deles é o de protección da saúde das persoas menores e prevención de condutas aditivas, “unha norma que situará a Galicia á vangarda na regulación da venda e consumo de vapeadores e bebidas enerxéticas, que quedarán equiparadas ao tabaco ou ao alcohol, respectivamente”.

En concreto, con esta nova lei quedará prohibida a venda deste tipo de produtos aos menores de idade, nunha acción que combina a prevención, a promoción da saúde e o control da oferta. A norma incorpora diferentes achegas dos sectores implicados, dos organismos públicos, de entidades sociais e da cidadanía, ademais de fundamentarse na evidencia científica e en resultados da Enquisa Nacional Estudes, elaborada polo Ministerio de Sanidade entre estudantes de secundaria.

O segundo proxecto de Lei que se debaterá no Pleno será o do clima de Galicia, que marca como reto principal dotar a Galicia das ferramentas, órganos e instrumentos necesarios para garantir a consecución da neutralidade climática no horizonte de 2040, unha década antes do prazo fixado pola Unión Europea. “Estamos a falar dun novo paso no camiño que levamos adiante en Galicia de loita contra o cambio climático, co obxectivo de facilitar unha transición ecolóxica xusta, sostible e xeradora de emprego verde”, sinalou Alberto Pazos.

O portavoz popular explicou que a nova lei “introduce a obriga da Xunta de integrar a perspectiva climática, tanto desde o punto de vista da redución de emisións como da adaptación aos efectos de quecemento global na elaboración dos seus plans e programas sectoriais, na preparación de contratos públicos e nas convocatorias de subvencións que teñan un impacto nos obxectivos de neutralidade climática de Galicia”.

O Pleno continuará coa comparecencia da conselleira do Mar, por petición propia, para informar sobre a avaliación das políticas pesqueiras europeas, nun momento de especial transcendencia logo de coñecer que a Unión Europea ten previsto recortar un 67 por cento os fondos específicos para a cadea mar-industria.

DEFENSA DO AUTOGOBERNO

Dentro do apartado de proposicións non de lei, o Grupo Popular solicitará o apoio do Parlamento galego a cantas iniciativas impulse a Xunta, incluída a vía xudicial, en defensa do autogoberno de Galicia, que pode verse seriamente violentado na súa capacidade de impulso lexislativo polos recursos de inconstitucionalidade anunciados polo Goberno central contra determinados preceptos incluídos na Lei de medidas fiscais e administrativas aprobada en 2024 e dirixidos á axilización da dependencia e da discapacidade, así como a repotenciación dos parques eólicos.

“Pedro Sánchez, e o seu Goberno, volve castigar a Galicia e, logo do recurso que presentou no seu momento contra a Lei do litoral, desta vez ataca a determinados preceptos aprobados o pasado ano na Lei de medidas fiscais e administrativas, co obxectivo de axilizar a tramitación da dependencia e a discapacidade en Galicia a través de homologacións automáticas, das que xa se teñen beneficiado máis de 9.300 persoas en nove meses; ou para regular o sistema de repotenciación dos parques eólicos, co que basicamente se busca reducir o impacto ambiental e visual destas instalacións, así como mellorar os beneficios económicos e sociais na contorna na que se instalan”.

Ademais desta proposición non de lei, o Grupo Popular tamén preguntará ao Goberno galego polas medidas que ten previsto levar adiante ante este novo conflito institucional aberto polo Goberno de Pedro Sánchez.

DESPROTECCIÓN DAS VÍTIMAS DE VIOLENCIA DE XÉNERO

A segunda das proposicións non de lei do Grupo Popular ten que ver cos fallos detectados nas pulseiras de control de agresores con orde de afastamento de vítimas de violencia de xénero, “unha situación intolerable que debe derivar, irremediablemente, na dimisión ou cese da ministra de Igualdade”, indicou Alberto Pazos.

Así mesmo, pídese ao Goberno central que informe ao Goberno galego de cantos casos de desprotección de vítimas de violencia de xénero tiveron lugar durante o fallo do sistema; cantas mulleres portaban dispositivos telemáticos de control durante os últimos doce meses; as incidencias ocorridas nos devanditos dispositivos; e as medidas adoptadas para emendar estas deficiencias e garantir a seguridade das vítimas.

“Tamén queremos que o Consello Xeral do Poder Xudicial elabore un informe que acredite que este fallo xa foi solucionado e que o sistema actual non supón un risco para a seguridade das mulleres, porque esta situación non se pode volver a repetir: a seguridade das mulleres, e sobre todo das mulleres que sofren maltrato, debe estar por enriba de todo, porque a violencia de xénero constitúe unha das máis graves vulneracións dos dereitos humanos da nosa sociedade”, dixo o portavoz popular.

Dentro do apartado de preguntas ao Goberno galego, o Grupo Popular interesarase pola valoración do ditame motivado da Comisión Europea no que advirte da ilegalidade da prórroga da concesión da AP-9, unha oportunidade que o Goberno de España deixou pasar para rescatar a concesión desta autoestrada, liberala das peaxes e transferila á Xunta de Galicia, como vimos demandando unanimemente todos os grupos deste Parlamento.

A través dunha segunda pregunta quérese coñecer a situación da formación profesional en Galicia, logo de que neste curso acadáramos o récord de estudantes en FP, que acceden á maior oferta existente de formación na historia de Galicia.

O PPdeG esixe a Pedro Sánchez que “blinde por lei non desconectar Galicia” e cese nas súas pretensións de “illar a máis de 130.000 galegos e galegas do rural” a través da eliminación de paradas, horarios e frecuencias de autobús prevista na nova Lei de mobilidade sostible.

Unha norma que será votada o próximo mércores, 8 de outubro, no Congreso e ante a que o PP presentou unha serie de emendas coas que busca “frear este despropósito” e que os veciños e veciñas dos 22 concellos galegos afectados non perdan o seu servizo de transporte público. “O PSOE e o BNG teñen a oportunidade de apoiar estas emendas porque, do contrario, estarán avalando que Pedro Sánchez siga desconectando Galicia”, defende neste sentido Paula Prado.

Por iso, a través das súas emendas —que tamén se votarán o mércores na Cámara Baixa—, os deputados do PP queren que o que se blinde nesa lei sexan precisamente os servizos actuais de autobús, mantendo as paradas, así como as frecuencias e os horarios que hai neste momento.

A secretaria xeral dos populares galegos visitou Guitiriz, un dos 10 concellos afectados polos plans do Goberno central na provincia de Lugo, que é ademais a provincia galega onde máis paradas se suprimirían. Fíxoo acompañada polo portavoz do PP local, José Manuel López, o coordinador de Infraestruturas e Territorio do PPdeG, Antonio Ameijide, e deputados do partido no Congreso —Francisco Conde, Jaime de Olano, Cristina Abades e Rosa Quintana—.

“O Goberno de Sánchez, desde a súa chegada, non cesa na súa intención de desconectar o rural galego”, asegurou Paula Prado poñendo como exemplo a eliminación de frecuencias e paradas de tren –como a da Gudiña– e agora a lei estatal que suprimiría paradas de autobús estatais nos concellos de Melide, Arzúa, Chantada, Guitiriz, Monterroso, O Corgo, Palas de Rei, Quiroga, Baralla, A Pontenova, Meira, As Nogais, Ribadavia, A Rúa, Riós, Trasmiras, A Mezquita, Lalín, O Porriño, Tui, Silleda e Forcarei.

Desde o PPdeG critican así que o presidente do Goberno queira “condenar” ao rural galego a unha perda do transporte público e dos seus servizos “cando todas as administracións traballan polo contrario”. E, nesta liña, a secretaria xeral do partido conclúe: “Se queremos loitar para reverter o despoboamento, o Goberno central vai en dirección contraria”.

UN NOVO MAPA CONCESIONAL IMPOSTO E UNILATERAL

Os populares denuncian que o texto actual da Lei de mobilidade sostible suporá a eliminación destas paradas en Galicia e no resto de España e, ademais, non inclúe o financiamento adecuado para prestar este servizo tal e como se viña facendo ata a actualidade.

Desde o PPdeG lamentan así mesmo que o novo mapa concesional derivado desta nova normativa non fose consensuado nin dialogado coas comunidades autónomas na medida en que son estas “as que mellor coñecen as demandas e necesidades de mobilidade nos seus territorios”.

Por iso, instan ao Goberno central a que renuncie á “imposición” e a “unilateralidade” e, no seu lugar, aborde de xeito coordinado coas comunidades un novo modelo que “sexa realmente eficiente na atención das demandas de mobilidade en todo o territorio, sobre todo no rural, e non penalice a ninguén”.

Os deputados do Grupo Popular Ángel Rodríguez e Magdalena Pérez, acompañados do alcalde de Boqueixón, Ovidio Rodeiro, visitaron esta mañá o Centro de Formación e Experimentación Agraria de Sergude e salientaron a importancia desta formación para garantir o relevo xeracional no agro galego.

Ángel Rodríguez e Magdalena Pérez fixeron un percorrido polas instalacións do centro nas que os alumnos reciben unha completa formación agraria e forestal moi práctica e achegada ás necesidades do sector agrogandeiro galego, o que facilita a axilidade na incorporación de todos os alumnos ao mercado laboral.

Ademais deste centro de formación e experimentación agraria de Sergude, a Xunta conta con outros cinco centros espallados por toda Galicia: Guísamo, Pedro Murias en Ribadeo, Monforte de Lemos, Becerreá e Lourizán en Pontevedra. “Todos eles contan cunha excelente colaboración coas empresas do sector, que o pasado ano se traduciu na realización de prácticas dos seus alumnos en cerca de 70 empresas, o que contribuiu a que o alumnado que cursa os estudios nestes centros tivera un índice de inserción laboral próximo ao 100 por cento”, destacaron.

Os deputados do Grupo Popular Miguel Fidalgo e Felisa Rodríguez criticaron hoxe a falta de compromiso amosada onte polos responsables do Goberno central e de AENA para o impulso dos tres aeroportos galegos, en especial o de Peinador, e demandou aos responsables do Concello de Vigo unha maior implicación e colaboración coa Xunta de Galicia para que o aeroporto de Peinador deixe de perder enlaces aéreos e sexa máis atractivo para as compañías aéreas.

Miguel Fidalgo e Felisa Rodríguez desprazáronse ata o aeroporto de Peinador para lamentar a “fuxida” protagonizada onte polos responsables de AENA, “máis preocupados por atender as súas cuestións persoais que en buscar solucións eficientes para paliar a perda de voos e prazas a consecuencia das decisións adoptadas por Ryanair, cando son os responsables directos da coordinación dos aeroportos e de facer unha planificación eficiente das rutas”.

FORMATO INEFICAZ

“Quedou demostrado a ineficacia do formato destas reunións, onde o Goberno central e AENA se limitan a vender os seus investimentos nos aeroportos pero non entran no fondo do problema que neste momento máis preocupa aos galegos: a falta dunha oferta eficiente de voos desde os tres aeroportos de Galicia que sexa capaz de competir co avance permanente que viven aeroportos como o de Porto”, sinalou Miguel Fidalgo.

Así mesmo, o deputado criticou “a ausencia do alcalde de Vigo nunha reunión tan importante para o aeroporto de Peinador, enviando a unha concelleira máis preocupada en lanzar bulos sobre supostas axudas da Xunta a outros aeroportos galegos que en poñer enriba da mesa medidas para o impulso do aeroporto de Vigo”. “É o momento de deixar á marxe as liortas políticas e que os concellos e a Xunta traballen da man para que AENA asuma as súas responsabilidades cos aeroportos galegos e poña en marcha medidas que permitan incrementar as conexións aéreas e a chegada de novas compañías”, anotou.

Pola súa banda, Felisa Rodríguez manifestou que “esta situación que vive o aeroporto de Vigo non só afecta ao sector turístico, porque a redución de enlaces aéreos é unha cuestión que repercute noutros sectores importantes da nosa economía, como a industria e o comercio”.

Os deputados do Grupo Popular José Luís Ferro e Víctor Baladrón, acompañados da portavoz do PP no Concello de Ourense, Ana Méndez, visitaron a CIFP Portovello da capital ourensá, onde destacaron a importancia da formación profesional como motor de emprego e cualificación profesional. En concreto, subliñaron a alta inserción laboral dos estudantes de FP en Galicia, que acada o 85,6 por cento no conxunto de ciclos e chega incluso ao 97 por cento na modalidade dual.

José Luís Ferro e Víctor Baladrón salientaron o notable incremento do número de matriculados en formación profesional en Galicia nos últimos anos, consolidando este modelo formativo como unha opción cada vez máis elixida pola mocidade. Así, Galicia conta este curso 2025-2026 con máis de 71.200 estudantes matriculados en FP, o que supón un novo récord de alumnos ao incrementarse o 3,5 por cento respecto ao pasado curso.

EXCELENCIA FORMATIVA

Ademais, lembraron que 21 das 23 familias profesionais que se imparten en Galicia superan o 80 por cento de inserción laboral. Máis en concreto, apuntaron que 25 ciclos logran o 100 por cento de empregabilidade e 63 ciclos superan o 90 por cento, consolidando a FP como unha ensinanza de futuro.

Respecto do CIFP Portovello, destacaron que o ciclo de Mobilidade Segura e Sostible rexistra un 100 por cento de inserción laboral, un dato que reflicte a demanda real do mercado e a calidade da formación impartida. Neste sentido, destacaron que “centros como este de Ourense se teñen consolidado como espazos de excelencia formativa, en contacto directo coas empresas e cunha orientación clara cara á empregabilidade do alumnado”.

Os deputados do Grupo Popular Raquel Arias e José Manuel Mato salientaron hoxe en Paradela que un total de 47 empresas da provincia de Lugo (das que 9 están localizadas na comarca de Lemos) se repartiron case 615.000 euros en axudas da Xunta de Galicia con cargo ao programa Emega, dirixido á posta en marcha, mellora e reactivación de iniciativas empresariais constituídas por mulleres.

Nunha visita a Talleres Ángel, unha das empresas beneficiadas das axudas Emega, Raquel Arias e José Manuel Mato subliñaron o compromiso do Goberno galego para impulsar as iniciativas empresariais e a creación de emprego feminino estable, así como favorecer a conciliación da vida persoal, familiar e laboral das mulleres galegas.

OCUPAR O LUGAR QUE LLES CORRESPONDE NO MERCADO LABORAL

“O éxito deste programa da Xunta pode comprobarse nos máis de 2.000 proxectos empresariais e a consolidación de máis de 4.000 empregos femininos que se beneficiaron nos últimos dez anos”, sinalou a deputada popular, quen destacou a súa “contribución para que todas as emprendedoras galegas poidan ocupar o lugar que lles corresponde no mercado laboral”.

Pola súa banda, José Manuel Mato apuntou que este programa “presta un especial apoio ás mulleres que emprenden no rural, ás maiores de 55 anos e a aquelas que desenvolven a súa actividade en sectores tradicionalmente masculinizados, así como naqueles ámbitos con especiais dificultades para a inserción laboral feminina”.

O Partido Popular de Galicia denuncia que Pedro Sánchez “leva máis de 1.000 días sen aprobar Presupostos” e que isto provoca que España “non poida afrontar as necesidades dos seus servizos públicos”, afectando tamén gravemente aos concellos galegos.

“Un ano máis, Pedro Sánchez renunciou a presentar Presupostos Xerais do Estado, os de 2026, e España segue guiándose por uns prorrogados desde 2022”, citou a secretaria xeral Paula Prado hoxe en declaracións aos medios en Monterrei como exemplo da “parálise” do Goberno central, en contraposición á “eficacia” dun Goberno galego que vai en camiño de aprobar os seus décimo sétimos Orzamentos consecutivos en tempo e forma.

“Supoño que Sánchez está máis ocupado e preocupado pola suposta contabilidade B do seu partido e por eses sobres con cartos co logo do PSOE”, lamentou, agardando que o secretario xeral do PSdeG, Xosé Ramón Gómez Besteiro, pida explicacións ao seu partido e a voceira do BNG, Ana Pontón, pida explicacións aos seus socios. “Xa van 24 horas e aínda non dixeron nada”, apuntou.

“Temos un Goberno de España que non se preocupa dos galegas e das galegas, nin do rural, de concellos como o de Monterrei. Nós seguiremos traballando por resolver os problemas dos veciños e das veciñas de Galicia, que é para que o nos apoiaron maioritariamente en todas as eleccións ás que nos presentamos”, rematou.

A número dous dos populares galegos fixo estas declaracións á súa chegada ao Festival Monterrei Reverdece, IV Festa da Vendima, unha “magnífica” celebración na que participou xunto ao alcalde José Luis Suárez e que enxalzou como exemplo do dinamismo do rural galego e da recuperación que están a experimentar os concellos afectados polos incendios deste verán.

A RESPOSTA EXTRAORDINARIA A UNHA SITUACIÓN EXTRAORDINARIA

Paula Prado, en referencia precisamente á “situación extraordinaria” dos lumes de agosto, “provocada maioritariamente por incendiarios”, quixo poñer en valor a “resposta extraordinaria” que está deu e segue dando o Goberno galego, cuxa efectividade proba o feito de que moitas xa están pagadas. “Unha vintena para propietarios de vivendas, outras 13 para paliar os danos en tecores e 4 para negocios afectados”, destacou.

Pola contra, a resposta do Goberno de Sánchez “segue sendo a nada”. E, de feito, dous meses máis tarde, “os afectados non é que esperen polas axudas estatais, senón que están esperando pola convocatoria desas axudas que, ademais, serán xenéricas e menores”.

O portavoz do Grupo Popular, Alberto Pazos, cualificou hoxe de “preocupante para Galicia” a ausencia de orzamentos do Estado para o 2026 “polas graves consecuencias que pode traer á hora de desenvolver novos proxectos estratéxicos ou avanzar na realización dos existentes, en ámbitos fundamentais como as infraestruturas viarias ou ferroviarias, ou en sectores como a industria, a agricultura, a vivenda ou a xeración de emprego”. Pola contra, manifestou a “abismal diferencia existente co Goberno galego de Alfonso Rueda, que está a darlle os últimos retoques aos orzamentos da Xunta para o vindeiro ano para que poidan estar plenamente operativos desde o 1 de xaneiro”.

Alberto Pazos lembrou que o Goberno de Pedro Sánchez incumpre, desde o pasado 30 de setembro, a obriga constitucional de presentar ante o Congreso os presupostos para o ano seguinte, unha situación que o obriga a traballar “cuns orzamentos prorrogados desde o ano 2023, unhas contas que veñen da pasada lexislatura e que foron aprobados por unha maioría do Congreso totalmente diferente á que agora respalda a Pedro Sánchez”.

CONXELACIÓN DA ACCIÓN POLÍTICA

“Unha paralización que se traduce nunha total conxelación da acción política do Goberno central, paralizando investimentos e proxectos; que reduce a eficiencia das políticas públicas estatais; anula a eficacia de posibles leis, como a de vivenda; e deixa sen efecto medidas económicas comprometidas, como pode ser a conxelación do salario dos empregados públicos”, explicou.

Pola contra, o portavoz popular salientou que “o Goberno de Alfonso Rueda si que cumpre os seus compromisos e está a avanzar na elaboración dos orzamentos da Xunta para 2026, mantendo fielmente a súa senda de estabilidade a pesar das incertezas que existen a nivel internacional e nacional e, o que é máis grave, sen coñecer dato algún das previsións económicas do Goberno de España”.

“Galicia cumprirá, un ano máis, o seu deber de aprobar os orzamentos en tempo e forma, fixando como prioridade aumentar o crecemento da economía galega, creando emprego de calidade, poñendo marcha políticas de vivenda, blindando o Estado de Benestar, desenvolvendo as novas competencias sobre o litoral, ademais de loitar contra o cambio climático e a potenciación do rural”, indicou.

Alberto Pazos afirmou que “España non pode seguir nas mans dun Goberno totalmente paralizado, sen apoio parlamentario, con orzamentos constantemente prorrogados e sen un proxecto de país”, ao que anotou que “Galicia non merece un Goberno de España que a ignore e menosprece constantemente, como está a pasar con cuestións como a prestación da dependencia, a repotenciación dos parques eólicos, o castigo a Lugo na nova planificación eléctrica ou o propio traspaso da AP-9, que xa sufre o calvario das 58 vergoñentas, incompresibles e interminables prórrogas na súa tramitación no Congreso á proposición de Lei aprobada por unanimidade neste Parlamento galego de transferencia desta autoestrada a Galicia”

RESCATE AP-9

“Unha autoestrada que tamén sufre a incomprensible decisión do Goberno de Pedro Sánchez de non levar adiante o rescate e a liberación das súas peaxes, tanto despois do ditame da Comisión Europea sobre a nulidade das prórrogas realizadas sobre a concesión desta autoestrada, como tendo presente os cálculos económicos que aseguran que o prezo do rescate e o custo das bonificacións ata o remate da concesión é practicamente o mesmo”, sinalou.

Neste sentido, criticou que esta mesma semana o secretario de Estado de Transportes volvera xustificar que non se proceda ao rescate da AP-9 “polas súas implicacións xurídicas e económicas milmillonarias, sen dar un só dato da orixe desas cifras e facendo caso omiso do estudo realizado pola Xunta sobre o custo do rescate: exactamente 2.356 millóns de euros, unha cifra moi semellante á que suporá o abono das bonificacións das peaxes ata o remate da concesión”.

Alberto Pazos esixiu “unha vez máis ao Goberno de España que polo ben dos cidadáns proceda ao rescate da AP-9, libere as súas peaxes e proceda á súa transferencia a Galicia, porque é o que lle están a pedir todos os galegos que, ademais de ver mellorada a súa seguridade viaria, verían como esta decisión repercutiría de xeito moi positivo nos seus petos”.

ESTABILIDADE AOS GOBERNOS MUNICIPAIS

Por último, o portavoz popular criticou “as novas mostras do seu talante democrático amosado esa semana polo BNG e, especialmente, a súa voceira Ana Pontón”. En concreto, cuestionou “que estarían a dicir desde a banda da esquerda nacionalista de Galicia se unha persoa relacionada co PP actuara como o fixo un energúmeno vinculado ao BNG no Pleno do Concello de Ponteareas celebrado esta semana?”. Neste sentido, subliñou que “sempre respectamos e respectaremos o dereito de calquera persoa ou formación a manifestarse ou defender os seus dereitos como considere máis oportuno, pero non imos tolerar este tipo de ataques a ameazas directas contra representantes políticos, como aconteceu esta semana no Pleno de Ponteareas coa súa alcaldesa”, a quen trasladou “todo o noso apoio e ánimo”.

Tamén se preguntou “que estarían dicindo os altavoceiros nacionalistas se un alcalde do PP, días antes da celebración dunha moción de censura democrática, mandara á Policía Local a desaloxar dos seus despachos aos que foron os seus compañeiros de Goberno, pero que agora decidiron darlle a alcaldía á formación política máis votada nas eleccións tras comprobar a ineficacia e nula xestión do alcalde nacionalista? ou que unha das últimas decisións deste alcalde nacionalista sexa modificar os indicativos instalados nas rotondas do concello, buscando a confrontación entre os veciños e vez de procurar o consenso”. “Isto é o que está a ocorrer estes días no Concello de Ribeira, unha vez se coñeceu que o Partido Popular vai recuperar a Alcaldía gracias ao apoio de varios concelleiros independentes que ata agora apoiaron ao BNG, que aceptou encantado os seus votos, a pesar de coñecer que procedían dunha escisión do Partido Popular”, explicou.

“O que para a señora Pontón é bochornoso non é máis que o feito de que goberne a formación política que conseguiu o maior respaldo dos seus veciños nas eleccións municipais, algo que desde o PP podemos dicir con todo o orgullo tanto en Forcarei, como en Touro, Fisterra, Carral ou agora en Ribeira”, indicou o portavoz popular, quen apuntou que “quen non pode defender o talante democrático do BNG é quen lle quitou cos seus votos a Alcaldía á formación máis votada de Noia, para darlle o goberno local a un cuatripartito ingobernable, gracias ao voto favorable dun antigo concelleiro do PP”.

Pazos incidiu que “o PP conseguiu con estas mocións de censura dar unha estabilidade aos gobernos de todos estes concellos, unha estabilidade que ata o de agora non tiñan ao ser uns gobernos municipais en mans de multipartitos, con ideoloxías e proxectos no seu interior totalmente discordantes e imposibles de levar adiante”.

O Parlamento de Galicia aprobou hoxe, cos votos favorables do Grupo Popular e do BNG, pero que non contou co apoio do PSdeG, unha proposición non de lei a través da que se demanda ao Goberno de España que inicie negociacións urxentes coa empresa Ryanair para que desista das medias anunciadas e elimine o ERE proposto, mantendo o seu nivel de operacións actual nos aeroportos de Santiago de Compostela e Vigo.

O deputado popular Gonzalo Trenor lembrou que “a competencia do transporte aéreo é do Estado, do mesmo xeito que os aeroportos de interese xeral e a súa regulación”, polo que demandou “ao Goberno central e a AENA que tomen en serio as súas competencias en lugar de tentar derivar responsabilidades ás comunidades autónomas e aos concellos”.

COORDINACIÓN

“A Xunta leva moito tempo insistindo na necesidade de coordinar de forma conxunta a planificación de rutas dos tres aeroportos galegos, para o que trasladou reiteradamente ao Goberno central a necesidade de adoptar medidas para garantir a viabilidade e a competitividade dos aeroportos galegos, tanto en conta o impacto do AVE”, sinalou o deputado popular.

Neste sentido, Trenor manifestou que “o Goberno de España e AENA non poden entrar nunha batalla estéril cunha aeroliña 100 por cento privada”, e avogou porque Ryanair e AENA “solucionen canto antes un conflito económico no que teñen como reféns aos galegos e ás persoas que queren visitar Galicia”.

O Parlamento de Galicia aprobou hoxe a proposición non de lei do Grupo Popular, que non contou co voto favorable do BNG, a través da que se esixe ao Goberno central que consensúe e dialogue coas comunidades autónomas calquera medida ou iniciativa en materia de vivenda, nomeadamente o Plan de Vivenda 2026-2030. En concreto, demándase que respecte a Conferencia Sectorial de Vivenda como máximo órgano de cooperación entre o Estado e as comunidades autónomas e aproveite a reunión do vindeiro xoves, 2 de outubro, para facer efectiva esta colaboración, unidade de acción e respecto ao autogoberno e a diversidades nas políticas públicas de vivenda.

A portavoz popular de Vivenda, María Deza, lembrou que o Goberno galego xa remitiu ao Goberno central hai nove meses as súas propostas para o novo plan estatal, “pero ningunha delas aparece recollida no borrador elaborado, de aí que sexa imprescindible unha nova reunión da Comisión Bilateral”. “O Goberno de Pedro Sánchez non pretende un documento de consenso porque só quere un plan feito á medida dos seus intereses e sen ningunha marxe de negociación para as comunidades”, apuntou.

En concreto, explicou que o novo Plan de Vivenda impón un cofinanciamento mínimo obrigatorio do 40 por cento para que as comunidades autónomas poidan participar. “Pasamos dun financiamento voluntario de menos do 30 por cento a unha achega obrigatoria do 40 por cento, que no caso de Galicia implicaría multiplicar por cinco a contribución ao Plan Estatal”, afirmou.

“A pesar destas condicións, Galicia non renuncia a chegar a un acordo, como xa o fixo saber tanto o Presidente Rueda como a propia conselleira de Vivenda, e amosouse disposta a asumir ese esforzo orzamentario”, indicou a portavoz popular, pero anotou que “un plan que queira ser operativo debe ser flexible e adaptarse ás circunstancias e problemas de cada territorio, máxime se as comunidades autónomas financian un 40 por cento do mesmo”.

María Deza manifestou que o plan “debe articularse como un verdadeiro instrumento de colaboración entre administracións e non basearse en medidas impostas que xa se teñen demostrado ineficaces, como a declaración de zonas de mercado residencial tensionado”. Ademais, avogou porque “se permita a construción de vivendas protexidas en réxime de venda, no só alugueiro, porque o dereito á propiedade tamén existe”. “O problema da vivenda non se soluciona só con axudas ao alugueiro: hai que construír vivenda e, neste ámbito, incentivar o investimento privado”, dixo.

Por último, a portavoz popular alertou que “o atraso que leva o Ministerio de Vivenda na elaboración do novo Plan Estatal pon en perigo a súa execución e que as comunidades autónomas, como Galicia, poidan convocar as axudas no primeiro semestre de 2026”.

ZONAS TENSIONADAS

Por outra banda, no debate dunha iniciativa sobre a declaración de zonas de mercado residencial tensionado, María Deza reiterou que esta medida “non é eficaz para solucionar o problema do prezo da vivenda” e puxo como exemplo o caso de Cataluña, onde a sinatura de contratos de alugueiro caeu durante o primeiro período da regulación case un 18 por cento, a oferta de vivenda caeu en máis de 40.000 inmobles e a oferta de vivendas en alugueiro baixou máis dun 12,5 por cento.

A pesar destes datos, asegurou que “o Goberno galego tramitará con todo rigor todas as solicitudes de zonas tensionadas, aínda co convencemento de que esta declaración non vai solucionar o problema de acceso á vivenda no caso de A Coruña ou de Santiago, do mesmo xeito que agravou estes problemas nos demais lugares nos que se implantou”.