Categoría: Parlamento de Galicia

Os deputados do Grupo Popular Miguel Viso e Cristina Campero anunciaron hoxe a presentación no Parlamento de Galicia dunha iniciativa a través da que se demanda ao Goberno de España que impulse dunha vez a execución da autovía A-76 entre Ourense e Ponferrada, por tratarse dunha infraestrutura estratéxica para acceder á Meseta desde o interior da Comunidade galega, vertebrando as comarcas de Valdeorras, Quiroga e Lemos das provincias de Lugo e Ourense.

Nun encontro celebrado coa portavoz do PP no Barco de Valdeorras, Inmaculada Rodríguez, e veciños desta localidade ourensá, os deputados populares lamentaron “o bloqueo ao que o Goberno de Pedro Sánchez está a someter a esta autovía clave para acceder á Meseta desde o interior de Galicia, unha situación que conta coa complicidade do BNG ao aceptar o incumprimento do pacto que asinaron cos socialistas para colocar a Pedro Sánchez na Moncloa”.

NIN PLANIFICACIÓN NIN ORZAMENTOS

“O Goberno central nin avanza na planificación dos tramos necesarios para impulsar a A-76 nin habilita os investimentos correspondentes”, criticaron os deputados populares, quen apuntaron a negativa do Ministerio de Transportes a facilitar información algunha sobre o estado da tramitación desta autovía e as previsións reais para a súa execución.

Miguel Viso e Cristina Campero lembraron que esta autovía foi considerada como prioritaria pola patronal das empresas construtoras (Seopan) nun informe sobre as actuacións a acometer polo Estado no horizonte 2024-2035.

A esta demanda sumouse o recente informe realizado polo Eixo Atlántico sobre infraestruturas viarias e ferroviarias da Eurorrexión, no que se pon de manifesto que, “vinte anos despois da inclusión da A-76 no Plan Estratéxico de Infraestruturas do Transporte 2005-2020, non se ten materializado nin un só quilómetro desta autovía, que é reiteradamente reivindicada non só como conexión de Galicia coa Meseta norte, senón tamén como medio para acadar unha mellor comunicación de Valdeorras coa súa capital de provincia e o resto de Galicia”.

O portavoz de Infraestruturas do Grupo Popular, Roberto Rodríguez, acompañado do deputado e concelleiro padronés Ángel Rodríguez anunciaron hoxe a presentación dunha iniciativa no Parlamento galego a través da que se solicita ao Goberno central a realización urxente das obras de humanización do tramo da estrada N-550 ao seu paso pola Ponte en Padrón, actualizando o proxecto existente para mellorar a seguridade viaria e peonil, a renovación da sinalización e a mellora da iluminación deste treito.

Ángel Rodríguez lembrou que “o proxecto de orzamentos aprobado polo Goberno de Mariano Rajoy en 2018 xa recollía unha partida económica de 4,5 millóns de euros para a mellora da N-550 ao seu paso polo municipio de Padrón, pero a chegada de Pedro Sánchez ao Goberno de España, logo da moción de censura, privou de levarse a cabo esta obra, chegando ao punto de que desapareceu dos orzamentos do Estado desde aquela data”.

PREOCUPACIÓN COMÚN

Os deputados populares fixeron un percorrido pola marxe deste treito da estrada N-550 e comprobaron “o extremo deterioro no que se atopa esta estrada nacional logo de moitos anos de esquecemento por parte do Goberno central”. En concreto, as condicións malas e de inseguridade desta vía tradúcense en fochancas, sinalización deficiente polo desgaste da pintura e, sobre todo, as graves carencias de accesibilidade e de seguridade peonil, ademais de insuficiente iluminación nalgúns puntos que derivan dun incremento do risco de accidentes.

“O deterioro que presenta este tramo da N-550 é unha preocupación de todos os grupos políticos do Concello de Padrón e o seu arranxo unha demanda compartida, que agora o Grupo Popular queremos levar ao Parlamento galego porque é imprescindible que o Goberno central adopte as medidas oportunas para mellorar a seguridade e a humanización desta estrada”, sinalou Ángel Rodríguez.

O portavoz do Grupo Popular, Alberto Pazos, avanzou hoxe que “solicitaremos a participación no plan de traballo da Comisión de estudo para a sobre a posible modificación da letra do himno de Galicia das organizacións e entidades máis representativas da cultura e da historia de Galicia, como a Real Academia Galega ou o Consello da Cultura de Galicia”.

Alberto Pazos explicou que esta mañá tivo lugar unha sesión desta Comisión de Estudo na que se aprobaron as normas de funcionamento, con dúas únicas puntualizacións: que os membros da Comisión teñan á súa disposición, coa maior brevidade posible, toda a información que chegue á Mesa e poidan comezar a estudar e analizar a mesma de inmediato; e que os traballos da Comisión estean rematados o antes posible.

“Se en algo coincidimos todos os grupos parlamentarios é que esta Comisión debe desenvolverse dun xeito áxil, para que non se prolongue sine die sen chegar a unhas conclusións definitivas”, manifestou o portavoz popular, quen apuntou que “mostra deste interese é que xa se fixou un prazo de 20 días para que os grupos parlamentarios formulemos as nosas suxestións para a elaboración do plan de traballo”.

NON FACER Á LIXEIRA

Pazos asegurou que “desde o Grupo Popular afrontamos esta Comisión cunha gran sensación de responsabilidade, porque estamos a falar dun símbolo de Galicia, que, xunto coa bandeira e o escudo, nos identifica e representa en cada recuncho do mundo”. Por este motivo, apuntou que “a modificación do himno galego é algo que non se debe facer á lixeira, senón dun xeito moi estudado e consensuado, tanto entre os grupos parlamentarios como coas organizacións sociais e entidades máis representativas da cultura e da historia de Galicia”.

Deste xeito, avanzou que “o Grupo Popular proporá facer partícipes deste estudo para a modificación do noso himno de dúas institucións senlleiras, como son a Real Academia Galega e o Consello da Cultura Galega, a quen solicitaremos expresamente dentro do Plan de Traballo da Comisión a súa colaboración, para que fagan as aportacións que consideren oportunas respecto dunha posible modificación da letra do noso himno”.

Neste punto, no nome do Grupo Popular trasladou a felicitación ao que será o novo presidente da Real Academia Galega, Henrique Monteagudo, “a quen desexamos o mellor á fronte desta institución e a quen ofrecemos a nosa máxima colaboración”.

Ademais do Consello da Cultura galega e da Real Academia Galega, Alberto Pazos anunciou que na proposta de Plan de Traballo “solicitaremos a presenza, ben a través de comparecencias ou ben a través de informes específicos, de todas aquelas entidades e expertos que consideremos poden aportar o seu coñecemento para adoptar a decisión definitiva”, porque reiterou que “temos a máxima predisposición para estudar calquera evidencia científica que poida xustificar a modificación da letra do noso himno, sempre dentro dunha análise pausada e reflexiva, e co respaldo de todos, porque estamos a falar da posible modificación de algo que é patrimonio e que nos representa a todos os galegos”.

SOLUCIÓN PARA SARGADELOS

Respecto da situación que atravesa a planta de Sargadelos en Cervo, Alberto Pazos considerou “necesario que todas as partes amosen a súa plena disposición para buscar unha solución”. En concreto, dixo que “o propio empresario debe recapacitar a súa fulminante decisión, porque comprobouse que as deficiencias detectadas na empresa son totalmente subsanables para garantir a seguridade e a saúde dos traballadores sen implicar o peche da empresa, pero tamén hai que ser conscientes da complexidade que supón a adaptación dun entorno laboral nun espazo declarado como ben de interese cultural, como é o caso da planta de Sargadelos en Cervo”.

“Agradecemos tanto a disposición amosada pola Inspección de Traballo como polo propio propietario da empresa para buscar unha solución que permita manter en Galicia un referente tanto a nivel empresarial como da nosa cultura, e esperamos que finalmente todo volva á normalidade e Sargadelos manteña tanto a súa produción como todos os postos de traballo, tan importantes para unha comarca como a de A Mariña, pero tamén para a imaxe exterior de Galicia que transmite esta empresa”, sinalou.

DEMAGOXIA COA SANIDADE GALEGA

Por último, Pazos fixo unha breve reflexión sobre a situación da sanidade pública galega e criticou que “os mesmos que teñen convocada unha manifestación para o vindeiro domingo son os que nos seus propios informes recoñecen o gran avance rexistrado pola sanidade pública galega nos últimos anos, que pasou de estar á cola no ano 2010 na valoración da sanidade entre todas as comunidades autónomas a situarse nos anos seguintes nun nivel intermedio”.

“Pero é que tamén os que convocan esta manifestación son os mesmos que nos seus informes poñen de manifesto que o orzamento destinado en 2025 a sanidade pública por habitante en Galicia está por enriba da media das comunidades autónomas (2.007 euros fronte a 1.944 euros de media) cando en 2010, pouco despois de que o PP chegara á Xunta, o gasto sanitario por habitante en Galicia estaba por baixo da media (1.333 euros fronte a 1.343 euros de media estatal)” apuntou.

Ademais, o portavoz popular subliñou que, “se non lles chegan os seus propios datos, os convocantes desta manifestación tamén poden botarlle un vistazo aos últimos datos facilitados polo Ministerio de Sanidade respecto ás listas de espera: para cirurxía, a espera en Galicia está en 71 días, 50 días menos que a media estatal; e para consultas, a espera na Comunidade galega é de 72 días, 22 días menos que a media estatal”.

“Son datos contrastados que botan abaixo calquera intento demagóxico de minusvalorar a situación da sanidade galega e o traballo dos profesionais que nos atenden día tras día, pero como hai grupos que teñen que aceptar con submisión todos os ditames que emanan dos coroneis da UPG, hai que montar algaradas públicas todas as fins de semana”, lamentou.

O Parlamento de Galicia aprobou hoxe por unanimidade a proposición non de lei do Grupo Popular a través da que insta á Xunta a regular e establecer a organización das microcredenciais na formación para o emprego, co fin de certificar os resultados de aprendizaxe derivados de actividades formativas de curta duración, promovendo así un modelo adaptado ás necesidades actuais das persoas e do mercado laboral.

A portavoz popular de Emprego, Noelia Pérez, considerou “imprescindible avanzar na organización das microcredenciais, xa que convertéronse nunha tendencia crecente na Unión Europea para fortalecer as competencias do capital humano, ao tempo que Galicia conta coas competencias transferidas en materia de políticas activas de emprego e formación profesional para o emprego”.

GALICIA, PIONEIRA

As microcredenciais permiten adquirir e certificar coñecementos, habilidades e competencias específicas de maneira flexible e adaptada ás novas demandas laborais. Sen substituír ás cualificacións tradicionais, representan unha ferramenta eficaz para reducir a fenda entre a formación académica e as necesidades reais do mercado de traballo, promovendo tanto a adaptación a novos sectores como a mellora nos postos actuais.

Noelia Pérez destacou que “Galicia foi pioneira na implantación deste modelo de microcredenciais mediante programas como o de Arraigo para a formación, un exemplo claro da aposta por iniciativas innovadoras no ámbito da formación para o emprego”.

Así mesmo, manifestou que as microcredenciais “son un recurso estratéxico para fomentar a aprendizaxe permanente e a empregabilidade, promovendo accións formativas de curta duración que respondan ás demandas do mercado laboral”.

 

 

 

O Grupo Popular demandará no Pleno da vindeira semana que o Goberno de España dialogue e negocie coas comunidades autónomas o reparto de migrantes menores non acompañados dun xeito planificado e co financiamento preciso. Así mesmo, pedirá ao Goberno central que atenda dunha vez as demandas de Galicia e presente de inmediato o Plan Director do Corredor Atlántico ferroviario, con datas, cifras detalladas e prazas definidas para a execución das obras.

Ao remate da Xunta de Portavoces, o portavoz popular, Alberto Pazos, informou que a sesión plenaria inclúe a comparecencia, a petición propia, o conselleiro de Emprego para dar conta do Plan Estratéxico do Comercio 2025-2030, aprobado onte no Consello da Xunta e que estará dotado con máis de 320 millóns de euros para modernizar, visibilizar e mellorar a competitividade do pequeno comercio galego.

“Estamos a falar dun sector moi importante para o tecido económico galego ao estar integrado por máis de 32.000 establecementos nos que traballan arredor de 110.000 persoas”, concretou Alberto Pazos, quen afirmou que “a través de máis de 70 accións, este Plan Estratéxico de Comercio busca blindar o futuro deste sector e garantir a súa competitividade”.

DEMANDAS EN MATERIA FERROVIARIA

Dentro do apartado de proposicións non de lei, o Grupo Popular demandará, en primeiro lugar, que o Goberno de España atenda as demandas de Galicia respecto do Corredor Atlántico ferroviario e informe con detalle das obras previstas e o horizonte temporal para a súa execución.

“Os incumprimentos respecto desta infraestrutura fundamental para o desenvolvemento económico e social de Galicia, garantindo unha conexión eficiente co resto de España e de Europa, van máis aló xa que descoñecemos a composición e o funcionamento do grupo de traballo creado para o desenvolvemento deste proxecto, tampouco hai noticias sobre o nomeamento do interlocutor do Goberno galego con Renfe para que dea cumprida información sobre as incidencias e os avances en infraestruturas ferroviarias, e que dicir da saída sur de Vigo, unha infraestrutura estratéxica para a conexión con Portugal que non se prevé a súa finalización, segundo as últimas estimacións polo estado actual das obras, ata finais de 2034”, lamentou o portavoz popular.

Tamén relacionado co transporte ferroviario, o Grupo Popular formulará unha pregunta ao Goberno galego sobre a precariedade que presentan os servizos que existen en Galicia. “A día de hoxe, aínda non se repuxeron todos os frecuencias eliminadas durante a pandemia da Covid-19, nin se ampliou a oferta de prazas e de persoal, nin se incrementaron os servizos de alta velocidade, nin se están a acometer as melloras para a modernización das instalacións e dos trens, nin, por desgraza, se estea a impulsar a intermodalidade”, apuntou.

30 MILLÓNS DE EUROS ANUAIS

A segunda das proposicións non de lei do Grupo Popular ten que ver coa distribución, por parte do Goberno de España, dos migrantes menores non acompañados, solicitando ao Goberno de Pedro Sánchez diálogo e negociación con todas as comunidades autónomas, para que a decisión non se adopte, como así se fixo, logo dun acordo bilateral entre o Goberno central e os independentistas cataláns.

Alberto Pazos apuntou que, “aparte deste novo trato de favor do Goberno de Pedro Sánchez ao independentismo catalán, a chegada de 326 novos menores a Galicia suporía un gasto anual de 30 millóns de euros, o que fai imprescindible un aporte de financiamento por parte do Goberno central para que as arcas galegas non se vexan prexudicadas por esta decisión”.

“Galicia está disposta a cumprir a lexislación vixente e garantir o benestar necesario para todos estes menores, pero para iso pedimos planificación e a dotación dos fondos necesarios, porque resulta claramente insuficiente os 100 millóns de euros que o Goberno de Pedro Sánchez destinará para repartir entre todas as comunidades autónomas”, anotou.

Así mesmo, lembrou que a Comunidade galega xa acolle neste momento a 273 migrantes menores, o que supón que o sistema de protección autonómico xa teña unha sobreocupación do 108 por cento. “A chegada de 326 menores máis a Galicia incrementaría esta preocupante situación, ademais de complicar sensiblemente a prestación das atencións e os servizos que se merecen”, subliñou Alberto Pazos.

SOLUCIÓN ENERXÉTICA

Por último, dentro do apartado de preguntas ao Goberno galego, o Grupo Popular interesarase polas previsións existentes para dar unha solución enerxética aos proxectos industriais estratéxicos de Galicia, porque, coa planificación actual, quedan fóra proxectos relacionados cos biocarburantes, o hidróxeno ou o amoníaco que precisan case 1.200 megavatios adicionais para garantir a súa posta en marcha e a súa viabilidade.

“Ademais, resulta fundamental implantar nova infraestrutura eléctrica que permita evacuar toda a electricidade xerada en Galicia a partir de fontes renovables, o que tamén facilitaría dar servizo a eses proxectos que teñen ou van ter un forte consumo eléctrico”, engadiu.

O Grupo Popular tamén se interesará polas medidas que ten pensado poñer en marcha a Consellería de Sanidade para mellorar as instalacións do Hospital Materno-Infantil de Ourense, logo de que se producira o derrubamento dunha parte do teito na terceira planta deste centro sanitario.

O Grupo Popular solicitará no Parlamento de Galicia “o impulso definitivo á tan ansiada cuarta fase do polígono industrial Lalín 2000, unha actuación estratéxica para avanzar no desenvolvemento económico e a creación de postos de traballo neste concello e en toda a comarca do Deza”.

Os deputados do Grupo Popular celebraron hoxe en Lalín a súa habitual reunión dos luns, na que avanzaron os asuntos que levarán mañá á Xunta de Portavoces para a súa inclusión no Pleno da vindeira semana.

Posteriormente, o portavoz popular, Alberto Pazos, acompañado dos viceportavoces, Paula Prado, Julio García Comesaña e Cristina Sanz, trasladáronse ata a Casa Consistorial, onde mantiveron un encontro co alcalde de Lalín, José Crespo.

Nesta xuntanza, os portavoces populares avanzaron que o Grupo Parlamentario solicitará no Parlamento de Galicia impulso definitivo á cuarta fase do polígono industrial Lalín 2000, “unha ampliación que parte do concepto de parque ecolóxico sostible buscando un perfil de uso comercial e con naves de tamaño máis pequeno”.

FIRME COMPROMISO DA XUNTA

“Esta actuación conta co firme compromiso da Xunta para a súa realización, que se manifesta na partida de 4,4 millóns de euros que xa figura nos orzamento da Xunta para o presente ano 2025”, sinalou Alberto Pazos.

Ademais, apuntou que “a boa sintonía existente entre os responsables da Xunta e do Concello de Lalín facilitará que esta obra sexa unha realidade máis pronto que tarde, para que as empresas de toda a comarca poidan dispor de solo para levar adiante os seus proxectos mantendo a Lalín como unha localidade de referencia económica e industrial no interior de Galicia”.

Así mesmo, o alcalde de Lalín trasladou aos portavoces do Grupo Popular a proposta para a posible conexión por autovía de Lalín, Agolada e Melide a través dun ramal que una, desde Agolada, a futura autovía Pontevedra-Cerdedo-Lalín-Lugo coa autovía A-54 Santiago-Lugo en Melide. “Trátase dun proxecto ambicioso que o Grupo Popular vai estudar e valorar na súa xusta medida, porque somos conscientes das necesidades existentes en materia de comunicación que ten o interior de Galicia, esquecido durante moitas décadas en beneficio do litoral atlántico”, manifestou Alberto Pazos.

As deputadas do Grupo Popular María Deza e Loli Hermelo salientaron hoxe a colaboración da Xunta de Galicia para a implantación nos concellos galegos de transporte público durante os meses de verán, un servizo que o Concello de Sanxenxo volverá a implantar este ano pero que no Concello de Cangas non se levará adiante, a pesar da demanda veciñal existente, pola negativa dos responsables municipais a solicitalo.

Nunha xuntanza celebrada coa Asociación de Veciños de Nerga en Cangas, María Deza explicou que estes servizos “permitiron reducir o uso do vehículo privado e fomentar o transporte público, a favor dunha mobilidade sostible”. En concreto, as persoas usuarias destas liñas de transporte “se poden beneficiar dos descontos e as vantaxes da tarxeta de mobilidade de Galicia, do mesmo xeito que os menores de 21 anos poden facer ata 60 viaxes ao mes de maneira gratuíta coa tarxeta Xente Nova”.

“Será o segundo ano consecutivo co que o Concello de Sanxenxo conta con este servizo, co que conectamos diversos puntos do municipio entre sí e cos servizos de transporte regular de viaxeiros de uso xeral, reducindo de forma considerable a conxestión viaria que existía con anterioridade”, dixo a deputada popular.

DESINTERESE EN CANGAS

Pola súa banda, Loli Hermelo criticou que o Concello de Cangas “non se sume a esta iniciativa da Xunta de Galicia polo desinterese dos responsables municipais, a pesar de que melloraría as posibilidades de transporte dos veciños e de todos os que nos visitan, ao tempo que reduciría considerablemente os problemas de tráfico existentes sobre todo na época veraniega”.

“En concreto, existen varias parroquias que están a demandar de xeito reiterado contar cun transporte público cunha frecuencia axeitada, pero o Concello fai oídos xordos a esta solicitude e poñendo como escusa que é a Xunta a que ten que levar a cabo todas as accións de transporte”, lamentou a deputada popular.

Os deputados do Grupo Popular Argimiro Marnotes e Noelia Pérez mantiveron un encontro con representantes de árbitros, adestradores e directivos do deporte ourensán para recoller as súas propostas de actuación sobre a violencia no deporte e trasladarlles a decisión do Goberno galego de exercer a acción popular nos procedementos penais nos casos de violencia no deporte que teñan lugar en Galicia.

Nunha xuntanza cos presidentes galego e ourensán de árbitros de fútbol, o presidente de adestradores de fútbol de Ourense e directivos do voleibol ourensán, Argimiro Marnotes e Noelia Pérez incidiron no pleno compromiso da Xunta coa erradicación da violencia no deporte, que agora dará un paso máis coa modificación da lexislación vixente para poder exercer a acción popular en procedementos penais derivados de calquera acto que poida considerarse violencia no deporte. “O obxectivo final é facer do deporte un espazo seguro, libre de violencia e respectuoso cos calores da convivencia e o xogo limpo”, indicaron.

MECANISMOS SANCIONADORES E MEDIDAS DE INTERVENCIÓN

Así mesmo, os deputados populares informaron que, logo da aprobación por unanimidade dunha iniciativa no Pleno celebrado esta semana, a Xunta dará comunicación aos concellos e clubs federados de Galicia dos mecanismos sancionadores e de todas as medidas de intervención e protección previstas nos protocolos existentes dirixidos á prevención da violencia no deporte.

En concreto, entre as medidas que a Xunta impulsará figuran o reforzo das campañas de prevención e sensibilización en todo o territorio galego contra a violencia no deporte; o impulso de protocolos de boas prácticas para proporcionar ás entidades deportivas e organizadores de competicións ferramentas eficaces na prevención da violencia; a intensificación da capacidade sancionadora da Comisión Galega de Control da Violencia, que poderá iniciar de oficio procedementos sen necesidade de denuncia previa; ou a creación de mecanismos electrónicos accesibles para que a cidadanía poida denunciar situacións de violencia ou condutas contrarias ás normas en eventos deportivos.

Os deputados do Grupo Popular Raquel Arias e José Manuel Mato visitaron a gardería de Sober e salientaron que a provincia de Lugo conta neste momento con case 3.500 prazas para nenos de 0 a 3 anos. Neste sentido, lembraron que o prazo de matrícula para acceder ás prazas ofertadas pola Xunta permanece aberto ata o vindeiro 4 de abril.

Raquel Arias e José Manuel Mato salientaron que “será o cuarto ano consecutivo no que todas as escolas infantís de Galicia son totalmente gratuítas, unha medida pioneira para a que a Xunta dedica máis de 65 millóns de euros este ano e que permite un aforro medio de case 3.000 euros por curso a cada familia”.

REFORZO DA CONCILIACIÓN

“Galicia é co 60,5 por cento a comunidade autónoma coa maior taxa de escolarización en escolas infantís, superando xa amplamente o obxectivo da Unión Europea de chegar ao 45 por cento en 2030 e situándose 15 puntos por enriba da media de España”, manifestaron.

Así mesmo, puxeron en valor a aposta do Concello de Sober pola conciliación en colaboración coa Xunta de Galicia, que vén de financiar a posta en marcha dunha nova escola infantil neste municipio que permitirá duplicar o número de prazas para atender aos nenos entre 0 e 3 anos. Porén, lamentaron que outros concellos, como o de Monforte, rexeiten reiteradamente a axuda da Xunta para a creación de novas prazas en garderías, tal e como lle están a demandar as familias. Na actualidade, na comarca de Lemos existen 218 prazas en escolas infantís.

Así mesmo, os deputados populares afirmaron que a Xunta segue reforzando os servizos de conciliación en toda Galicia, con medidas como o Bono Concilia Familia, que na última convocatoria beneficiou a 15.000 familias; a Tarxeta Benvida, que concede ás familias unha axuda directa para facer fronte aos gastos orixinados polo nacemento dun bebé; ou as preto de 100 casas-niño espalladas por toda a xeografía galega e que permiten un recurso de conciliación en concellos sen escola infantil.

Os deputados do Grupo Popular Gonzalo Trenor e Magdalena Pérez reuníronse cos patróns maiores das confrarías de Porto do Son, Portosín e Lira para trasladarlles a súa preocupación polas campañas de desprestixio do sector do mar que están a levar adiante con intereses partidistas. “Hai pouco máis dun ano tomaron como escusa o vertido de pellets que chegou ás nosas praias e agora utilizan demagoxicamente o proxecto de Altri en Palas de Rei para difamar sobre a calidade dos nosos produtos”, lamentaron.

Nunha xuntanza na que tamén participou o alcalde de Porto do Son, Luis Oujo, Gonzalo Trenor e Magdalena Pérez analizaron cos representantes das confrarías a situación do sector do mar en Galicia, “no que se abre unha nova etapa coa recente designación do novo comisario de Pesca e Océanos da Unión Europea, Costas Kadis”. Neste sentido, avogaron porque “se aposte por un desenvolvemento pesqueiro sostible, compatibilizando o traballo dos pescadores co respecto polo medio ambiente, porque os galegos somos os primeiros interesados en coidar os recursos marítimos existentes”.

Porén, os deputados populares manifestaron a súa preocupación aos representantes das confrarías polo ruído e as campañas que se fan desde determinados grupos políticos e as súas organizacións satélites que prexudican a boa imaxe dos produtos pesqueiros galegos e de todo o sector relacionado co mar.

“Resulta lamentable que se utilicen accidentes como o da chegada dos pellets ás nosas praias ou agora o proxecto de Altri para sementar dúbidas respecto da calidade dos produtos galegos e bo estado das nosas augas”, sinalaron os deputados populares, quen trasladaron aos responsables das confrarías que “seguiremos traballando, como o viñemos facendo ata agora, por manter e defender a boa imaxe da pesca galega, facendo todo o posible con contrarrestar estes bulos que tanto mal poden facer a este sector”.