O Pleno do Parlamento pecha definitivamente a Comisión de Investigación sobre a contratación pública da Xunta coa aprobación do seu ditame

O Pleno do Parlamento de Galicia pechou definitivamente a Comisión de Investigación sobre a contratación pública da Administración autonómica coa aprobación do seu ditame, no que se constata que “non hai nin unha soa tacha de legalidade nin no proceso de construción do Hospital Público Álvaro Cunqueiro, nin nos procesos de contratación menor da Xunta, nin na contratación de emerxencia efectuada pola Administración Pública autonómica e, particularmente, polo Servizo Galego de Saúde durante a pandemia”, subliñou o deputado popular Roberto Rodríguez.

En concreto, sobre o Hospital Álvaro Cunqueiro, Roberto Rodríguez explicou que a fórmula de colaboración público-privada utilizada para a súa construción “era a única opción viable naquel momento de gravísima crise económica, ausencia de recursos financeiros e imposibilidade de recorrer á débeda pública”. “A decisión adoptouse, nun primeiro momento, co aval da Intervención Xeral do Estado e o Banco Europeo de Investimentos, e posteriormente a legalidade da concesión foi avalada en 2010 por un informe do Grupo de Traballo de Contabilidade Nacional, integrado polo INE, o Banco de España e a IGAE”, concretou.

MÁIS BARATO E EN MENOR TEMPO

“O Goberno bipartito de BNG e PSdeG xa explorara no seu momento a posibilidade de utilizar unha fórmula público-privada para a construción deste hospital, pero nada deixou feito, nin proxecto nin crédito orzamentario”, dixo o deputado popular, quen engadiu que “executar o Hospital con fondos públicos esixiría que a Xunta renunciase ao seu gasto corrente ou aos demais investimentos previstos”. “Aínda no suposto de ter contado con orzamento suficiente, a construción tería resultado máis cara e tardaría máis tempo, prazo do que a Área Sanitaria non dispoñía, dado o colapso que presentaban daquela as infraestruturas sanitarias de Vigo”, matizou.

Roberto Rodríguez asegurou que na Comisión tamén “se acreditou que non houbo modificación do prazo de duración da concesión nin se reduciu a superficie hospitalaria construída”, do mesmo xeito que “quedou plenamente acreditado que non houbo sobrecuso”.

Respecto da contratación da Administración autonómica, Roberto Rodríguez subliñou que a Comisión “acreditou que a Xunta cumpre escrupulosamente a normativa legal, sometendo os expedientes a todos os controis internos e externos esixibles, tanto por parte da Asesoría Xurídica e a Intervención, como polas posteriores auditorías externas por parte dos organismos competentes”.

“Ademais, acreditouse a ausencia dunha relación causa-efecto entre a identidade dos cargos directivos e a facturación das empresas que prestan servizo á Xunta”, manifestou. Referíndose ao caso concreto da empresa Eulen, o deputado popular dixo que “o Goberno bipartito adxudicoulle unha media anual de 4,67 millóns de euros, mentres que os gobernos posteriores acadaron unha media de 4,72 millóns de euros”.

Sobre os contratos menores, explicou que durante o Goberno bipartito supuxeron o 8,2 por cento do orzamento e nas lexislaturas posteriores foron o 8,6 por cento, “aínda que a comparativa non resulta homoxénea porque en 2023 inclúense os datos de 30 entidades do sector público autonómico, a metade das cales non transparentaban as súas contas co Goberno bipartito”.

NON BUSCARON A VERDADE

Roberto Rodríguez acusou a BNG e PSdeG de “non buscar en ningún momento a verdade, porque non lles interesou nunca atopala”. “Comezaron a Comisión fuxindo da verdade da inexistencia da corrupción allea e a rematan fuxindo de verdade da existencia da corrupción propia: da súa paranoia corrupta no PP ao nacionalismo de amiguetes alá onde goberna o BNG ou onde os nacionalistas apoian ao goberno do PSdeG”, apuntou.

“A oposición fracasou na consecución dos verdadeiros obxectivos cos que chegaron a esta Comisión: o BNG, para apuntalar o liderado da señora Pontón ante unha UPG que, en vésperas da súa Asamblea Nacional, viuse na obriga de recordarlle que os marcos do seu nacionalismo están no comunismo e na independencia; e porque o PSdeG tiña como único obxectivo que esta Comisión axudara a tapar a corrupción que asolagaba ao Goberno de Pedro Sánchez”, sinalou o deputado popular, para concluír que “teñen motivos dabondo para considerar fracasada a Comisión, porque o liderado da señora Pontón sae da Comisión mais feble do que entrou e o Goberno do número un, por imposible que parecera hai dous meses, sae aínda mais afundido na corrupción do que xa estaba”.

Continúa a tramitación parlamentaria do proxecto de Lei de medios públicos de comunicación audiovisual de Galicia, unha norma “rigorosa, necesaria e útil”

A deputada do Grupo Popular Carmen Pomar reiterou hoxe no Pleno “a nosa sincera oferta de pacto para sacar adiante o proxecto de Lei de servizos dos medios públicos de comunicación audiovisual de Galicia para a sociedade dixital”, unha vez superou esta mañá o debate de totalidade. En concreto, salientou que “falamos dunha norma rigorosa, necesaria e útil para o conxunto de Galicia, que blinda a vocación dos medios públicos de comunicación audiovisual de titularidade autonómica, obrigados a producir os seus programas, contidos e servizos en lingua galega, garantindo tamén a edición e difusión en galego da produción allea”.

Carmen Pomar explicou que o descenso do consumo da televisión tradicional e o incremento do número de espectadores a través de internet “fai imprescindible aprobar unha nova lei galega que regule os medios de comunicación de titularidade pública para adaptala á lexislación española e europea, pero, sobre todo, para dotar a estes medios dun marco normativo co que poidan dar resposta aos retos de futuro nun mercado tan competitivo como é o audiovisual”.

CON TODAS AS GARANTÍAS

En concreto, afirmou que é unha lei rigorosa “porque o anteproxecto foi tramitado con todas as garantías, sometido a información pública e a un proceso de alegacións”, ao tempo que “se axusta aos novos requirimentos derivados das últimas reformas normativas de ámbito estatal europeo e está sendo tramitado polo procedemento ordinario neste Parlamento, coa plena participación da oposición”.

“E falamos dunha lei necesaria, porque as novas posibilidades tecnolóxicas derivadas da dixitalización e os novos, imparables e cambiantes patróns de consumo propios desta segunda década do século XXI fan necesaria unha nova regulación dos medios públicos audiovisuais de titularidade autonómica”, apuntou.

A deputada popular lembrou que o director xeral da CRTVG “poderá ser elixido por maioría cualificada deste Parlamento, pero o que non lles interesa é chegar a acordos: van ser os que non queiran o consenso nin para a elección por dous terzos, nin para a elección por dous quintos desta Cámara”. “Por iso hai unha disposición adicional que, como último recurso e para evitar situacións de bloqueo e interinidade indefinida, faciliten a elección democrática do director xeral por maioría absoluta”, concretou.

BNG E PSdeG CARECEN DE CREDIBILIDADE

“Non queren unha CRTVG independente, porque a realidade é que vostedes aspiran a unha Corporación ao seu servizo, como fixeron cando tiveron responsabilidades de Goberno en Galicia”, subliñou Carmen Pomar. Ademais, considerou “sorprendente escoitar aos socialistas galegos falar de ataques ao pluralismo e á liberdade informativa ou de golpes á democracia, cando é o que levan facendo desde a chegada de Pedro Sánchez á Moncloa”.

Así, dixo que “son os mesmos que, coa complicidade do BNG, reformaron a lei da CRTVE por decretazo para colocar a un director xeral afín ao sanchismo e dar asento no Consello de Administración a todos os seus socios parlamentarios para contentalos, pero deixando fóra ao partido máis votado”.

“BNG e PSdeG carecen de total credibilidade cando esixen diálogo na tramitación desta lei, porque demostraron que entenden como diálogo aprobar un decreto por sorpresa, dun día para outro, para a renovación da Lei da CRTVE, coa modificación no sistema de elección do director xeral e o seu blindaxe, atribuíndolle a el só as competencias que antes estaban no Consello de Administración”, rematou.

O Parlamento galego pide ao Goberno central medidas dirixidas a reducir a sinistralidade asociada ao envorco de tractores agrícolas

O Parlamento de Galicia aprobou hoxe a proposición non de lei do Grupo Popular, que non contou co voto favorable dos deputados do BNG, a través da que se demanda ao Goberno de España o desenvolvemento de medidas dirixidas a reducir a sinistralidade asociada ao envorco de tractores agrícolas, co obxecto de garantir a seguridade e o benestar dos profesionais e avanzar cara unha agricultura máis segura e sostible.

O portavoz popular do Medio Rural, Miguel Viso, lembrou que, segundo os datos do Instituto de Seguridade e Saúde Laboral de Galicia (Issga), máis do 60 por cento das mortes por accidentes de tractor están relacionadas con envorcos. En concreto, en 2024 rexistráronse en Galicia 74 accidentes laborais relacionados co tractor, mentres que os accidentes non laborais ascenderon a 39.

MEDIDAS A ADOPTAR

Miguel Viso explicou que “para previr estes accidentes e minimizar o seu impacto é fundamental fomentar a modernización do parque de tractores agrícolas, co impulso de axudas para a renovación de tractores antigos; desenvolver campañas de sensibilización e formación para concienciar sobre os riscos do envorco e a importancia do uso de medidas de seguridade; reforzar a obrigatoriedade de inspeccións técnicas periódicas en tractores; e establecer incentivos económicos para os agricultores que incorporen sistemas de protección nos seus tractores”.

Neste sentido, considerou “fundamental reforzar as campañas de sensibilización e formación; avanzar na modernización do parque de maquinaria agrícola; ampliar as accións formativas, tanto para agricultores en activo como para estudantes de formación profesional e obradoiros de emprego; e intensificar a colaboración entre o Issga e a Dirección Xeral de Tráfico”.

“A nosa meta é clara: unha agricultura máis segura e sostible”, sinalou o portavoz popular, quen asegurou que “a prevención funciona porque a tecnoloxía, a formación e a concienciación son armas poderosas contra os accidentes”.

O Parlamento galego pide á Xunta que intensifique as axudas do Plan de mellora de camiños rurais

O Parlamento de Galicia aprobou hoxe por unanimidade a proposición non de lei do Grupo Popular a través da que se insta a Xunta de Galicia a seguir intensificando as axudas correspondentes ao Plan de mellora de camiños municipais. “Trátase de seguir apostando por un programa que funciona, ben valorado no rural, e de conseguir que cada vez máis profesionais e máis empresas se acheguen, decidan e aposten polo rural para desenvolver as súas actividades e evitar así o despoboamento que tanto nos preocupa”, sinalou o deputado popular Enrique Barreiro.

O Plan Marco para o mantemento dos camiños e estradas rurais contará para os anos 2024 e 2025 cun orzamento de 19,5 millóns de euros, un 16 por cento máis que nas anteriores convocatorias.

ABERTO A TODOS OS CONCELLOS

Enrique Barreiro explicou que “este plan está aberto a todos os concellos galegos, sempre que teñan remitidas ao Consello de Contas os orzamentos do último exercicio e estean ao día no cumprimento das súas obrigas tributarias e fronte á Seguridade Social. As actuacións subvencionables van desde a ampliación e incremento da seguridade dos camiños; o reforzo do firme existente e a drenaxe; e tamén todos aqueles traballos de mantemento dos viais.

“A mellor forma de asentar poboación no rural é asegurar unha boa calidade de vida e facilitar a posibilidade de desenvolverse laboralmente, para o que se requiren unhas axeitadas vías de comunicación”, indicou o deputado popular.

Alberto Pazos afirma que a “extrema debilidade” do Goberno de Sánchez “vai ser a mellor escusa de PSdeG e BNG para xustificar que non se cumpra a súa promesa de eliminar as peaxes da AP-9”

O portavoz do Grupo Popular, Alberto Pazos, afirmou hoxe que a “extrema debilidade” do Goberno de Pedro Sánchez para aprobar tanto decretos-lei como os propios orzamentos do Estado “vai ser a mellor escusa que van ter os socialistas e nacionalistas galegos para xustificar que non se cumpra a súa promesa de gratuidade da AP-9”.

“Nós imos seguir insistindo, tanto na eliminación das peaxes nesta autoestrada como na súa transferencia a Galicia, ao que sumamos agora a solicitude de liberación da peaxe do treito Vigo-Porriño, de xeito que se mellore a seguridade de forma inmediata na A-55 e como medida rápida e economicamente máis viable ante a construción dun novo túnel nesta autovía”, indicou.

Alberto Pazos lembrou que “o único que sufrimos os galegos nestes últimos meses respecto da AP-9 foi un novo incremento das súas peaxes: o 5,34 por cento desde o pasado día 1 de xaneiro, o que supón pagar máis de 20 euros para quen teña que facer o traxecto entre Vigo e A Coruña”.

RESCATE E BONIFICACIÓNS, O MESMO CUSTO

“Dáse o paradoxo de que, coas novas bonificacións das peaxes anunciadas polo Goberno de Pedro Sánchez, que esperemos que algún día sexan realidade, o custo da indemnización polo rescate da autoestrada e o custo total desas bonificacións ata o final da concesión aseméllanse de xeito considerable, xa que ronda os 2.300 millóns de euros”, explicou o portavoz popular, quen indicou que “o Ministerio debería valorar se realmente compensa manter esas bonificacións ou abonar o rescate da AP-9”.

Pazos avanzou que “imos seguir insistindo na demanda para que o Goberno de Pedro Sánchez transfira a Galicia a AP-9, tal e como o pediu este Parlamento por unanimidade en varias ocasións, pero agora imos dar un paso máis, co obxectivo de mellorar a seguridade nun dos treitos da autovía A-55 no que se rexistra o maior número de accidentes de España.

En concreto, dixo que “pedimos que o Goberno central negocie coa concesionaria da AP-9 liberar inmediatamente a peaxe do treito entre Vigo e Porriño, de xeito que se mellore a seguridade de forma inmediata na autovía A-55, ao posibilitar aos condutores utilizar o treito da AP-9 de forma gratuíta, en vez de arriscarse a circular polas perigosas curvas de Mos que tanta sinistralidade rexistran”.

“Trátase dunha solución alternativa de uso inmediato ante a futura construción dun novo túnel na A-55 entre Vigo e Porriño”, unha obra que “comezou con gran polémica, logo de que o Goberno central presentara unha proposta que supón unha grave afección a parroquias como Bembrive en Vigo ou Sanguiñeda, Petelos, Pereiras e Tameiga en Mos”, apuntou.

Por este motivo, o Grupo Popular esixirá ao Goberno central no Pleno da vindeira semana que abra de xeito inmediato un período de interlocución con todos os concellos afectados por esta importante obra, de xeito que se defina unha actuación respectuosa co territorio, socialmente viable e dote á zona dunha infraestrutura axeitada e segura.

SOLUCIÓN EN MANS DO GOBERNO DE SÁNCHEZ

Alberto Pazos tamén se referiu ao “novo episodio da demostración da extrema debilidade do Goberno de Pedro Sánchez” vivido o pasado mércores no Congreso ao ver como se rexeitaba a aprobación do coñecido como Decreto Omnibus pola negativa chantaxista dos seus socios cataláns de Junts.

“O que debe quedar claro, desde o primeiro momento, é que quen traizoa e utiliza ao seu antollo a Pedro Sánchez e ao seu Goberno son os seus aliados de Junts,  que foron quen puxeron cos seus votos a este Goberno bicolor de PSOE e SUMAR e que agora decidiron, ao non atender as súas chantaxes, que non ían apoiar este decreto”, subliñou.

“O Partido Popular xa avisou, desde o primeiro momento, que non estaba disposto a apoiar este Real-Decreto na súa totalidade, simple e llanamente porque, ademais da revalorización das pensións, das bonificacións ao transporte ou das axudas aos afectados pola DANA, recollía outras moitas cuestións coas que non estaba de acordo, como subas de impostos, xa que non se prorrogan as baixadas do IVE que están vixentes para determinados alimentos ou electricidade; unha maior protección aos okupas, obrigando aos propietarios a seguir pagando do seu peto os gastos da súa vivenda okupada, coa imposibilidade de recuperala; a cesión, aceptando un novo chantaxe dos nacionalistas vascos, dun palacete en París ao PNV; ou inflixindo un recorte ao financiamento das comunidades autónomas, xa que non se actualizan as previsións de ingresos de 2025 nas entregas a conta ás comunidades, o que supón recortes de recursos económicos ás comunidades autónomas para destinalos a sanidade, educación ou políticas sociais, como a dependencia”, manifestou.

Alberto Pazos incidiu que “a solución neste momento está nas mans do Goberno de Pedro Sánchez, porque o Partido Popular xa anunciou que está plenamente disposto a aprobar un decreto que se centre no realmente importante: a revalorización das pensións, as bonificacións ao transporte público e as axudas aos afectados pola DANA”. Neste sentido, puxo de manifesto a vontade do PP de “apoiar medidas coherentes” ao aprobar cos seus votos no mesmo Pleno do Congreso o decreto que unicamente falaba de pensións, máis en concreto, de poder compatibilizar o cobro dunha pensión coa realización dun traballo remunerado.

Para rematar, Alberto Pazos criticou a postura adoptada polo único deputado do BNG nas votacións dese Pleno. “Paradoxicamente, votou a favor dos decretos que non saíron adiante a pesar dos agravios que supoñen para Galicia e votou en contra do decreto aprobado, gracias ao apoio do Partido Popular, que abre a posibilidade de cobrar unha pensión ao tempo que se realiza un traballo remunerado, sen esquecernos da súa nova e manifesta contradición: critican denodadamente en Galicia a aprobación, por maioría parlamentaria, das leis de acompañamento, ao tempo que apoian no Congreso a aprobación dun Decreto-Lei Omnibus, que inclúe unha chea de medidas enmascaradas nunha suba das pensións e unhas axudas ao transporte”, sinalou.

O Parlamento pide que se formalice a colaboración entre as direccións xeral de Patrimonio Cultural e de Emerxencias e Interior para mellorar a protección e salvagarda dos bens existentes en Galicia

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta a formalizar a colaboración en materia de protección do patrimonio cultural entre a Dirección Xeral de Patrimonio Cultural e a Dirección Xeral de Emerxencias e Interior para mellorar a protección e salvagarda do bens culturais de Galicia.

O deputado popular José Luís Ferro afirmou que “para que a colaboración entre estas dúas direccións xerais sexa máis precisa e eficaz débese formalizar e protocolizar, establecendo as actuacións da policía autonómica a prol dun eficaz cumprimento da normativa sobre protección do patrimonio cultural de Galicia derivado da lexislación galega vixente”.

“Con este instrumento poderemos garantir un axeitado coñecemento do marco legal de aplicación por todos os implicados e incrementar a calidade na prestación deste servizo público, que ambas unidades directivas consideran de especial preocupación e sensibilidade”, indicou Ferro.

AMPLA COLABORACIÓN

En concreto, apuntou que as actuacións de colaboración poderían abarcar desde a vixilancia e control dos bens de patrimonio cultural e do seu ámbito de protección; ata indentificación dos presuntos responsables das actuacións irregulares; así como as pescudas para reunir probas e información; apoio policial na paralización de obras ilegais; colaboración nos casos de emerxencia; control dos rexistros obrigatorios para as entidades dedicadas ao comercio de bens do patrimonio cultural; ou a vixilancia das actuacións realizadas nos ámbitos de protección dos Camiños de Santiago.

Para o desenvolvemento de todas estas actividades, o deputado popular indicou que a Dirección Xeral de Patrimonio “poñerá a disposición da Policía Autonómica o inventario de bens integrantes do patrimonio cultural de Galicia”, ao tempo que a colaboración tamén implicará o asesoramento técnico e xurídico necesarios para facer unha mellor planificación e coordinación das actividades entre os responsables da Dirección Xeral de Patrimonio Cultural e os da Policía Autonómica, establecéndose así unhas canles áxiles e continuas de comunicación.

O Parlamento galego solicita ao Goberno de España que asegure a continuidade na asistencia sanitaria ao colectivo docente adscrito a MUFACE

O Parlamento de Galicia aprobou hoxe a proposición non de lei do Grupo Popular, que non contou co apoio de PSdeG e Grupo Mixto, a través da que se solicita ao Goberno de España que tome as medidas necesarias para asegurar a continuidade na asistencia sanitaria a todo o colectivo docente adscrito a MUFACE. “Vemos como BNG e PSdeG usan moitas veces ao profesorado de parapeto aos seus intereses partidistas, pero á hora da verdade esquecen a este colectivo, como está a acontecer nesta ocasión coa posible desaparición desta mutualidade”, sinalou a deputada popular Felisa Rodríguez.

O pasado 5 de novembro coñeceuse que a licitación do concerto para prestar asistencia sanitaria no ámbito de MUFACE quedara deserto debido a un infrafinanciamento e unhas coberturas máis esixentes das que presta o propio Sistema Nacional de Saúde nalgúns aspectos. “A día de hoxe, a incerteza segue a ser absoluta, tanto para os 1,5 millóns de funcionarios e familiares que reciben cobertura sanitaria en España, como para calquera cidadán que entende que a falta de planificación do Goberno central pode prexudicar ao sistema de sanidade público”, indicou Felisa Rodríguez.

GOBERNO CENTRAL DIVIDIDO

“O Goberno de Pedro Sánchez continúa dividido, porque mentres desde o Ministerio de Función Pública confían en que con este proceso MUFACE seguirá existindo, desde Sanidade xa estudan as formas para que os mutualistas poidan incorporarse á sanidade pública, cumprindo o plan da propia ministra de desmantelar unha mutualidade que leva moito tempo funcionando correctamente”, explicou.

A deputada popular engadiu que “o Goberno central parece esquecer as súas responsabilidades e non é consciente de que a desaparición de MUFACE tería un notable impacto na asistencia sanitaria pública, pois só en Galicia tería que absorber máis de 60.000 adscritos, dos que arredor de 40.000 proceden do ámbito do sector educativo”.

“Esta situación, sumada ao déficit de médicos causado tamén pola rixidez nas directrices formativas do Ministerio, incrementaría os tempos medios de espera para os pacientes, tanto en cirurxías como en consultas, ademais de que produciría unha discontinuidade asistencial, pois os pacientes deixarían de estar atendidos polo seu médico de toda a vida”, manifestou a deputada popular.

Outra consecuencia negativa da desaparición de MUFACE sería a desconexión da historia clínica dos pacientes, pois o sistema IANUS de historia clínica da sanidade pública galega non conta cos datos da sanidade privada.

O Parlamento de Galicia pide ao Goberno central que intensifique as accións diplomáticas ante a UE para a inclusión de Vigo como porto nodal na Rede Transeuropea de Transportes

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que intensifique as accións diplomáticas ante a Unión Europea para reclamar a inclusión de Vigo como porto nodal na Rede Transeuropea de Transportes (TEN-T), así como requirir á Comisión Europea unha revisión inmediata do regulamento vixente, solicitando o establecemento de criterios obxectivos que non se limiten ao número de toneladas e que demostren a importancia estratéxica, económica, loxística e sostible do porto vigués, así como de outros portos europeos de similares características.

A deputada popular Patricia García destacou que o porto de Vigo é na actualidade “un símbolo de innovación e sostibilidade no sector marítimo a consecuencia do seu liderado no tráfico de pesca, a súa posición como unha das principais terminais de automóbiles do Atlántico e a súa implicación en proxectos internacionais como Portos Azuis, impulsado pola FAO”.

En concreto, lembrou que o 75 por cento das mercadorías que entraron ou saíron de Galicia por vía marítima en 2023 fixérono a través do porto de Vigo, o que supuxo un aumento do 28,5 por cento respecto a 2022. Ademais, o valor total do comercio exterior deste porto situouse nos 16.897 millóns de euros, máis do 33 por cento do comercio exterior de Galicia.

Porén, Patricia García manifestou que “a decisión da Unión Europea de non incluír a Vigo como porto nodal na Rede Transeuropea de Transportes ten graves consecuencias, como que perde acceso a fondos europeos que permitirían mellorar as súas infraestruturas e adaptarse aos retos da sustentabilidade; dificúltase que compita en igualdade de condicións con outros portos europeos o que impacta negativamente na súa competitividade; Galicia queda máis afastada das principais rutas loxísticas internacionais, limitando o desenvolvemento de sectores clave mencionados; e esta exclusión perpetúa o abandono histórico cara ao noroeste peninsular, contradicindo os principios de cohesión económica e territorial promovidos pola Unión Europea”.

ESTRATEXIA AMPLA E COORDINADA

Para abordar a exclusión do porto de Vigo da rede e garantir a súa inclusión na próxima revisión, a deputada popular considerou “esencial deseñar e executar unha estratexia ampla e coordinada que inclúa medidas políticas, técnicas e diplomáticas”. Así, en primeiro lugar demandou “solicitar á Comisión Europea e aos Estados membros unha revisión dos criterios establecidos no Regulamento europeo 2024/1679, substituíndo a exclusividade do criterio baseado no volume de mercadorías por un enfoque máis holístico que inclúa o valor económico das mercadorías manexadas, a importancia estratéxica do porto nas conexións intercontinentais, a contribución á cohesión económica e territorial das rexións periféricas e a sustentabilidade ambiental e a adaptación ás políticas de transición ecolóxica da UE”.

En segundo lugar, demandou a implantación de novos indicadores clave para valorar os portos, como a súa capacidade de liderado en sectores específicos e a súa posición nas cadeas globais de subministración, así como elaborar unha proposta técnica baseada en estudos que destaquen o porto de Vigo como motor económico de Galicia, España e Europa, resaltando o seu impacto no comercio marítimo europeo e nos obxectivos climáticos da UE.

“E por último, o Goberno Central debe intensificar as negociacións coa Comisión Europea defendendo o porto de Vigo como unha infraestrutura de interese nacional e europeo”, dixo a deputada popular, quen considerou “imprescindible que o Goberno de España incorpore Vigo como prioridade nas súas axendas internacionais”.

O Parlamento de Galicia insta ao Goberno de España a demandar en Europa a revisión dos criterios de reparto das cotas de Gran Sol e melloras nos sistemas de avaliación sobre stocks pesqueiros

O Parlamento de Galicia aprobou hoxe por unanimidade a proposición non de lei do Grupo Popular a través da que se insta ao Goberno de España a demandar no ámbito europeo a revisión dos criterios de reparto das cotas de Gran Sol, priorizando unha distribución máis equitativa; e apostar por melloras nos sistemas de avaliación científica, incorporando datos máis precisos sobre os stocks de pesqueiras en zonas como o Atlántico Norte, baseándose en índices que reflictan as condicións reais das augas galegas.

O portavoz popular do Mar, Miguel Fidalgo, considerou lamentable que, “unha vez máis, o Goberno de España non conseguiu, na reunión do Consello de Ministros de Pesca da Unión Europea celebrada a comezos do pasado mes de decembro, reducir os recortes que se expuñan para varias especies, entre elas e especialmente a pescada, o xurel ou a xarda”.

MELLORA DAS POSIBILIDADES DE PESCA

“O Goberno de España nin fixo ben o seu traballo nin negociou correctamente a repartición de cotas do Gran Sol”, criticou Miguel Fidalgo, quen asegurou “non entender os golpes de peito cando o acordo acadado co Reino Unido supón unha gran baixada na pescada do caladoiro do Atlántico Norte, o que repercutirá nunha perda de ingresos para a economía galega de 54 millóns de euros”.

Fidalgo insistiu que “defender a mellora das posibilidades de pesca ten que ser a principal obriga do Goberno de España alí onde se negocie, porque pescar máis e pescar mellor é compatible cos obxectivos da Política Pesqueira Común: garantir a sustentabilidade da pesca desde o punto de vista ambiental, económico e social”.

Ademais, apuntou que “as decisións comunitarias deben adaptarse á realidade das rexións pesqueiras e, por iso, desde o PPdeG esiximos un compromiso firme por parte do Estado español na defensa dos intereses do sector pesqueiro galego”.

O Grupo Popular pedirá no Pleno que o Goberno central libere de peaxe o tramo Vigo-Porriño da AP-9 para mellorar a seguridade na A-55 e propoña novas alternativas ao novo trazado da autovía Rías Baixas

O Grupo Popular demandará ao Goberno central no Pleno do Parlamento de Galicia da vindeira semana, ademais de insistir na transferencia da AP-9 á Comunidade galega, que libere a peaxe do tramo Vigo-Porriño desta autoestrada para mellorar a seguridade da A-55 e propoña novas alternativas ao novo trazado proposto da autovía das Rías Baixas pola grave afección que esta iniciativa provoca en parroquias de Vigo e Mos. Así mesmo, pedirá á Xunta e ao Goberno de España medidas orientadas á repotenciación de parques eólicos antigos que supoñan una mellora medioambiental e garantan un uso eficiente dos recursos.

Ao remate da Xunta de Portavoces, o portavoz popular, Alberto Pazos, informou que este primeiro pleno do novo período de sesións dará comezo co debate de totalidade do proxecto de Lei de servizos dos medios públicos de comunicación audiovisual de Galicia para a sociedade dixital, “unha nova lei que vai permitir dar un paso adiante no intenso labor que vén desenvolvendo a Corporación de Radio e Televisión de Galicia, que pasará a chamarse Corporación de Servizos Audiovisuais de Galicia, na promoción, difusión e impulso da lingua galega”.

Pazos apuntou que o novo texto legal “adapta a lexislación da CRTVG á sociedade actual, apostando pola alfabetización mediática e dixital para promover o bo uso da tecnoloxía e recoñecer as novas falsas, ao tempo que vela pola utilización responsable da intelixencia artificial”. Ademais, incorpora a normativa para a elección tanto do Consello de Administración da Compañía como do seu director xeral, “buscando, en todo momento, evitar situacións de interinidade indefinida na Dirección da Corporación, como a que estamos a vivir na actualidade, recoñecendo o excelente traballo que están a desenvolver os xestores actuais”.

De seguido, a sesión plenaria procederá ao debate do ditame da Comisión de Investigación sobre a contratación pública na Administración autonómica, que “serviu para demostrar a xestión exemplar que levou a cabo o Goberno galego para dotar a Vigo dun dos mellores hospitais públicos de España e Europa, e demostrar que toda a contratación pública da Xunta levouse e lévase a cabo con total transparencia e seguindo estritamente a normativa vixente”, asegurou Alberto Pazos.

O portavoz popular lembrou que a Comisión de Investigación “deixou claro, logo das comparecencias dos dous conselleiros maiores do Consello de Contas, que non existiu sobrecusto algún na construción do Hospital Público Álvaro Cunqueiro, constatándose, ademais, que a opción levada a cabo para facelo realidade era a única posible naquel momento, conseguindo poñelo en marcha nun tempo récord para beneficio de todos os cidadáns de Vigo e a súa contorna”.

A continuación, a sesión plenaria acollerá a comparecencia do conselleiro de Emprego, Comercio e Emigración para explicar as liñas mestras do seu departamento na procura de man de obra cualificada para a cobertura de vacantes en sectores estratéxicos de Galicia.

BENEFICIOS DA REPOTENCIACIÓN

Dentro do apartado de proposicións non de lei, o Grupo Popular demandará á Xunta, e tamén aos proxectos que dependan da autorización do Goberno central, a adopción de medidas, especialmente as orientadas á repotenciación de parques eólicos, que supoñan unha mellora ambiental, ao mesmo tempo que garanten un uso eficiente dos recursos existentes na Comunidade galega.

“A repotenciación inclúe beneficios adicionais, como a conexión á rede existente, un grao de aceptación pública probablemente máis elevado e o coñecemento do impacto ambiental que, en principio, é menor, ao reducirse o número de aeroxeradores dun xeito moi significativo” concretou o portavoz popular.

A segunda proposición non de lei ten que ver coa transferencia e a rebaixa de peaxes das autoestradas estatais, ampliado nesta ocasión con demandas de modificación a proxectos anunciados desde o Goberno de España para a comarca de Vigo.

En concreto, en primeiro lugar, pídese, unha vez máis, que o Goberno de España proceda á transferencia da titularidade da AP-9 nos termos aprobados por unanimidade neste Parlamento galego, ao tempo que se inicien, con carácter inmediato, negociacións coa concesionaria desta autoestrada a fin de que se proceda a liberar de peaxe o tramo Vigo-Porriño, para abordar de xeito urxente os problemas de seguridade da A-55, por ser a solución máis rápida, inmediata e economicamente mais viable ao problema da sinistralidade nesta vía.

“Unha segunda cuestión que demandamos é que, con carácter urxente, o Goberno de Pedro Sánchez propoña novas alternativas ao novo trazado proposto da autovía das Rias Baixas pola grave afección que provoca a parroquias de Vigo, como Bembrive; e de Mos, como Sanguiñeda, Petelos, Pereiras e Tameiga”, sinalou Alberto Pazos.

PROCEDER INEXPLICABLE

Neste sentido, cualificou de “inexplicable o modo de proceder do Goberno de Pedro Sánchez, que, pese ao forte impacto no seu territorio, fixo partícipe ao Concello de Vigo da definición da alternativa proposta pero non tivo ningún tipo de comunicación previa a este trámite cos demais concellos afectados, nomeadamente o Concello de Mos, que adaptou o seu Plan Xeral ao trazado marcado polo Ministerio de Fomento no ano 2015”

Por este motivo, tamén se esixe ao Goberno de España a inmediata apertura dun período de interlocución, institucional e técnica con todos os concellos afectados para definir a actuación nesta autovía, de modo que sexa respectuosa co territorio, socialmente viable e supoña unha infraestrutura axeitada e segura para a mobilidade da zona.

A primeira das preguntas que o Grupo Popular formulará ao Goberno galego tamén está relacionada coa situación das autoestradas de titularidade estatal, xa que pide a súa valoración sobre a suba de peaxes que se viviu a comezos desde ano 2025 nestas autoestradas, manténdoas como as máis caras de España. “Sen esquecernos de que os usuarios da AP-53 continúan, a día de hoxe, sen gozar de descontos nas peaxes, a pesar do anuncio feito polo Goberno central para estender a esta autoestrada as bonificacións coas que conta a AP-9”, dixo o portavoz popular.

A segunda das preguntas do Grupo Popular ten como obxectivo coñecer as melloras que está a incorporar no programa galego de cribado neonatal, mentres que a terceira versa sobre as liñas básicas do plan integral de actuación para a renovación e impulso dos centros de información á muller, logo de que neste ano 2025 a Xunta incrementara o apoio anual a estes centros en máis dun 30 por cento, superando os 6,5 millóns de euros de dotación económica.