Categoría: PP de Galicia

 

A secretaria xeral do PPdeG, Paula Prado, considera que a mensaxe de Fin de Ano transmitida hoxe polo presidente Alfonso Rueda constitúe “un chamamento a seguir facendo entre todos que Galicia funcione sen poñerse límites e sen aceptar limitacións”.

“Logo de escoitar ao presidente Rueda, queda claro que 2024 foi o ano no que os galegos e galegas blindaron o sentidiño e a estabilidade que nos fan excepcionais e que, polo tanto, 2025 será un ano no que Galicia seguirá funcionando”, explica.

A número dous dos populares galegos reivindica así a aposta do seu partido pola Galicia que funciona “fronte aqueles que aínda non asumiron o resultado das urnas e seguen paralizados por liortas internas e sometementos partidistas”.

O discurso pronunciado polo presidente Rueda é, na súa opinión, a constatación de que os galegos e galegas contan e seguirán contando cun Goberno centrado na consolidación dunha educación pública gratuíta desde a escola infantil ata a universidade, na creación de emprego, na protección do medio ambiente e na tarefa de facilitar o acceso á vivenda. Ao tempo que segue traballando ademais para preservar a nosa Comunidade como “unha terra aberta na que non sobra ninguén e todos son ben recibidos”.

“Como comprobamos coas propias palabras do presidente, o Goberno galego ten clara a súa prioridade para este 2025: seguir mellorando a vida da xente desde a serenidade e a responsabilidade, sen compracencia e sen conformismos, con traballo e cumprindo a palabra dada”, conclúe Paula Prado.

 

O Partido Popular de Galicia estrease dando por primeira vez na súa historia as tradicionais badaladas de Fin de Ano, as súas particulares ‘camPPanadas’, e desexando un feliz 2025, cun toque de humor e con Ana Vázquez, Raúl Santamaría e Avelino Souto como protagonistas.

A través dun vídeo estreado hoxe nas redes sociais do partido, os populares galegos botan man de tres dos seus rostros máis televisivos: o deputado autonómico e exconcursante de ‘Reacción en Cadena’, Raúl Santamaría; a deputada nacional e colaboradora en ‘Todo es mentira’, Ana Vázquez; e o coordinador de Medio Rural do partido, Avelino Souto, quen ao longo deste ano se fixo cada vez máis coñecido polas súas intervencións ‘estelares’ nos plenos municipais de Lalín.

Uns protagonistas que representan á súa vez ás mulleres e á mocidade galegas: dous sectores da sociedade que foron clave na vitoria electoral do PPdeG o pasado 18 de febreiro apoiando maioritariamente a Alfonso Rueda.

No vídeo os espectadores atoparanse aos tres políticos aproveitando os momentos previos ás badaladas para emular un concurso televisivo no que Ana Vázquez é a encargada de descifrar palabras a través das pistas que lle van ofrecendo os seus compañeiros. Unha dinámica na que saen a relucir temas que marcaron o ano 2024.

Finalmente, cun escenario tan emblemático como a Praza do Obradoiro de fondo, chega o momento da conta atrás e os protagonistas retransmiten as ‘camPPanadas’, cumprindo coa tradición das 12 uvas desexando un feliz ano 2025 a todos os galegos e galegas, á vez que dedican varias das badaladas aos presidentes Alfonso Rueda e Alberto Núñez Feijóo, a Galicia ou a España, entre outros.

 

O Partido Popular de Galicia pide ao Goberno de Pedro Sánchez “máis transparencia cos seus proxectos, menos mentiras cos prazos e a maior axilidade” en relación á autovía A-54, que une Santiago de Compostela e Lugo, para que “sexa unha realidade canto antes”.

Nunha visita a Melide, o deputado e portavoz de Infraestruturas do PPdeG no Parlamento galego, Roberto Rodríguez, acompañado da voceira local e exalcaldesa, Dalia García, trasladou esta petición, lamentando que o Goberno central veña amosando reiteradamente que os compromisos con Galicia en materia de infraestruturas non están entre as súas prioridades.

“Os veciños e veciñas de Melide e desta comarca levan moitos anos agardando por unha infraestrutura esencial, a autovía A-54, que o Goberno de Sánchez xa comprometera para o Xacobeo 2021-2022, pero remata este ano 2024 sen ser unha realidade e no ano 2025 tampouco o vai ser”, sinalou Rodríguez.

Nese sentido, emprazou ironicamente aos galegos a volver a incluír tamén esta vía na carta aos Reis Magos, “á que sempre teñen que recorrer os galegos e galegas cando se trata das súas infraestruturas”.

“UN TRÁFICO MOITO MAIOR DO RECOMENDABLE”

O último atraso da A-54 é o da apertura do tramo entre Melide e Palas de Rei, previsto nas últimas intencións do Goberno central para antes de que rematara o presente ano. Un tramo que, non obstante, e tal como denunciaron Roberto Rodríguez e Dalia García, non vai evitar o paso polos núcleos de Melide e tampouco de Arzúa, pola falta de previsión do Executivo de Sánchez.

Este foi un dos motivos da visita do deputado a este concello da provincia da Coruña, onde os seus veciños e veciñas temen polo “colapso” e pola “falta de seguridade viaria” que se vai producir en canto se abra o novo tramo, ao acumularse no centro da vila “un tráfico moito maior do recomendable”.

“Porque mentres non remate o seguinte último treito, ata Arzúa, o centro de Melide e a rotonda principal da N-547 neste concello van estar aínda máis colapsados do normal, con graves problemas para condutores e viandantes”, explicou.

“Avogamos para que esta infraestrutura, a A-54, fundamental para esta comarca, para a provincia de Lugo e para o resto de Galicia, sexa unha realidade canto antes. Todos desexamos poder viaxar de Santiago a Lugo e de Lugo a Santiago de forma rápida e segura”, concluíu Roberto Rodríguez.

Pola súa banda, desde o PP de Melide, Dalia García e o resto dos concelleiros piden ao alcalde, José Manuel Pérez, que “tamén sexa transparente”, non faga caso omiso ás peticións dos seus veciños e dea a cara ante o Ministerio de Transportes e Mobilidade Sostible. “Necesitamos canto antes un plan de tráfico organizado porque se non, o noso concello seguirá colapsado”, lamentou a voceira local.

 

O presidente do PPdeG, Alfonso Rueda, asegurou hoxe que ve ao Partido Popular preparado en Pontevedra para un 2025 aínda mellor que os anos anteriores, tanto a nivel provincial como local.

Na Xunta Directiva Provincial que tivo lugar nesta ocasión no Pazo da Golpelleira, en Vilagarcía de Arousa, o líder dos populares galegos subliñou que o partido está preparado na Deputación, con Luis López á fronte, que leva dous anos exemplo de como facer as cousas ben; preparado nos concellos gobernados polo PP, xa 27 en toda a provincia, que levan ao ámbito local o mellor dos valores populares; e preparado nos grupos municipais na oposición, para loitar polos veciños.

Nese sentido, Rueda salientou que o PPdeG ten un plan, reflectido nuns Orzamentos autonómicos xa aprobados en tempo e forma, e que recollen cuestións tan importantes como a aposta de Galicia pola vivenda, co obxectivo de duplicar o parque público; pola sanidade, con máis de 5.400 M€; e por medidas pioneiras como a gratuidade das matrículas universitarias. Unha aposta que se estende a toda a provincia e tamén moi especialmente á comarca do Salnés que visitou hoxe.

Este PPdeG que ofrece feitos, e non palabras, foi protagonista dun 2024 cun saldo claramente positivo, que comezou en febreiro cunha gran vitoria electoral e continuou en xuño coas europeas, ademais doutros moitos logros, nos que a provincia de Pontevedra foi fundamental.

Por último, Rueda quixo facer fincapé no excelente traballo que está realizando o grupo municipal do PP en Vilagarcía, demostrando que partido foi o que gañou as eleccións locais e cal é a opción preferida polos veciños. Un partido, ademais, con concelleiros que tamén traballan polo municipio desde o Parlamento e o Congreso.

“TRABALLANDO UNIDOS, ACADAMOS OBXECTIVOS”

Pola súa banda, o presidente provincial de Pontevedra, Luis López, animou aos asistentes a seguir traballando no vindeiro ano, tal e como fixeron neste 2024.

“Temos 27 concellos da provincia gobernados polo PP, gobernamos na Deputación e gobernamos na Xunta, e iso é unha mostra de que traballando unidos, imos acadando os nosos obxectivos. Moitas gracias e a seguir traballando para ter unha Galicia aínda mellor”, indicou o líder provincial.

 

A secretaria xeral do PPdeG, Paula Prado, asegurou hoxe que no discurso que ofreceu a pasada noite o Rei Felipe VI veu representada á “Galicia real” que os galegos e galegas elixiron maioritariamente o 18 de febreiro, nas eleccións autonómicas, e que segundo as últimas enquisas publicadas “seguen apoiando con firmeza”.

“Desde o PPdeG imos seguir impulsando esa Galicia na que cre a gran maioría, para que o noso futuro siga soando ben”, subliñou.

Nun ano no que houbo partidos que apoiaron o veto ao Rei na toma de posesión da nova presidenta de México e outros que seguiron alimentando a desigualdade entre territorios, lembrou Paula Prado, os populares galegos defenden “a Galicia real que é leal á Constitución, que cre na fortaleza do modelo autonómico, e que simbolizan á perfección os presidentes Alfonso Rueda e Alberto Núñez Feijóo”.

Na súa opinión, neste 2024 no que Felipe VI visitou Galicia máis que nunca, e no que a nosa Comunidade acolleu en Marín á Princesa Leonor, o monarca “demostrou que é o Rei que os galegos e galegas merecemos e necesitamos”.

“Conseguiu unha vez máis representar co seu discurso aos que compartimos os valores de unidade, concordia e respecto”, concluíu Prado, e sinalou que o PPdeG celebra tamén “a súa reivindicación do ben común como principio reitor na política”, así como “a súa defensa da Constitución”.

 

O Partido Popular de Galicia estrea hoxe o seu vídeo de Nadal, no que o presidente Alfonso Rueda emprega as súas dotes de ‘director’ para deixar claro que “Galicia soa moi ben”, despois dun ano moi especial no que logrou a súa primeira maioría absoluta nas eleccións autonómicas.

Logo de percorrer a Comunidade en moto e en autobús nos anos anteriores, o líder dos populares galegos nesta ocasión ponse á fronte dun cento de galegos e galegas sobre o escenario dun auditorio para, con bo humor e proximidade, mostrar a harmonía e o bo facer da nosa terra.

Ao longo do vídeo os espectadores iranse atopando con personaxes que, por un motivo ou outro, foron protagonistas deste 2024: desde o televisivo deputado Raúl Santamaría ata o presidente do Parlamento de Galicia, Miguel Santalices; pasando entre outros polo responsable de Mar do Goberno galego, Alfonso Villares, e incluso un particular ‘señor K. García’ que ten moita intención de ‘cantar’.

Non podía faltar tampouco o tradicional cameo do presidente de honra do PPdeG, Mariano Rajoy, que volve verse no apuro de lidar co novo formato de tapóns de botella; nin o do presidente nacional do PP, Alberto Núñez Feijóo, que observa con envexa o ben que soa este “concerto galego” a diferenza doutros.

Ademais, non perden a oportunidade as fillas do presidente, que xa non saben con que lles vai saír seu pai, ou, por primeira vez, Toñito, o ‘fenómeno’ de Carballo, que igual que nos mítines dá un bo susto a todos os presentes.

Aparecen tamén, ataviados cos habituais xerseis de Nadal, a secretaria xeral do PPdeG, Paula Prado, e os catro presidentes provinciais do partido: Diego Calvo (A Coruña), Elena Candia (Lugo), Luis Menor (Ourense) e Luis López (Pontevedra). E estréase o portavoz do Grupo Popular no Parlamento de Galicia, Alberto Pazos.

Alfonso Rueda, logo de supervisar todo o proceso de preparación escénica e a medida que o público vai enchendo o auditorio e os cantantes soben ao escenario, vainos recibindo a todos eles con afecto para acto seguido coller as partituras da man dun camareiro moi especial, Adrián do bar O Cañón de Pau (Pontevedra), o lugar onde o presidente toma o café todas as mañás.

A continuación, é sorprendido coa interpretación do tema ‘Xuntos’, himno da maioría absoluta deste ano nas eleccións autonómicas, que dá paso á panxoliña ‘Noite de Paz’, en referencia á estabilidade de Galicia e a un desexo de paz en todo o mundo.

Neste contexto é no que o presidente traslada a súa mensaxe para enviar un agarimoso saúdo aos afectados pola catástrofe de Valencia e desexar a todos os galegos e galegas un Bo Nadal e un Próspero Ano 2025: “Queremos que este Nadal soe ben para todos os galegos e galegas. Porque cando os galegos nos xuntamos, soamos moi ben. E o noso futuro soa aínda mellor”.

 

O presidente do PP de Santiago, Borja Verea, animou hoxe os seus a seguir traballando con ganas, entusiasmo e ilusión para acadar o obxectivo de gobernar a capital de Galicia e canalizar a forza de cambio que comezou nas eleccións municipais.

Ante preto de medio millar de afiliados e simpatizantes, o líder dos populares composteláns márcase como obxectivo para o próximo ano “seguir traballando para ser aínda mellores e estar preparados cando chegue o momento de gobernar”.

“Nós temos claro o noso obxectivo. Xa gañamos as eleccións e agora queremos gobernar porque estamos convencidos de que imos facelo mellor”, engadiu explicando que, con paciencia, este obxectivo está cada vez máis preto.

Verea agradeceu a confianza “masiva” que os veciños de Santiago depositaron nel e no seu equipo: “Cada día somos máis e a forza de cambio que comezou nas eleccións municipais é xa imparable”.

PAULA PRADO: “NÓS, E NON OUTROS, SOMOS MAIORÍA”

Pola súa banda, a secretaria xeral do PPdeG, Paula Prado, quixo destacar a achega de Borja Verea e o seu equipo aos dous grandes éxitos do partido este ano. Referíndose así ao máis de 45% de apoio recibido por Alfonso Rueda na cidade de Santiago nas autonómicas e aos case 18.000 votos ao PP nas eleccións europeas.

Como resultado deste apoio, explicou, os intereses dos composteláns son defendidos nos lugares onde se toman as decisións e son tidos en conta á hora de levalas a cabo. Algo do que puxo como exemplo os Orzamentos aprobados esta mesma semana e nos que Santiago e o seu futuro están moi presentes.

“Grazas ao PP de Santiago por ser a mellor oposición posible e por demostrar que somos nós, e non outros, os que somos maioría”, concluíu recordando a vitoria electoral de Borja Verea nas eleccións municipais.

DIEGO CALVO FAI BALANCE DUN GRAN ANO PARA O PARTIDO

O presidente provincial do PP da Coruña, Diego Calvo fixo balance dun ano no que en Galicia “revalidamos unha maioría absoluta que avala o gran traballo do Goberno galego” e en España “gañamos as eleccións e demostramos que somos a única alternativa seria para sacar a este país do caos no que o meteron os socialistas e os seus socios”.

De cara ao novo ano, o líder popular pediulle aos seus “seguir traballando para que Galicia siga sendo un exemplo de boa xestión e un ‘oasis de tranquilidade’ no medio do clima de tensión que se instaurou no resto do territorio español”.

 

O PPdeG reclama a Pedro Sánchez que deixe de desconectar Galicia e dea marcha atrás na súa intención de illar a máis de 130.000 galegos e galegas a través do plan que prevé a eliminación de paradas de autobús estatais en 22 concellos rurais da Comunidade.

A secretaria xeral do partido, Paula Prado, lamentou hoxe que, desde a súa chegada á Moncloa hai seis anos, Sánchez non cesase no seu obxectivo de illar o rural galego. Xa que, aos problemas ferroviarios e á falta de frecuencias, únese ademais os plans do Goberno central de eliminar paradas de autobús.

“Sánchez quere condenar ao rural galego a unha perda do transporte público e dos seus servizos, cando todas as administracións traballan polo contrario”, asegurou a número dous dos populares galegos incidindo en que “o Goberno central vai en dirección contraria na loita para reverter o despoboamento”.

De aí que o partido, tal e como xa fixo o responsable de Mobilidade do Goberno galego, Diego Calvo, e como se ten reiterado en todas as cámaras de representación, pida a Sánchez que deixe de desconectar Galicia e cese nas súas pretensión de eliminar paradas de autobús”.

“Os galegos e galegas non merecen perder servizos por un despropósito”, engadiu na mesma liña que o alcalde de Lalín, un dos concellos afectados. “Para manter o rural vivo o que non se pode facer é quitarlle servizos”, asegurou José Crespo.

O rexedor lalinense ten claro que “desconectar o mundo rural do mundo urbano nunha é unha boa solución” e que “unha Galicia a dúas velocidades nunca vai avanzar como debería facelo”.

UN NOVO MAPA CONCESIONAL INADMISIBLE PARA GALICIA

Logo de ofrecer declaracións aos medios, Paula Prado e José Crespo mantiveron unha reunión de traballo con representantes dos 22 concellos afectados e na que tamén participou o coordinador de Infraestruturas do PPdeG, Antonio Ameijide.

Unha reunión na que se abordou a problemática da implantación do novo mapa concesional de transporte por estrada de competencia estatal, cuxa incidencia sería inadmisible para Galicia dado o seu gran impacto social, territorial e económico.

Non en balde, a proposta do Ministerio de Transportes pretende eliminar 90 tráficos dentro de Galicia. Un recorte que deixaría aos concellos de Arzúa, Melide, Chantada, O Corgo, Guitiriz, Baralla, Meira, Monterroso, As Nogais, Palas de Rei, Quiroga, A Pontenova, Trasmiras, A Mezquita, Ribadavia, Riós, A Rúa, Forcarei, Lalín, Tui, Silleda e O Porriño sen parada. De feito, neste último e noutros, as paradas da liña estatal xa foron suprimidas.

Tendo en conta as particularidades de Galicia e a necesidade de conectividade do rural, os populares galegos consideran que o novo mapa concesional condena ao rural a unha perda radical de servizos de transporte público e por iso amosa o seu total rexeitamento a este deseño.

Reclaman ademais, ao igual que xa fixo o Goberno galego, a convocatoria urxente da Conferencia Sectorial de Transportes para que os representantes autonómicos poidan trasladar as súas preocupacións e propostas co obxectivo de paliar os efectos negativos que este novo mapa concesional traerá aos territorios.

 

O presidente do Partido Popular de Galicia, Alfonso Rueda, subliñou hoxe o compromiso do Goberno galego por mellorar a vida dos veciños de Vigo a través dos Orzamentos que se aprobaron onte e que, na súa opinión, son a plasmación con feitos da súa aposta polas infraestruturas, a vivenda, a sanidade e a cultura na cidade.

Mencionou neste sentido o compromiso da Xunta coa alta velocidade a Portugal, co Porto de Vigo, coa proxección de 9.000 vivendas públicas na cidade, co hospital e o futuro CIS Olimpia Valencia e coa recuperación do emblemático Cine Fraga.

Ante máis de 350 afiliados e simpatizantes do PP de Vigo, Rueda fixo un chamamento aos seus para que continúen facendo valer esta realidade como ata o de agora. Unha tarefa na que, segundo o presidente, os populares vigueses puxeron a disposición dos veciños o seu traballo e esforzo.

Agora, engadiu, vén o tempo consolidar todo o ben feito e tomar un novo impulso cun Congreso local do que o partido sairá reforzado e máis unido que nunca. Nesta liña, o presidente amosouse convencido de que se saberá sacar proveito de todo o extraordinario capital humano dun equipo que definiu como traballador, rigoroso, leal e cumpridor.

Alfonso Rueda concluíu reivindicando ao PP como un partido unido, cohesionado e comprometido e que se marca como obxectivo para o Ano Novo seguir sendo fiel a si mesmo e continuar facendo as cousas ben como ao longo deste 2024.

LUIS LÓPEZ: “O PP DE VIGO ESTÁ NUNHA CLARA LIÑA ASCENDENTE”

O presidente provincial do PP de Pontevedra, Luis López, aproveitou este multitudinario encontro para felicitar o Nadal a toda a familia popular da cidade e trasladarlles os seus parabéns polo “magnífico traballo e o gran momento” que está a vivir o partido en Vigo tras “aumentar fortemente os apoios” acadados nas catro citas electorais celebradas no último ano e medio.

Nesta liña, engadiu que o partido segue medrando e se atopa “nunha clara liña ascendente” na cidade grazas á súa política de cercanía chea de doses de realidade e á extensión da súa base social entre todos os estratos e barrios de Vigo.

Finalmente, destacou o enorme labor da xestora presidida por Ana Ortiz durante todos estes meses e agradeceu o esforzo de todos os militantes e simpatizantes nos últimos tempos por contribuír “cunha gran achega á recuperación do goberno da Deputación o pasado ano e á maioría absoluta obtida por Alfonso Rueda nas eleccións autonómicas do pasado mes de febreiro”.

ANA ORTIZ: “TEMOS UN PARTIDO UNIDO, FORTE E PREPARADO”

Pola súa banda, a líder local do partido quixo trasladar o seu orgullo polo intenso traballo realizado durante estes meses no PP de Vigo, agradecendo que hoxe “o partido estea unido, forte e preparado para o que se nos poña por diante”.

“Neste partido non sobra ninguén e fai falta que máis xente se incorpore a un proxecto que é imparable ante o declive doutros”, asegurou Ana Ortiz facendo un chamamento a “pensar no que estamos a construír e non perder o tempo nos espectáculos doutros”. Xa que, tal e como concluíu, “o tempo corre para todos e para o PP de Vigo o futuro está encarrilado”.