Categoría: PP de Galicia

Santiago, 22 de decembro de 2016.- O Parlamento de Galicia aprobou hoxe a proposición non de lei do Grupo Popular a través da que se insta á Xunta a impulsar a creación dunha consulta especializada de enfermería oncolóxica no Hospital da Costa de Burela. O obxectivo é que este servizo complemente a prestación asistencial do novo hospital de día de oncohematoloxía posto en marcha na pasada lexislatura e que está a contribuír dun modo altamente eficaz á mellora da atención, tratamento e calidade de vida dos enfermos de cancro.

---

A deputada popular Encarna Amigo afirmou que esta consulta de enfermería oncolóxica no Hospital de Burela permitiría “seguir mellorando e complementando” o hospital de día de oncohematoloxía posto en marcha en novembro de 2014. En concreto, dixo que “hoxe existen dúas enfermeiras que atenden este servizo e o que queremos é reforzalo cunha enfermeira máis especializada na atención deste tipo de doentes, onde a sensibilidade e a transmisión de información específica é fundamental”.

 

“A posta en marcha da consulta de enfermería oncolóxica permitirá que os doentes conten cun persoal encargado de explicarlles os coidados que teñen que seguir, os efectos dos tratamentos e as fórmulas para palialos e, en xeral, resolver todas as dúbidas ou calquera cuestión referente á enfermidade”, apuntou a deputada popular.

 

Así mesmo, Amigo engadiu que esta nova consulta permitirá “diminuír o grao de ansiedade que produce a enfermidade e axilizar os procesos de valoración, así como a frecuencia das visitas dos pacientes á área de urxencias, como garantía para mellorar os obxectivos terapéuticos e de calidade de vida dos enfermos”.

 

PAPEL ESPECIAL

 

A deputada do Grupo Popular destacou que “os profesionais de enfermería oncolóxica “teñen un papel moi especial en ámbitos tan importantes como a prevención de complicacións e a detección e control dos efectos secundarios, coa finalidade de proporcionar atención especializada nos episodios críticos”. Ademais, sinalou que estes profesionais “incorporan aos coidados os aspectos psicosociais do enfermo e da súa familia, para conseguir unha atención integral que responda as necesidades dos mesmos”.

 

Encarna Amigo explicou que o hospital de día de oncohematoloxía de Burela ocupa unha superficie de 120 metros cadrados e conta con 12 postos para tratamentos “nos que os enfermos de cancro poden recibir os tratamentos de quimioterapia preto dos seus fogares e sen necesidade de desprazarse a Lugo ou A Coruña”. “Aída que a súa implantación foi progresiva ao longo do tempo, desde o mes de setembro as consultas xa funcionan os cinco días á semana, o que significa que o servizo xa está a pleno rendemento”, indicou.

Santiago, 22 de decembro de 2016.- O portavoz de Sanidade do Grupo Popular, Aurelio Núñez Centeno, asegurou hoxe que “coa partida xenérica do Sergas para centros de saúde poderase facer fronte ao custo que suporía a licitación do proxecto do novo centro de saúde de Cangas”. Neste sentido, sinalou que “o Sergas traballará nos vindeiros meses para definir, conforme ás necesidades asistenciais do concello de Cangas, os requirimentos deste novo centro de saúde e no momento que haxa acordo entre todas as partes procederase á licitación do proxecto definitivo para poder comezar a construción do novo centro de saúde”.

---

Aurelio Núñez considerou “aconsellable unificar nun centro de saúde equidistante os servizos que se prestan no centro de saúde de Aldán e o consultorio de Hío, cunhas instalacións máis tecnificadas e actualizadas, e cunha mellor cobertura de persoal ao unificarse nunha única edificación”.

 

DISCREPANCIAS COS TERREOS

 

Porén, lembrou que “os terreos proporcionados en O Viso están a xerar discrepancias entre os veciños”, pero indicou que o Sergas procederá a definir o proxecto do novo centro que atenda as necesidades asistencias do concello de Cangas. “No momento que haxa acordo entre todas as partes, procederase á licitación do proxecto definitivo”, apuntou.

 

Aurelio Núñez concretou que na actualidade 64 profesionais atenden aos veciños de Cangas, tanto no centro de saúde da capital municipal como no de Aldán e no consultorio de Hío. “Préstase todo tipo de servizos, incluída saúde mental, radiodianóstico con teleradioloxía, odontoloxía e fisioterapia, ademais de consultas de especialidades en xinecoloxía e oftalmoloxía”, sinalou.

Santiago, 22 de decembro de 2016.- A portavoz de Asuntos Sociais do Grupo Popular, Marta Rodríguez Arias, salientou hoxe no Parlamento o incremento do 36 por cento das prazas públicas en residencias para maiores rexistrado na provincia de Ourense entre os anos 2009 e 2016. “Unha destas residencias é a de Cornuval, no concello do Carballiño, cen por cento pública, de titularidade pública da Xunta, que presta un servizo público e está financiada pola administración pública”, sinalou.

---

Marta Rodríguez concretou que a Xunta de Galicia creou 334 novas prazas públicas en residencias para maiores de Ourense desde o ano 2009, ao pasar de 917 ás 1.251 actuais.

 

“Os compromisos se demostran con feitos, porque son as cifras e os orzamentos os que permiten prestar os servizos sociais ás persoas e abrir residencias e atender”, sinalou.

 

VISIONARIOS SOCIALISTAS

 

A portavoz popular cualificou ao PSOE de “visionarios, porque foron eles os que, a través da Lei de servizos sociais aprobada en tempos do bipartito, inventaron unha nova fórmula de xestión dos servizos públicos que permite ás administracións públicas prestar os servizos sociais de forma directa ou indirecta”.

 

Neste sentido, lembrou exemplos desta privatización socialista, como o servizo Xantar na casa, o comedor e transporte nos centros de día, a axuda no fogar ou o xantar sobre rodas nos concellos onde gobernan. Ademais, sinalou que “crearon unha empresa específica para construír e xestionar residencias de maiores, que xustificaron baseándose na eficiencia económica”. 

Santiago, 20 de decembro de 2016.- O deputado do Grupo Popular Alberto Pazos asegurou hoxe no Parlamento que o actual Goberno da Deputación de Pontevedra, presidido por Carmela Silva, “é o máis irrelevante da historia” e dixo que “se o seu plan era demostrar a inutilidade das deputacións provinciais, teño que felicitala porque logrou o obxectivo”. Ademais, Pazos lembrou que este Goberno provincial conta con tres membros imputados por delitos relacionados coa corrupción. “A pesar de que a investigación avanzou e se desimputou a outras persoas, os membros do seu goberno continúan imputados e vostede segue sen tomar ningunha medida e sen dar explicacións aos cidadáns”, engadiu.

---

Alberto Pazos afirmou que os orzamentos que a presidenta da Deputación de Pontevedra presentou hoxe no Parlamento “supoñen unha emenda á totalidade da proposta de novo goberno provincial que fixo nesta Cámara hai algo máis dun ano”.

 

INCREMENTO DOS FONDOS DE LIBRE DISPOSICIÓN

 

Así, concretou que “rompeu a promesa de desaparición dos fondos de libre disposición, aos que cualificaba de ilegais, clientelares e caciquís, porque antes da finalización do seu primeiro ano de goberno improvisou unha partida de libre disposición por contía superior a 1 millón de euros que distribuíu a dedo para compensar unha suposta discriminación previa dalgúns concellos, fondos que nun 84 por cento se transferiron a gobernos amigos”.

 

“Este ano incrementa eses fondos de asignación dixital a 2,7 millóns de euros entre libre disposición e subvencións nominativas, introducindo como novidade a eliminación das bases que regulaban a xestión deses fondos”, sinalou.

 

O deputado popular indicou que a través do Plan de Concellos “trasladou aos entes locais a maioría das responsabilidades que asumía a deputación nos seus territorios, pero sen transferirlles os fondos que financiaban esas responsabilidades”. A maiores, Alberto Pazos recordou a práctica paralización do parque de maquinaria provincial, ao tempo que fixou un criterio que restrinxe o mantemento das estradas provinciais a aquelas que soporten un tráfico viario de máis de 3.000 vehículos, “o que supón abandonar o mantemento de máis do 90 por cento das vías de titularidade provincial: as do rural”.

 

DEIXOU TIRADO AO ASOCIACIONISMO

 

“Prometeu vostede apoio aos colectivos, asociacións, clubes, fundacións, ONGs a través da concorrencia, pero simplemente eliminou calquera liña de axuda”, manifestou o deputado popular, que asegurou que “deixou tirado ao asociacionismo pontevedrés”.

 

No ámbito do emprego, Alberto Pazos recordou que “prometeu dedicar o 20 por cento do orzamento a emprego e no informe da propia Deputación admite que se reduciu a un 8 por cento”.

 

“A cambio, aumentaron vostedes o custe de goberno e asesores en máis de 700.000 euros ao ano e dedicaron 13 millóns de euros do orzamento a subscribir convenios para satisfacer aos alcaldes de Vigo e Pontevedra que a sosteñen no posto, e aumentou o plan de compostaxe, mentres lle negan os fondos que lle legalmente lle corresponden ao novo concello de Cerdedo-Cotobade”, engadiu.

Santiago, 20 de decembro de 2016.- O Grupo Popular defenderá no Pleno da vindeira semana solicitar ao Ministerio de Fomento a conexión de Lugo coa alta velocidade ferroviaria e que elabore unha planificación estratéxica que permita avanzar neste obxectivo de modo firme e constante, recollendo xa nos orzamentos de 2017 as partidas suficientes para avanzar na redacción dos proxectos construtivos. Así mesmo, demandará á Xunta que inicie a oferta rutineira da proba do VIH ás persoas entre 15 e 59 anos que vaian proceder a unha extracción de sangue no seu centro de saúde.

---

O portavoz do Grupo Popular, Pedro Puy, reiterou que neste momento “Lugo é a única capital galega que queda fora dos enlaces ferroviarios de alta velocidade coa Meseta, polo que para o Partido Popular constitúe unha prioridade” acadar esta conexión.

 

MODERNIZACIÓN FERROVIARIA

 

En concreto, a proposición non de lei do Grupo Popular insiste na necesidade de acometer, no menor prazo de tempo posible, un proceso de modernización da liña ferroviaria entre Lugo e Ourense, ao tempo que demanda unha priorización nos investimentos que garantan a modernización e faciliten a conexión de Lugo cos servizos de alta velocidade ferroviaria.

 

O Grupo Popular tamén defenderá na sesión plenaria da vindeira semana instar á Xunta a que inicie, tal e como se recolle no Plan galego anti VIH/sida e outras infeccións de transmisión sexual 2015-2018, a oferta rutineira  da proba do VIH ás persoas de entre 15 e 59 anos que vaian proceder a unha extracción de sangue no seu centro de saúde. O obxectivo desta iniciativa é reducir o diagnóstico tardío desta infección e, deste xeito, minorar a transmisión do virus entre a poboación.

 

Así mesmo, o Grupo Popular cuestionará ao Goberno galego sobre a incidencia do Brexit no sector pesqueiro, en particular na flota de Gran Sol; e sobre a implantación do programa Acude e axuda, dirixido a reducir os tempos para o inicio das manobras de reanimación cardiopulmonar.

Santiago, 20 de decembro de 2016.- O deputado do Grupo Popular César Fernández Gil asegurou esta tarde no Parlamento que os orzamentos da Deputación de Ourense para 2017 permiten “seguir camiñando na boa dirección e dando respostas ás necesidades que ten a sociedade da provincia de Ourense”.

---

César Fernández indicou que o goberno da Deputación de Ourense ten “unha visión integral da provincia e amosa que existe proxecto político que cristaliza en plans e nun orzamento”. Neste sentido, lembrou que estas contas están aprobadas desde o pasado mes de setembro, “o que outorga certidume, planificación e seguridade para as entidades locais e os cidadáns”.

 

XESTIÓN SERIA E SOLVENTE

 

Estas orzamentos “amosan que existe unha xestión seria e solvente da Deputación de Ourense, poñendo a disposición dos ourensáns unha administración pública para mellorar os servizos que reciben”.

 

En concreto, o deputado popular sinalou que estes orzamentos “responden ao Plan de mandato Ourense 15-19, a través do que se reduciu a débeda desta administración desde o 116 por cento ao 25 por cento”.

 

Entre os proxectos estratéxicos que se levarán adiante, Fernández referiuse á aposta polo termalismo como eixo de desenvolvemento provincial; o plan de fomento do emprego para os concellos, distribuído con criterios de obxectividade no reparto dos fondos públicos; o proxecto de Provincia Intelixente, para afondar no desenvolvemento da administración electrónica; o incremento do plan de cooperación de obras e servizos para os concellos; e as axudas para que os concellos que acrediten insuficiencia financeira sufraguen gasto corrente; ao tempo que foi a primeira deputación en asumir os gastos que ocasionan os grupos de emerxencias supramunicipais nos concellos.

 

César Fernández manifestou que “parece que aos grupos da oposición o último que lles preocupa é Ourense, porque a realidade que pintan é permanentemente desmentida pola sociedade ourensá”. Deste xeito, pediu “un mínimo de respecto cara aos representantes públicos da sociedade de Ourense”, aínda que recoñeceu que á oposición “pódelle resultar frustrante chegar e ter que someterse ao que dita a realidade”.

Santiago, 20 de decembro de 2016.- O deputado do  Grupo Popular Daniel Vega puxo de relevo esta mañá no Parlamento que o presidente da Deputación de Lugo, o socialista Darío Campos, preside un goberno “en precario” e lembroulle que “está obrigado a pactar para que un ano máis os orzamentos do ente provincial non queden en fume”. Para evitar esta situación, Vega tendeu a man do PPdeG ao Goberno provincial en minoría, dun xeito responsable e tal e como fixeron na presente anualidade, para que sexa posible chegar a unhas contas de consenso que permitan resolver os problemas dos lucenses tamén no 2017.

---

 
Daniel Vega lembrou que Darío Campos “é o presidente con menos respaldo das catro deputacións galegas e o mais débil que se acorda na institución provincial”. “A pesar diso, segue aplicando a unilateralidade, carente de man esquerda, de diálogo e pouco interesado no funcionamento normal da institución”, dixo.

 

 “Non podemos comprender a falta de diálogo do PSOE, pese a que presenta unhas contas que só defenderán, no mellor dos casos, 10 dos 25 deputados provinciais”, sinalou o deputado popular. Neste sentido, engadiu que “o único que nos queda claro é que vostede so chega a acordos cando se trata de manterse no poder e non pensa no interese dos lucenses”, polo que recomendoulle “unha vez máis que sexa consciente da súa febleza e conxugue o verbo pactar”.

 

O deputado popular reclamoulle, por exemplo, que os orzamentos da 2017 incorporen o investimento necesario para facer posible a dotación de material do auditorio de Lugo, en cuxa construción a Xunta xa investiu 20 millóns de euros. Lembroulle tamén que nas contas pactadas para a anualidade de 2016, a Deputación comprometeuse co PP a ampliar as dotacións en materia de axuda no fogar, o plan de obras e servizos, impulsar o programa de axudas para concellos de menos de 20.000 habitantes ou o plan para a renovación de marquesiñas, “cuestións que esiximos incorporar tamén nos orzamentos de 2017”.

 
FALTA DE CREDIBILIDADE E INCUMPRIMENTOS

 
Por outra banda, Daniel Vega reprochou a falta de “credibilidade e palabra” do presidente socialista e repasou os múltiples compromisos incumpridos por Darío Campos daqueles que presentou na súa anterior comparecencia no Parlamento de Galicia. “Vostede veu aquí para propoñer múltiples iniciativas que despois quedaron en promesas rotas: eliminou os orzamentos participativos, hai un futuro incerto para a granxa Gayoso Castro, e 6 anos despois a Deputación de Lugo foi incapaz de poñer en marcha unha soa praza das residencias promovidas polo ente provincial”, concretou.

 
Vega tamén censurou que “o PSOE é responsable directo do deterioro da imaxe do ente provincial, entre liortas internas do provincial e os problemas xudiciais da institución”, polo que reclamou “accións decididas para devolver á Deputación a dignidade que nunca debeu perder”.

 
“Vostede, Sr. Campos, converteu a Deputación de Lugo na institución provincial con máis problemas internos de España: en pouco máis dun ano o seu grupo viuse reducido coa marcha do señor Martínez e despois romperon o pacto de goberno co BNG; ao tempo que a imaxe da institución viuse relegada ás portadas dos xornais que informaban dos líos xudiciais do seu ex presidente”, sinalou. “As deputacións provinciais non deben ser isto, porque a Deputación está para resolver dificultades e non para crealas”, apuntou.

 
Para rematar, Daniel Vega lembrou que son tempos de responsabilidade política. “Debémonos  aos cidadáns, chegou a hora do traballo e do diálogo, palabras fundamentais no día a día da política”.

Santiago, 20 de decembro de 2016.- O deputado do Grupo Popular Aurelio Núñez Centeno cualificou hoxe os orzamentos da Deputación Provincial de A Coruña de “pouco ambiciosos, cómodos e conformistas”, que “cun descenso das partidas para o beneficio dos cidadáns pero en claro avance para o PSOE e BNG, os grupos políticos que manexan o organismo”. Así mesmo, criticou “a pouca vontade de diálogo” amosada polo goberno da Deputación, polo que demandou que “retomen o consenso e negocien co grupo maioritario do PP”.

---

Aurelio Núñez explicou que as contas da Deputación de A Coruña para 2017 “conxeláronse, ao incrementarse unicamente o 0,52 por cento”. Nese sentido, considerou “curioso que os grupos da oposición vexan ridículo  un incremento dos orzamentos da Xunta do 3 por cento e vexan magnífico este incremento mínimo, pasota e pasivo na Deputación coruñesa”.

 

MENOS RECURSOS PARA OS CONCELLOS

 

“Gastan moito máis no goberno da Deputación e moito menos nas necesidades dos concellos”, sinalou o deputado popular. En concreto, lembrou que o capítulo de investimentos redúcese en  máis de 4,5 millóns de euros; as transferencias aos concellos en 762.000 euros; os gastos para conservación e mantemento de vías e obras provinciais en 1,6 millóns de euros; o investimento para cultura e deportes nun 15 por cento; e a partida de acción social nun 17,92 por cento, especialmente o destinado a políticas de igualdade, que pasa de 1,3 millóns a 673.000 euros.

 

Núñez Centeno referiuse expresamente ao novo plan único POS-Plus, que aglutina os antigos POS, PAS e PAI. “Este plan baleira de contido político en exceso a capacidade de actuación da Deputación e dota de menos recursos económicos aos concellos da provincia, xa que pasa dun investimento conxunto dos tres plans antigos de 78 millóns aos 74 millóns d euros do novo plan único”, explicou.

 

Así mesmo, o deputado popular cualificou de “conto da leiteira” o anuncio de que o POS-Plus se incrementará sensiblemente, porque “a día de hoxe non deixan de ser boas palabras que non se reflicten no papel”.

 

NEGOCIE CO PARTIDO  POPULAR

 

Aurelio Núñez demandou ao presidente da Deputación coruñesa que “retome o espírito de diálogo e de consenso” no organismo provincial. “Faga valer as súas ideas, non se deixe malaconsellar e ser refén da vicepresidenta do BNG, e negocie co Partido Popular para recuperar ese consenso que imperou nos últimos anos”, indicou.

 

Para rematar, o deputado popular demandou que as contas da Deputación Provincial “deben seguir na liña do rigor e de control do gasto da anterior corporación provincial do PP”, que deixou unha institución saneada logo de amortizar unha débeda que superaba os 90 millóns de euros no ano 2011.

Santiago, 19 de decembro de 2016.- O portavoz do Grupo Popular, Pedro Puy, manifestou hoxe que, unha vez rematen esta semana as comparecencias e se peche o prazo de presentación de emendas aos orzamentos da Comunidade galega para 2017, “iniciaremos un procedemento de negociación cos grupos da oposición que permita chegar a acordos e mellorar o documento orzamentario”.

---

Pedro Puy iniciou a súa comparecencia ante os medios de comunicación trasladando, no nome do Grupo Popular, “a máis enérxica condena dos casos de violencia machista que aconteceron esta fin de semana”. Neste sentido, animou “a toda aquela persoa que coñeza casos de malos tratos, e en especial ás mulleres que os sofren, a traballar nas denuncias e na persecución deste tipo de accións absolutamente intolerables e inxustificables”.

 

Así mesmo, felicitou á nova Presidenta local do PP en Vigo, Elena Muñoz, que saíu elixida nun “congreso que serve para deixar ben claro que no noso partido os procesos de elección son absolutamente democráticos”. Puy lembrou que o  Grupo Popular conta con dúas deputadas de Vigo, Teresa Egerique e Marián García, ademais doutro deputado da área metropolitana viguesa, Alberto Pazos, o que demostra que se trata dunha zona “que nos preocupa e motiva a traballar en coordinación coa dirección local de Vigo para impulsar todas aquelas iniciativas que supoñan mellora da cidade e da calidade de vida de todos os que residen en Vigo”.

 

DEBATE DE TOTALIDADE A MEDIADOS DE XANEIRO

 

O portavoz popular fixo un repaso da tramitación no Parlamento dos orzamentos da Comunidade galega para 2017 e lembrou que xa compareceron todos os membros do Consello da Xunta. A eles sumaranse hoxe os presidentes dos órganos institucionais do Consello Consultivo, Consello Económico e Social, Consello da Cultura Galega e Corporación de Radio e Televisión de Galicia; mañá farano os presidentes das Deputacións provinciais; e o mércores os representantes da Axencia Galega de Turismo, o director da Axencia Galega de Desenvolvemento Rural (AGADER), a Axencia Galega de Emerxencias e o Instituto Galego de Seguridade e Saúde Laboral (ISSGA).

 

O remate das comparecencias esta semana “permite confiar na celebración do Pleno de debate de totalidade ao inicio da primeira quincena de xaneiro”, avanzou Pedro Puy, quen tamén engadiu que “unha vez rematado o prazo de presentación de emendas, iniciaremos un procedemento de negociación cos grupos da oposición que permita chegar a acordos e mellorar o documento orzamentario para 2017”.

 

Cuestionado sobre a proposta de financiamento para Galicia presentada hoxe polo BNG, Puy lembrou que “xa foi votada na Cámara a finais da pasada lexislatura” e subliñou que “o sistema de cupo sería prexudicial para Galicia a curto prazo, como o din a maioría dos expertos que analizan o sistema de financiamento autonómico”.

 

O CUPO NON COMPENSA A GALICIA

 

“O propio sistema de cupo é contrario non so aos principios básicos da organización da facenda pública multinivel, senón incluso contraditorio co que defendemos todos: unha Europa máis solidaria e máis eficaz na loita contra as crises asimétricas”, manifestou.

 

Deste xeito, Puy explicou que, en termos financeiros, “non compensaría a Galicia, nin é unha proposta que sexa racional en relación coas circunstancias económicas e financeiras que estamos a vivir, cunha comunidade autónoma integrada e aberta á economía española e europea”.

 

Pedro Puy dixo que na actualidade “o debate na Unión Europea é se establecemos a nivel europeo políticas fiscais que permitan resolver as inequidades e os ciclos asimétricos que o mercado xera unha vez que hai un mercado único europeo”, polo que “cando estamos a falar dunha preocupación pola desigualdade, hai que pensar na escala do mercado onde se producen esas inequidades”.

 

Santiago, 17 de decembro de 2016.- O Grupo Popular vén de rexistrar unha proposición non de lei a través da que se solicita ao Ministerio de Fomento e á empresa Autopistas del Atlántico, S.A. (Audasa) que, no marco das obras de ampliación da capacidade da AP-9 que se levan a cabo na entrada a Vigo, se proceda a cumprir co seu compromiso de instalar pantallas antirruído, naqueles puntos onde sexa necesario de acordo coa normativa vixente, e se adopten medidas paliativas que minimicen o impacto da autoestrada e melloren a compatibilidade desta infraestrutura coa contorna construída e co día a día dos veciños.

---

O deputado popular Alberto Pazos considera necesario que “se adopten as medidas necesarias que palíen as molestias que a AP-9 lles ocasiona aos cidadáns”. Neste sentido, apunta que “este é o momento máis acaído, xusto cando se están a levar a cabo as obras de ampliación da capacidade da AP-9”.

 

COMPROMISO CON REDONDELA

 

Alberto Pazos lembra que Audasa “comprometeuse directamente co Concello de Redondela a realizar as actuacións paliativas necesarias para minimizar o impacto da infraestrutura ampliada, especialmente a contaminación acústica, que afecta especialmente aos veciños de Teis e de Chapela deste municipio”.

 

“As obras de ampliación entre os enlaces de Cangas e Teis da AP-9 que se están a realizar conlevarán un incremento do nivel de ruídos que padecen os veciños como consecuencia de que a circulación dos vehículos se situará máis próxima ás vivendas e do probable incremento do tráfico pola autoestrada”, indicou.

 

Pazos salientou que a ampliación da AP-9 “mellorará tanto o acceso como a saída de Vigo, reducindo os problemas de tráfico existentes na actualidade e reforzando a seguridade dos condutores, pero leva aparellado o incremento das molestias causadas polos ruídos aos veciños da zona, algo que a concesionaria comprometeuse a solventar e que consideramos necesario que o Parlamento galego se pronuncie sobre este tema”.