Santiago, 21 de febreiro de 2017.- A portavoz de Enerxía do Grupo Popular, Marta Nóvoa, defendeu esta tarde no Parlamento que o Goberno central leve a cabo unha revisión da fiscalidade sobre a enerxía, de tal xeito que se adecúe o tipo de IVE e o Imposto Especial de Electricidade para favorecer a competitividade das empresas e o benestar dos fogares. Respecto da solicitude dunha tarifa galega por parte do BNG, subliñou que “a tendencia é cara á integración en aras dun mercado único, que sexa capaz de garantir un subministro a fogares e empresas nas mellores condicións de eficiencia, de seguridade e competitividade posibles, algo que apoia a maioría das forzas políticas en Galicia, en España e no resto de países europeos, a excepción de opcións extremas e o populismo”.
Marta Nóvoa amosou a preocupación do PPdeG polo incremento do prezo da luz neste ano 2017 como consecuencia dun episodio punta, pero salientou que “a día de hoxe o prezo medio da enerxía no mercado maiorista é un 40 por cento inferior ao que se rexistrou de máxima o pasado 25 de xaneiro, e é previsible que continúe a tendencia á baixa, porque está a crecer de novo a produción eólica e a hidráulica, ao tempo que o mercado Francés está a recuperar a produción nas súas instalacións nucleares que estiveron pechadas por revisións de seguridade”.
EXCEDENTARIA CON CONDICIÓNS FAVORABLES
“Galicia é excedentaria en enerxía nuns 4.000 GW/h, pero non sempre sopra o aire, nin sempre fai sol, nin sempre chove, polo que hai moitos momentos nos que as renovables non chegan para cubrir as demandas das familias e da industria”, explicou a portavoz popular. Deste xeito, dirixiuse ao BNG para demandarlles que “se convenzan e deixen a demagoxia a un lado, porque non queren máis a Galicia por dicir que se pode facer unha tarifa eléctrica galega e vivir só da enerxía que se produce na nosa Comunidade Autónoma, porque non é así, non é sostible”.
Marta Nóvoa afirmou que desde o PPdeG “nunca imos defender unha posición separatista, porque todos os españois e tamén os galegos contribuímos no noso recibo para que a electricidade custe o mesmo en todas as partes do territorio, por solidariedade”. “Esta situación tamén beneficia aos galegos e galegas, porque aquí os custes das redes de transporte e distribución eléctrica son máis altos que noutras comunidades autónomas”, indicou.
RESPONSABILIDADE DO BNG
Así mesmo, a portavoz popular criticou que o BNG “omita a súa responsabilidade ao ter apoiado o pago das primas ás renovables en 2008, 2009 e 2010, cando eran dez veces máis caras que na actualidade, diferindo o pago destes e outros custes do sistema eléctrico ata acumular unha débeda de 26.000 millóns de euros. “Son políticas equivocadas do pasado que pagaremos durante 25 anos”, lamentou.
Diante desta situación, lembrou que o Goberno do PP “tivo que poñer freo para non seguir incrementando ese déficit, conxelando as peaxes para 2017 e incluíndo novas medias para reforzar a protección dos consumidores”.
