O próximo pleno debatera o traspaso da AP-9 e a reforma da Lei de Servizos Sociais

CRISTINA ROMERO AVANZA O DEBATE NO PLENO DA VINDEIRA SEMANA DAS PROPOSICIÓNS DE LEI PARA O TRASPASO DA AP-9 Á XUNTA E DE MODIFICACIÓN DA LEI DE SERVIZOS SOCIAIS

·    “Esperamos que ambas iniciativas lexislativas saian co maior respaldo posible dos deputados deste Parlamento, para o que o Grupo Popular manterá a súa plena disposición ao diálogo”, indicou

Santiago, 7 de marzo de 2016.- A viceportavoz do Grupo Popular, Cristina Romero, avanzou hoxe que o Pleno da vindeira semana debaterá a aprobación da proposición de lei que solicita a transferencia da AP-9 á Xunta de Galicia e a toma en consideración do proxecto de lei de modificación da Lei de servizos sociais, coa que se pretende reforzar e blindar o papel das entidades na prestación de servizos sociais. Respecto dos posibles candidatos ás eleccións galegas, Romero contrastou a unidade do PP respecto a que Feijóo é o mellor candidato fronte ás discrepancias existentes no PSOE coa candidatura de Besteiro.

“Trátase de dúas proposicións de lei significativas, tanto para o desenvolvemento económico e a mellora das comunicacións viarias en Galicia, como para a optimización dos nosos servizos sociais, polo que esperamos que ambas iniciativas lexislativas saian co maior respaldo posible dos deputados deste Parlamento, para o que o Grupo Popular manterá a súa plena disposición ao diálogo”, sinalou Romero.

Respecto da proposición de Lei de solicitude de transferencia da AP-9 á Xunta de Galicia, a viceportavoz popular avogou por “manter no Pleno a unanimidade acadada en Comisión para que esta demanda chegue ao Congreso dos Deputados co maior respaldo e firmeza do Parlamento galego”. “Desde o Grupo Popular reiteramos o interese por xestionar esta autoestrada que vertebra e comunica o norte e o sur de Galicia e que ten contribuído e contribúe notablemente ao desenvolvemento da Comunidade galega”, engadiu.

Cristina Romero lembrou “a boa disposición amosada esta fin de semana pola ministra de Fomento en funcións, Ana Pastor, para falar sobre a transferencia desta autoestrada”, aínda que insistiu na “necesidade de que a concesionaria preste o servizo nas mellores condicións e dispoña dunha política de peaxes cos beneficios que se prestan noutras autovías españolas”.

REFORZAR E BLINDAR ENTIDADES SOCIAIS

En segundo lugar, Romero avanzou que a sesión plenaria procederá ao debate para a toma en consideración da proposición de lei do Grupo Popular a través da que se solicita a modificación da Lei de servizos sociais, co obxectivo de reforzar e blindar o papel das entidades de iniciativa social na prestación de servizos, dotándoas dun novo mecanismo que impulse as súas relacións coas administracións públicas e ofrecendo unha maior seguridade xurídica ás actividades económicas deste sector.

Neste sentido, a viceportavoz subliñou que esta iniciativa lexislativa “nace logo dun intenso traballo e das achegas realizadas polo Comité Español de representantes de persoas con discapacidade (CERMI)” e apuntou que desde o Grupo Popular “imos buscar ao longo da tramitación parlamentaria o apoio dos demais grupos, para o que estaremos abertos a estudar e consensuar as súas propostas co obxectivo de que esta modificación lexislativa saia co maior respaldo posible”.

Cristina Romero explicou que con esta modificación lexislativa “Galicia adapta a súa normativa á directiva europea 2014/24/UE, dando entrada aos concertos sociais como modalidade diferenciada do concerto xeral, ao tempo que se crea a figura dos acordos marco para a xestión de servizos sociais coas entidades para atender, na medida que sexa posible, a libre elección da persoa destinataria do servizo”.

“A posta en marcha destes concertos sociais suporá un recoñecemento á necesidade de establecer condicións especiais a estas prestacións dadas as especificidades dos servizos sociais”, indicou.

Esta modificación da Lei de servizos sociais tamén recolle que as administracións públicas darán prioridade ás entidades sen ánimo de lucro cando existan análogas condicións de eficiencia, calidade e rendibilidade social, ao tempo que se establecerán fórmulas para garantir o mantemento na prestación dos servizos sociais por parte das entidades que xa os viñan realizando.

BLUF DE PRIMARIAS SOCIALISTAS

Cuestionado sobre os posibles candidatos ás eleccións galegas, Cristina Romero indicou que no Partido Popular “somos respectuosos cos procedementos internos dos outros partidos” e salientou que no PP “fixemos un calendario para a renovación dos equipos, ideas e persoas que estamos a cumprir”. Neste sentido, apuntou que os socialistas galegos “fan un calendario pero logo non o cumpren, polo que o das primarias parece un bluf máis dos que xa nos teñen acostumados”

A viceportavoz popular recoñeceu que non hai candidato designado nin polo PP nin polo PSOE. Porén, manifestou que “existe unha gran diferenza: todo o Partido Popular coincide en que Feijóo é o mellor candidato, cousa que non está a ocorrer no Partido Socialista, visto o acontecido esta fin de semana”.

Feijóo di que a renovación do PPdeG amplía a vantaxe cos resto de partidos

O presidente do PPdeG participa no congreso provincial do PP de Lugo, onde Elena Candia saíu elixida presidenta da formación na provincia

Feijóo sinala que a renovación do PPdeG amplía a vantaxe cos que están moi lonxe de ser o que precisa Galicia 

• Considera que os populares deben esixirse máis e non deben permitirse a irresponsabilidade do PSOE, nin a incoherencia de Ciudadanos ou a demagoxia de Podemos

• Subliña que o PP é o partido que representa aos galegos: cómo son, cómo senten, cómo fan. É o partido do rural galego, o partido das mulleres e homes do mar e o partido do sentir maioritario das galegas e os galegos

Lugo, 6 de marzo de 2016.- O presidente dos populares galegos, Alberto Núñez Feijóo, sinalou hoxe que a renovación do PPdeG achega o partido aos galegos e á Galicia de mañá, ao tempo que amplía a vantaxe cos que están moi lonxe de ser o que precisa Galicia.
Segundo o dirixente popular, o PPdeG é o partido con máis experiencia e con máis experiencias, pero nunca deixa de aprender do que fixo, dos retos que tivo que abordar, dos erros e, sobre todo, dos galegos. Baixo o seu punto de vista, Galicia ensinoulle ao partido esforzo, constancia, perseverancia e, por tanto, a formación seguirá aprendendo da Comunidade.
Así se expresaba o líder dos populares galegos na clausura do congreso provincial do PP de Lugo, onde aproveitou para felicitar á nova presidenta, Elena Candia, a quen lle lembrou que debe representar a toda a militancia da provincia e defender os intereses de toda a poboación.
Do mesmo xeito, agradeceu ao presidente saínte, Xosé Manuel Barreiro, o seu traballo e dedicación á fronte da formación provincial nos últimos anos e tamén na vicepresidencia do partido autonómico.
UN PARTIDO ACTIVO QUE SE RENOVA
O presidente do PPdeG criticou a volatilidade e a fraxilidade dos principios do resto de partidos e fixo fincapé en que a formación dos populares ten que ofrecer algo máis, manténdose por riba das frivolidades e achegando solidez.
Con respecto a isto, sinalou que o PPdeG é o primeiro partido da provincia, de Galicia e de España porque os cidadáns así o decidiron. Por iso, cre que os populares deben esixirse máis e non deben permitirse o nivel de irresponsabilidade do PSOE, nin o nivel de incoherencia de Ciudadanos ou a demagoxia de Podemos.
Por ese motivo, segundo subliñou Feijóo, o PPdeG decidiu renovar as súas ideas, actitudes e equipos. Como engadiu, este partido reacciona, está activo e está en pé.
Neste senso, o líder dos populares galegos asegurou, con respecto aos outros partidos, de que non poden arrinconar á formación pola que apostaron 7 millóns e medio de españois. 
O PARTIDO DAS SOLUCIÓNS
Da mesma maneira, puxo en valor que a crise non venceu aos populares e, de feito, Galicia está saíndo dela, pasando de xerar paro a crear emprego; de decrecer, a volver a crecer economicamente; do desfase orzamentario, ao control e á responsabilidade económica e ao crecemento da produción industrial, á internacionalización, á innovación e á confianza dos consumidores e dos emprendedores.
Así, fixo fincapé en que os populares son un partido activo que non para ata dar coas solucións e vai a onde haxa que ir para atopalas. Deste xeito, onde antes había gradas baleiras, agora fanse barcos; onde antes estaban paradas as máquinas, agora faranse novos vehículos; e onde durante anos houbo un solar en Lugo, en Rozas, agora haberá investimento, emprego e seremos unha referencia de innovación en España e internacionalmente. 
Segundo aseverou, o PPdeG é o partido que representa ás galegas e os galegos: como son, como senten, como fan. É o partido do rural galego, o partido das mulleres e homes do mar e o partido do sentir maioritario das galegas e os galegos. 
Por último, Feijóo sinalou que o PPdeG non ten sentido se non está preto das galegas e os galegos e, ao mesmo tempo, asegurou que Galicia precisa deste partido, máis que nunca.

Feijóo afirma que o PPdeG traballa por ampliar a confianza maioritaria dos galegos

O presidente do PPdeG participa no congreso provincial do PP de Ourense, onde José Manuel Baltar volveu renovar a confianza do partido na provincia

Feijóo sinala que o PPdeG traballa por ampliar a confianza maioritaria dos galegos con autocrítica, renovación e as persoas no centro 

• Lembra que o PP ten que buscar sempre a vitoria dunha maioría ampla e estable que permita a gobernabilidade do país, ante as minorías que non aceptan a derrota e para as que o seu país é algo secundario

• Sinala que nin a opinión de Pedro Sánchez, nin a de Albert Rivera, nin a de Pablo Iglesias vale máis que a dos 7,3 millóns de españois que lle deron a maioría ao PP

Ourense, 5 de marzo de 2016.- O presidente dos populares galegos, Alberto Núñez Feijóo, sinalou hoxe que o PPdeG traballa por ampliar a confianza maioritaria dos galegos con autocrítica, renovación e coas persoas no centro.  
Así se expresaba o dirixente popular na clausura do congreso provincial do PP de Ourense, onde aproveitou para felicitar a José Manuel Baltar e á súa candidatura pola vitoria acadada e pola honra que supón presidir un partido gañador, que está activo e en movemento.
Como lembrou Feijóo, esta semana cumpríronse sete anos da vitoria electoral nas autonómicas en 2009. Con respecto a isto, destacou que o que gañou esas eleccións non foi o candidato, senón o esforzo, traballo e a renovación de todo o partido coa súa militancia.
Deste xeito, sinalou que agora o partido volve a equiparse para as súas vitorias do futuro e ten que facelo como en 2005, con autocrítica, esixíndose máis e con traballo e esforzo.
Nesta liña, Feijóo destacou que este ano haberá unhas autonómicas para as que parece que Podemos ten présa, xa que ten medo de que canto máis tempo pase máis se coñeza a súa inoperancia, e quizáis tamén haxa outras xerais porque a irresponsabilidade de Pedro Sánchez deixou o futuro deste país nas mans do partido de Pablo Iglesias.
O PP TEN QUE BUSCAR SEMPRE A MAIORÍA
O presidente dos populares galegos afirmou que o PP ten que buscar sempre a vitoria dunha maioría ampla e estable que permita a gobernabilidade do país, ante as minorías que non aceptan a derrota e para as que o seu país é algo secundario, porque eles teñen que ser os protagonistas.
Segundo Feijóo, o seu ego lévaos a facerse crer que son estrelas cando deberían ser servidores humildes. Por iso, cre que durarán o que dura unha estrela fugaz e acabarán estrelados como Pedro Sánchez esta semana, que fracasou nas eleccións pero se emperrouse en ter o seu momento de gloria buscando un goberno de fracaso.
Neste senso, o líder do PPdeG criticou que o socialista fíxolles perder o tempo aos cidadáns e agora non debería intentar arrastrar o seu país ao seu fracaso persoal.
Como engadiu, nin a opinión de Pedro Sánchez, nin a de Albert Rivera, nin a de Pablo Iglesias vale máis que a dos 7,3 millóns de españois que lle deron a maioría ao PP. 
Por iso, Feijóo pediu que deixen de crerse por riba dos españois, posto que nin os defenden a eles nin aos seus votantes, senón que o único que defenden é o seu interese persoal e non vale máis o que ven nun espello que o que ven nas urnas.
CONFIANZA
O líder dos populares galegos lembrou que non son o primeiro partido de España, de Galicia e de Ourense por casualidade, senón porque traballan as vitorias para obter resultados que beneficien ao conxunto dos cidadáns.
De feito, desde aquel 1 de marzo de 2009, agora baixa o paro, soben as afiliacións á seguridade social, crece a economía, hai máis innovación e máis exportacións que nunca, hai máis confianza de consumidores e emprendedores, hai menos impostos, hai máis responsabilidade económica e hai seguridade nas prestacións sociais.

GPP salienta que novo Plan Hidrolóxico Galicia-Costa destinará 655 M€ a saneamento


O GRUPO POPULAR SALIENTA QUE O NOVO PLAN HIDROLÓXICO GALICIA-COSTA DESTINARÁ 655 MILLÓNS DE EUROS A SANEAMENTO E CUMPRIMENTO DOS OBXECTIVOS AMBIENTAIS

·    O portavoz de Medio Ambiente asegurou que “os novos plans hidrolóxicos aprobados en xaneiro cumpren perfectamente a directiva europea, ao tempo que a propia Unión Europea leva un control exhaustivo deste cumprimento e avalía minuciosamente o respecto das súas normas”

Santiago, 4 de marzo de 2016.- O portavoz de Medio Ambiente do Grupo Popular, Gonzalo Trenor, salientou hoxe que o novo Plan Hidrolóxico para a demarcación Galicia-Costa destinará 655 millóns de euros á execución de novas infraestruturas de saneamento e ao cumprimento dos obxectivos medioambientais. “Os investimentos realizados permitiron acadar unha porcentaxe do 77,5 por cento de augas en bo estado en Galicia, sete puntos máis que hai seis anos”, indicou.

Gonzalo Trenor asegurou que “os novos plans hidrolóxicos aprobados en xaneiro cumpren perfectamente a directiva europea, ao tempo que a propia Unión Europea leva un control exhaustivo deste cumprimento e avalía minuciosamente o respecto das súas normas”.

ESFORZO MEDIO AMBIENTAL

Neste sentido, Trenor apuntou que o Plan Hidrolóxico para a demarcación Galicia-Costa “supón un gran esforzo en canto a recursos, xa que se investiran 655 millóns de euros para seguir mellorando e conservando o bo estado das nosas augas”.

“Fíxose un importante esforzo no cumprimento dos obxectivos ambientais, tendo en conta non só a valoración do estados das masas de auga, senón tamén o cumprimento do principio de non deterioración e os requirimentos adicionais en zonas protexidas que teñen vinculación co medio acuático”, sinalou.

Aprobado o ditame da proposición de Lei para a transferencia da AP-9 á Xunta

APROBADO EN COMISIÓN O DITAME DA PROPOSICIÓN DE LEI QUE SOLICITA A TRANSFERENCIA DA AP-9 Á XUNTA DE GALICIA

·    “Debemos enviar unha mensaxe clara de que os galegos queremos xestionar esta infraestrutura que vertebra e comunica o norte e o sur de Galicia e que ten contribuído e contribúe ao noso desenvolvemento”, apuntou Goldar

Santiago, 4 de marzo de 2016.- O Parlamento galego aprobou hoxe o ditame da proposición de Lei para remitir ao Congreso dos Deputados para a transferencia da titularidade e competencias da AP-9 á Xunta de Galicia. O deputado do Grupo Popular Jesús Goldar avogou porque “a unanimidade acadada na admisión a trámite se manteña no debate de totalidade que terá lugar en sesión plenaria para enviar unha clara mensaxe de que os galegos queremos xestionar esta infraestrutura que vertebra e comunica o norte e o sur de Galicia e que ten contribuído e contribúe notablemente ao desenvolvemento da Comunidade galega”.

Jesús Goldar lembrou que “a Xunta ten unha política activa en relación coa autoestrada AP-9 de demanda continua ao Ministerio de Fomento dun mellor servizo nesta vía, así como na intención de asumir a súa explotación”. Neste sentido, lembrou que o Ministerio respondera no ano 2010 á proposta de cambio de titularidade da AP-9 realizada desde a Xunta que “é un itinerario internacional e vía de acceso a portos e aeroportos de interese xeral, polo que é unha autoestrada de interese xeral para o Estado e debe estar integrada dentro da rede nacional de estradas”.


INTEGRAMENTE POR TERRITORIO GALEGO

“Porén, a Xunta de Galicia discrepou destas afirmacións porque entendía e segue a entender que a AP-9 non é un acceso a portos o aeroportos de interese xeral, non sirve de acceso a pasos fronteirizos, xa que a concesión da AP-9 conclúe no enlace coa A-55 antes da fronteira con Portugal, e non enlaza comunidades autónomas, dado que o seu percorrido desenvólvese na súa totalidade polo territorio de Galicia, sen ter continuidade cara a outros territorios”, sinalou.

Posteriormente, o Goberno galego reiterou a solicitude de traspaso en xaneiro de 2012, ao que se sumou “a demanda para que posta en marcha de mecanismos para que os cidadáns puideran beneficiarse das infraestruturas amortizadas prematuramente, situación que ademais xera importantes agravios comparativos, desde o momento en que nunca existiu un verdadeiro modelo do que debería ser a rede de autoestradas de peaxe”, indicou Goldar.

O deputado popular agardou que a tramitación desta proposición de lei, logo da aprobación do ditame en comisión parlamentaria esta mañá e a próxima aprobación polo Pleno, “continúe áxil no Congreso dos Deputados coa fin de que se poida materializar o traspaso da AP-9 á Comunidade galega no menor prazo de tempo posible”. “Entrementres, cómpre demandar que o Ministerio preste o servizo nas mellores condicións e cunha política de peaxes acaída, que é o verdadeiramente transcendente”, engadiu.

Feijóo avanza unha achega de 22M€ en 2016 para impulsar a concentración parcelaria

Santiago, 3 de marzo de 2016.- O presidente do PPdeG, Alberto Núñez Feijóo, avanzou hoxe unha achega de 22 millóns de euros en 2016, o maior investimento nos últimos sete anos, para impulsar a concentración parcelaria. “Seguimos avanzando e, aproveitando a mellora da situación económica, hoxe aprobamos que en 2016 se faga o maior investimento dos últimos sete anos para impulsar a concentración parcelaria: 22 millóns de euros. Multiplicamos por tres o investimento dedicado a concentración parcelaria e pasamos dunha media de oito millóns anuais a 22 millóns en 2016”, dixo.

Nun primeiro termo, Feijóo asegurou que con este investimento remataranse as 137 zonas activas e empezarase a traballar nas zonas prioritarias agro-grandeiras. “E os criterios de priorización –precisou- son as zonas con importancia hortícola, vinícola e forestal”.

Así mesmo, explicou que as 137 zonas supón actuar en preto de 120.000 hectáreas, en case un millón de parcelas e beneficiar a 100.000 propietarios.

Logo de precisar que dentro de catro anos estarán finalizadas administrativamente practicamente todas as concentracións parcelarias que se iniciaron en Galicia, o mandatario salientou que a orde de prioridade para decidir as actuacións será a seguinte: aquelas que favorezan o final de procesos de reestruturación parcelaria que estaban a piques da súa finalización definitiva; as que propicien o avance dos procesos de reestruturación que teñan unha incidencia económica importante; e os traballos previos ao decreto de utilidade pública de novas zonas de reestruturación parcelaria.

Feijóo lembrou que o proceso de concentración e ordenación da estrutura agrícola ten cinco obxectivos principais: “Mellorar a rendibilidade da actividade produtiva; facilitar que os predios abandonados ou que non formen parte de explotacións poidan mobilizarse para uso agrario; minimizar os efectos que poidan ter as grandes obras públicas ou explotacións de coutos mineiros; potenciar a conservación das zonas de maior interese ambiental; e reducir as emisións que se derivan dos longos desprazamentos polas explotacións dispersas”.

Feijóo anuncia licitación da xestión do Centro de Tratamento de Residuos Industriais

Santiago, 3 de marzo de 2016.- O líder do PPdeG, Alberto Núñez Feijóo, avanzou hoxe a aprobación da licitación da xestión do Centro de Tratamento de Residuos Industriais de Galicia, que ata agora xestionaba Sogarisa, cun contrato que vence este ano e que agora se saca a concurso público entre todos os operadores de residuos que queiran participar.
Como destacou Feijóo, co novo contrato, a Xunta seguirá a ser titular da instalación, terá o poder xeral de ordenación das normas de uso e conservación e tamén exercerá as facultades de supervisión, impulso e control da mesma.
Sobre a nova adxudicación, o presidente do Goberno galego aclarou que non xerará ningún gasto para a Xunta, xa que a retribución do adxudicatario consistirá no importe recadado pola prestación de servizos. É máis, suporalle ingresos, xa que a adxudicataria deberá abonar ao Goberno galego un canon anticipado de 3,5 millóns de euros, outro canon anual fixo de 45.000 euros e outro variable segundo os beneficios.
Ademais, destinarase o 5 por cento da facturación bruta anual das actividades de tratamento de residuos a dotar un Fondo Local para o Concello das Somozas, onde se sitúa a instalación.
Segundo matizou Feijóo, á hora de adxudicar o contrato, a Xunta terá en conta das ofertas presentadas a viabilidade do plan de explotación. Así mesmo, valorará o Plan de investimentos que acheguen, dando maior puntuación ás que susciten un maior volume de investimento e priorizaranse aqueles plans que propoñan a ampliación da infraestrutura para mellorar e optimizar o tratamento de residuos.
A estratexia do Goberno galego en materia de residuos, como sinalou Feijóo, persegue a implantación dun novo modelo máis sostible, facendo especial fincapé na prevención e na valorización.
En definitiva, este contrato por 20 anos ten un valor estimado de 230 millóns de euros e a retribución do adxudicatario consistirá no importe do prezo que recada pola prestación dos servizos abonado polos usuarios.
Como lembrou o titular da Xunta, nun primeiro momento aprobouse e púxose en marcha o Plan de Xestión de Residuos Urbanos e agora os esforzos da Xunta céntranse no eido dos residuos industriais, tendo en tramitación o Plan de Xestión de Residuos Industriais de Galicia e contando nos orzamentos para 2016 con 3 millóns de euros para prevención e reciclaxe deste tipo de residuos.

Feijóo avanza tramitación do anteproxecto de Lei de protección de animais de compañía

Santiago, 3 de marzo de 2016.- O presidente dos populares galegos, Alberto Núñez Feijóo, avanzou hoxe o inicio da tramitación do anteproxecto de Lei galega de protección e benestar dos animais de compañía, que equipara a nosa normativa ás doutras Comunidades e Estados europeos, implanta medidas no control do abandono dos animais e aposta pola educación da cidadanía no respecto e a protección aos animais.
O mandatario destacou que un dos principais obxectivos desta nova Lei é loitar contra o maltrato animal, non só na súa na súa representación como violencia extrema, senón tamén noutras manifestacións, tales como someter ao animal a condicións hixiénicas e sanitarias cuestionables, ou o seu emprego en espectáculos prohibidos ou nos que non se garantan unhas condicións mínimas de benestar.

As características da nova lei
Nesa liña, o texto establece a prohibición expresa de determinadas mutilacións nos animais, coma o corte de orellas ou rabo, que se facía co fin de manter unha serie de características dun tipo de raza. Tamén se prohibe o emprego de calquera trebello destinado a impedir ou limitar a mobilidade dun animal que lle produza danos ou sufrimentos ou lle impida manter a súa posición normal e mesmo se prohibe o emprego de animais silvestres en espectáculos circenses e se tipifica dita infracción ou delito como moi grave.
Como sinalou Feijóo, esta lei vai máis alá ao estender no réxime sancionador a responsabilidade non só aos organizadores, senón tamén aos que participen ou colaboren dalgunha maneira neses espectáculos.
Outro dos retos aos que se enfronta a lei, segundo engadiu, é o de paliar o abandono dos animais domésticos, e a lograr este obxectivo van destinadas varias medidas. Así, as asociacións de defensa e protección dos animais poderán ser declaradas entidades colaboradoras da Xunta e poder así subscribir convenios de colaboración para facer énfase na divulgación e na educación.
Ademais, introdúcese a obriga de identificación en todos os cans, mediante microchip, e a inscrición no Rexistro galego de identificación de animais de compañía, o que minorará o abandono, e crearanse os fogares de acollida cun réxime de acollemento temporal nos que se garanta o coidado e atención que precisen os animais.
No que atinxe aos animais potencialmente perigosos, Feijóo apuntou que se concretarán as razas de can que teñen tal consideración, establécese a obriga da obtención previa da licenza municipal para poder ter un can desta categoría e deberase inscribilos no rexistro municipal de animais potencialmente perigosos.
Por outra banda, como matizou, a nova lei tamén establece un artigo sobre as aves de presa en catividade para as que será necesario obter unha autorización administrativa, á vez que deberán ser identificadas individualmente con microchip ou anela.
Como sinalou, esta lei foi comentada con distintos membros do Consello Xeral do Colexio de Veterinarios e, a partir de agora, someterase a información pública para as posibles alegacións que queiran facer os distintos colectivos. 

Feijóo presenta a Axenda 20 para o emprego, con medidas para crear postos de calidade

Santiago, 3 de marzo de 2016.- O presidente do PPdeG, Alberto Núñez Feijóo, presentou hoxe a Axenda 20 para o emprego, o documento “que impulsará a calidade e a estabilidade do emprego en Galicia” e que está dotado con 900 millóns de euros, 180 millóns anuais ata 2020. A axenda contempla 20 medidas agrupadas en tres eixos prioritarios: a creación de emprego de calidade como elemento clave da competitividade, a formación e a capacitación como pancas do cambio do modelo produtivo e a reorientación dos servizos de atención ás persoas que demandan emprego para intentar casar as súas necesidades coas das empresas.
“Despois de anos de recesión, a economía galega está volvendo a despegar, aínda que é evidente que este crecemento ten que ser máis intenso e máis robusto”, indicou o presidente. Resaltou que esta incipiente recuperación é “froito dos esforzos das persoas e das empresas e dunha política económica responsable e coherente”. Para continuar na traxectoria ascendente que está a seguir a nosa economía, Feijóo invitou a “saber de onde vimos e cara a onde queremos ir”.
Neste senso, a Axenda 20 para o emprego marca as liñas mestras a seguir en materia laboral durante os próximos cinco anos, de acordo cos obxectivos marcados en materia laboral polo Plan Estratéxico de Galicia 2015-2020: reducir a taxa de paro ata o 10%, crear 100.000 novos empregos e asinar 50.000 novos contratos indefinidos, entre outros.
Tres grandes retos
Tal e como explicou Feijóo, o primeiro reto da Axenda é que Galicia cree postos de traballo de calidade. Nesta liña incidirá o programa Aprol, que incentivará a contratación e fomentará o autoemprego nos colectivos que teñen máis dificultades para atopar un traballo, como as mulleres, os parados de longa duración, a mocidade e as persoas con discapacidade.
Outra das principais novidades desta documento será a activación de Lanzadeiras de Emprego para apoiar a busca de emprego e promover o emprendemento e o autoemprego a través da Administración Local, entidades sen ánimo de lucro e empresas privadas.
Para superar o segundo reto, mellorar a formación dos traballadores, o presidente avanzou catro grandes medidas: crear Unidades de Formación na Empresa para impulsar dentro do tecido empresarial a especialización e capacitación con compromiso de contratación, aprobar un programa de formación e emprego no rural atendendo ás súas necesidades específicas, profundar nun modelo de formación que responda ás necesidades do mercado, unha liña na que xa estamos a avanzar mediante a FP Dual ou lanzar o “cheque formación”, para que as persoas desempregadas teñan máis liberdade de elección á hora de escoller accións formativas concretas.
Por último, a Axenda busca reorientar os servizos de atención ás persoas que demandan emprego. “Neste senso, imos crear un novo portal do Servizo Público de Emprego de Galicia e implantar nel un sistema de xestión de calidade”, dixo Feijóo. Ademais, vaise poñer en marcha o novo modelo de orientación aberta, que combine accións presenciais e online.

Jaime Olano califica el discurso de Pedro Sánchez de “poco creíble” y “decepcionante”

Madrid, 1 de marzo de 2016.- El diputado popular gallego Jaime de Olano ha valorado hoy en la TVG el discurso de investidura de Pedro Sánchez y lo ha calificado como un discurso “que nos da la imagen de un candidato poco fiable, sin un proyecto claro para España y cuyo único objetivo, confesado expresamente, es que no gobierne el Partido Popular, que ha sido el partido más votado por los españoles el pasado 20 D”.
Para Olano, “ha sido un discurso poco realista y de cara a la galería en el que se ha dedicado a repartir caramelos a Podemos y a Ciudadanos buscando el apoyo de ambos, cuando éstos ya se han declarado incompatibles entre sí”.
Según el diputado popular, “ha sido poco creíble, porque ha apelado al diálogo cuando todo el mundo sabe que se lo ha negado al PP y a sus 7,2 millones de votantes en más de 20 ocasiones”. Para Olano, “esto demuestra, una vez más, que una cosa es lo que dice Pedro Sánchez y otra lo que hace”.
En opinión de Jaime Olano, “ante todo ha sido un discurso decepcionante para España, porque ha anunciado la derogación de todas las reformas estructurales que el PP puso en marcha, entre ellas la Reforma Laboral que no sólo su hipotético socio de Ciudadanos, sino también todas las autoridades nacionales e internacionales alaban, y que junto al esfuerzo de los españoles han permitido a nuestro país iniciar la salida de la crisis”. En este sentido, Olano ha apuntado un dato, “Sánchez ha tardado más de 40 minutos en pronunciar la palabra desempleo, que es la principal preocupación de los españoles hoy en día”.
Sin duda, para el líder popular, el de Sánchez ha sido un discurso que nos retrotrae a las peores políticas de Zapatero, con anuncios que suponen un desmedido incremento del gasto público sin valorar de dónde va a salir el dinero, lo que nos permite aventurar que de ponerse en marcha su programa volveríamos a la situación de 2011 en poco tiempo”
Finalmente, Olano ha calificado la intervención de Sánchez como “vacía”, ya que ha anunciado cuestiones como que pedirá la ampliación del plazo de reducción del déficit público a la UE, cuando hoy mismo se ha anunciado que Mariano Rajoy ya tiene el compromiso verbal de las autoridades comunitarias