Ribeira, 15 de setembro de 2016.- O presidente do PPdeG, Alberto Núñez Feijóo, solicitou hoxe o voto para que Galicia siga mirando cara adiante, continúe avanzando con normalidade e estabilidade, e non quede bloqueada. Neste sentido, cuestionouse se, “con todo o que é Galicia e con todo o que hai que facer, de verdade non teñen nada mellor que dicir e que propoñer os demais que a descualificación?”.
Feijóo asegurou que “en Galicia si pode haber unha política que non consista simplemente na descualificación ao adversario; que consista en propoñer e ser construtivo, en lugar de quedarse na crítica sen alternativa; que non consista en bloquear, poñer obstáculos, vetos e liñas vermellas; e que una as forzas dun pobo en lugar de estar divididos”.
MOITO POR AVANZAR E CONQUISTAR
“Temos moito por avanzar e por conquistar: temos que seguir crecendo e facelo con máis intensidade; creando aínda máis emprego; apoiando ás mulleres e homes que teñen fillos; respaldando ás familias; batendo marcas de creación de prazas públicas de gardería; aumentando o número de prazas de residencias e centros de día; modernizando instalacións, tecnoloxía e servizos da sanidade pública; sumando quilómetros de infraestruturas de máis prestacións para estar mellor conectados; impulsando sectores como a pesca ou o naval para acadar obxectivos como no naval ou a automoción; e baixando ou eliminando impostos, como fixemos co IRPF, os impostos no rural ou as herdanzas, que xa non pagan o 99 por cento dos galegos”, concretou.
Así, apuntou que “me presento a estas eleccións porque temos aínda moito por facer, son moitas as metas que temos que ir logrando e moitos os galegos que tamén teñen que ter a súa oportunidade. Non me presento polo que fixemos, porque iso está e aí está a credibilidade das verbas de cada quen”.
O Presidente do PPdeG afirmou que “podo presentar un balance que non é froito dun traballo individual, senón do esforzo colectivo de Galicia que logrou mellorar a situación”. Neste sentido, engadiu que “teño un proxecto no que se pode reflectir a maioría das galegas e galegos e a experiencia de que cumpro os meus compromisos”.
“Me presento a estas eleccións como militante de Galicia, teño o meu tempo e as miñas enerxías para Galicia e podo dicir como e con quen gobernarei desde o primeiro día”, subliñou. “Pido o voto para o goberno dunha gran maioría; para a unidade, a estabilidade e a responsabilidade; para un pacto coas galegas e os galegos; e para servir a Galicia”, indicou.
QUERO UN POBO UNIDO
Feijóo engadiu que “quero un pobo unido, porque xuntos é como acadamos que Galicia pasara de decrecer a crecer; de destruír a crear emprego; e estar á cabeza do cumprimento das obrigas de déficit, ao tempo que á cabeza do investimento de todas as comunidades españolas”. Ademais, fixo especial referencia ao ámbito social, onde “logramos unha educación pública máis completa, competitiva e accesible; renovamos a sanidade pública con novas instalacións, nova tecnoloxía e novos servizos; e abrimos máis prazas públicas de residencias e centros de día”.
De cara ao futuro, asegurou que “temos enerxías para crer neste país, para dicir que somos unha excepción para ben, e para dicirlle á xente que queremos o que é importante para cada un de nós e para o que nos une a todos: Galicia”.
