Santiago, 26 de outubro de 2021.- A deputada do Grupo Popular Begoña Freire afirmou hoxe no Parlamento galego que o Pacto Social pola Vivenda 2021-2025, consensuado con todos os axentes implicados, prevé mobilizar nos vindeiros anos arredor de 1.100 millóns de euros en Galicia e beneficiar a máis de 70.000 familias galegas.
“A política de vivenda ten que ser transversal e por iso a Xunta conta cunha completa planificación, cun modelo axustado ás necesidades reais de Galicia e centrada nun obxectivo: apoiar ás familias galegas na consecución dunha vivenda digna”, dixo.
Begoña Freire explicou que a Xunta adxudicou, a través do Rexistro de demandantes de vivenda, máis de 3.500 vivendas de promoción pública e conta na actualidade cun parque público de 3.700 vivendas para alugueiro, cifra que se incrementa con cada nova promoción.
AMPLO ABANICO DE MEDIDAS
En concreto, a deputada popular manifestou que a Xunta dispón “dun amplo abanico de medidas que permite desenvolver unha política que está ao pé da rúa, dando resposta ás demandas e ás necesidades da xente”. Así, referiuse aos programas de vivendas de promoción pública de nova construción ou rehabilitada ou as liñas de axuda para alugueiro e adquisición de vivenda.
“A política de vivenda da Xunta céntrase en traballar para que todos os galegos dispoñan dunha vivenda digna e a prezos asequibles, construíndo vivenda pública e apostando tamén pola rehabilitación”, sinalou Begoña Freire, quen apuntou a existencia de diversos programas de axuda para que mozos galegos dispoñan de máis oportunidades para acceder á súa primeira vivenda.
PLAN CONSENSUADO
Así mesmo, Freire lembrou que o Plan Rehavita 2015-2020 “deu os seus froitos e agora está en marcha o Pacto Social pola Vivenda 2021-2025, impulsado polo Goberno galego e que naceu do consenso e a implicación de todas as partes afectadas: promotores, construtores, cooperativas, os concellos, os arquitectos e arquitectos técnicos, e, por suposto, os consumidores e usuarios”.
Por último, a deputada popular salientou que os orzamentos da Xunta recollen unha partida de máis de 123,5 millóns de euros para o Instituto Galego de Vivenda e Solo, o que supón un incremento dun 28,6 por cento respecto a 2021 para continuar apoiando ás familias que máis o necesitan, favorecer a emancipación dos mozos e mozas menores de 35 anos, dar un impulso á rehabilitación de vivendas ou a construción de novas vivendas públicas en cidades como A Coruña, Vigo ou Santiago.
