Santiago, 2 de marzo de 2021.- O Grupo Popular demandará ao Goberno de España no Pleno da vindeira semana o traspaso a Galicia das competencias para a xestión do dominio público marítimo terrestre. Así mesmo, solicitará á Xunta a elaboración do III Programa de Muller e Ciencia, unha vez avaliado a segunda edición desta iniciativa entre os anos 2016 e 2020.
Ao remate da Xunta de Portavoces, o portavoz popular Pedro Puy avanzou que as preguntas dos grupos da oposición ao Presidente da Xunta adiantaranse á xornada do martes, xa que o mércores Feijóo ten previsto manter un encontro co ministro de Transportes, Mobilidade e Axenda Urbana, José Luís Ábalos.
COMPARECENCIAS DE CULTURA E EDUCACIÓN, E MAR
A orde do día da sesión plenaria inclúe as comparecencias do conselleiro de Educación e Cultura, para informar das previsións e liñas xerais de actuación do seu departamento, así como as actuacións en relación coa evolución da Covid-19; e da conselleira do Mar, para dar conta do impacto que en materia pesqueira pode ter o acordo de saída da Unión Europea de parte do Reino Unido, así como das actuacións que se van desenvolver no futuro na defensa de Galicia nesta cuestión.
Dentro do apartado de proposicións non de lei do Pleno, o Grupo Popular demandará ao Goberno de España a transferencia a Galicia das competencias para a xestión do dominio público marítimo terrestre, “unha cuestión que xa se ten formulado noutras ocasións desde a Comunidade galega”.
XESTIÓN DE PROXIMIDADE
Pedro Puy lembrou que Galicia conta con máis de 2.000 quilómetros de costa, sendo a comunidade que con máis territorio costeiro. “Deste xeito, reclámase esta xestión do domino público marítimo terrestre porque se trata dun territorio que ten unha especial vinculación con materias que son actualmente competencia autonómica, como a regulación urbanística, a construción de portos ou o control de vertidos na costa”, sinalou.
“O obxectivo é acadar unha mellor prestación do servizo público, facéndoo a través dunha xestión de proximidade e cun coñecemento máis detallado da realidade costeira galega, referendada coa aprobación do Plan de Ordenación do Litoral”, indicou.
Unha segunda proposición non de lei do Grupo Popular ten como obxectivo a elaboración do III Programa de Muller e Ciencia, dentro da Unidade de Muller e Ciencia e en colaboración coa Comisión Interdepartamental de I+D+i e as asociacións de mulleres da ciencia de Galicia.
AVALIACIÓN
Previamente, o Grupo Popular solicita que o Goberno galego realice unha avaliación do II Programa de Muller e Ciencia, desenvolvido entre os anos 2016 e 2020, que incidiu na investigación e a práctica científica para avanzar na igualdade entre mulleres e homes e no cambio institucional que o permita.
O portavoz popular recordou que este II Programa galego de Muller e Ciencia desenvolveuse en tres eixos estratéxicos: un primeiro, para conseguir o compromiso das institucións para a integración do principio de igualdade de oportunidades entre homes e mulleres; en segundo lugar, conseguir unha presenza equilibrada de homes e mulleres no sistema de ciencia, tecnoloxía e innovación; e, por último, integrar o principio de igualdade de oportunidades entre homes e mulleres en cada fase da produción, transferencia e aplicación do coñecemento.
Xa no apartado de preguntas ao Goberno galego, os deputados do Grupo Popular interesaranse polas ferramentas que as directrices da paisaxe pon a disposición das administracións públicas e os cidadáns para facilitar o uso e aproveitamento do territorio galego e a preservación da paisaxe; pola existencia dalgún novo compromiso de apoio económico do Goberno de España para a celebración do bienio Xacobeo 2021-2022; e polo ofrecemento que fixo o Goberno galego ás entidades locais para asumir por parte da Xunta a xestión das axudas municipais á hostalería, microempresas e autónomos para acadar unha maior simplificación e axilidade.
