Santiago, 1 de xuño de 2021.- O Grupo Popular demandará no Pleno do Parlamento galego da vindeira semana ao Goberno de España que “reconduza a situación” das novas tarifas eléctricas “cara unha racionalidade” e aborde este tema con diálogo coas comunidades autónomas.
Así mesmo, solicitará que o Goberno central conte coa participación das comunidades autónomas no deseño do Plan Turístico Nacional Xacobeo 2021-22 para a concreción de accións e aplicacións de recursos económicos.
Ao remate da Xunta de Portavoces, o portavoz popular, Pedro Puy, informou que a sesión plenaria dará comezo coa comparecencia, a petición propia, da conselleira do Mar para abordar a situación creada polo recurso interposto polo Ministerio de Transición Ecolóxica e Reto Demográfico respecto do Plan Xeral de Explotación Marisqueira para o período 2021-23.
SEN ALEGACIÓNS ANTERIORES AO MESMO PLAN
“Estamos sorprendidos porque este instrumento de planificación foi aprobado noutras ocasións polo mesmo sistema sen que houbera alegación algunha, e máis cando o Ministerio ten que informar cando se autorizan explotacións marisqueiras, porque afectan ao dominio público marítimo terrestre, pero non é así cando se trata dunha regulación xenérica dunha actividade”, sinalou.
Pedro Puy lamentou que esta situación “ten xerado unha enorme alarma, tanto na Xunta como nas propias confrarías, xa que pon en risco a actividade de máis de 3.700 persoas que traballan no marisqueo a pé, principalmente mulleres, e de arredor de 5.000 persoas que se dedican ao marisqueo desde embarcación”.
Dentro do apartado de proposicións non de lei, o Grupo Popular solicitará ao Goberno de España que “reconduza a nova situación das tarifas eléctricas cara unha racionalidade e en diálogo coas comunidades autónomas, como se ven pedindo desde a Xunta de Galicia”. “Seguimos pensando que é necesario facer unha transición enerxética equilibrada e xusta”, manifestou Pedro Puy, pero afirmou que “os efectos de todas estas decisións van repercutir no custo da enerxía para o consumidor final e para a competitividade das empresas”.
?É necesario facer unha transición eléctrica equilibrada e xusta,os efectos das decisións do Goberno central repercuten nun coste da luz dos máis elevados,imos demandar no Pleno que reconduza a situación cara a unha racionalidade e un abandono das improvisacións,Puy @ppdegalicia pic.twitter.com/SL2TIk681i
— GrupoPopularGalicia (@GrupoPopularGal) June 1, 2021
O portavoz popular lembrou que o Goberno de España “leva tempo prometendo medidas para rebaixar o prezo da luz, pero o novo réxime de tarifas suporá un encarecemento do servizo”. Fronte a isto, salientou que o Goberno galego “puxo en marcha desde hai anos axudas para as familias con menos recursos para o pago da factura eléctrica” e concretou que o bono eléctrico beneficia a cerca de 4.400 familias.
SEN DETALLES DO PLAN TURÍSTICO PARA O XACOBEO
Unha segunda proposición non de lei do Grupo Popular ten como obxectivo que o Ministerio de Industria, Comercio e Turismo conte coa participación das comunidades autónomas no deseño do Plan Turístico Nacional Xacobeo 2021-22 para a concreción de accións e para a aplicación de recursos económicos.
?️Sorprendidos da falta de contacto coas CCAA,de precisión nas medidas e de ausencia total de orzamento no anunciado polo Goberno central Plan turístico nacional #Xacobeo2021,o @ppdegalicia solicitará no Pleno que o deseño conte coa participación das CCAA e que aporte recursos pic.twitter.com/hZ8WR380kN
— GrupoPopularGalicia (@GrupoPopularGal) June 1, 2021
Pedro Puy lamentou que o Ministerio anunciou a principios do mes de marzo o Plan Turístico Nacional Xacobeo 21-22, pero a día de hoxe “non se deron máis detalles nin se contactou ou se pediu a colaboración das comunidades autónomas”.
Neste sentido, lembrou que se trata “dun evento que ten un carácter nacional e un fenómeno cun enorme interese para as comunidades do interior polas que discorre o Camiño de Santiago, onde a presenza de visitantes ten que ver co turismo cultural ou relixioso”.
Por último, no apartado de preguntas, o Grupo Popular interesarase polos resultados do proceso asistencial integrado para a esclerose lateral amiotrófica; pola evolución dos traballos de ampliación da rede de centros integrados de formación profesional; e polas xestións realizadas pola Xunta para defender a autonomía financeira de Galicia na tramitación do proxecto de Lei de medidas de prevención e loita contra o fraude fiscal, que “atenta contra a nosa autonomía fiscal, a nosa capacidade de desenvolvemento do Dereito Civil, deturpando os pactos sucesorios; e non respecta os principios básicos da relación tributaria entre Administración e contribuínte”, sinalou Pedro Puy.
?️O Goberno quere arranxar o que perdeu nos tribunais mediante a vía dos recursos e levalo a unha lei, contradecindo as resolucións da xustiza e sen respectar figuras propias do dereito civil, Puy anuncia iniciativa do @ppdegalicia sobre defensa da autonomía financeira de Galicia pic.twitter.com/iYoV47Oa8g
— GrupoPopularGalicia (@GrupoPopularGal) June 1, 2021
