17 de xaneiro de 2023. A deputada do Grupo Popular Noelia Pérez reiterou hoxe no Parlamento galego ao Goberno central que “transfira ás comunidades autónomas os fondos europeos para a transformación dixital porque son as que mellor coñecen as necesidades e as particularidades do seu territorio para o despregamento das redes”.
“O Goberno de Pedro Sánchez segue pretendendo investir directamente eses fondos europeos a pesar de ter fracasado xa no programa de axudas para impulsar a tecnoloxía 5G en estradas e en zonas rurais”, indicou.
Noelia Pérez criticou que “os socialistas galegos pretendan poñer o foco da falta de conectividade na Xunta, cando a competencia en materia de telecomunicacións corresponde ao Goberno do Estado e ademais ten os fondos económicos para a mellora da cobertura tanto a través de fibra como de 5G, que ten previsto executar de xeito centralizado por parte do Ministerio”. Neste sentido, lamentou que “o Goberno de Pedro Sánchez decidiu reservar para si a capacidade investidora en banda larga e 5G, sabendo que conta para iso con máis de 4.000 millóns de euros de fondos europeos».
INCREMENTO DE INVESTIMENTO DA XUNTA
A deputada popular salientou o incremento do investimento destinado pola Xunta á dixitalización en Galicia, xa que, ademais dos créditos recollidos directamente para a Axencia para a modernización tecnolóxica de Galicia (Amtega), este organismo “vai executar fondos do Mecanismo para a recuperación e a resiliencia destinados á dixitalización que, por motivos de eficacia e eficiencia, figuran no orzamento doutras consellerías”.
En concreto, citou o investimento da Consellería de Educación para dotar de 4.600 aulas dixitais ao sistema educativo público galego; ou o destinado pola Consellería de Política Social ao proxecto de teleasistencia avanzada, que elevará nun 50 por cento o número de persoas maiores que contan con apoios tecnolóxicos nos seus fogares.
