Santiago, 31 de maio de 2021.- O Grupo Popular vén de presentar emendas á proposición de lei de reforma da Lei galega 11/2007 para a prevención e o tratamento integral da violencia de xénero a través das que se solicita a inclusión, dentro do concepto de violencia vicaria e ademais da entendida como o homicidio ou asasinato das ou dos fillos ou fillas da muller, das accións levadas a cabo contra calquera outra persoa estreitamente unida á vítima coa finalidade de causarlle maior dano psicolóxico, por parte de quen sexa ou fose o seu cónxuxe ou por quen mantivo con ela unha relación análoga de afectividade, aínda sen convivencia.
Así mesmo, proponse darlle carácter retroactivo á Lei para que todas as afectadas sexan recoñecidas como vítimas de violencia de xénero e se lles outorgue a protección e as axudas que este estatuto lles ofrece.
A viceportavoz popular, Paula Prado, amosou a preocupación polo incremento de casos de violencia de xénero rexistrado nos últimos días e a necesidade de adoptar todas as medidas necesarias para acabar con esta situación.
Así, referiuse ás emendas presentadas polo Grupo Popular á proposición de lei para incorporar a violencia vicaria na Lei de violencia de xénero porque “consideramos necesario ampliar o concepto recollido no texto inicial para engadir a violencia exercida para quen mantivo coa muller unha relación estreita ou de afectividade aínda sen convivencia”.
“Coa modificación da proposición de lei que propoñemos, todas estas vítimas de violencia de xénero tamén terán á súa disposición todas as medidas de axuda aprobadas con carácter retroactivo”, aínda que subliñou que “a Xunta xa está a poñer a súa disposición este tipo de apoios a pesar de que non está recollida na Lei neste momento a violencia vicaria”.
?️ @paulapra2 fala das emendas presentadas a proposición de lei de modificacion da Lei galega sobre violencia de xénero referidas a
✅ caracter retroactivo das axudas as que poden optar as vítimas de violencia vicaria
✅ampliación a persoas estreitamente unidas á vítima pic.twitter.com/s625FrwBKW— GrupoPopularGalicia (@GrupoPopularGal) May 31, 2021
MODIFICACIÓNS PENDENTES NO PACTO DE ESTADO
Paula Prado lembrou que “hai catro anos que no Pacto de Estado se recolleu como unha das medidas a modificación da lexislación para incluír a violencia vicaria como unha das formas de violencia de xénero, pero non se ten mudado unha soa coma neste sentido, polo que agardamos que o Goberno de España se tome en serio este Pacto e comece a facer estas modificacións lexislativas tan importantes e necesarias para moitas mulleres que sofren violencia de xénero”.
Ademais, Prado lembrou que o Grupo Popular ten presentado unha proposición de lei para incluír a violencia dixital como unha forma de violencia de xénero. “Estamos a falar daquelas condutas que se exercen a través da novas tecnoloxías, do correo electrónico, internet, sistemas de mensaxería dixital ou redes sociais, con independencia de que o agresor garde ou non relación conxugal, de parella ou análoga de afectividade no presente ou no pasado, ou de parentesco coa vítima; coa única finalidade de discriminación, dominación, control e intromisión sen consentimento na privacidade da vítima”, concretou.
O @ppdegalicia rexistrou unha proposición de lei para incluír as violencia dixital como unha forma de violencia de xénero,a través das novas tecnoloxías con independencia de que o agresor garde ou non relación de afectividade ou parentesto coa vítima no presente ou no pasado pic.twitter.com/pad8uRIsmS
— GrupoPopularGalicia (@GrupoPopularGal) May 31, 2021
ATENCIÓN ÁS VÍTIMAS DE VIOLENCIA DIXITAL
“Consideramos imprescindible que se identifique a estas vítimas e se poña á súa disposición todos os recursos precisos para a súa atención, ademais de poñer en marcha políticas de prevención da sextorsión, o ciberbulling, o grooming ou o ciberacoso e abuso sexual a menores de idade, co obxectivo de identificar con antelación condutas e fenómenos emerxentes e previr a violencia de xénero dixital”, manifestou.
Neste sentido, a viceportavoz popular salientou que “as vítimas potenciais deste tipo de violencia de xénero son fundamentalmente as persoas máis novas, as adolescentes, que incluso moitas veces non son consciencia de que están sufrindo este tipo de violencia”.
MACHADAZO FISCAL
Cuestionada sobre a nova factura da luz, Paula Prado cualificou de “machadazo fiscal” esta decisión do Goberno central, “que afecta principalmente ás familias máis humildes”. En concreto, apuntou que a factura dos fogares poderase incrementar ata nun 36 por cento, o que supón ao redor de 66 euros ao ano.
A @Xunta xa advertíu que presentaría alegacións sobre as novas tarifas eléctricas que incrementa a luz nos fogares un 36%, a transición enerxética do Goberno central é inxusta desordenada e afecta directamente as economías das familias e as industrias @paulapra2 pic.twitter.com/1Ztf6uBhsq
— GrupoPopularGalicia (@GrupoPopularGal) May 31, 2021
“Estamos a falar que o Goberno central está a realizar unha transición enerxética inxusta e desordenada, pechando centrais térmicas sen ter unha tecnoloxía de substitución o suficientemente madura e que afecta directamente á competitividade das empresas”, sinalou a viceportavoz popular, quen avogou por implantar medidas importantes como a rebaixa do IVE na luz do 21 ao 10 por cento mentres se mantén o contexto actual marcado pola crise sanitaria.
Así mesmo, destacou que a Xunta “está a axudar aos fogares con menos recursos a través do bono eléctrico”, ao que este ano se destinan 1,6 millóns de euros.
