Destaca que, nos últimos nove meses, o desemprego baixa en Galicia nun 19,27%, cunha vantaxe de case tres puntos con respecto ao Estado
O secretario xeral do PPdeG, Miguel Tellado, puxo en valor que Galicia está no camiño da recuperación e da reactivación económica con menos paro que en setembro de 2019. Para seguir nesta senda, manifestou que é preciso continuar apoiando aos sectores económicos máis afectados pola covid-19 e, ao mesmo tempo, avaliar as novas oportunidades laborais para adiantarnos ás necesidades formativas cara aos empregos do futuro.
Segundo sinalou, os datos de desemprego de setembro indican que a Comunidade segue a resistir os efectos provocados polo coronavirus con menos parados que antes da pandemia. De feito, o paro baixa na evolución anual, acumulando seis meses consecutivos de caída, o que indica a recuperación do mercado de traballo, e o descenso do 13,32% é o maior da serie histórica.
Igualmente, o desemprego descende nas catro provincias galegas e nas sete grandes cidades, en todos os sectores económicos, nas mulleres, nos maiores de 45, nos menores de 30 e nos parados de longa duración, ademais de aumentar as afiliacións e a contratación indefinida e a tempo completo. Así mesmo, remarcou que, nos últimos nove meses, o desemprego baixa en Galicia nun 19,27%, cunha vantaxe de case tres puntos con respecto ao Estado (16,21%).
Por outra parte, en setembro produciuse un descenso con respecto a agosto de 968 persoas protexidas por Erte, o que supón unha caída do 8,95%. Deste modo, a evolución durante os meses que está a durar a pandemia resulta favorable, xa que neste período saíron dun Erte un total de 155.196 traballadores, o que supón o 94,04%, mentres a proporción de saídas no Estado é do 92,94%.
APOSTAR POLO FUTURO SEN DEIXAR A NINGUÉN ATRÁS
O número dous dos populares galegos fixo fincapé na importancia de facilitar ao noso tecido produtivo unha transformación dixital, pois o escenario de cambio que se está a vivir -e que a pandemia acelerou- require que as organizacións se adapten ás novas tecnoloxías para manter a competitividade no mercado e xerar un valor de diferenciación moi relevante.
Segundo destacou, o Goberno galego traballa para identificar o antes posible os empregos de futuro neste momento de oportunidades para o que é necesario orientar a formación cara á demanda do mercado laboral e, por iso, Galicia contará cunha Axenda Galega de Capacidades que permitirá cruzar as necesidades do mercado laboral coa formación.
“Atender ás necesidades reais do mercado de traballo e facilitar o acceso das persoas sen emprego ao mundo laboral son obxectivos principais para a Xunta”, apuntou Tellado explicando que a oferta formativa do Goberno galego está acorde coa demanda do tecido produtivo. Nese senso, engadiu que Galicia está a investir 53,7 millóns de euros ata 2022 para formar a 37.100 persoas desempregadas e ocupadas a través de 2.200 cursos dirixidos a cubrir a demanda do mercado de traballo.
“Mirar cara o futuro tamén significa non deixar a ninguén atrás”, subliñou aclarando que os populares continúan comprometidos cos que peor o están pasando e manteñen o seu apoio aos sectores económicos máis afectados pola crise do coronavirus. Sobre isto, recalcou que a Xunta lanzará, a mediados de outubro, unha nova convocatoria do Plan de rescate co obxectivo de chegar a máis persoas beneficiarias: “Por moito que o Goberno de Sánchez insista nos seus restritivos requisitos para acceder ás axudas do terceiro Plan, nós queremos esgotar os cartos para que o diñeiro se quede na nosa Comunidade”.
REPARTO XUSTO DOS NEXT GENERATION
O secretario xeral referiuse tamén á oportunidade que supoñen os Fondos Next Generation para transformar a nosa economía, lembrando que a nosa Comunidade puxo todos os medios para aproveitala presentando unha candidatura sólida e traballando en proxectos tractores e transformadores.
Por todo isto, insistiu en demandar ao Goberno central un reparto claro e xusto destes fondos, baseado na calidade das candidaturas e non nas cores políticas: “Galicia non pode perder esta ocasión por erros na xestión, pola indefinición nos criterios de repartición nin porque se pense antes en consolidar aritméticas parlamentarias que en modernizar o noso tecido produtivo”.
