O secretario xeral lamenta os vaivéns continuos do Executivo central, que xera incertezas engadidas ás que xa de por si a pandemia pon ante nós
2, outubro, 2020. O secretario xeral do PPdeG, Miguel Tellado, asegurou que o Goberno de Pedro Sánchez é un problema económico en si mesmo. “Debido aos seus continuos vaivéns e á súa falta de concreción en asuntos como o teito de gasto e o uso do déficit, é practicamente imposible que Galicia conte cos Orzamentos aprobados o 1 de xaneiro”, afirmou.
Tal e como apuntou, que un Goberno sen orzamentos estea a deslizar suba de impostos e desgravacións fiscais xa existentes, xera incertezas engadidas ás que xa de por si a pandemia pon ante nós. “As contas públicas non poden facerse lendo entre liñas as declaracións dos Ministros nun ou noutro xornal”, indicou.
Tellado tamén remarcou que a Comunidade ten estabilidade pero non un marco para elaborar os seus Orzamentos: “Pode facer os seus deberes, en canto o Goberno lle dea o marco macroeconómico para facelos. Para aprobar as contas, a Pedro Sánchez fáltanlle apoios, a Galicia o que lle falla é o Goberno central”. Por todo isto, lamentou que toda España terá que facer fronte a unha triple pandemia -á sanitaria, á social e á económica-.
Ademais, afeou a actitude desleal da voceira do BNG, Ana Pontón, que, en lugar de defender os intereses dos galegos e esixir ao Executivo central a fixación do marco macroeconómico para o 2021, se dedica só a criticar ao Goberno autonómico, que si aprobou as súas contas en tempo e forma durante os últimos 10 anos. “Prefire defender ao Goberno que leva prorrogando os orzamentos dous anos en vez de defender á Xunta aínda que iso sexa o que máis lle conveña a Galicia. Tapa a incompetencia de Pedro Sánchez e dun PSOE con quen goberna sempre que pode e onde pode”, incide.
SAÍR CANTO ANTES DA CRISE
Na súa comparecencia en rolda de prensa, o número dous dos populares tamén se referiu ás cifras de desemprego de setembro, destacando dous datos positivos: o paro baixa con respecto ao mes anterior e a contratación aumenta.
Deste modo, Galicia conta con 377 parados menos que en agosto, o que supón un -0,21% menos; a contratación medra nun 29% -asináronse 18.700 contratos máis que en agosto-; desde o mes de abril, a Comunidade logrou que máis de 15.000 persoas abandonasen as listas do paro; e supera o millón de afiliacións á Seguridade Social, situándose a un nivel superior ao de hai 9 anos.
“Sabemos que o horizonte económico trala pandemia é pouco alentador e que virán tempos moi duros, pero podemos asegurar que traballaremos para que Galicia supere da mellor maneira posible esta situación”, dixo mentres admitía que, dentro da innegable gravidade, temos algún motivo para a esperanza: “Hai grupos de expertos, como o Foro Económico de Galicia, que apuntan que a nosa economía está entre as que menos se contraeron nestes meses; o noso sector turístico foi dos que mellor resistiu neste verán atípico; e as exportacións volven medrar logo duns meses de parón”.
“Os galegos e galegas poden estar seguros de que poñeremos todo da nosa parte para que saiamos canto antes desta crise que temos no horizonte”, subliñou Tellado, quen resaltou que iso mesmo é o que lle piden ao Executivo central: un goberno que goberne e non que confronte coas Comunidades autónomas, estabilidade e non inseguridade, confianza e non que hoxe diga unha cousa e mañá a contraria, e certezas.
O ESTATUTO ELECTROINTENSIVO, UNHA FERRAMENTA BÁSICA
Así mesmo, o secretario xeral tamén falou da loita para que en Galicia non se destrúan postos de traballo que son estratéxicos, como os das factorías de Alcoa na Mariña. Segundo sinalou, esta comarca ten demostrado a súa vontade para seguir producindo aluminio primario, polo que celebrou que as administracións e os traballadores estean traballando con unidade para conseguir un obxectivo fundamental: o de que non se paren as cubas.
“O futuro de mil traballadores afectados polas decisións de Alcoa está moi por riba dos intereses non confesados dunha empresa que actúa de mala fe e que traizoou a confianza de administracións e empregados para impedir a venda e evitar así a entrada de competidores”, manifestou mentres salientaba que non se pode aceptar unha decisión inxusta que o único que provoca é perda de postos de traballo, de competitividade e que se deixe de producir en España aluminio primario, un sector considerado estratéxico.
“Aínda é posible unha solución: Alcoa está a tempo de recapacitar e manter aberta a negociación para que o Goberno compre temporalmente a planta de aluminio e a venda inmediatamente despois a Liberty”, mantivo Tellado.
Sobre isto, engadiu que, malia que Alcoa é urxente, o importante seguirá sendo ter un prezo competitivo da enerxía, que permita que as empresas electrointensivas galegas manteñan a súa actividade e non haxa máis peches nestes vindeiros meses. “Para conseguilo a ferramenta básica é o Estatuto Electrointensivo que o Goberno Sánchez leva dous anos prometendo e do que non coñecemos máis ca anuncios e retrasos continuados”, apostilou.
AS NEGATIVAS DECISIÓNS DO GOBERNO CENTRAL
Por último, Miguel Tellado cuestionou as intencións do Goberno de España en temas decisivos para a nosa economía como o peche da central térmica das Pontes, o empeño do Executivo para pechar as industrias de transformación ubicadas en dominio marítimo e terrestre -ENCE, conserveiras, depuradores ou empresas frigoríficas-, o retraso na aprobación do Estatuto Electrointensivo ou a negativa de dotar de carga de traballo aos estaleiros públicos da Ria de Ferrol.
“Son decisións que non entendemos nin compartimos pero que imos combater activamente como primeiro partido de Galicia porque é a responsabilidade que asumimos nas urnas o pasado 12 de xullo”, sentenciou.
