Os presidentes do PP de Asturias, Extremadura e Cantabria únense tamén a Pablo Casado e Teo García Egea, así como a secretaria xeral do PP vasco
O Congreso do PPdeG, que terá lugar esta fin de semana en Santiago, contará coa presenza de todos os presidentes autonómicos do Partido Popular con responsabilidades de Goberno. A data de hoxe teñen confirmada a súa asistencia ao Conclave o presidente da Junta de Andalucía, Juanma Moreno, a presidenta da Comunidade de Madrid, Isabel Díaz Ayuso, o presidente de Castela e León, Alfonso Fernández Mañueco, e o presidente de Murcia, Fernando López Miras.
Todos eles súmanse aos xa confirmados Teodoro García Egea e Pablo Casado, que asistirán ás xornadas de venres e sábado, respectivamente. Ademais, os presidentes do PP en Extemadura, José Antonio Monago, en Asturias, María Teresa Mallada de Castro, e en Cantabria, María José Sáenz de Buruaga, así como a secretaria xeral do Partido Popular vasco, Laura Garrido, participarán nun evento que se celebra un ano despois da cuarta vitoria electoral consecutiva e por maioría absoluta de Alberto Núñez Feijóo en Galicia.
O acto tamén contará coa presenza da presidenta de Nuevas Generaciones, Beatriz Fanjul, e dos vicesecretarios Jaime de Olano, Ana Beltrán e Antonio González Terol.
Malia que tanto o programa como o número de asistentes e invitados están por pechar, o PPdeG agradece o interese coa que tanto a dirección nacional da formación como o resto do territorio están a afrontar este Conclave.
Cómpre lembrar que Galicia non só é o berce dese Partido Popular que fundou Manuel Fraga hai 45 anos, senón que tamén é unha terra que ostenta dous importantes fitos na política española. En primeiro lugar, é o exemplo de que é compatible ser unha nacionalidade histórica con ter un profundo respecto pola unidade de España e pola Constitución de 1978; e, en segundo lugar, cando todo o país padecía os efectos da inestabilidade política do multipartidismo e das opción políticas máis extremas, os galegos apostaron por un Goberno estable, pola unificación do centro-dereita en torno ás siglas do PP e por deixar fóra do Parlamento a Ciudadanos, VOX e Podemos.
Por tanto, a nosa Comunidade é un territorio simbólico para o PP e os populares galegos agradecemos que así se demostre coa destacada presenza de líderes da formación no Congreso desta fin de semana.
UN CAMIÑO POR PERCORRER COS GALEGOS
O 17º Conclave autonómico ten por lema “Un camiño por percorrer”, un slogan que recolle a intención da formación de non vivir dos logros colleitados ata o de agora, senón que traballa por todos os retos que aínda quedan por acadar coa vista posta na Galicia do futuro.
Os populares queren continuar actualizándose e renovándose sempre da man dos galegos, para seguir avanzando así no sendeiro das melloras económicas e as baixadas de impostos -que forman parte dos relatorios-, da blindaxe dos servizos sociais públicos e de calidade, e da aposta por ser un partido cada vez máis aberto e accesible.
O Congreso que se desenvolverá os días 16 e 17 de xullo será presidido polo presidente do PP de Pontevedra, Rafael Domínguez, un dos referentes urbanos do PPdeG, que mellorou o resultado do partido nun momento de especial dificultade electoral e nunha cidade na que gobernan os nacionalistas. Pola súa parte, como vicepresidenta da Mesa exercerá Marta González, deputada no Congreso e integrante do PP de Santiago, urbe que acolle este evento.
