Santiago, 26 de abril de 2021.- O Grupo Popular iniciará con Vigo no Pleno desta semana unha serie de iniciativas parlamentarias a través das que se demanda ao Goberno central actuacións pendentes nas principais cidades e vilas de Galicia.
En concreto, neste caso solicítase a realización de proxectos en Vigo que dean solucións a carencias estruturais existentes nesta cidade, relacionados coa AP-9, as conexións ferroviarias, a mellora do saneamento, a conexión eléctrica a 220 kv, a promoción do Xacobeo, a construción da Biblioteca Pública Nacional ou a reforma da Lei do cambio climático.
O portavoz do Grupo Popular, Pedro Puy, lembrou que “a situación política, social e económica actual vén marcada pola pandemia da Covid-19”, polo que demandou “un esforzo conxunto das administracións para permitir que a recuperación sexa máis rápida e fácil”. Así, salientou que “a Xunta está a facer un traballo notable de estímulo da economía e de impulso de iniciativas que estaban en carteira”, pero lamentou que o Goberno central non estea a colaborar o suficiente para a mellora da situación nas cidades galegas.
?️A situación política,económica e social segue a estar marcada pola pandemia,a @Xunta fai un traballo de estímulo da economía e impulso de iniciativas,é o momento de continuar cos investimentos paralizados,o @ppdegalicia comezará solicitando os da cidade de Vigo @PPdeVigo pic.twitter.com/ml0naxND9b
— GrupoPopularGalicia (@GrupoPopularGal) April 26, 2021
ACTUACIÓNS XA COMPROMETIDAS
Puy avanzou que este tipo de proposicións non de lei “non vai ser unha iniciativa exclusiva de Vigo, senón que continuaremos traendo ao Parlamento galego propostas para que o Goberno de Pedro Sánchez leve adiante actuacións importantes da súa competencia, que na súa maioría xa estaban comprometidas polo anterior Goberno de Mariano Rajoy”.
Respecto da proposición non de lei que se debaterá no Pleno desta semana, o portavoz popular concretou que aborda actuacións en materia de infraestruturas viarias e ferroviarias, como a ampliación da AP-9; a integración urbana da AP-9 en Vigo; a conexión da AP-9 co Ifevi; a remodelación da Avenida de Madrid; a transferencia da AP-9 a Galicia, aplicando bonificacións e suprimindo a peaxe de Redondela; o soterramento a VG-20 en Navia; e no ambito ferroviario, o compromiso real co Corredor Atlántico, a conexión da saída sur da cidade, o AVE Vigo-Porto e o AVE Ourense-Vigo por Cerdedo.
Tamén se demanda a conexión de Vigo á rede de transporte eléctrica de 220kv, que tanto necesita o sector da automoción da cidade para o seu futuro; ou a aposta por unha planta de baterías en Vigo. Tamén se piden actuacións no ámbito da cultura, como o apoio ao Xacobeo 2021-2022; ou a construción dunha nova Biblioteca Pública Nacional.
Por último, o Grupo popular solicita que o Goberno central rectifique a Lei de cambio climático e a Lei de pesca sostible a fin de evitar aqueles aspectos que prexudican directamente á economía de Vigo e a súa área de influencia.
RECUPERACIÓN SUSTENTABLE DA PESCA
Por outra parte, Pedro Puy explicou que o Grupo Popular tamén demandará que o Parlamento galego rexeite a resolución do Parlamento Europeo que dispón medidas para promover a recuperación das poboacións de peixes por enriba do rendemento máximo sustentable, unha decisión que contén numerosos aspectos que son moi negativos para os intereses da frota pesqueira galega e da cadea mar-industria.
?Galicia sempre defendeu a compatibilidade entre os usos pesqueiros e económicos, o sector en Galicia está a sufrir importantes atrancos, o @ppdegalicia defenderá no Pleno iniciativa contra a recomendación do Parlamento europeo respecto do aumento dos recursos pesqueiros do mar pic.twitter.com/4m9ETTQVt9
— GrupoPopularGalicia (@GrupoPopularGal) April 26, 2021
En concreto, o portavoz popular explicou que o Parlamento Europeo aposta por substituír o criterio de rendemento máximo sustentable polo de rendemento máximo económico, realizando unha excesiva presión ambiental sobre o sector, que xa ten que afrontar retos impostos como a obriga de desembarque, o Brexit, ou a futura reforma do regulamento de control.
