Santiago, 27 de xullo de 2022.- A portavoz de Sanidade do Grupo Popular, Encarna Amigo, destacou esta tarde o extraordinario esforzo realizado pola Xunta na convocatoria de formación sanitaria especializada de este ano, na que a Comunidade galega incrementa un 45 por cento a súa oferta de prazas formativas para especialistas en medicina de familia ante o grave problema de déficit destes profesionais que está a sufrir toda España.
“A Xunta fixo todo o que está na súa man e o Goberno de España nada do que está na súa”, destacou Amigo, lembrando que o Goberno de Pedro Sánchez leva seis anos incumprindo un acordo do Consello Interterritorial do Sistema Nacional de Saúde aprobado por unanimidade en abril de 2018 no que se solicitaba a revisión e flexibilización dos criterios de acreditación de prazas de especialidades deficitarias como a medicina de familia.
“O aumento de prazas do que presume agora o PSdeG non é ningún mérito de Pedro Sánchez senón que foi conseguido co esforzo e co orzamento das comunidades autónomas, en particular de Galicia, mentres o Ministerio non fixo nada para facilitar o proceso de acreditación de máis prazas formativas”. Galicia, destacou a voceira popular, conseguiu duplicar as súas prazas formativas desta especialidade en cinco anos a pesares das rixideces do sistema, pero chegou ao seu tope sen que o Goberno de España tomase nin unha soa medida para flexibilizar o proceso e permitir acreditar máis prazas.
INCREMENTO EXTRAORDINARIO DE PRAZAS
A portavoz popular lembrou que a Xunta promoveu un manifesto xunto co Goberno vasco, ao que se adheriron outros cinco gobernos autonómicos, no que se esixe ao Goberno central que cumpra os seus compromisos pendentes coas comunidades autónomas e tome as medidas que permitan un incremento de arredor de 1.000 prazas MIR máis de medicina de familia nas convocatorias dos vindeiros anos para poder cubrir as xubilacións que se van producir. Esta demanda foi, ademais, respaldada pola maioría do Congreso dos Deputados nas votacións de resolucións que se produciron tras o Debate do Estado da Nación.
Encarna Amigo destacou que “ese incremento extraordinario é imposible se non se produce antes unha revisión dos criterios de acreditación de unidades docentes”, xa que os requisitos vixentes provocan que centros pequenos de contornas rurais, habituais en Galicia, non poidan participar na formación de residentes. Ou vetan como centros docentes aqueles que leven menos de 2 anos funcionando. “Na situación na que estamos, non sería comprensible que o Centro Integral de Saúde que comezará a funcionar este ano en Lugo estea dous anos sen poder formar médicos”, dixo.
“A Xunta remitiu xa en outubro pasado 20 propostas ao Ministerio de Sanidade para a reforma deste sistema de acreditación formativa”, lembrou Amigo, “das que o conselleiro deu conta no Parlamento a pregunta deste grupo”. Porén, o Goberno de España non fixo ningún avance nesa revisión normativa comprometida desde o ano 2018.
“Por se acaso o Ministerio ten a ben concluír esa revisión e facilita a creación de máis prazas formativas, a Xunta solicitou ante o Ministerio esta semana que a orde que regula a convocatoria MIR deste ano permitise incorporar novas prazas no caso de que se puideran acreditar nos vindeiros meses”, detallou a deputada popular, “pero lamentablemente o Goberno de España negouse, o que pode xerar outra situación absurda como a deste ano cando o Ministerio non permitiu a Galicia incluír na oferta as novas prazas que tiña acreditadas e obrigou a pospoñelas ata a convocatoria do vindeiro ano”. “O Goberno de Sánchez non é consciente da situación de urxencia que ten a primaria en toda España”, lamentou Amigo.
OS RESIDENTES SI QUEDAN EN GALICIA
A voceira de Sanidade do Grupo Popular asegurou que a Xunta fai o máximo esforzo por reter aos médicos que rematan a súa residencia e considerou que os datos ofrecidos hoxe polo deputado socialista Julio Torrado “están totalmente desmentidos pola Xunta, que acreditou xa hai meses no Parlamento que, dende o ano 2010 ata a actualidade, o 90 por cento dos MIR galegos que realizaron a súa especialidade en medicina familiar e comunitaria están agora mesmo a traballar no Sergas”.
“Dous terzos dos mesmos contan xa con praza en propiedade”, destacou Amigo lembrando os datos ofrecidos polo conselleiro na Cámara “e ademais este ano a Xunta está a ofrecer aos residentes que rematan o MIR de medicina de familia prazas en propiedade sen oposición a través dun concurso de méritos”, sinalou referíndose á oferta de emprego de facultativo especialista en atención primaria que a Xunta lanzou este ano para incentivar as prazas de difícil cobertura nos centros de saúde galegos.
“Curiosamente, o mesmo PSdeG que di hoxe que as condicións laborais son deplorables e a precariedade moi alta votou en contra da Lei que habilitou á Xunta para ofrecer a estes residentes unha praza en propiedade a través dun concurso de méritos, que é a máxima estabilidade posible”, destacou a deputada popular.
