7 de novembro de 2022. O Grupo Popular demandará no Pleno do Parlamento de Galicia desta semana que o Goberno central, logo do decepcionante resultado do cumio hispano-portugués celebrado o pasado venres, avance de xeito inequívoco na modernización dos treitos ferroviarios Vigo-O Porriño e O Porriño-Fronteira portuguesa, incluíndo partidas económicas nos presupostos do Estado para 2023. Pola súa banda, os senadores do Partido Popular na Comisión de Infraestruturas avanzaron a presentación dunha iniciativa na Cámara Alta solicitando proxectos e obras fundamentais no corredor Atlántico ferroviario.
Ao remate da xuntanza celebrada esta mañá entre deputados do Grupo Popular no Parlamento de Galicia e senadores do PP na Comisión de Infraestruturas, Pedro Puy lamentou que “o proxecto de orzamentos do Estado para 2023 xa avanzaba que a conexión ferroviaria de Porto con Vigo non é unha prioridade para o Goberno de España, ao consignar para esta obra menos de 30.000 euros, unha situación que se confirmou no recente cumio hispano-portugués”.
O portavoz popular lamentou que “infraestruturas importantes para a vertebración de Galicia co resto de España e Europa, ou para a conexión interior na Comunidade galega, están a sufrir importantes retrasos”. Así, recollendo os últimos datos correspondentes a 2022, criticou que o Goberno de Pedro Sánchez so tiña executado en Galicia no primeiro semestre deste ano o 28 por cento do previsto nos orzamentos, unha situación que resulta recorrente porque en 2021 a execución orzamentaria do Estado na Comunidade galega quedou no 67 por cento.
“Temos problemas de execución e iso conleva, ademais, que obras importantes para Galicia non se estean a executar, como a autovía entre Lugo e Santiago, por non falar da modernización do tren Ferrol-A Coruña; o AVE por Cerdedo; a nova autovía Vigo-O Porriño, a autovía da Mariña, a autovía Lugo-Ourense; ou a de Ourense a Ponferrada”, sinalou.
Diante desta situación, o Grupo Popular defenderá no Pleno do Parlamento galego desta semana que o Goberno de España avance de xeito inequívoco na modernización dos treitos ferroviarios Vigo-O Porriño e O Porriño-Fronteira portuguesa, tanto no ámbito administrativo como orzamentario, de xeito que se acompasen os tempos á planificación prevista polo Goberno de Portugal e que fixa en 2030 a chegada do AVE a Valença.
ORZAMENTOS QUE NON VALEN
Pola súa banda, o senador popular Juan José Sanz avanzou a presentación na Cámara Alta dunha iniciativa en relación coa construción e mellora do corredor atlántico para o seu debate no Pleno da Cámara Alta.
Sanz cualificou como “unha gran oportunidade” para as infraestruturas tanto o cumio hispano-portugués como os orzamentos do Estado para 2023, aínda que criticou que “xamais se tramitaron uns presupostos que o propio Goberno de España xa anunciou que non valen, porque non se corresponden co que remitiron a Europa”. “Son unha tomadura de pelo tanto ás cámaras do Congreso e o Senado como ao conxunto dos españois”, sinalou.
Pedro Puy engadiu que no Pleno desta semana o Grupo Popular tamén demandará ao Goberno central que amplíe os prazos sinalados no Real Decreto-Lei que establece a obrigatoriedade de que os promotores de parques eólicos acrediten o cumprimento duns determinados fitos administrativos. A aprobación deste Real Decreto-Lei polo Goberno central supuxo que a Xunta recibira 144 novas solicitudes de tramitación de parques eólicos nun breve prazo de tempo, que suman máis de 4.000 MW, o que equivaldría a duplicar a potencia actual instalada.
Esta esixencia imposta desde o Goberno central provoca que na actualidade 125 proxectos eólicos, cunha potencia instalada de máis de 3.500 MW, corran o risco de perder os seus permisos de acceso e conexión se non obteñen a Declaración de Impacto Ambiental antes do 24 de xaneiro de 2023. A transcendencia destes parques é que moitos deles están vinculados a contratos de compravenda de enerxía con industrias galegas, como é o caso de Alcoa, Sentury ou Showa Denko.
Tamén dentro da sesión plenaria terá lugar o debate de toma en consideración dos proxectos de Lei reguladora do xogo en Galicia e de medidas urxentes para a redución da temporalidade no emprego público de Galicia.
INICIATIVAS LEXISLATIVAS
Respecto da primeira iniciativa lexislativa, Puy incidiu que chega ao Parlamento galego despois dun longo proceso de diálogo con todos os colectivos implicados e ten como obxectivo adaptar a norma vixente de 1985 aos tempos actuais. Así mesmo, asegurou que ofrecerá “seguridade, garantindo a protección dos menores de idade e das persoas que o precisen por motivos de saúde”, e incorpora unha serie de medidas de protección tanto da poboación xeral como para desincentivar hábitos e condutas relacionadas co xogo.
O portavoz popular manifestou que “sorprende que os grupos da oposición presentaran emendas de devolución ao proxecto de Lei para reducir a temporalidade no emprego público de Galicia, xa que o obxectivo desta norma é axilizar e dotar de seguridade xurídica nos procesos de estabilización”. Puy destacou que esta nova lei “vén avaliada polos acordos asinados cos sindicatos CC.OO, UXT e CSIF na Comisión de Persoal” e lembrou que a Xunta xa aprobou o pasado mes de maio os decretos de oferta de emprego público, nos que se inclúe un total de 10.338 prazas para este proceso de estabilización de emprego.
