Santiago, 12 de maio de 2021.- A viceportavoz do Grupo Popular, Paula Prado, reiterou hoxe no Pleno do Parlamento galego que “levamos anos reclamando reiteradamente ao Goberno central a definición dun novo modelo de financiamento autonómico e local, que dea certezas dos recursos cos que pode contar cada administración e que teña en conta as particularidades dos concellos galegos na súa distribución, como os factores demográficos e de dispersión xeográfica”.

Paula Prado incidiu que “é o Estado o que debe clarificar o sistema de financiamento das administracións autonómica e local e posteriormente poderemos deseñar o futuro das relacións financeiras entre a Xunta e as entidades locais”.

“Todos somos conscientes de que o actual sistema de financiamento local é prexudicial para o municipalismo galego e que non garante a suficiencia dos concellos de menor poboación”, afirmou a viceportavoz popular.

DISTRIBUCIÓN DAS AXUDAS AOS CONCELLOS

Diante desta situación, Prado demandou aos socialistas galegos “seriedade nos seus plantexamentos, porque non se pode facer unha cousa onde gobernan e pedir a contraria onde son oposición”. “Non poden pedirlle á Xunta que estableza un novo marco de financiación local cando ten que partir do Goberno de España que vostedes dirixen hai tres anos”, apuntou.

Respecto das criticas do PSdeG sobre a distribución das subvencións convocadas pola Xunta entre os concellos galegos, Paula Prado asegurou que “máis dun 70 por cento destas convocatorias estableceron o réxime de concorrencia competitiva”.

Neste sentido, a viceportavoz popular lembrou que case o 90 por cento dos convenio do anterior Goberno bipartito da Xunta foron para concellos nos que gobernaban BNG ou PSdeG. Ademais, engadiu que “na o actual goberno da Deputación de Lugo só destinou o 1,5 por cento do importe dos convenios realizados cos concellos aos gobernados polo PPdeG”.