Santiago, 26 de febreiro de 2019.- O portavoz de Sanidade do Grupo Popular, Aurelio Núñez Centeno, salientou hoxe “a disposición ao diálogo constante da Consellería de Sanidade, e particularmente do conselleiro, na busca de solucións aos problemas que ten o sistema sanitario galego, e nomeadamente a atención primaria”.

 

 

Porén, criticou que a oposición “o único que trata é facer partidismo coa sanidade pública, tentando desgastar ao Goberno galego cunha serie de constantes falacias e un desprestixio permanente”.

 

Aurelio Núñez sinalou que “desde a pasada semana que interpelaron no Pleno ao conselleiro xa existen novas realidades: resolveuse a folga do persoal do Hospital de Santiago; negociouse co persoal dos puntos de atención continuada, con achegamento de posturas; sentáronse á mesa empresa e traballadores de ambulancias; presentáronse 175 medidas do borrador do novo modelo de atención primaria, que está en período de aportacións por parte de profesionais e cidadanía; e publicouse o novo contrato para profesionais”.

 

Ademais, o portavoz de Sanidade lembrou que desde o Goberno galego “estase a propoñer a incorporación do superávit do pasado ano para destinar unha parte á sanidade pública; e a publicación de ofertas públicas de emprego cun número importante de prazas para a sanidade, ademais dun concurso aberto e permanente e o plan de estabilización; xunto coa solicitude de acreditación de novas unidades formativas para incrementar as prazas MIR”.

 

 

 

No debate doutra moción sobre atención pediátrica, Aurelio Núñez explicou que “o novo contrato, aprobado e asinado pola maioría dos sindicatos, facilitará a fixación dos residentes de pediatría e a posibilidade de retorno de profesionais galegos formados ou exercendo noutras comunidades autónomas ou Portugal”.