Santiago, 21 de decembro de 2021.- A deputada do Grupo Popular Marta Rodríguez-Vispo salientou hoxe no Pleno do Parlamento galego “o claro impulso que o Goberno galego está a dar para incentivar a contratación das persoas LGTBI cos programas de empregabilidade, cunha clara discriminación positiva para facilitar a súa inserción laboral”.
“Imos defender e sempre imos estar ao carón dos que sofren esta situación, buscando o cambio e a sensibilización, e no peor dos casos o castigo, dos que provocan que a vida das persoas LGTBI sexa difícil no día a día”, apuntou.
Rodríguez-Vispo manifestou que a oposición “volve chegar tarde” coas súas demandas para o colectivo LGTBI “porque en Galicia xa levamos tempo traballando e se ten avanzado moito neste ámbito”. Así, lembrou que “a Comunidade galega foi pioneira na aprobación en 2014 da Lei pola igualdade de trato e a non discriminación de lesbianas, gays, transexuais, bisexuais e intersexuais de Galicia”, a través da que se abordan áreas estratéxicas para a plena integración deste colectivo na comunicación, educación, saúde, familia, ocio, cultura, xuventude, xustiza e emprego.
Neste sentido, a deputada popular afirmou que o Goberno galego “está a promover diferentes medidas no tecido empresarial para mellorar a inserción do colectivo LGTBI, tanto no ámbito formativo como no que a incentivos á contratación se refire”. En concreto, referiuse á organización de xornadas de formación, para sensibilizar e crear conciencia nas organizacións sobre as situacións que as persoas LGTBI teñen que soportar a diario e as súas consecuencias na vida privada e interpersoal; ou a Guía para a prevención e o tratamento do acoso sexual e o acoso por razón de sexo nas pequenas e medianas empresas, traballada desde o diálogo social.
COMPROMETIDOS CONTRA A DISCRIMINACIÓN
“Tanto o Goberno galego como o Grupo Popular estamos comprometidos contra a discriminación de todo o colectivo LGTBI, existindo unha colaboración e interlocución constante con todo o tecido asociativo que agrupa a este sector”, asegurou Rodríguez-Vispo.
Para rematar, apuntou que “outras das medidas levadas a cabo para facilitar a vida destas persoas foi o desenvolvemento de incentivos á contratación”, a través do programa Galicia Emprega e o incremento dun 25 por cento da contía das axudas para a inclusión das persoas LGTBI nos programas de promoción do emprego autónomo, no programa a prol da economía social e nos centros especiais de emprego.
“Tamén é necesario poñer en valor o traballo desenvolvido polo Observatorio contra a discriminación por orientación sexual e identidade de xénero, cuxo obxectivo é mellorar e buscar solucións para avanzar nunha sociedade diversa e integradora, para concienciar á cidadanía da necesidade de respectar e axudar a aqueles que sexan máis susceptibles de sufrir as consecuencias da parte da sociedade máis intransixente”, manifestou.
