7 de febreiro de 2023. A deputada do Grupo Popular Raquel Arias salientou hoxe no Pleno do Parlamento galego que “todos os datos avalan a xestión que se está a facer da Corporación de Radio e Televisión de Galicia, que conta co respaldo maioritario da audiencia galega”.

“Deixen de utilizala politicamente e respecten aos seus profesionais e aos galegos e galegas, que a senten como propia a ven maioritariamente e son quen sosteñen os medios públicos de radio e televisión de Galicia”, pediu a BNG e PSdeG.

Raquel Arias manifestou que a proposición de lei do BNG para reformar a Lei dos medios públicos de comunicación audiovisual de Galicia “está baseada na falacia de que a CRTVG non actúa con independencia nin con criterios profesionais; e é so propagandista, porque no seu preámbulo fala do Estatuto Profesional, do Consello de Informativos e do contrato-programa, pero no texto non fai ningunha proposta a eles e se limita ao proceso de elección do director xeral e do Consello de Administración”.

COPIA DO FRACASO DO MODELO DE RTVE

“Toda a parafernalia que hoxe traen aquí os nacionalistas ten un único obxectivo: cambiar ao director xeral da CRTVG, sen desenvolver un novo modelo de xestión nin reforma estrutural algunha”, concretou.

A deputada popular explicou que a Lei 9/2011 de medios públicos de comunicación audiovisual de Galicia “garante a independencia, a liberdade de información, o respecto á profesionalidade dos traballadores e á despolitización”. Neste sentido, lembrou que se trata dunha lei “aprobada cos votos do PPdeG e do PSdeG que defende os valores do pluralismo, a veracidade e a accesibilidade, ao tempo que reforza a capacidade de control do Parlamento galego”.

Arias criticou que o BNG propoña un sistema de elección do presidente da CRTVG que copia “o estrepitoso fracaso da Radio-Televisión Española no intento de concurso público, cuestionado polos propios membros do comité de expertos e que foi rexeitado polos letrados do Congreso, xa que consideraban que nalgúns aspectos era contrario á lei”.

“O que fixo o Goberno de Pedro Sánchez con RTVE non ten precedentes nunha democracia, xa que cesou por decreto-lei ao Consello de Administración que fora elixido polo Congreso para poñer unha administradora única designada a dedo polo Goberno mediante un decreto, Rosa María Mateo”, lembrou Raquel Arias. Posteriormente, o Tribunal Constitucional anulou este nomeamento por consideralo ilegal, e xa foron nomeados outros dous administradores: José Manuel Pérez Tornero, que deixou o posto porque non estaba disposto a seguir a directrices que lle pretendían impoñer desde o Goberno; e a actual Elena Sánchez, que os propios traballadores xa teñen levado aos tribunais e que os letrados do Congreso consideran ilegal.