Santiago, 23 de outubro de 2018.- O Parlamento de Galicia aprobou hoxe, coa abstención de En Marea, a proposición non de lei, impulsada polo Grupo Popular, a través da que se insta ao Ministerio de Agricultura e Pesca que desenvolva unha estratexia de comunicación para contrarrestar a confusión xerada logo das medidas adoptadas polas autoridades sanitarias a propósito do anisakis.

 

 

“Estas campañas serían moi acaídas para responder á confusión xerada por estas tormentas mediáticas, que buscan intereses que descoñecemos, pero o que si sabemos é que afectan duramente ao noso sector da pesca”, sinalou a deputada popular Soraya Salorio.

 

 

Na súa intervención, a deputada popular lembrou que durante o pasado verán as autoridades sanitarias decidiron aumentar a cinco días a recomendación para conxelar o pescado antes de consumilo, co obxectivo de diminuír o risco de infectarse co parasito do anisakis logo de que se detectaran supostos casos de contaxio en peixe que fora conxelado previamente.

 

 

 

“Aínda que en Galicia son mínimos os casos de infestación de anisakis en humanos, si que somos quen máis sufrimos as mensaxes que falan deste problema”, lamentou Salorio. Así, sinalou que “consumir peixe é completamente seguro, sempre que se adquira polas canles legais de comercialización e que se cumpran as recomendacións da Axencia Española de Consumo, Seguridade Alimentaria e Nutrición”.

 

Deste xeito, indicou que “armadores, mariñeiros, comercializadores ou praceiros están tratando de neutralizar coas ferramentas que teñen ao seu alcance a baixada das cotizacións do pescado, que afectan especialmente á pescada, xunto ao descenso no consumo”. “Tampouco a Consellería do Mar quedou cos brazos cruzados e tomou medidas desde o primeiro momento, en pleno mes de agosto, cunha campaña informativa e publicitaria sobre como tratar este parásito á hora de cociñar o peixe e de promoción do consumo da pescada”, lembrou a deputada popular.

 

“Somos coñecedores de que todas estas accións foron ben recibidas polo sector, que agradeceron toda a colaboración, especialmente cando estamos ante unha situación complicada para eles pola caída de prezos dos seus produtos en plena campaña”, sinalou.

 

 

 

Porén, apuntou que “a realidade é que, unha vez feitos os deberes desde Galicia, o sector pesqueiro afectado demanda que sexa o Ministerio de Agricultura e Pesca quen desenvolva unha estratexia de comunicación para contrarrestar o efecto que está tendo esta confusión sobre as medidas adaptadas polas autoridades sanitarias ao terse supostamente detectado casos de infección por inxerir peixe”.