Santiago, 21 de marzo de 2018.- O Parlamento de Galicia aprobou hoxe, a instancias do Grupo Popular, unha proposición non de lei a través da que se demanda ao Goberno central que permita os concellos utilizar os remanentes de tesourería positivos para a devolución do Imposto sobre o Incremento de Valor dos Terreos de Natureza Urbana, coñecido como plusvalía municipal, indebidamente cobrado a máis de 20.000 galegos. “Desde o PPdeG defenderemos sempre a correcta aplicación da normativa tributaria, tamén naqueles casos nos que quen debe devolver o indebidamente cobrado é o ente recadador, neste caso os concellos”, indicou o portavoz de Facenda, José González Vázquez.
Na súa intervención, González Vázquez explicou a plusvalía municipal grava o incremento de valor que experimentan os terreos urbanos e que se poña de manifesto a consecuencia da transmisión da propiedade dos terreos por calquera tipo, mesmo por herdanza”.
Neste sentido, apuntou que “en Galicia son 115 os concellos que teñen tipos aprobados para a aplicación da plusvalía municipal, principalmente municipios urbanos. “O 70 por cento da plusvalía recádase polas sete principais cidades galegas, destacando Vigo cunha media de 9,6 millóns de euros nos tres últimos anos”, concretou.
SENTENZA DO TRIBUNAL CONSTITUCIONAL
A crise inmobiliaria motivou unha perda xeneralizada de valor dos inmobles urbanos nos últimos anos. Diante desta situación, o pasado mes de maio o Tribunal Constitucional declarou nulos e inconstitucionais os artigos da Lei de Facendas Locais que regulan a cuantificación da plusvalía municipal “na medida que someten a tributación situacións de inexistencia de incrementos de valor”, é dicir, as ventas a perda.
José González afirmou que “o número de casos de ventas a perda nos que se pagou plusvalía en Galicia ronda, con datos do 2017, os 18.300”. Porén, apuntou que desde esa data os concellos seguen a cobrar indebidamente a plusvalía nas ventas a perda, polo que o número de afectados a día de hoxe supera amplamente os 20.000.
Neste sentido, recordou que “a devolución da plusvalía non se pode facer de oficio polos concellos, senón que é necesario que o contribuínte afectado presente unha reclamación”. O prazo para a presentación desta reclamación é de catro anos desde que se presentou a autoliquidación.
RECLAMACIÓN ANTES DA PRESCRICIÓN
“Cada día que pasa, entre 15 e 20 galegos que non reclaman perden o seu dereito para solicitar a devolución por transcurso do prazo de prescrición”, dixo o portavoz popular, quen indicou que “a día de hoxe hai arredor de 4.000 galegos que se non presentaron a reclamación xa perderon o seu dereito a presentala”, alertou.
González Vázquez asegurou que “non existe dúbida algunha de que quen ten que facer a devolución é o concello que cobrou indebidamente a plusvalía, e reiterou que para facelo é necesario que o contribuínte afectado o reclame antes de que prescriba o seu dereito”.
Ademais, a proposición non de lei solicita que os concellos galegos informen á cidadanía do dereito que lles asiste para reclamar a devolución da plusvalía indebidamente cobrada, así como de que ese dereito extínguese polo transcurso do prazo de catro anos. Así mesmo, demándase que, en tanto non se resolva a situación lexislativa, os concellos deixen de cobrar a plusvalía nos casos de venda a perda que se acrediten mediante a presentación da escritura de compra e de venda.
