O Parlamento de Galicia aprobou hoxe a proposición non de lei do Grupo Popular a través da que se pide ao Ministerio de Agricultura, Pesca e Alimentación que se fagan estudos máis exhaustivos sobre a necesidade de adopción de medidas de protección dos cetáceos, así como a adopción de medidas desde un punto de vista de proporcionalidade para os posibles danos que cada arte de pesca pode orixinar na interactuación con estas especies.
A deputada popular Teresa Egerique lembrou que “recentemente coñecemos que a Comisión Europea intentará protexer aos cetáceos para que a pesca non dane accidentalmente a estes tipo de animais”. Así, España, Francia e Suecia foron expedientadas pola Comisión Europea pola laxitude das súas accións para evitar a morte de mamíferos, cetáceos e aves nas súas tarefas pesqueiras.
Diante desta situación, a conselleira do Mar amosou a súa preocupación e remitiulle unha carta no mes de xuño ao ministro de Pesca explicando que o nivel de selectividade do arrastre peláxico, en termos de interacción e captura accidental de mamíferos mariños, é moi superior a outras artes, polo que se entende que as actuacións e normas deben tamén ser diferentes.
Ante a diferenciación que se da no uso de artes e a súa afectación para os mamíferos, así como ante posibles medidas de protección dos mesmos, Teresa Egerique apuntou que “a conselleira solicitoulle ao ministro que realizase xestións ante o marco decisorio europeo, co obxectivo de que a normativa de captura accidental de mamíferos e a de descartes atenda de forma específica a cada pesquería”.
?É moi importante diferenciar e defender a forma de pescar dos galegos, que cumpren estrictamente as normas e non son tan agresivos coma outros, @temtem23 defendeu hoxe no @Par_Gal adoptar medidas en relación coa pesca accidental de cetáceos @RosaQuintanaMar pic.twitter.com/itYz3rfhJ4
— GrupoPopularGalicia (@GrupoPopularGal) October 2, 2020
“É moi importante diferenciar e defender a forma de pescar dos galegos, que compren estritamente as normas e non son tan agresivos como outros”, subliñou a deputada popular.
NORMATIVAS LINEAIS
En concreto, sinalou que “queremos evitar que a imposición de normativas lineais castigue a aquelas flotas que empregan artes selectivas e con nulo efecto pernicioso sobre os recursos e contorno mariño, como pode ser a frota galega”, polo que considerou que, “ao igual que se ten limitado de forma estrita outras pesquerías, coma o arrastre e enmalle de fondo, sería necesario circunscribir estas normas sobre protección de mamíferos a aquelas artes realmente perniciosas”.
Teresa Egerique salientou que “a Xunta adoptou medidas para paliar esta situación e para iso convocou unha orde de axudas para dotar aos pesqueiros de tecnoloxía e ferramentas para esquivar as capturas non desexadas de todos aqueles animais mariños que non sexan especies obxectivo para a pesca, ou o que é o mesmo, limitar o impacto da pesca no medio mariño e adaptar a pesca á protección das especies”.
A Consellería do mar destina a esta liña de axudas un importe de 300.000 euros e a contía da subvención pode ser de ata o 50 por cento do investimento, no caso de que o beneficiario sexa unha pequena ou mediana empresa, e de ata o 30 por cento cando non se trate de pemes.
