Santiago, 18 de xaneiro de 2018.- O Parlamento de Galicia aprobou esta mañá unha proposición non de lei impulsada polo Grupo Popular a través da que se insta á Xunta a adoptar, dentro do seu ámbito competencial e en colaboración coa Administración xeral do Estado, así como cos sectores interesados, medidas que contribúan a frear os efectos negativos da revenda de entradas de espectáculos en internet e que lles proporcionen aos consumidores maiores garantías.

A deputada popular Teresa Egerique sinalou que “o impulso experimentado polo uso da internet e das redes sociais propiciou en pouco tempo un fenómeno que xerou novos modelos de negocio baseados en proporcionar maiores oportunidades de circulación a produtos e servizos xa existentes, apoiados nas interaccións entre os usuarios”.

    
REVENDA EN MINUTOS

Neste sentido, Egerique indicou que “en moitas ocasións tan só uns minutos despois do inicio da venda telemática de entradas a través das canles oficiais de distribución, póñense xa a disposicións dos usuarios numerosos billetes para eses mesmos espectáculos en páxinas de revenda por prezos superiores”.

Diante desta situación, un grupo de artistas constituíu a chamada Alianza Antireventa, unha plataforma que ten por obxecto solicitar ao Goberno central e autonómico que diten as disposicións necesarias para poñer fin ás prácticas de revenda masiva de entradas para espectáculos culturais e deportivos a través de webs de venda non autorizadas polos promotores. Do mesmo xeito, a OCU tamén pediu que se modifique a normativa e se proporcionen maiores garantías aos consumidores.

TRABALLO CONXUNTO

Así mesmo, o Goberno central está a traballar conxuntamente con artistas, promotores e consumidores na identificación das medidas necesarias para frear os efectos negativos da revenda telemática de entradas, creando unha comisión de estudo sobre as posibilidades de intervención en materia de revenda de entradas ou facendo unha consulta pública previa sobre a revenda telemática.

Teresa Egerique lembrou que a recentemente aprobada Lei de espectáculos públicos e actividades recreativas de Galicia “xa contempla esta situación prohibindo a revenda de entradas de papel ou en calquera medio ou soporte electrónico, ademais de considerar a revenda de entradas como unha infracción grave”.