10 de maio de 2023. O Parlamento de Galicia aprobou hoxe a proposición non de lei do Grupo Popular a través da que reafirma o seu compromiso co marco lingüístico recollido na Constitución, no Estatuto de Autonomía e na Lei de Normalización Lingüística de Galicia, desenvolto no Plan Xeral de Normalización da Lingua galega e nos plans de dinamización da lingua galega no tecido socioeconómico e na mocidade; ao tempo que defende o modelo bilingüe para o galego e o castelán, xunto coa aprendizaxe de linguas estranxeiras para o plurilingüismo no ensino non universitario de Galicia, porque está a permitir asegurar no ámbito educativo plenas competencias en lingua galega do alumnado.

O deputado popular José Luis Ferro manifestou que “os galegos e galegas levan moitos anos comprometidos coa convivencia lingüística entre o galego e o castelán, ambas linguas cooficiais ao amparo do marco normativo previsto na Constitución, no Estatuto de Autonomía e na Lei de normalización lingüística de Galicia”.

BILINGÜISMO CORDIAL

“En Galicia non existe ningún tipo de conflito lingüístico e mesmo contamos cun modelo de bilingüismo cordial totalmente normalizado, un modelo integrador que busca a convivencia entre as linguas cooficiais en condicións de igualdade”, apuntou. Ademais, Ferro dixo que “as políticas destes anos puxeron o foco no bilingüismo ao tempo que se promoveu a aprendizaxe de linguas estranxeiras e un aproveitamento intenso co outro gran tronco lingüístico común que é a lusofonía”.

José Luis Ferro salientou que, máis de dez anos despois da aprobación do Decreto 79/2010 para o plurilingüismo na ensinanza non universitaria de Galicia, “os datos avalan a súa eficacia e corroboran que cada día falan galego máis persoas e a nosa lingua consolídase como maioría na Comunidade galega”.

“Para conseguir todo isto foi fundamental unha correcta información e unha política lingüística flexible, que cumpra plans e logre resultados, sen imposicións de ningún tipo”, manifestou o deputado popular, quen avogou por “traballar todos unidos, comezando pola Xunta, achegando novas ideas e proxectos ao actual proceso normalizador, facendo especial fincapé nun maior emprego do galego en todos os ámbitos”.

Ferro asegurou que o traballo do Goberno galego “está encamiñado a procurar por todos os medios que os galegos coñezan e dominen a súa propia lingua, e que a usen sen complexos e sen confrontacións, pero con orgullo”. “Non podemos consentir que se pretenda facer da nosa lingua unha arma arroxadiza ao servizo dunha ou doutra ideoloxía, porque un idioma propio constitúe a base de identidade máis clara dun pobo e o vínculo esencial de unión entre as súas xentes”, rematou.