Santiago, 24 de febreiro de 2021.- “Insólita,inédita e tomadura de pelo”, así cualificou hoxe o portavoz de Infraestruturas do Grupo Parlamentario Popular, Diego Calvo, a iniciativa presentada polo PSdeG na que reclamaban un acordo para agradecer ao Goberno Socialista todo o feito polos galegos con respecto á xestión da AP-9.

Para o deputado popular, é unha “broma de mal gusto”, solicitar ao Parlamento de Galicia o agradecemento a “tres anos de incumprimentos na eliminación das peaxes de Redondela, incrementos extraordinarios de peaxes para compensar ampliacións en Santiago e en Rande ou converter a autoestrada de Galicia na única na que se incrementaron os prezos neste 2021”.

Tras solicitar un acordo unánime para urxir a reunión da Comisión mixta de transferencias, Calvo acusou aos socialistas galegos de “terse convertido nunha sucursal do Goberno e da conta de resultados de Audasa”, cando o que terían que facer é “poñerse de lado dos galegos”.

Insistiu Diego Calvo nesa cuestión ao asegurar que “o que trae aquí o PSOE non serve para mellorar a vida dos galegos nin para mellorar o traballo das administracións, xa que só é unha mostra máis da sumisión dos socialistas galegos a Sánchez nun momento de renovación de líderes políticos”.

Prórroga “sen contraprestacións”

Do mesmo xeito, o deputado popular lembrou que foi Emilio Pérez Touriño o primeiro en ampliar a concesión da autoestrada no ano 1994 “sen contraprestación ningunha”, e puxo de manifesto que a última prórroga autorizada por un goberno popular supuxo a conclusión da AP-9 ata Ferrol “libre de peaxe”. Por iso, Calvo acusou ao PSdeG de querer “enganar aos galegos” e “modificar a realidade ao seu gusto”, cando “a verdade é que a única administración que ten presentada unha proposta real de modificacións nas peaxes é a Xunta de Galicia”.

Finalmente, o titular de infraestruturas insistiu na “broma de mal gusto” dos socialistas ao plantexar ante o pleno que a Xunta destine parte dos seus orzamentos a bonificar as peaxes dunha autoestrada estatal. “De que partida queren vostedes que se quiten eses cartos? Da de Sanidade? Da de Educación? Da de Política Social?”, inquiriu Calvo, que recriminou ao PSOE que se atrevan a pedir aos galegos que paguen “o que non queren pagar os seus compañeiros de partido en Madrid”.

O Partido Popular, apelando “á sensatez” dos grupos da oposición, presentou unha proposta de acordo para a convocatoria inmediata da comisión conxunta sobre a AP-9 (Xunta e Ministerio de Transportes), aplicación das bonificacións remitidas pola Xunta, e o cumprimento dos compromisos na supresión da peaxe de Redondela ou a execución de actuacións compensatorias polas obras da AP-9 en Chapela.