Santiago, 10 de novembro de 2020.- O deputado popular Martín Fernández Prado asegurou hoxe no Parlamento galego que a nova Lei de ordenación do territorio, que superou no Pleno o debate de totalidade, establece “os criterios xerais para ordenar as actividades sobre o solo, que é un ben limitado e moi sensible, para facer un desenvolvemento sostible, equilibrado e salvagardando os valores naturais”. Neste sentido, sinalou que con esta nova norma “pechamos a renovación e a redacción de novos textos lexislativos que completan a regulación territorial e urbanística na Comunidade galega”.
Martín Fernández subliñou que “o coidado da paisaxe e do territorio sempre foi un dos aspectos centrais das políticas nos gobernos de Feijóo, pero neste momento, en que un dos catro eixos da estratexia de Galicia cara o 2030 é a Galicia verde, en sintonía cas políticas europeas e mundiais, é especialmente importante”.
COMPROMISO E PREOCUPACIÓN POLO CAMBIO CLIMÁTICO
“A sociedade mudou moito nestes 25 anos que leva en vigor a actual lei e que se modifica con este novo texto lexislativo, e neste momento esta a requirirnos moito máis compromiso e preocupación polo cambio climático e os aspectos medioambientais, e esta lei vai nese camiño”, apuntou.
Na súa intervención no Pleno, Fernández Prado incidiu que esta nova lei “actualiza, simplifica e axiliza os diferentes instrumentos da planificación urbanística para evitar posibles desequilibrios e mellorar a coordinación e planificación integral do territorio en termos de igualdade”. Así, engadiu que “atende aos principios de igualdade entre homes e mulleres, avanzando cara unha cidade coidadora, na que os elementos deben atender ás persoas e a súa diversidade, situándoas como elementos clave sobre as que regular o territorio no que habitan”.
Neste sentido, indicou que a perspectiva de xénero “aporta a visión de que o territorio, as cidades e a forma en que ordenamos a paisaxe deben perseguir a idea de xerar espazos sostibles medioambiental e economicamente, ao tempo que accesibles humanamente; é dicir, que a finalidade última da ordenación debe ser mellorar de forma equitativa a vida das persoas tendo en conta o conxunto da súa diversidade e complexidade”.
ÚNICO PROCEDEMENTO DE TRAMITACIÓN
O deputado popular explicou, ademais, que a nova lei “establece un único procedemento de tramitación para todos os instrumentos de ordenación do territorio, ao tempo que achega maior seguridade á figura do plan sectorial, concretando e actualizando a súa definición para diferenciala do concepto de proxecto sectorial”.
“Abordamos unha actualización da lei que pretende ser útil e práctica a sociedade e que vai ser mais eficiente e así mellorar a implementación de figuras de ordenación territorial e, polo tanto, axudar a acadar o obxectivo último de seguir coidando un dos nosos máximos activos: o noso territorio e a nosa paisaxe”, manifestou.
En definitiva, Martín Fernández concluíu que “estase a facer unha lei máis eficaz e eficiente, evitando cargas administrativas innecesarias ou accesorias, o que supón a racionalización dos recursos públicos asociados á tramitación dos procedementos administrativos relacionados coas mesmas”.
Así, engadiu que “para evitar unha duplicidade de procedementos, a nova lei contempla que a tramitación do propio instrumento de ordenación do territorio determine a modificación do planeamento urbanístico directamente, sen necesidade de volver a tramitar un novo procedemento coa única finalidade de contemplar expresamente tal modificación que, de facto, xa prevalece”.
