Santiago, 16 de decembro de 2019.- O Grupo Popular insistirá no Pleno de mañá que o Goberno central abone a Galicia a débeda de 200 millóns de euros da mensualidade do IVE de 2017 e os 170 millóns de euros das compensacións por ser unha comunidade cumpridora nos obxectivos de sustentabilidade financeira.
“O obxectivo é claramente económico, pero tamén vai servir para que vexamos onde estamos todos politicamente e se hai algunha forza política que segue defendendo que estamos facendo un teatrillo e non preocupándonos polo bo funcionamento dos servizos públicos en Galicia e polo encadre final do exercicio 2019”, sinalou o portavoz popular, Pedro Puy.
A xornada no Parlamento de Galicia de mañá estará protagonizada pola celebración dun Pleno específico para a aprobación dos orzamentos da Xunta para 2020, co que Galicia será a segunda comunidade autónoma española en ter aprobadas as súas contas públicas para o vindeiro ano. “Este feito da máis estabilidade, certidume e confianza tanto aos operadores económicos como ao conxunto da sociedade que a alternativa, como é a situación na que se atopan outras administracións e nomeadamente a Administración xeral do Estado”, indicou.
A continuación, terá lugar o Pleno ordinario, no que tamén se debaterán para a súa aprobación os proxectos de Lei de medidas fiscais e administrativas, e de regulación do aproveitamento lúdico das augas termais de Galicia. Respecto do primeiro, Puy lembrou que recolle medidas que permitirán a práctica eliminación do imposto de sucesións, facilita a sucesión de empresas familiares; promove a adquisición de vivendas en zonas pouco poboadas coa menor tributación de España; implanta unha dedución verde para favorecer a eficiencia enerxética dos fogares; crea 22 novas escalas de persoal funcionario, para facer efectivo o proceso de funcionarización voluntario do persoal laboral fixo; facilita o coñecemento e o control da actividade desenvolvida polas vivendas de uso turístico; e blinda a limitación no número de autorizacións de instalacións de salóns de xogo, salas de bingos e tendas de apostas.
Respecto do proxecto de lei de regulación do aproveitamento lúdico das augas termais de Galicia, Puy manifestou que o seu obxectivo é “potenciar o uso lúdico destas augas como fonte de riqueza, garantindo tanto a salubridade como a sustentabilidade do recurso”.
SITUACIÓN COMPLICADA
Pedro Puy salientou que “o Grupo Popular defenderá nesta sesión plenaria dúas proposicións non de lei de grande relevancia para Galicia a curto e medio prazo”. A primeira ten que ver cos recursos das contas públicas e lembrou que “a Xunta leva meses reivindicando e avisando dos problemas que se poderían xerar polo incumprimento do pago dos cartos que o Estado recadou e que, de acordo co sistema de financiamento, lle corresponden a Galicia”.
Neste sentido, dixo que “menos da metade dese problema xa se arranxou co anuncio do pago das entregas a conta, pero aínda quedan pendentes os 200 millóns de euros da mensualidade do IVE correspondente a 2017 e os 170 millóns de euros de dous anos por ter sido unha comunidade cumpridora nos obxectivos de sustentabilidade financeira, que xa está recollida nos orzamentos”.
“Estamos nunha situación complicada, non tanto como outras comunidades autónomas, e a Xunta está a ter tensións financeiras e o peche do exercicio se pode complicar se non se transfiren eses 200 millóns de euros antes de que remate o ano”, manifestou Pedro Puy, quen salientou que o Goberno galego foi “proactivo ao respecto porque, do mesmo xeito que fixera coas entregas a conta, ten presentado distintas alternativas ao Goberno do Estado para facer efectivo este pago e evitarlles problemas ás comunidades autónomas”.
Respecto da segunda proposición non de lei do Grupo Popular, Puy concretou que demanda para que o Ministerio de Fomento elabore un Plan Director de transporte de mercadorías para o noroeste peninsular que desenvolva unha rede ferroviaria de calidade e acorde cos requisitos establecidos para a Rede Transeuropea de Transporte.
“A conexión con esta rede europea da unha saída importante ás industrias e aos portos galegos, e o que fai falta é ir desenvolvemento un Plan estratéxico de transporte de mercadorías”, sinalou. Deste xeito, sinalou que “pedimos ao Goberno de España que se implique e non pasen os prazos para que esta obra participe do cofinanciamento comunitario”.
COMPARECENCIA POLAS PEAXES DA AP-9
Así mesmo, o portavoz popular anunciou que o Goberno galego ten previsto solicitar a comparecencia en comisión parlamentaria para explicar a proposta que trasladou ao Goberno central para reducir a peaxe da AP-9. “Entendemos que é necesario convocar canto antes unha comisión conxunta desta autoestrada e poñer freo a esa suba abusiva das peaxes prevista para o 1 de xaneiro, que está a introducir novos elementos de desequilibrio territorial coa eliminación de peaxes noutras autoestradas nacionais”, sinalou.
