1 de decembro de 2022. A viceportavoz do Grupo Popular, Paula Prado, lamentou hoxe no Pleno do Parlamento galego que BNG e PSdeG rexeitaran unha proposta de declaración institucional a través da que se amosa o desacordo coas consecuencias nefastas que a Lei Orgánica de garantía integral da Liberdade sexual está a producir na redución de penas aos condenados por delitos de natureza sexual, ao tempo que se reafirma o compromiso para seguir traballando a favor da igualdade real e efectiva, en defensa dos dereitos das mulleres e para a erradicación das desigualdades.
Paula Prado comezou a súa intervención lamentando “o novo caso coñecido hoxe dun condenado por agresión sexual en Vigo que quedou en liberdade ao aplicar a Audiencia Provincial de Pontevedra a Lei do sólo si é si”. “Queremos trasladar desde o Parlamento galego o noso agarimo para esta nova vítima que sinte que o sistema non a ten defendido, nin antes nin despois”, manifestou.
CONDENA DAS AFIRMACIÓNS DA MINISTRA
Así mesmo, lamentou que as voceiras de Igualdade de BNG e PSdeG que interviñeron hoxe no Pleno do Parlamento galego “rexeitaran condenar as gravísimas acusacións realizadas onte pola ministra de Igualdade contra os membros do PP, afirmando que promovemos a cultura da violación”. “Tiveron unha magnífica oportunidade de demostrar que non practican o feminismo selectivo, porque creemos de xustiza que se condenen esas graves acusacións da ministra”, sinalou.
O texto da declaración institucional proposta polo Grupo Popular e rexeitada por BNG e PSdeG é o seguinte:
“Declaración institucional en relación ás consecuencias da entrada en vigor da Ley Orgánica 10/2022 de garantía integral de la libertad sexual
O pasado 7 de outubro entrou en vigor a Ley Orgánica 10/2022 de garantía integral de la libertad sexual, denominada coloquialmente a lei do “solo sí es sí”. A nova tipificación dos delitos sexuais que introduce a nova regulación penal supuxo unha revisión á baixa das condenas que establecen as sentenzas dalgúns condenados por este tipo de delitos sexuais, tendo en conta que a aplicación da norma máis favorable constitúe un principio básico do Dereito Penal, derivado do artigo 9.3 da Constitución Española e do artigo 2.2 do Código Penal.
O Consello Xeral do Poder Xudicial (CXPX), en febreiro do ano 2021, xa advertiu do que ocorrería no seu informe sobre a lei e sinalou que o cadro penolóxico previsto para os delitos de agresións sexuais supoñía unha redución do límite máximo dalgunhas penas; e concluía que a redución dos límites máximos das penas comportaría a revisión daquelas condenas nas que se tiveran imposto as penas máximas conforme á lexislación vixente.
O Ministerio de Igualdade e o Consello de Ministros non atenderon as advertencias das consecuencias indesexables da denominada lei do solo sí es sí e desde a súa entrada en vigor, e despois de máis de cen sentencias revisadas polos xuíces en España, xa teñen transcendido cando menos 39 casos nos que se ten rebaixado a pena dos agresores. Tres delas en Galicia, con consecuencias demoledoras, como son os casos de Cambre e Ourense, cunha redución da pena en dous anos e outra que rematou coa posta en liberdade dun individuo que intentou violar a unha moza en Xinzo de Limia no 2016. Hoxe hai un violador máis na rúas de Galicia e unha vítima que observa con estupor como unha lei que pretendía protexer ás mulleres se convirte nun salvoconduto para saír de prisión do seu agresor sexual.
É por isto que o Parlamento de Galicia acorda manifestar:
1.- O Parlamento de Galicia reafírmase na súa defensa de separación de poderes e no respecto á independencia do poder xudicial, piar fundamental do Estado de dereito consagrado na vixente Constitución de 1978, e recollendo o sentir maioritario da sociedade galega mostra o seu desacordo coas consecuencias nefastas que a L.O. 10/2022 de garantía integral de la libertad sexual está a producir na redución de penas aos condenados por delitos de natureza sexual.
2.- O Parlamento de Galicia traslada o seu apoio e solidariedade ás vítimas destes delitos contra a liberdade sexual que están sufrindo polas consecuencias nefastas da denominada lei do solo sí es sí.
3.- O Parlamento de Galicia mostra a súa comprensión coa decepción e a indignación das mulleres e de toda a cidadanía polas infames consecuencias desta lei.
4.- O Parlamento de Galicia reafirma o seu compromiso para seguir traballando a favor da igualdade real e efectiva, en defensa dos dereitos das mulleres, e para a erradicación das desigualdades e de calquera forma de violencia de que se exerza contra elas.
