Os populares presentarán iniciativas en todos os municipios para buscar apoio institucional contra a turismofobia que pretende importar o Bloque 

O número dous do PPdeG, Miguel Tellado, avanzou que o seu partido presentará iniciativas nos 313 municipios de Galicia para que todos os concelleiros se posicionen e digan se están do lado do Xacobeo ou do lado do BNG de Ana Pontón, que iniciou unha campaña que pedía rachar cun fenómeno cultural e turístico con máis de once séculos de historia e que, ademais, supón unha táboa de salvación para os sectores que máis sufriron as consecuencias da pandemia.

Deste modo, os populares buscan atopar nas administracións locais o apoio institucional que non encontran na segunda forza política no Parlamento, dando a oportunidade aos concelleiros nacionalistas de aclararlle a Pontón que “unha cousa é xogar a ser independentistas e falar da autodeterminación de Galicia e outra é poñer en risco o pan de milleiros de familias galegas”.

“O Xacobeo é algo noso, algo único e propio de Galicia”, sinalou o secretario xeral admitindo que, cando alguén ataca á Comunidade Autónoma, o PPdeG ten a obriga de responder.

A TURISMOFOBIA DO BNG

Cómpre lembrar que a campaña “Rachemos co Xacobeo” foi un exemplo máis da radicalización do Bloque Nacionalista Galego, pretendendo importar de fóra unha turismofobia que non se corresponde coa realidade da nosa terra, que desfruta dun modelo turístico tranquilo e non masificado.

Así mesmo, os nacionalistas puxeron en dúbida con esta iniciativa a profesionalidade e o traballo de milleiros de hostaleiros da Comunidade, ademais de atacar directamente o prestixio da marca Galicia e a imaxe do noso país en todo o mundo.