Santiago, 9 de marzo de 2021.- O deputado do Grupo Popular Diego Calvo saudou hoxe no Pleno que o BNG “recuara e aceptara manter o consenso acadado no Congreso respecto da continuidade do emprego para os traballadores da central térmica de As Pontes”.
“Nós seguimos defendendo a unión de todos os partidos políticos na procura do mantemento dos postos de traballo e a súa continuidade a través do traballo con biocombustibles, o que posibilitaría tamén o mantemento do emprego para as empresas auxiliares e os transportistas”, sinalou.
Diego Calvo acusou aos nacionalistas de utilizar o Parlamento para intentar rachar os acordos conseguidos no Congreso co respaldo de todos os grupos. “Menos dun mes tardan vostedes en querer botar por terra o acordo asinado no Congreso, pois trouxeron aquí unha proposta distinta á que presentaron en Madrid e iso só ten un nome: enganar”, criticou Calvo, que insistiu en que “unha vez máis, o BNG sácase a careta e demostra que seguen a ser os de sempre, os que buscan a ruptura e a confrontación sen máis obxectivo que os seus intereses partidistas”. “Vostedes, está claro, non son xente de fiar”, lamentou.
O PPdeG defendeu en todo momento que se condicione o peche da central térmica a lograr un acordo cos traballadores e traballadoras que garanta a continuidade do emprego, así como a asignación de novas instalacións de produción de enerxías renovables en As Pontes no marco dun proxecto de desenrolo económico e un plan industrial para a súa execución.
De igual modo, Diego Calvo apelou a que se inste á Xunta a dirixirse ao Goberno de España para garantir a implementación de novos proxectos industriais na comarca que emanen dos convenios de transición xusta e dos plans Futur-E de Endesa e para ofrecer á central unha solución de continuidade industrial tanto para os traballadores da empresa principal como para os das auxiliares e os camioneiros.
“Para o Grupo Popular, é urxente a convocatoria da Mesa de Traballo para a transición enerxética xusta para As Pontes, así como demandar a implicación do Goberno e da Xunta no apoio aos proxectos de reindustrialización que poidan implantarse en As Pontes grazas aos fondos Next Generation”, defendeu o deputado popular.
TRANSICIÓN ENERXÉTICA
Neste aspecto, Calvo botoulle en cara ao BNG que acuda ao Parlamento Galego a tentar lavar a súa conciencia, “pois durante moito tempo foron os primeiros en urxir o peche da central sen ter en conta a realidade das Pontes, das súas xentes e de toda unha comarca”. Neste sentido, criticou que “agora queiran enviar aos traballadores a unha nova reconversión e convertelos en investigadores dun hipotético centro de transformación de enerxía que está, polo de agora, só nas súas mentes”.
Ademais, criticou que o BNG non presentara ningunha proposta nin opinara sobre os proxectos presentados na comisión de reactivación convocada no Parlamento galego, “para vir agora a defender o que xa é indefendible porque, grazas entre outros a vostedes, Endesa decidiu pechar a central da que viven milleiros de familias”.
“A situación que se está a vivir en As Pontes é dramática por culpa da política de transición enerxética acelerada e inxusta imposta polo PSOE en consonancia co BNG”, asegurou Calvo, que aproveitou para tender a man aos partidos da oposición para “traballar xuntos en prorrogar a vida da planta co uso de biocombustibles e apoiar a elaboración do convenio de transición xusta para As Pontes”.
Finalmente, animou aos nacionalistas “a poñerse dunha vez de lado dos galegos, deixando aparte as ideoloxías” e tamén a rachar os pactos de goberno que manteñen en concellos e deputacións co partido socialista. “Está claro que non cumpren con vostedes… nin cos acordos de investidura sobre a autopista nin agora co sector industrial galego”, apuntou Calvo, que rematou dicindo: “Se apoian as súas políticas e apoian os seus gobernos, vostedes son tan culpables como eles na falta de apoio do Goberno Central a Galicia”.
