Santiago, 6 de novembro de 2017.- O portavoz do Grupo Popular, Pedro Puy, salientou hoxe o protagonismo que terá a vaga de incendios forestais do pasado mes de outubro no Pleno que se celebra esta semana. Neste sentido, destacou a “axilidade e rapidez coa que se está a actuar no Parlamento, aberto aos problemas que poden xurdir, e a rapidez de resposta da Xunta ante os problemas da cidadanía, poñendo a disposición dos afectados axudas por 21 millóns de euros”.
Pedro Puy lembrou que a sesión plenaria iniciarase mañá co debate de totalidade do proxecto de Lei de espectáculos públicos e actividades recreativas, “a primeira norma autonómica que establece unha regulación global deste asunto e que dotará dunha maior seguridade tanto os grandes eventos como as verbenas populares”.
AXUDAS HABILITADAS
O Pleno estará protagonizado polos incendios forestais, xa que, ademais da comparecencia, a petición propia e a solicitude dos tres grupos da oposición, do Presidente da Xunta, se suman outra pregunta de En Marea ao Presidente galego sobre este tema; tres interpelacións e unha pregunta á conselleira do Medio Rural sobre os lumes; catro das seis proposicións non de lei da oposición son sobre este asunto; e tamén se debaterá unha moción sobre a elaboración do novo Plan Forestal.
Pedro Puy salientou a “axilidade e rapidez” do Parlamento por incorporar ao debate os problemas que poden xurdir, así como a “rapidez de resposta da Xunta na posta a disposición dos afectados de axudas por importe de 21 millóns de euros para a reparación dos danos ocasionados pola vaga de lumes, agrupando nunha soa orde tódalas subvencións dos distintos departamentos autonómicos do Goberno galego”.
Así mesmo, indicou que o propio Goberno central xa avanzou un paquete de medidas para os afectados polos incendios e incluso algunha deputación, como a de Ourense, tamén ten reaccionado ante este problema coa celebración dun Pleno e a adopción dun acordo con medidas para os afectados polos incendios forestais e para coordinar cos alcaldes as medidas para a reparación de danos.
“Confiamos que, dado que todas as administracións teñen que colaborar dentro do seu ámbito competencial na axuda ao restablecemento dos danos e do mesmo xeito que o Estado, o Goberno galego e a Deputación de Ourense están xa a actuar as demais deputacións provinciais se sumen e se coordinen neste traballo”, indicou.
REMATE COMPARECENCIAS DE ORZAMENTOS
O portavoz popular referiuse, ademais, á tramitación parlamentaria dos orzamentos da Xunta para 2018 e indicou que hoxe rematan as comparecencias dos responsables da administración, que darán paso á celebración do Pleno de totalidade o vindeiro 20 de novembro e a posterior debate en comisión e ponencia das contas públicas.
Puy manifestou que “todas as comparecencias se axustaron á normalidade, salvo pola incidencia da inasistencia dos presidentes das deputacións de Pontevedra e Lugo, que racharon acordo que viña do ano 2007”. Neste sentido, cualificou de “sorprendente” esta ausencia “unha vez que hai un acordo sobre a importancia da coordinación entre as deputacións e a Xunta para determinados aspectos, e parece que imos dez anos cara atrás con argumentos que parecían superados”.
