24 de abril de 2023. O portavoz do Grupo Popular, Pedro Puy, lamentou hoxe a situación na que se atopa o servizo de atención ao público da Seguridade Social, polo que lembrou que este grupo parlamentario pedirá no Pleno que o Goberno central adopte as medidas oportunas para facilitar unha atención correcta, sobre todo ás persoas maiores.
Así mesmo, pedirase a implicación do Goberno de Pedro Sánchez no Pacto de Estado por Ferrol, que a día de hoxe só está executado na parte que corresponde á Xunta de Galicia.
Dentro da orde do día do Pleno desta semana, Puy lembrou que o Grupo Popular demandará ao Goberno de Pedro Sánchez que adopte as medidas de reforzo necesarias para, de xeito inmediato, acabar caos deficiencias existentes nos servizos de atención á cidadanía da Seguridade Social. Esta situación “está a xerar moito malestar entre os cidadáns, porque se producen importantes dilacións na resolución de moitos expedientes de prestacións públicas”, dixo.
“É o momento de chamar a atención sobre as deficiencias existentes neste servizo para que funcione correctamente”, manifestou o portavoz popular, quen puxo de manifesto que a Xunta a Xunta xa habilitou un protocolo específico para a atención xeral e preferente das persoas maiores de 65 anos, facilitando unha atención máis personalizada e impulsando a súa independencia
REACTIVACIÓN DA COMARCA DE FERROLTERRA
Unha segunda proposición non de lei do Grupo Popular ten como obxectivo avanzar na execución do Pacto de Estado por Ferrol, un proxecto que propuxo a Xunta hai dous anos dirixido á reactivación económica e social desta cidade, e de toda a comarca, protexendo o emprego e o tecido industrial a través da modernización e mellora dos sectores tradicionais.
Pedro Puy manifestou que a Xunta “está a desenvolver as iniciativas da súa competencia”, pero lamentou a falta de resposta desde o Goberno central ás actuacións que lle competen. Así, incidiu na importancia da construción do dique seco para consolidar o naval de Ferrol, ao tempo que referiuse á necesaria mellora das infraestruturas de comunicación nesta comarca, principalmente a conexión da liña A Coruña-Ferrol co corredor atlántico ferroviario e a mellora da liña Ferrol-Ribadeo.
Pedro Puy lembrou que na sesión plenaria que se celebra esta semana terá lugar a comparecencia, a petición propia, do conselleiro de Facenda para informar do desempeño fiscal do Goberno galego no ano 2022, “unha comparecencia habitual para explicar a xestión dos orzamentos do pasado ano”.
Neste sentido, destacou a redución do ratio de débeda pública/PIB, unha boa noticia “tendo en conta todo o que se está a anunciar desde a Unión Europea en relación á recuperación da estabilidade financeira xa a partir do vindeiro ano”.
PERDA PODER ADQUISITIVO
Cuestionado polas mobilizacións sociais en demanda de melloras salariais, Pedro Puy sinalou que “toda a sociedade está a ver como as súas rendas se ven afectadas pola perda de poder adquisitivo”, ante o que lamentou que o Goberno de Pedro Sánchez “decidira non facer un pacto de rendas para que toda a poboación se acomodase aos ritmos da inflación na perspectiva de recuperar poder adquisitivo”.
Diante desta situación, considerou que “tanto empresarios como sindicatos son razoables para saber que efectos pode ter tanto a conflitividade como non pactar unhas subas que impidan un efecto de segunda ronda do proceso inflacionario”
Para rematar, explicou que as perdas de poder adquisitivo tamén se producen pola vía do incremento da recadación do IRPF por parte do Estado. Neste sentido, salientou que a Xunta “deflactou a parte da tarifa que lle corresponde, polo que sería bo que o Estado non se aproveitase en termos de recadación de toda a progresividade en frío que xeran as subas salariais para adaptarse á inflación, e que provocan que a presión fiscal no IRPF suba máis que proporcionalmente .
