Os populares presentarán unha Proposición non de Lei no Parlamento e mocións nos diferentes concellos
A secretaria xeral do PPdeG, Paula Prado, avanzou que os populares instarán ao Goberno central e ao PSdeG a reverter o agravio que supón para a Galicia rural o novo mapa concesional das liñas de autobús estatais, un “auténtico despropósito” que deixa a máis de 136.000 galegos sen parada de autobús. Para que a “desconexión” de Pedro Sánchez non sexa unha realidade, o partido presentará unha Proposición non de Lei no Parlamento e mocións nos diferentes concellos.
Tras manter unha xuntanza con representantes políticos nalgúns dos municipios afectados por esta decisión -en total son 23 os prexudicados- á que asistiron o alcalde de Palas de Rei, Pablo Taboada, a tenente de alcalde de Lalín, Paz Asorey, e os portavoces do PP en Arzúa, Melide, Silleda e Allariz, Rafael Rivadulla, Dalia Couso, Ignacio Maril e Luz Doporto; Prado lamentou que a actitude de Sánchez afonde no abandono do rural, eliminando paradas, suprimindo tráficos internos dentro da Comunidade e promovendo transbordos nas viaxes de longa distancia.
Ante o novo mapa de transporte estatal, a secretaria xeral preguntouse se o Goberno “ao que se lle enche a boca falando da España despoboada”, critica a pouca poboación ou a baixa demanda: “Non será que son Sánchez e os seus ministros os que están despoboando España?”. Como indicou, as decisións do Executivo parecen querer illar a nosa Comunidade pois, a menos de medio ano da chegada do AVE a Ourense, o resto de cidades aínda agardan pola alta velocidade, seguimos á espera dos anunciados trens Avril “e esta semana volvemos constatar que que o PSOE e Pedro Sánchez seguen desconectados dos galegos”.
Ademais, ao mapa concesional súmase á Lei de Mobilidade que impulsa o Executivo central e que supón suprimir os trens rexionais galegos. “O Goberno prima a planificación urbana e metropolitana, e a rendibilidade económica da mobilidade, condenando ao rural a unha perda radical de servizos e de conectividade en transporte público”, engadiu.
Segundo admitiu, resulta curioso que nunha cuestión que se basea en conectar a vida das persoas e que canto máis precisamos a vertebración territorial, o Goberno de Sánchez opte por desconectar a Galicia, por poñer a marcha atrás e que borre do mapa 23 paradas claves para os galegos.
A XUNTA EXERCE AS SÚAS COMPETENCIAS
Fronte a iso, Prado resaltou que a Xunta si é consciente da realidade da nosa Autonomía, onde xa completou a renovación e modernización do transporte, recordando que en 2020 puxo en marcha 127 concesións do Plan de Transporte Público en Galicia, o que permitiu mellorar o autobús interurbano en todos os seus ámbitos.
A día de hoxe, o número de liñas incrementouse das 927 ás 2.492 actuais, case o cuádruplo; chegamos xa a 54.419 paradas, cerca do triplo; e a cifra anual de servizos duplicouse ata 2,4 millóns. Igualmente, continúan avanzando os beneficios como a extensión da gratuidade do transporte público de titularidade da Xunta aos menores de 21 anos nas súas viaxes por todo o territorio.
“Queda claro que cando Galicia exerce as súas competencias, neste caso co transporte público, esas competencias funcionan mellor”, dixo afeando que un Estado desvirtuado como o que está creando o Goberno de España desmerece todas as súas funcións.
GALICIA DEBE XESTIONAR A SÚA COSTA
Durante a súa intervención, a secretaria xeral tamén se referiu ao rexeitamento do Goberno central para ceder as competencias na xestión das costas galegas: “A nosa demanda de que Galicia asuma de forma integral a xestión sobre o seu litoral é totalmente lexítima e pretende completar o traspaso de competencias iniciado en materia de costas no ano 1985. Fronte a non continuado desde Madrid, esta vez coa escusa da necesidade da modificación do Estatuto, nós dicimos si, e facémolo con respaldo xurídico”.
Sobre isto, apuntou que a Lei de Costas estatal sinala que, nesta materia, as Comunidades exercerán as competencias atribuídas polos seus estatutos. Así, mentres Andalucía e Cataluña xa teñen transferida por parte do Estado a función de xestión do dominio público, Galicia aínda non, malia que se pode realizar o traspaso da función de outorgar as concesións no litoral por Real Decreto, sen necesidade de reformar o Estatuto.
“Que sentido ten xestionar a costa galega desde un despacho de Madrid? Non é certo que é a Administración galega a que coñece máis de preto os intereses do seu litoral e das súas empresas?”, manifestou recoñecendo que seguirán reclamando o traspaso das competencias pendentes e así llelo trasladará o presidente Rueda aos portavoces da oposición o vindeiro luns.
“Agardamos, ao igual que noutras cuestións, unha postura de país. Débese acabar co non por resposta por parte do PSdeG e do BNG”, subliñou ao tempo que aseguraba que os populares non queren 313 agravios, nin no transporte público, nin na xestión do litoral, nin en ningunha cuestión de relevancia para a nosa Comunidade: “Queremos cumprir cos nosos 313 obxectivos e facelo cun proxecto común”.
