Santiago, 26 de setembro de 2022.-  O portavoz do Grupo Popular, Pedro Puy, cualificou hoxe de “decisión valente, que engade transparencia á xestión do Goberno galego e que vai permitir á oposición ter un avance das liñas dos orzamentos da Xunta para 2023 que virán ao Parlamento galego na data habitual” a comparecencia do Presidente da Xunta, Alfonso Rueda, mañá no Pleno da Cámara galega. Neste sentido, Puy manifestou que BNG e PSdeG “perden toda credibilidade cando critican á Xunta tanto cando comparece no Pleno como cando non o fai”.

Pedro Puy marcou a comparecencia do Presidente da Xunta como “algo novidoso”, xa que é a primeira vez que vén ao Parlamento galego a informar das liñas xerais dos orzamentos entre a aprobación do teito de gasto e a remisión das contas á Cámara unha vez aprobadas polo Goberno galego. Neste sentido, apuntou que a comparecencia “terá unha perspectiva máis política que contable” e lembrou que o propio Presidente xa ten avanzado algunhas cuestións das que abundará na súa intervención de mañá.

En concreto, apuntou que “hai unha política de ingresos que tende a deixar recursos, nun momento de inflación, nas mans das familias, cunha rebaixa progresiva dos tramos máis baixos do imposto á renda e a continuidade na senda de reducir o imposto sobre o patrimonio”, “Pero tamén hai anuncios polo lado do gasto, como a deflactación de boa parte das prestacións que a Xunta da ás persoas que máis o precisan, co que se vai incrementar a solidariedade e a equidade do sistema”.

PESCA DE FONDO

O Pleno tamén inclúe a comparecencia da conselleira do Mar para dar conta dos retos aos que se enfronta o sector do mar logo das últimas decisións da Comisión Europea respecto da pesca de fondo. Neste sentido, Pedro Puy indicou que na sesión plenaria debaterase unha proposición non de lei do Grupo Popular co obxectivo de rexeitar esta decisión da Comisión Europea, que excede o marco do regulamento no que se ampara. “Consideramos que se a Comisión Europea non rectifica, o Goberno central debería recorrer a súa entrada en vigor e solicitar a suspensión temporal”, dixo.

A orde do día da sesión plenaria tamén incorpora o debate de dous proxectos de lei “relevantes”. En primeiro lugar, debaterase se procede ou non á tramitación por lectura única do proxecto de Lei de medidas extraordinarias dirixidas a impulsar a provisión de postos de difícil cobertura no ámbito sanitario, sobre todo en medicina de familia, hospitais comarcais ou saúde mental.

“A decisión de optar por este tipo de tramitación responde á necesidade de dar resposta, canto antes, ás necesidades organizativas actuais ante o incumprimento dos compromisos de reforma da lexislación estatal”, manifestou Pedro Puy.

En segundo lugar, procederase ao debate para a aprobación definitiva do proxecto de Lei de áreas empresariais de Galicia, “que combina o respecto ao desenvolvemento territorial sustentable co fomento da actividade económica na Comunidade galega, axilizando e flexibilizando a planificación e creación de solo para as empresas”.

Para rematar, Pedro Puy referiuse á proposición non de lei do Grupo Popular que demanda ao Goberno de España que acelere o proceso de elaboración e publicación de normas que regulen a indicación, uso e autorización de dispensación de medicamentos e produtos sanitarios de uso humano por parte dos enfermeiros para doentes con patoloxías crónicas.

“Esta medida suporía un avance beneficioso para o conxunto deste nivel asistencial, pois potenciaría as capacidades da enfermería e, ao mesmo tempo, optimizaría as axendas do persoal médico, reservando a súa actuación para aqueles casos nos que a súa participación achegue máis valor engadido”, indicou o portavoz popular.