As Contas de 2022 amosan que hai outra forma de facer política sen aumentar a débeda, apoiando a familias e traballadores e blindando os servizos públicos
O secretario xeral do PPdeG, Miguel Tellado, contrapuxo o modelo de Pedro Sánchez, o do despilfarro, da débeda, dos impostos, pensado para manter ao Goberno máis caro da nosa historia e pagar a independentistas e radicais o seu apoio ao presidente socialista; co galego, o da responsabilidade e da boa xestión, que busca apoiar ás familias e aos traballadores reducindo as súas cargas, que non hipoteca o noso futuro aumentando a débeda e que blinda os servizos públicos e as políticas sociais. “Os galegos teñen moi claro que modelo prefiren”, aclarou.
Así se expresaba nunha rolda de prensa na que salientaba que os Orzamentos da Xunta para 2022 foron presentados en tempo e forma, incidindo en que o Executivo galego, malia o difícil momento que atravesou co repentino falecemento de Valeriano Martínez, non parou e seguiu funcionando ao máximo rendemento para cumprir os prazos. “Isto dá mostra do bo funcionamento das institucións galegas, da súa saúde democrática e dun Goberno perfectamente engraxado que funciona ao máximo nivel”, indicou.
OUTRA FORMA DE FACER POLÍTICA EN ESPAÑA
Máis polo miúdo, afirmou que os Presupostos galegos para o vindeiro ano son os mellores posibles para os momentos que estamos a vivir por tres razóns. A primeira delas é que demostran que hai outra forma de facer política no noso país: “Fronte a un Goberno central en constante expansión, unha maquinaria electoral insaciable que se sustenta a base de subir máis e máis os impostos; en Galicia presentáronse unhas Contas equilibradas, realistas e responsables, centradas na saída da pandemia e na reactivación da nosa económica, que non hipotecan o noso futuro e reducen os xuros da débeda a mínimos históricos”.
Nese senso, destacou que a Xunta segue con esa política responsable que logrou que na última década a nosa Autonomía pasase de estar entre as cinco Comunidades máis endebedadas a entrar no ránking dos tres territorios máis saneados de España.
REDUCIR AS CARGAS DAS FAMILIAS E TRABALLADORES
O número dous dos populares galegos tamén resaltou que non pode existir recuperación se seguen aumentando as cargas fiscais que teñen que soportar os traballadores e as familias.
Por este motivo, o Goberno galego consolida nestas Contas todas as baixadas de impostos que leva implementando durante a década e vai máis alá reducindo o tramo autonómico do IPRF para as rendas medias e baixas -o que beneficiará ao 90% dos contribuíntes-, diminuíndo o Imposto de Transmisión Patrimoniais, bonificando o Imposto de Patrimonio e mantendo nos mínimos o Imposto de Sucesións e os plans de alivio fiscal como os Impostos Cero no Rural.
BLINDAR O GASTO SOCIAL
Así mesmo, Tellado puxo en valor que estes son os Orzamentos máis altos da nosa historia e os que inclúen o maior gasto social, lembrando que as Contas galegas e o investimento da Xunta en políticas sociais non deixaron de crecer nos últimos anos.
“O compromiso do Goberno galego co mantemento e mellora dos servizos públicos é absoluto”, dixo explicando que os Presupostos consagran 7 de cada 10 euros a gasto social, blindan as infraestruturas sanitarias, reforzan os centros educativos e a financiación universitaria e sustentan novas medidas sociais como a gratuidade das garderías ou o novo modelo de residencias de maiores.
UNHA OPOSICIÓN EN CONTRA DE TODO
Na súa intervención, o secretario xeral lamentou a actitude dos grupos da oposición, que esta semana xa criticaban duramente os Orzamentos incluso antes de que estes entraran na Cámara e puideran analizalos, unha mostra máis de que os ían cuestionar “fosen como fosen”: “Así é a oposición en Galicia. Nunca a favor de nada e sempre en contra de todo. Non lles importa a realidade”.
Sobre isto, afeou que as queixas do resto de partidos sexan sempre as mesas -desmantelamento do público, recortes, austericidio…- parecendo discos antigos que se raian e repiten o mesmo constantemente. Fronte aos mantras da oposición, asegurou que a mellor vacina son os datos, uns que falan do maior gasto social da nosa historia, da blindaxe da Sanidade e da Educación públicas e das garderías gratuítas.
AS INXUSTAS CRÍTICAS DE PODEMOS
Por outra banda, referiuse aos ataques que unha parte do Executivo central fixo á Fundación Amancio Ortega pola súa doazón de 280 millóns de euros ao Ministerio de Sanidade para a compra de equipos de tratamento contra o cancro. Tellado recalcou que non se entenden as críticas da secretaria de Organización ou do portavoz parlamentario de Podemos que, lonxe de agradecer un xesto que vai permitir salvar vidas, dedícanse a insultar a un empresario galego.
“Instamos a Yolanda Díaz a que corrixa ou pida desculpas polas declaracións do seu partido. Non se pode aceptar e aplaudir unha doazón cunha man e atacar ao donante coa outra”, sentenciou.
